លោកអ្នកបានយល់ដឹងរួចមកហើយអំពីចលនាចំនួន៣៥ នៃក្បួនហាត់ប្រាណពង្រាបក្បាលពោះ នៅក្នុងទស្សនាវដ្ដី សុខភាពយើង លេខមុនៗនេះ។
ជាកិច្ចបន្ដ សូមបន្ដស្វែងយល់ និងហាត់ចលនាទី៣៦ជាបន្ដទៅទៀត។
ចលនាទី៣៦ ៖ ងើបខ្លួនដូចអាវ៉ង់
ជំហរហាត់ ៖ សូមផ្ដើមពីកាយវិការដូចសត្វជើងបួនឈរ ដោយច្រត់លើប្រអប់ដៃទាំងពីរ និងក្បាលជង្គង់ទាំងពីរ។ ជំហរហាត់ប្រហាក់ប្រហែលនឹងកាយវិការត្រៀមធ្វើចលនាអាវ៉ង់ដែរ។
របៀបហាត់ ៖ សូមចាប់ផ្ដើមបង្ហើបក្បាលជង្គង់ពីកម្រាល លើកដងខ្លួន ចង្កេះ និងភ្លៅឡើងលើ រហូតត្រឹមដងខ្លួន ជើង និង ក្បាលស្ថិតនៅលើអ័ក្សតែមួយ។ ពេលនេះទម្ងន់ខ្លួនទ្រដោយបាតដៃទាំងពីរ និងចុងប្រអប់ជើងទាំងពីរ។ សូមសម្រាកនៅកាយវិការនេះប្រមាណ២ ឬ៣វិនាទី។ បន្ទាប់មកសូមទម្លាក់ជង្គង់មករកកាយវិការ ឬជំហរហាត់ដើមវិញ។
ចំនួនហាត់ ៖ សូមធ្វើចលនានេះឱ្យបាន១០ដង។
ដំណកដង្ហើម ៖ សូមដកដង្ហើមចេញ ពេលបង្ហើបក្បាលជង្គង់ផុតពីកម្រាល។
សូមប្រុងប្រយ័ត្ន ៖ សូមកុំងើបបំបះចង្កេះអី ពោលគឺកំប៉េះគូទមិនត្រូវខ្ពស់ជាងខ្នងឡើយ ព្រោះវាអាចកាត់បន្ថយចលនា ទៅលើសាច់ដុំពោះ។ ផ្ទុយទៅវិញក៏មិនត្រូវធ្វើការអែន ឬចង្កោងចង្កេះពេកដែរ។
គោលបំណង ៖ លំហាត់នេះបង្កើនចលនាសាច់ដុំពោះ សាច់ដុំទ្រូង(ប៉ិកតូរ៉ាល់) និងសាច់ដុំទ្រីស៊ិបបានប្រសើរ។
របៀបសម្រួលសាច់ដុំ ៖ នៅចុងបញ្ចប់នៃលំហាត់នេះ សូមរក្សាជំហរប្រអប់ដៃដដែល និងសូមអង្គុយលើកែងជើងទាំងពីរ ដោយទាញដៃទៅមុខ។ សូមរមៀលឆ្អឹងខ្នង និងចង្កោងខ្នងពីឆ្អឹងកងមួយទៅមួយទៀត រហូតដល់កាយវិការអង្គុយលើកែងជើង។
បើចង់ដឹងព័ត៌មានបន្ថែម សូមស្វែងរកអានសៀវភៅ “ក្បួនហាត់ប្រាណពង្រាបក្បាលពោះ”
ដកស្រង់ ៖ សៀវភៅ “ក្បួនហាត់ប្រាណពង្រាបក្បាលពោះ” និពន្ធដោយវេជ្ជបណ្ឌិត លី ចេងហ៊ុយ បោះពុម្ពនៅខែកុម្ភៈឆ្នាំ២០០៨ ដោយទស្សនាវដ្ដី សុខភាពយើង និងក្រុមកាឡាក់ស៊ី
អត្ថបទដោយ ៖ វេជ្ជ. លី ចេងហ៊ុយ
ប្រភព ៖ ទស្សនាវដ្តី សុខភាពយើង លេខ៦៤ ខែឧសភា ឆ្នាំ២០១១
Leave a Reply