គណៈទន្តពេទ្យរាជធានីភ្នំពេញ នឹងផ្តល់ស្លាកសញ្ញាដល់សមាជិករបស់ខ្លួន ដើម្បីបង្ហាញពីភាពស្របច្បាប់នៃការបើកសេវាកម្មពិនិត្យ និងព្យាបាលធ្មេញជូនប្រជាពលរដ្ឋ។
លោក ទី មករា អគ្គលេខាធិការគណៈទន្តពេទ្យរាជធានីភ្នំពេញបានមានប្រសាសន៍ឲ្យដឹងកាលពីព្រឹកថ្ងៃព្រហស្បត៍ ទី១ វិច្ឆិកា កន្លងមកថា គណៈទន្តពេទ្យរាជធានីភ្នំពេញ ដោយមានការឧបត្ថម្ភពីក្រុមហ៊ុនខនហ្កេត កំពុងរៀបចំស្លាកសញ្ញា(Logo) ផ្តល់ដល់សមាជិករបស់ខ្លួន ដើម្បីសម្គាល់ម្ចាស់គ្លីនិកជាសមាជិក គណៈទន្តពេទ្យ និងអាចបើកធ្វើអាជីវកម្មបានដោយស្របច្បាប់។ រហូតមកទល់ពេលនេះ យើងកំពុងផ្តល់ឲ្យប្រធាន និងអនុប្រគណៈទន្តពេទ្យជាមុនៗផ្តល់ឲ្យសមាជិកដទៃទៀត។
លោកបន្តថា “គណៈទន្តពេទ្យនឹងមនផ្តល់Logo ដល់អ្នកមិនមែនសមាជិកឬជាងធ្មេញ ដែលមិនបានទទួលការបណ្តុះបណ្តាល ចេញពីសាលាពេទ្យត្រឹមត្រូវនោះទេ ”។ លោកបន្តថា “ជាងធ្មេញដែលរៀនតៗគ្នា មិនអាចចូលជាសមាជិក គណៈទន្តពេទ្យបានទ្បើយ ហើយការបើកអាជីវកម្មរបស់ពួកគាត់សព្វថ្ងៃគឺខុសច្បាប់ ព្រោះពួកគាត់មិនដឹងីវិធីធ្វើធ្មេញ និងសម្លាប់មេរោគឲ្យបានត្រឹមត្រូវទ្បើយ ”។
ទោះជាយ៉ាងណារហូតមកទល់ពេលនេះ ជាងធ្មេញដែលរៀនតៗគ្នាភាគច្រើន បានបិទអាជីវកម្មរបស់ខ្លួនភាគច្រើនហើយ ដោយសារមាននិស្សិតចេញពីសាលាពេទ្យមកបើកជាជីវកម្មច្រើន និងការយល់ដឹងរបស់ប្រជាជនកាន់តែប្រសើរជាងមុនទាក់ទងនឹងសេវានេះ។
លោក ទី មករា បានបន្តថា ការធ្វើធ្មេញជាមួយជាងធ្មេញដែលរៀនតៗគ្នាគ្មានជំនាញច្បាស់លាស់ ពិតជាគ្រោះថ្នាក់ណស់ដល់ប្រជាពលរដ្ឋនោះគឺការឆ្លងមេរោគថ្លើម មេរោគអេដស៍ និងមេរោគដទៃទៀត ប្រសិនជាពួកគេមិនបានសម្លាប់មេរោគបានត្រឹមត្រូវទេនោះ។ លោកបន្តថា ចំណែកគ្លីនិក ដែលបើកប្រកបអា ជីវកម្ម ដោយមានទន្តពេទ្យទទួលបានការបណ្តុះបណ្តាលត្រឹមត្រូវ ពីសាកលវិទ្យាល័យវិទ្យាសាស្រ្តសុខាភិបាល ពួកគេសុទ្ឋតែចេះនិងមានជំនាញពិនិត្យព្យាបាល និងដឹងពីវិធីសម្លាប់មេរោគបានត្រឹមត្រូវ។
ការសិក្សារបស់គណៈទន្តពេទ្យកម្ពុជា កាលពីឆ្នាំ២០០៩បានរកឃើញថានៅរាជធានីភ្នំពេញមានគ្លីនិកពិនិត្យព្យាបាលធ្មេញចំនួនជាង៣០០កន្លែង ប៉ុន្តែបច្ចុប្បន្នចំនួននេះបានកើនទ្បើងដោយសារមានការបើកអាជីវកម្មថ្មីៗជាបន្តបន្ទាប់។
អត្ថបទដោយ ៖ គង់ សូរិយា
ចេញផ្សាយ ៖ ថ្ងៃទី០២ ខែវិច្ឆិកា ឆ្នាំ២០១២
Leave a Reply