គុណបំណាច់របស់ឪពុកម្ដាយមានតម្លៃដែលមិនអាចកាត់ថ្លៃបាន។ ការបម្រើអ្នកមានគុណគឺជាសម្បត្ដិដ៏ប្រពៃ និងជាអំពើដ៏ល្អប្រកបដោយគន្លងធម៌។ ដូចនេះដើម្បីជាការតបស្នងក្នុងនាមជាកូន គឺមានកាតព្វកិច្ចជាច្រើនដែលត្រូវធ្វើខ្លួនឱ្យក្លាយទៅជាបុត្រាបុត្រីមួយដែលមានភាពកត្ដញ្ញូចំពោះមាតាបិតា។
កូនគ្រប់រូបត្រូវគិតថាឪពុកម្ដាយបានចិញ្ចឹមបីបាច់ថែរក្សាតាំងពីតូចក្រូចឆ្មារ ដូចនេះជាការចាំបាច់បំផុតដែលខ្លួនត្រូវតបស្នងសងគុណបំណាច់ដ៏ធំធេងជូនលោកទាំងពីរវិញ។ ពេលនេះសូមលោកអ្នកជាកូនៗគ្រប់រូបគប្បីស្វែងយល់ចំណុចមួយចំនួនជាពិសេសអំពីកាតព្វកិច្ច និងតួនាទីជាកូនកត្ដញ្ញូ។
តួនាទីរបស់កូនប្រុសកូនស្រី
ក្នុងនាមជាកូនដែលប្រកបដោយគន្លងធម៌មួយរូប គប្បីមានភារកិច្ចដែលត្រូវតបស្នងលោកមានគុណទាំងពីរ ដែលកិច្ចការទាំងអស់នោះរួមមាន ការជួយសម្រាលការងារឪពុកម្ដាយ រក្សាកិត្ដិយស និងសភាពថ្លៃថ្នូររបស់គ្រួសារ ក្រាបសំពះ គោរពអ្នកមានគុណជាព្រះក្នុងផ្ទះ និងជាព្រះក្នុងសន្ដានចិត្ដគ្រប់ពេលវេលា ខិតខំកសាងកុសលផលបុណ្យ បំពេញតួនាទីជាកូនកត្ដញ្ញូឱ្យបានខ្ជាប់ខ្ជួន និងគប្បីធ្វើយ៉ាងណាឱ្យលោកទាំងពីរសប្បាយចិត្ដគ្រប់ពេលវេលា។
1 . ជួយសម្រួលកិច្ចការឪពុកម្ដាយ ៖ លោកអ្នកជាកូនគប្បីគិតថានឹងជួយធ្វើការងារឱ្យឪពុកម្ដាយ ដោយមិនខ្ជិលច្រអូសនោះទេ។ ភាពខ្ជិលច្រអូសជាអំពើមិនល្អ ហើយនឹងធ្វើឱ្យលោកអ្នកខាតបង់ប្រយោជន៍គ្រប់បែបយ៉ាងចំពោះខ្លួនឯង។ លោកអ្នកនឹងក្លាយជាមនុស្សមិនល្អ គ្មានភាពឧស្សាហ៍ ហើយក្លាយជាកូនមិនល្អរបស់ឪពុកម្ដាយទៀតផង។ ដូចនេះរាល់កិច្ចការងារទាំងឡាយដែលខ្លួនគិតថាអាចធ្វើទៅបានគួរមានចិត្ដល្អយកអាសាជួយសម្រួលកិច្ចការដែលអ្នកដទៃចង់ពឹងពាក់។ ការសម្រួលកិច្ចការរបស់ឪពុកម្ដាយគឺជាទង្វើដ៏ល្អមួយ ដែលលោកអ្នកអាចបំពេញកាតព្វកិច្ចជាកូនដ៏ល្អ។
