ជម្រាបសួរលោកវេជ្ជបណ្ឌិត! នាងខ្ញុំទើបតែសម្រាលកូនបាន២សប្ដាហ៍ ប្ដីរបស់នាងខ្ញុំចង់បានកូនមួយទៀត។ តើពេលវេលាណាទៅដែលយើងទាំងពីរនាក់អាចយកកូនបាន? សូមអរគុណលោកគ្រូ។
លោកស្រី ល. ម. ន អាយុ២៥ឆ្នាំ ខេត្ដកំពង់ចាម
វេជ្ជបណ្ឌិត លី ចេងហ៊ុយ ៖ តាមពិត ប្អូនស្រីអាចធ្លាក់មេជីវិតឬអូវុល និងអាចមានផ្ទៃពោះជាថ្មីបាននៅប៉ុន្មានតែ២ឬ៣ សប្ដាហ៍ក្រោយពេលសម្រាលតែប៉ុណ្ណោះ។ តាមលក្ខណៈវេជ្ជសាស្ដ្រ បើមានការរួមភេទប្អូនស្រីអាចមានផ្ទៃពោះបានមុនពេលដែលប្អូនស្រីមករដូវជាថ្មី ពីព្រោះថាការធ្លាក់មេជីវិតដែលអាចបង្កកំណើតបានគឺកើតមាន២សប្ដាហ៍មុនពេលមករដូវ។ ម្យ៉ាងទៀតវាទាក់ទងផងដែរទៅនឹងការបំបៅទឹកដោះកូន ការបំបៅដោះកូនអាចកាត់បន្ថយការមានផ្ទៃពោះរបស់ម្ដាយបែបធម្មជាតិ។ ការបំបៅដោះនាំឱ្យស្ដ្រីមិនមករដូវ តែវិធីសាស្ដ្រពន្យារកំណើតបែបធម្មជាតិមួយនេះមិនមានប្រសិទ្ធភាព១០០%នោះទេ។ ជាទូទៅវិធីសាស្ដ្រនេះអាចប្រើប្រាស់បានប្រសិទ្ធភាពតែករណីរយៈពេលខ្លីដែលទារកកំពុងបៅរយៈពេលក្រោម៦ខែ ការបំបៅបានទៀងទាត់មិនមានលាយការ បំបៅដោយបំពង់ទឹកដោះគោ និងស្ដ្រីមិនទាន់មករដូវនៅឡើយ។ រីឯចង្វាក់នៃការបំបៅគឺត្រូវថេររៀងរាល់៤ម៉ោងម្ដងនៅពេលថ្ងៃ និងរៀងរាល់៦ម៉ោងម្ដងនៅពេលយប់។ ទាក់ទងនឹងការដែលប្ដីប្រពន្ធរបស់ប្អូនស្រីចង់បានកូនថ្មីមួយទៀត គឺជាការសម្រេចចិត្ដដ៏សំខាន់ ប៉ុន្ដែការឆាប់យកកូនពេក ពិតជាមិនល្អនោះទេ។ ព្រោះថាប្រហែលជាប្អូនស្រីមិនទាន់បាត់ការឈឺចាប់ពេលសម្រាលផង ហើយម្យ៉ាងទៀតការមានកូនញឹកពេកគឺ ជាបន្ទុកធ្ងន់ធ្ងរសម្រាប់ប្ដីប្រពន្ធប្អូនស្រីផងដែរ។ អ្វីដែលសំខាន់ បើមិនទាន់ចង់បានកូនគឺត្រូវប្រើវិធីពន្យារកំណើតត្រឹមត្រូវពិតប្រាកដ មួយ។ តាមវេជ្ជសាស្ដ្រ ប្អូនស្រីអាចចាប់មានការរួមភេទជាមួយស្វាមីបានចាប់ពីសប្ដាហ៍ទី៦ក្រោយសម្រាល។
ដោយ ៖ វេជ្ជ. លី ចេងហ៊ុយ
ប្រភព ៖ ទស្សនាវដ្តី សុខភាពយើង លេខ៦៤ ខែឧសភា ឆ្នាំ២០១១
Leave a Reply