ការព្យាបាលជម្ងឺមាត់ធ្មេញជាបញ្ហាដែលលោកអ្នកឱ្យតម្លៃខ្លាំងបំផុត និងតែងតែមានការបារម្ភចំពោះសុខភាពធ្មេញនៅពេលដែលតម្រូវឱ្យមានការដក ឬការដាក់ធ្មេញ ជាពិសេសនៅពេលធ្មេញថ្គាមទាល់ដែលដុះចេញមក។ ការវះកាត់ធ្មេញថ្គាមទាល់ជាប្រធានបទសុខភាពមាត់ធ្មេញមួយដែលតែងតែបង្កើតជាចម្ងល់ដល់លោកអ្នកជាទូទៅជុំវិញបញ្ហាផលវិបាកនៃការវះកាត់ និងដកធ្មេញថ្គាមទាល់ ជាពិសេសសុវត្ថិភាពក្រោយពេលធ្វើការវះកាត់រួចរាល់ ដែលអាចផ្ដល់នូវគុណសម្បត្ដិ និងគុណវិបត្ដិក្រោយធ្វើការសម្អាតថ្គាមទាល់រួច។
ដើម្បីឱ្យយល់កាន់តែច្បាស់ ទស្សនាវដ្ដី សុខភាពយើង លេខនេះលើកយកវិធីសាស្ដ្រក្នុងការវះកាត់ធ្មេញថ្គាមទាល់មកជម្រាបជូនតាមរយៈការជួបសម្ភាសន៍ជាមួយលោកទន្ដបណ្ឌិត ញ្ញាណ ភិរម្យ អ្នកឯកទេសសុខភាពមាត់ធ្មេញ នៅមន្ទីរព្យាបាលធ្មេញ បស្ចិម។
ធ្មេញថ្គាមទាល់ជាអ្វី?
ធ្មេញថ្គាមទាល់គឺជាធ្មេញមួយរបស់មនុស្សដែលធ្វើការលូតលាស់យឺតជាគេបំផុត នេះមានន័យថាធ្មេញថ្គាមទាល់ជាធ្មេញមួយដែលដុះចេញមានរយៈពេលយូរជាងគេ ក្រោយធ្មេញទាំងអស់របស់មនុស្សដុះចេញមក។ ជួនកាលការដុះចេញរបស់វាធ្វើឱ្យធ្មេញដទៃទៀតចង្អៀតផងដែរ ដោយសារតែគ្មានកន្លែងដុះ។ មនុស្សចាប់ផ្ដើមដុះចេញនូវធ្មេញចុងក្រោយគេបង្អស់នៅពេលដែលមានអាយុគិតជាមធ្យមចន្លោះពី១៨ទៅ២៥ឆ្នាំ។ ករណីខ្លះការដុះចេញអាចមានមុន ឬក៏ក្រោយពីចន្លោះអាយុមធ្យមដែលកំណត់ជាទូទៅនេះ ជួនពេលខ្លះក៏ពុំមានការដុះចេញជាធ្មេញទាល់ក៏មាន តែក៏មិនមែនជាបញ្ហាចោទនោះទេ បើសិនជាយើងពុំមានការដុះធ្មេញនេះពិតប្រាកដមែន។
មូលហេតុនៃការវះកាត់ធ្មេញថ្គាមទាល់
នៅក្នុងរយៈពេលមធ្យមនៃការលូតលាស់របស់ធ្មេញថ្គាមទាល់ ពេលខ្លះក៏ពុំមានការដុះចេញនៃថ្គាមនេះដែរក្នុងលក្ខខណ្ឌប្រភេទនេះវាពុំមានជាបញ្ហាចោទសម្រាប់សុខភាពធ្មេញនោះទេ។ ជាធម្មតាការដុះរបស់ថ្គាមទាល់តែងតែបង្កជាបញ្ហាទៅវិញ ការដុះចេញនេះត្រូវបានគេបែងចែកជាបីប្រភេទ ដូចជាការដុះកប់ដែលមើលមិនឃើញដោយសារតែគ្មានកន្លែងដុះចេញ ការដុះចេញតែពាក់កណ្ដាលនៃថ្គាម និងការដុះចេញមកទាំងស្រុង។ ការដុះរបស់ធ្មេញទាល់អាចបង្កជាបញ្ហាផ្សេងៗដល់សុខភាពមាត់ធ្មេញ វាបណ្ដាលឱ្យមានការឈឺចាប់នៅពេលដែលការដុះចេញមកស្ថិតក្នុងស្ថានភាពចង្អៀត និងបុកសាច់អញ្ចាញធ្មេញ។ ក៏ប៉ុន្ដែការដុះចេញមកខ្លះ មិនមានការឈឺចាប់នោះទេ តែបង្កឱ្យមានការពុកធ្មេញនៅតំបន់បរិវេណដែលដុះចេញមកនោះ និងបង្កើតជាក្លិនមាត់ ដោយសារតែការពិបាកសម្អាតឱ្យអស់នូវកាកសំណល់នៅជាប់ធ្មេញ ដែលទាមទារឱ្យមានការវះកាត់ ឬក៏ដកធ្មេញថ្គាមទាល់ចេញ ដើម្បីបង្កជាការងាយស្រួលដល់ការដុសសម្អាត និងភាពទូលាយនៃធ្មេញ។
វិធីវះកាត់ធ្មេញថ្គាមទាល់
