យ៉ាងហោចណាស់មានកុមារច្រើនជាង១ម៉ឺននាក់កំពុងសម្រាកព្យាបាលក្នុងមន្ទីរពេទ្យទូទាំងប្រទេស និង៣០នាក់ផ្សេងទៀត ត្រូវបានស្លាប់ដោយសារជម្ងឺគ្រុនឈាម។
លោក ង៉ាន់ ច័ន្ទថា ប្រធានកម្មវិធីជាតិប្រយុទ្ធជម្ងឺគ្រុនឈាម នៃមជ្ឈមណ្ឌលជាតិប្រយុទ្ធជម្ងឺគ្រុនចាញ់បានប្រាប់ ទស្សនាវដ្ដី សុខភាពយើង កាលពីថ្ងៃទី១២ ខែតុលា ឆ្នាំ២០១០ថា ភាគច្រើនកុមារអាយុក្រោម១៥ឆ្នាំត្រូវបានស្លាប់ដោយសារជម្ងឺនេះ។ លោកបន្ដថា បើទោះបីជាក្នុងរយៈពេលថ្មីៗនេះ មានកុមាររហូតដល់ទៅ៣០នាក់ត្រូវបានស្លាប់ក៏ពិតមែន ប៉ុន្ដែអត្រា នេះវាមិនទាន់ឈានដល់ស្ថានភាពធ្ងន់ធ្ងរទេ។ លោកថ្លែងថា ៖ “បើទោះបីជាបែបនេះក៏ដោយ យើងនៅតែអង្កេតតាមដានស្ថានភាពជាប្រចាំដែរដើម្បីចៀសវាងការប្រែប្រួលវីរុសដាំងរបស់មេរោគគ្រុនឈាម ដូច្នេះប្រសិនបើយើងមិនប្រុងប្រយ័ត្នទេ វាអាចបណ្ដាលឱ្យមានបញ្ហាធ្ងន់ធ្ងរមិនអាចសង្គ្រោះបាន។
យោងតាមរបាយការណ៍កម្មវិធីជាតិប្រយុទ្ធជម្ងឺគ្រុនឈាមបានឱ្យដឹងថា គិតត្រឹមថ្ងៃទី១១ ខែតុលា ឆ្នាំ២០១០នេះ អ្នកឆ្លងជម្ងឺគ្រុនឈាមមាន១០៨១២នាក់ ក្នុងនោះស្លាប់៣០នាក់។ ចំនួននេះបើធៀបទៅនឹងរយៈពេលដូចគ្នាឆ្នាំ២០០៩ អ្នកឆ្លងជម្ងឺគ្រុនឈាមបានកើនឡើងដល់ទៅ២៨២ករណី រីឯការស្លាប់បានថយចុះត្រឹម៣នាក់។ លោក ច័ន្ទថា ថ្លែងថា ៖ “ការថយចុះនៃចំនួនអ្នកស្លាប់គឺបណ្ដាលមកពីប្រជាពលរដ្ឋបានយកកូនមកព្យាបាលនៅមន្ទីរពេទ្យទាន់ពេលវេលា”។
ខេត្ដកំពង់ចាមគឺជាតំបន់ដែលមានអត្រាស្លាប់ និងករណីឆ្លងជម្ងឺគ្រុនឈាមខ្លាំងជាងគេ
លោក ង៉ាន់ ច័ន្ទថា បន្ថែមថា នៅកម្ពុជាតំបន់ដែលងាយរងគ្រោះដោយសារជម្ងឺគ្រុនឈាមមាន ដូចជាខេត្ដកណ្ដាល ទីក្រុងភ្នំពេញ ខេត្ដបន្ទាយមានជ័យ កំពង់ស្ពឺ និងសៀមរាប ដោយឡែកខេត្ដកំពង់ចាមគឺជាតំបន់ដែលបានរងគ្រោះខ្លាំងជាងគេ ដោយអត្រាឈឺបានឈានរហូតដល់ទៅ១៨៥៥នាក់ ក្នុងនោះស្លាប់៣នាក់។ លោក ច័ន្ទថា បញ្ជាក់ថា ភាគច្រើនតំបន់ទាំងនេះមានដង់ស៊ីតេប្រជាជនរស់នៅច្រើនកុះករ រីឯស្ថានភាពអនាម័យនៅទីនោះក៏មិនអំណោយផលល្អដែរ ដូច្នេះការពង្រឹងលើកម្មវិធីអប់រំ តាមសហគមន៍គឺជាគោលការណ៍ចម្បង។
អ្នកស្រី ជេត អ៊ួន អាយុ៣០ឆ្នាំ ប្រជាពលរដ្ឋរស់នៅភូមិទ្រនូង ឃុំទ្រនូង ស្រុកមេមត់ ខេត្ដកំពង់ចាម បានប្រាប់ឱ្យដឹងថា អ្នកស្រីមានកូនប្រុសម្នាក់ អាយុ៣ឆ្នាំត្រូវបានស្លាប់ដោយសារជម្ងឺគ្រុនឈាមកាលពីពាក់កណ្ដាលឆ្នាំ២០០៩។ អ្នកស្រីថ្លែងថា ៖ “នៅពេលវាចាប់ផ្ដើមក្ដៅខ្លួនរយៈពេល៣ថ្ងៃ ខ្ញុំបានគិតថា ប្រហែលនេះគឺជាជម្ងឺធម្មតារបស់ក្មេងទេ ដូច្នេះគ្រាន់តែឱ្យគ្រូពេទ្យ ផ្សំថ្នាំទៅតាមអាការរបស់វាហ្នឹង រហូតជម្ងឺគ្រុនក្ដៅនេះបានបន្ដអស់រយៈពេល៨ថ្ងៃខ្ញុំក៏បានយកវាទៅមន្ទីរពេទ្យបានត្រឹមតែ១ថ្ងៃ ប៉ុណ្ណោះវាក៏ស្លាប់តែម្ដង។
ប្រភព ៖ ទស្សនាវដ្តី សុខភាពយើង លេខ០៥៨ ខែវិច្ឆិកា ឆ្នាំ២០១០
Leave a Reply