2 . រក្សាកិត្ដិយសគ្រួសារ ៖ ទាំងកូនប្រុស និងកូនស្រីទាំងឡាយគប្បីដឹងថាខ្លួនត្រូវធ្វើអ្វីខ្លះដើម្បីរក្សាកិត្ដិយសគ្រួសារ និងមុខមាត់ឪពុកម្ដាយ ហើយទង្វើអ្វីខ្លះដែលមិនគួរប្រព្រឹត្ដនោះ។ ចំពោះកូនស្រីចរិយាមារយាទជារឿងសំខាន់ណាស់ កូនស្រីត្រូវធ្វើខ្លួនឱ្យមានសុជីវធម៌ សីលធម៌ ធ្វើសេចក្ដីល្អទៀងត្រង់ និងសណ្ដាប់ធ្នាប់ល្អ ព្រមទាំងការគោរពតាមប្រពៃណីទំនៀមទម្លាប់។ ការដើរហើរចេញកម្សាន្ដហួសហេតុដោយគ្មានការអនុញ្ញាតពីឪពុកម្ដាយគឺជាទង្វើមួយមិនសមរម្យសម្រាប់កូនស្រីនោះទេ។ ព្រោះការធ្វើបែបនេះនឹងមានការជះឥទ្ធិពលអាក្រក់ដោយសារការភ្លើតភ្លើនឈ្លក់វង្វេងនឹងភាពទាន់សម័យ និងធ្វើឱ្យកូនស្រីទៅក្លាយទៅជាគ្មាន ទម្លាប់ មិនស្ដាប់ដំបូន្មាន និងអាចខូចអនាគតទៀតផង។ ដូចនេះកូនស្រីត្រូវស្ដាប់ដំបូន្មានឪពុកម្ដាយ និងទទួលការអប់រំឥរិយាបថ ឱ្យបានត្រឹមត្រូវពីឪពុកម្ដាយ ដើម្បីលើកស្ទួយកិត្ដិយសគ្រួសារ និងប្រទេសជាតិ ព្រមទាំងសង្គមទាំងមូលផងដែរ។ រីឯកូនប្រុសវិញគឺជាភាពកក់ក្ដៅមួយក្នុងគ្រួសារ កូនប្រុសមួយរូបត្រូវធ្វើខ្លួនយ៉ាងណាឱ្យក្លាយទៅជាអ្នកដែលផ្ដល់ភាពកក់ក្ដៅជូនគ្រួសារបន្ទាប់ពីលោកឪពុក។ បច្ចុប្បន្នសង្គមមានភាពជឿនលឿនទៅមុខពីសម័យមួយទៅសម័យមួយ ដូចនេះការជ្រួលជ្រើមឈ្លក់វង្វេងនឹងភាពទាន់សម័យនោះកំពុងតែមានការព្រួយបារម្ភចំពោះយុវជន។ កូនប្រុសទាំងឡាយត្រូវតែគិតគូរឱ្យបានត្រឹមត្រូវ បែងចែកអ្វីដែលល្អ និងអាក្រក់ មិនត្រូវបណ្ដែតបណ្ដោយខ្លួនឱ្យជ្រុលធ្លាក់ក្នុងអំពើអបាយមុខទាំងអស់់នោះទេ។ កូនប្រុសជាសសរទ្រូងដ៏រឹងមាំសម្រាប់គ្រួសារក៏ដូចជាសង្គមជាតិផងដែរ។
3 . ទ្រព្យសម្បត្ដិនៅតែជារបស់កូន ៖ ទោះបីជាឪពុកម្ដាយមានទ្រព្យតិចក្ដីច្រើនក្ដី លោកអ្នកគ្មានអ្វីគួរឱ្យស្ដាយដែលទុកទ្រព្យសម្បត្ដិឱ្យទៅកូននោះទេ។ បើទោះបីជាអ្នកមានគុណកំណាញ់ ក៏ចំពោះអ្នកដទៃប៉ុណ្ណោះ បើសម្រាប់កូនគឺទុកឱ្យដោយចិត្ដរីករាយ និងកក់ក្ដៅជាទីបំផុត។ ដូចនេះសូមកូនប្រុសកូនស្រីគប្បីកុំធ្វើឱ្យលោកអ្នកមានគុណអស់ក្ដីសង្ឃឹម ត្រូវខិតខំធ្វើខ្លួនឱ្យរឹងប៉ឹង រក្សានូវកិត្ដិយសថ្លៃថ្នូររបស់គ្រួសារទៅជាទុកចិត្ដដល់ឪពុកម្ដាយដាច់ខាត មិនត្រូវមើលងាយទ្រព្យលោកទាំងពីរឱ្យសោះ ទោះបីជាតិចតួចក្ដីឬគ្មានតម្លៃក្ដី។ ព្រោះវាជាទ្រព្យដែលបង្កប់នូវមនោសញ្ចេតនាដ៏ជ្រាលជ្រៅប្រកបដោយព្រហ្មវិហារធម៌ អាណិត ស្រឡាញ់ និងសេចក្ដីមេត្ដាដ៏រឹងមាំ ដែលបញ្ចេញនូវកាយវិការរឹងប៉ឹង តែទឹកចិត្ដទន់ភ្លន់សណ្ដោសប្រណីដល់កូនប្រុសស្រីជានិច្ច។
