ព្រះរាជពិធីបុណ្យអុំទូក អកអំបុក សំពះព្រះខែ ត្រូវបានប្រារឰធ្វើឡើងជារៀងរាល់ឆ្នាំ នៅក្នុងកំឡុងថ្ងៃ១៤-១៥កើត និងថ្ងៃ១រោចខែកត្ដិកពុទ្ធសករាជ។ ឆ្នាំនេះព្រះរាជពិធីនេះត្រូវបានប្រារឰឡើងនៅក្នុងថ្ងៃទី២០ ទី២១ និងទី២២ ខែវិច្ឆិកា នៃគ្រឹស្ដសករាជ។ នេះជាពិធីបុណ្យប្រពៃណីជាតិមួយដែលមានការរៀបចំជាលក្ខណៈជាតិ ជាព្រឹត្ដិការណ៍ដ៏ធំសម្បើម និងមានការ សប្បាយរីករាយជាច្រើនជាមួយផ្ទាំងទស្សនីយភាពក្នុងការប្រណាំងទូក បណ្ដែតប្រទីប និងមានការបាញ់កាំជ្រួចផងដែរ។
ព្រះរាជពិធីបុណ្យអុំទូកមានអាយុកាលជាច្រើនឆ្នាំ
ព្រះរាជពិធីបុណ្យនេះជាបុណ្យប្រពៃណីជាតិខ្មែរដែលមានអាយុតាំងពីបុរាណកាលមកម្ល៉េះ ហើយព្រះរាជពិធីត្រូវបានចែងទុកក្នុងឯកសារជាតិ និងអន្ដរជាតិ ព្រមទាំងតាមសិលាចារឹកនៃប្រាសាទខ្មែរផងដែរ។ ពិធីបុណ្យអុំទូកត្រូវបានធ្វើឡើងក្នុងគោលបំណងដើម្បីរម្លឹកដល់បុព្វបុរសខ្មែរជំនាន់ដើមដែលទទួលបានជ័យជំនះលើកងទ័ពចាមក្នុងយុទ្ធសាស្ដ្រសង្គ្រាមជើងទឹក។ ពិធីនេះបានចម្រើនខ្លាំងនាសម័យអង្គរក្នុងរាជព្រះបាទជ័យវរ្ម័នទី៧ សតវត្សរ៍ទី១២ និងសម័យលង្វែកនាព.ស២០៧១ គ.ស១៥២៨។ នាពេលបច្ចុប្បន្នព្រះរាជពិធីនេះកាន់តែមានការប្រារឰពិធីដោយសេចក្ដីសោមនស្ស សប្បាយរីករាយ និងកាន់តែមានភាពអធិកអធមពីប្រជាពលរដ្ឋ និងថ្នាក់ដឹកនាំនៃព្រះរាជាណាចក្រកម្ពុជា និងអន្ដរជាតិផងដែរ។ កម្មវិធីនៃការប្រកួតប្រណាំងទូកកាន់តែមានភាពសប្បាយរីករាយ និងមានការប្រែប្រួលពីចំនួនសមាជិកដែលចូលរួមក្នុងការប្រកួតពីមួយឆ្នាំទៅមួយឆ្នាំ។
ការចូលរួមប្រកួតប្រណាំងទូក
កាលពីឆ្នាំមុនការចូលរួមប្រណាំងទូកមានចំនួន៣៨៤ទូកដែលបានប្រកួតក្នុងព្រះរាជពិធីដ៏មហោឡារិកនេះ ហើយនៅក្នុងឆ្នាំនេះវិញគឺមានចំនួនប្រហែលជា៣៨៦ទូក សរុបចំនួន១៩៣គូ និងមានអ្នកចូលរួមប្រហែលជា២៣០២០នាក់។ ទូកទាំងអស់ដែលបានចូលរួមក្នុងការប្រកួតគឺមកពីគ្រប់បណ្ដាខេត្ដក្រុងក្នុងប្រទេស ពិសេសគឺតាមបណ្ដាខេត្ដនៅជាប់ដងទន្លេមេគង្គ និងដងទន្លេសាប។ ហើយខេត្ដក្រុងដែលមានទូកច្រើនជាងគេ គឺខេត្ដកណ្ដាល កំពង់ចាម ព្រៃវែង និងខេត្ដកំពង់ឆ្នាំងជាដើម ដែលមានការចូលរួមរាប់រយទូកក្នុងមួយឆ្នាំៗ។ ចំពោះពានរង្វាន់ឆ្នាំនេះក៏មិនខុសប្លែកពីឆ្នាំមុនដែរ សម្រាប់ទូកដែលទទួលជ័យលាភី។