ការវះកាត់ធ្មេញទាល់អាចប្រព្រឹត្ដទៅបានលុះត្រាតែយល់ពីស្ថានភាព និងទីតាំងរបស់ធ្មេញទាល់ឱ្យច្បាស់ជាមុនសិន ជាពិសេសជាងនេះទៅទៀតការវះកាត់ត្រូវអាស្រ័យទៅលើសុខភាពអ្នកជម្ងឺនិងតាមបែបបច្ចេកទេសវះកាត់ផងដែរ។ បែបផែននៃការវះកាត់ធ្មេញថ្គាមទាល់ត្រូវធ្វើឡើងទៅតាមបទដ្ឋាននៃការវះកាត់ច្បាស់លាស់ ព្រោះថាសរសៃនៃការដឹងរបស់ធ្មេញនៅកៀកនឹងសរសៃប្រសាទអាំងតែដង់សេយើរ។ បើសិនជានៅផ្នែកខាងក្រោមតម្រូវឱ្យមានការវះកាត់ចំពោះធ្មេញថ្គាមទាល់នៅផ្នែកខាងលើ ជាទូទៅមិនបង្កជាផលវិបាកច្រើននោះទេ លោកអ្នកគ្រាន់តែទៅពិភាក្សាជាមួយគ្រូពេទ្យ ដើម្បីដកចេញតែប៉ុណ្ណោះ។ តែទោះបីជាពេលខ្លះការដុះធ្មេញទាល់របស់លោកអ្នកមានលក្ខណៈល្អក៏ដោយ លោកអ្នកគប្បីទៅពិភាក្សាជាមួយនឹងគ្រូពេទ្យជំនាញ ព្រោះធ្មេញប្រភេទនេះជាទូទៅតែងតែផ្ដល់វិបាកជាច្រើនដល់លោកអ្នក។ តែការដកចោលធ្មេញទាល់ភាគច្រើនតែងផ្ដល់នូវផលល្អដល់សុខភាពមាត់ធ្មេញ។
ផលវិបាកនៃការវះកាត់ថ្គាមទាល់
ការវះកាត់ធ្មេញថ្គាមទាល់អាចបណ្ដាលឱ្យមានការឈឺចាប់ ក៏ប៉ុន្ដែបើសិនលោកអ្នកវះកាត់ជាមួយទន្ដពេទ្យដែលមានជំនាញច្បាស់លាស់នោះ នឹងអាចកាត់បន្ថយការឈឺចាប់ក្នុងពេលធ្វើការវះកាត់បាន ជាពិសេសនឹងមិនបង្កជាផលលំបាកផ្សេងៗនៅថ្ងៃក្រោយនោះទេ។ ការវះកាត់ធ្មេញថ្គាមទាល់មិនអាចបង្កជាបញ្ហា ដូចជាការស្លាប់ ពិការភ្នែក ឬផលលំបាកផ្សេងៗនោះទេ។ តែអាចកើតមានបានបើការវះកាត់ប្រព្រឹត្ដទៅដោយគ្មានបច្ចេកទេសត្រឹមត្រូវ មិនបានពិនិត្យមុនការវះកាត់ និងកត្ដាសម្ភារៈមិនស្អាត ដែលធ្វើឱ្យជ្រៀតចូលមេរោគផ្សេងៗ តាមរយៈការប្រើប្រាស់សម្ភារៈដែលមិនមានការលាងសម្អាត ឬក៏ដុតសម្លាប់មេរោគឱ្យបានល្អ បង្កភាពងាយស្រួលដល់ជម្ងឺផ្សេងៗ និងជម្ងឺឱកាសនិយមឆ្លងចូលសារពាង្គកាយអ្នកជម្ងឺមាត់ធ្មេញពីម្នាក់ទៅម្នាក់ទៀត។
បណ្ដាំផ្ញើអ្នកឯកទេស
ក្នុងករណីដែលលោកអ្នកចង់ចៀសផុតពីបញ្ហាផ្សេងៗដែលបណ្ដាលមកពីការវះកាត់ ឬដក និងដាក់ធ្មេញ សូមធ្វើការគិតគូរ ឱ្យច្បាស់ជាមុនសិនក្នុងការជ្រើសរើសទីកន្លែងក្នុងការធ្វើការវះកាត់។ ប្រការដែលប្រសើរគួរតែស្វែងរកការពិភាក្សាជាមួយទន្ដពេទ្យ ជំនាញដែលមានជំនាញច្បាស់លាស់ជាមុនសិន ទើបជាការប្រសើរ មុននឹងធ្វើការព្យាបាលធ្មេញ ដើម្បីទទួលបានសុខភាពមាត់ធ្មេញល្អ និងពុំមានបញ្ហាក្នុងការព្យាបាលជម្ងឺមាត់ធ្មេញ។ សុខភាពមាត់ធ្មេញល្អក៏ជាកត្ដារួមចំណែកផ្ដល់នូវភាពជោគជ័យដល់ជីវិតផងដែរ សូមចៀសវាងប្រើប្រាស់សេវាកម្មព្យាបាលមាត់ធ្មេញណាដែលគ្មានគុណភាព និងធានាសុវត្ថិភាពច្បាស់លាស់។ សុខភាពល្អ គឺជាដុំពេជ្រដែលលោកអ្នកគ្រប់រូបត្រូវតែឱ្យតម្លៃមុនវត្ថុសំខាន់ៗទាំងអស់។
ប្រភព ៖ ទស្សនាវដ្តី សុខភាពយើង លេខ០៥៩ ខែធ្នូ ឆ្នាំ២០១០
Leave a Reply