4 . គោរពព្រះក្នុងផ្ទះ ៖ ការធ្វើបុណ្យដាក់បាត្រក្រាបសំពះព្រះនៅក្នុងវត្ដ គឺពិតជាសេចក្ដីល្អ អំពើល្អដែលមានចិត្ដស្មោះសរ សន្សំកុសលផលបុណ្យ ប៉ុន្ដែកូនប្រុសកូនស្រីទាំងឡាយសូមកុំភ្លេចព្រះក្នុងផ្ទះ ព្រះមានគុណដ៏ធ្ងន់គឺមាតាបិតាជាអ្នកដែលបានបង្កើតចិញ្ចឹមបីបាច់ថែរក្សាកូនទាំងពេលលំបាក និងសប្បាយរីករាយ។ ដូចនេះសូមកូនប្រុសស្រីតបស្នងគុណចិញ្ចឹមបីបាច់ថ្នាក់ថ្នមថែរក្សា របស់លោកទាំងពីរកុំឱ្យមានភាពទើសទាល់ និងក្រាបសំពះមាតាបិតាកុំអៀនខ្មាសឱ្យសោះ។
5 . ធ្វើបុណ្យទាន់ខែភ្លឺ ៖ សូមកូនប្រុសស្រីធ្វើបុណ្យឱ្យទាន់ខែភ្លឺ រស្មីបំភ្លឺគង់មានថ្ងៃណាមួយនឹងរលត់ ហើយនឹងរលត់ពេលណាគឺមិនអាចដឹងទុកជាមុនបាននោះទេ។ ការប្រព្រឹត្ដអំពើល្អសាងកុសលផលបុណ្យ ជាពិសេសការស្ដាប់ដំបូន្មានឪពុកម្ដាយជារឿងដ៏គប្បីដែលកូនទាំងឡាយគួរប្រតិបត្ដិ ព្រោះលោកទាំងពីរនឹងមានសេចក្ដីរីករាយ សប្បាយចិត្ដនៅពេលដែលកូនប្រកបដោយគន្លងធម៌ដូចនេះ។ ឪពុកម្ដាយនឹងទទួលបាននូវភាពកក់ក្ដៅជាទីបំផុត នៅពេលដែលកូនបានធ្វើអ្វីដែលឱ្យឪពុកម្ដាយសប្បាយចិត្ដរីករាយ បំពេញនូវអ្វីដែលលោកទាំងពីរចង់បានតបស្នងគុណបំណាច់ដ៏ធំធេង ចិញ្ចឹមបីបាច់ថែរក្សា ជាពិសេសមិនត្រូវធ្វើឱ្យលោកមានគុណសម្រក់ទឹកភ្នែកដោយសារកូននោះទេ។
បណ្ដាំផ្ញើ
គុណអើយគុណដ៏សែនធ្ងន់ បើទោះបីជាតបស្នងយ៉ាងណាក៏មិនអស់ដែរ។ អ្នកម្ដាយដ៏រឹងប៉ឹងមាំមួនបានខិតខំតស៊ូពពោះប្រាំបួនខែដប់ថ្ងៃ រហូតដល់ពេលសម្រាលទ្រាំឈឺចាប់ស្ទើរតែមិនចង់បាន។ តែទោះបីជាយ៉ាងណាអ្នកមានគុណនៅតែប្រឹងបង្កើតរូបកូនឱ្យបានឃើញពន្លឺព្រះអាទិត្យ និងខិតខំបីបាច់ចិញ្ចឹមថែរក្សាដើម្បីឱ្យកូនមានអនាគតទៅថ្ងៃមុខ។ ដូចនេះគុណរបស់លោកអ្នកមានគុណ ទាំងពីរពិតជាមិនអាចកាត់ថ្លៃបានឡើយ។ សូមផ្ដាំផ្ញើទៅកូនប្រុសកូនស្រីទាំងឡាយ គប្បីធ្វើយ៉ាងណាឱ្យក្លាយខ្លួនជាកូនមួយរូបដែលប្រកបដោយគន្លងធម៌ ជាកូនកត្ដញ្ញូសម្រាប់ឪពុកម្ដាយ។
ប្រភព ៖ ទស្សនាវដ្តី សុខភាពយើង លេខ០៥៩ ខែធ្នូ ឆ្នាំ២០១០
Leave a Reply