ការប្រែប្រួលសម្រាប់ការប្រកួត
ចំពោះបទបញ្ជានៃការប្រកួតនៅក្នុងឆ្នាំនេះគឺមិនមានអ្វីប្រែប្រួលច្រើននោះទេ។ ការប្រណាំងគូពិសេសសម្រាប់ឆ្នាំនេះ គឺនៅប្រហែលត្រឹមតែ១៥គូប៉ុណ្ណោះដូចឆ្នាំមុន។ គូពិសេសទាំងនោះគឺជាគូដែលជ្រើសរើសដោយមានការរៀបចំរបស់សម្ដេចអគ្គសេនា មហាបតីតេជោ ហ៊ុន សែន។ មួយវិញទៀតគឺមានការពង្រឹងវិន័យនៃការចូលរួមប្រកួតចូលរួមអុំ និងបទបញ្ជាផ្ទៃក្នុងដែលធ្លាប់មានមកផងដែរ ហើយការពង្រឹងនេះក៏បានធ្វើជារៀងរាល់ឆ្នាំផងដែរ។
ទឹកទន្លេមានភាពតូចជាងឆ្នាំមុន
ក្នុងឆ្នាំនេះទឹកទន្លេមានកម្រិតតូចជាងឆ្នាំមុនៗ ដោយសារភ្លៀងចុងវស្សាតិចតួចទើបធ្វើឱ្យទឹកស្រកមានទំហំឬសភាពតូច។ ឆ្នាំមុនព្រះរាជពិធីបុណ្យអុំទូកបានប្រារឰធ្វើឡើងនៅក្នុងថ្ងៃទី២០ដល់ថ្ងៃទី២២ខែវិច្ឆិកា តែឆ្នាំនេះនៅពេលដែលបានដូរចន្ទគតិគឺត្រូវនឹងចុងខែវិច្ឆិកាវិញម្ដង ដូចនេះធ្វើឱ្យទឹកមានសភាពតូចជាងឆ្នាំមុន។ បើទោះជាកម្រិតទឹកមានសភាពតូចបន្ដិចជាងឆ្នាំមុន តែកម្រិតទឹកទន្លេសាបមានកម្រិតប្រហាក់ប្រហែលនឹងទឹកទន្លេមេគង្គ ដូចនេះចរន្ដទឹកហូរមិនអាចធ្វើឱ្យទឹកហូរខ្លាំងនោះទេ។ ផ្ទុយទៅវិញបើសិនជាទឹកទន្លេមេគង្គស្រកលឿនជាងទឹកទន្លេសាប ទឹកអាចហូរខ្លាំងដែលអាចបង្កការលំបាកដល់ការអុំទូក។ សរុបសេចក្ដីមក ទោះបីជាឆ្នាំនេះទឹកមានសភាពតូច តែមិនអាចបង្កភាពរាំងស្ទះអ្វីដល់ការអុំទូក។ សរុបសេចក្ដីមកទោះបីជាឆ្នាំនេះទឹកមានសភាពតូច តែមិនអាចបង្កភាពរាំងស្ទះអ្វីដល់ការរៀបចំបច្ចេកទេសនោះទេ ហើយថែមទាំងមិនអាចធ្វើឱ្យមានបញ្ហាក្នុងការប្រារឰព្រះរាជពិធីបុណ្យអុំទូកនោះឡើយ។ ទោះបីជាឆ្នាំនេះទឹកតិច ឬមានសភាពជន់ខ្លាំងក៏ដោយ ក៏ខាងគណៈកម្មាធិការបច្ចេកទេសនៅតែរៀបចំ ជំនួយជារៀងរាល់ឆ្នាំ ដើម្បីការពារសុវត្ថិភាពប្រជាពលរដ្ឋដែលបានចូលរួមក្នុងការប្រកួត។ ហើយនៅឆ្នាំនេះដោយសារតែទឹកនៅតូច ដូចនេះក៏ដោយ ក៏ត្រូវបានពង្រឹងនាវាសង្គ្រោះ និងកម្លាំងសង្គ្រោះផងដែរ។
ការប្រណាំងទូកជាកីឡាប្រពៃណី
បុណ្យអុំទូកបានបង្ហាញយ៉ាងច្បាស់នូវកីឡាបែបប្រពៃណីជាតិមិនមែនជាកីឡាសុទ្ធសាធ ដែលមានការប្រកួតប្រជែងរកទូកដែលអុំលឿនជាងគេក្នុងប្រទេសនោះទេ។ ការប្រណាំងទូកត្រូវបានរៀបចំបែងចែកប្រកួតតាមផែន ដែលមានចាត់ចំណាត់ថ្នាក់ទៅតាមផែននីមួយៗ។ តែអ្វីដែលពិសេសនោះគឺសម្រាប់តែគូពិសេសប៉ុណ្ណោះដែលត្រូវប្រើប្រាស់ក្រូណូម៉ែត្រដើម្បីចុចកំណត់ពេល ហើយធ្វើចំំណាត់ថ្នាក់ថេរវេលានៃការអុំទូកពិសេសនីមួយៗ។ ការប្រណាំងទូកនេះមិនមែនជាការប្រកួតដើម្បីចាញ់ឈ្នះនោះទេ នេះគឺជាពិធីបុណ្យកម្សាន្ដបែបប្រពៃណី និងវប្បធម៌របស់ជាតិខ្មែរ។ ដូចនេះសូមលោកដែលជាកីឡាករប្រណាំងទូកទាំងអស់ នៅតែបន្ដការប្រណាំងទូកទាំងអស់ នៅតែបន្ដការគោរពនូវវិន័យដែលផ្ដល់ដោយគណៈកម្មាធិការ ធ្វើយ៉ាងណាឱ្យពិធីបុណ្យជាតិកាន់តែមានភាពសប្បាយរីករាយ។
ការប្រណាំងគូពិសេស
ទូកពិសេសដែលបានចាត់ទុកថាជាទូកលឿនជាងគេនោះគឺរៀបចំជាផែនពិសេសដោយឡែកសម្រាប់ធ្វើការប្រកួតគ្នា ដូចជារៀងរាល់ឆ្នាំដែរ។ ទូកផែនធម្មតានៅថ្ងៃទីមួយ និងថ្ងៃទីពីរអុំពីរជើង ដោយផ្លាស់ប្ដូរខ្សែរទឹក ឯថ្ងៃទីបីគឺអុំតែមួយជើងតែប៉ុណ្ណោះ ដោយធ្វើការចាប់ឆ្នោតជ្រើសរើសខ្សែទឹក។ រីឯទូកដែលស្ថិតក្នុងផែនពិសេសនោះគឺអុំពីពីរទៅបីថ្ងៃ ដោយធ្វើការផ្លាស់ប្ដូរខ្សែទឹក។
បណ្ដាំផ្ញើ
ព្រះរាជពិធីបុណ្យអុំទូកជាព្រឹត្ដិការណ៍មួយឆ្នាំមានម្ដង ដូចនេះថ្ងៃដែលពិសេសពិតជាមានការប្រព្រឹត្ដទៅដោយភាពសប្បាយរីករាយ និងអធិកអធម ដែលមានប្រជាពលរដ្ឋជាច្រើនចូលរួមក្នុងឱកាសនេះ។ ទីក្រុងភ្នំពេញជាកន្លែងមានសោភ័ណភាព សម្រាប់ការទាក់ទាញភ្ញៀវទេសចរណ៍ និងអន្ដរជាតិមកកម្សាន្ដ ដូចនេះសូមលោកអ្នកដែលបានចូលរួមពិធីដ៏អស្ចារ្យនេះ សូមមេត្ដាជួយថែរក្សានូវបរិស្ថាន ដើម្បីឱ្យទីក្រុងនៅតែមានសោភ័ណភាព។
ប្រភព ៖ ទស្សនាវដ្តី សុខភាពយើង លេខ០៥៨ ខែវិច្ឆិកា ឆ្នាំ២០១០
Leave a Reply