កីឡាបានត្រូវបែងចែកជាច្រើនប្រភេទខុសៗគ្នា និងមានសារៈប្រយោជន៍ដូចគ្នាៗ។ កីឡាវាយកូនបាល់ជាប្រភេទកីឡាមួយបែបដែលផ្ដល់នូវអត្ថប្រយោជន៍ជាច្រើន និងពុំបង្កឱ្យមានគ្រោះថ្នាក់ក្នុងពេលលេងដូចជាកីឡាមួយចំនួននោះទេ។ ជាពិសេសសម្រាប់អ្នកដែលចង់ទទួលបានសុខភាព លោកអ្នកគួរសាកល្បងលេងកីឡាវាយកូនបាល់ ដើម្បីទទួលបានសុខភាពល្អ។
ទស្សនាវដ្ដី សុខភាពយើង បានជួបជាមួយលោក យី សារិន ជាគ្រូបង្ហាត់កីឡាវាយកូនបាល់នៅសហព័ន្ធកីឡាវាយកូនបាល់អូឡាំពិក ដើម្បីបកស្រាយប្រធានបទកីឡាវាយកូនបាល់នេះ។
ប្រវត្ដិកីឡាវាយកូនបាល់នៅប្រទេសកម្ពុជា
កីឡាវាយកូនបាល់ជាកីឡាពេញដែលទទួលការពេញនិយមជាច្រើនទសវត្សរ៍ តាំងពីឆ្នាំ១៩៩៥មកម្ល៉េះ។ កីឡាវាយកូន បាល់មិនត្រឹមជាកីឡាប្រើប្រាស់សម្រាប់ការកម្សាន្ដ និងសុខភាពប៉ុណ្ណោះទេ វាថែមជាវិញ្ញាសានៃការប្រកួតប្រជែងជាខ្នាតអន្ដរជាតិ ដែលប្រទេសកម្ពុជាធ្លាប់បានទទួលបាននូវភាពជោគជ័យជាច្រើនគ្រាកន្លងមកហើយ ទោះបីជាការប្រកួតនៅក្នុងអំឡុងទសវត្សរ៍នោះ ពុំមានភាពទូលំទូលាយក៏ដោយ។ បច្ចុប្បន្នកីឡាវាយកូនបាល់នៅតែរក្សាបាននូវប្រជាប្រិយភាពរបស់ខ្លួនដដែល សម្រាប់ពលរដ្ឋខ្មែរ គ្រប់រូបដែលនិយមចូលចិត្ដវិស័យកីឡា។
របៀបលេងកីឡាវាយកូនបាល់
ការលេងកីឡាកូនបាល់អាចប្រព្រឹត្ដទៅដោយមនុស្សពីរនាក់ ឬក៏បួននាក់ ដែលត្រូវចាប់ដៃគ្នាជាគូប្រកួតជាលក្ខណៈក្រុម ដែលមានអាជ្ញាកណ្ដាលអង្គុយលើកៅអីនៅម្ខាងជិតសំណាញ់ ដើម្បីមើលការឆ្លងរបស់កូនបាល់។ ការប្រកួតជាផ្លូវការនៅអាស៊ីត្រូវធ្វើឡើងចំនួន២សិចមិនកំណត់ពេលវេលា ក្នុងមួយសិចមាន៦ពិន្ទុធំដែលក្នុងមួយ១ពិន្ទុធំមាន៤កូនបាល់។ ប្រសិនបើលេងឈ្នះមួយ សិចម្នាក់ស្មើ គឺត្រូវតម្រូវឱ្យកីឡាករធ្វើការប្រកួតមួយសិចទៀត ដើម្បីយកឈ្នះចាញ់ ដែលមានលក្ខណៈខុសប្លែកពីការប្រកួតជាផ្លូវការនៅទ្វីបអឺរ៉ុប ដែលការប្រកួតត្រូវធ្វើឡើងចំនួន៥សិច។
អត្ថប្រយោជន៍នៃការលេងកីឡាវាយកូនបាល់
ទោះបីលោកអ្នកពុំមែនជាកីឡាករអាជីពដែលអាចរកថវិកាពីកីឡាវាយកូនបាល់ក៏ដោយ តែលោកអ្នកនូវតែអាចទទួលបាននូវអត្ថប្រយោជន៍ជាច្រើនក្នុងការលេងកីឡានេះ។ ប្រសិនជាលោកអ្នកអនុវត្ដតាមក្បួនខ្នាតនៃការលេងកីឡាដែលមិនប៉ះពាល់ដល់សុខភាពបានត្រឹមត្រូវ នោះលោកអ្នកនឹងទទួលបានអត្ថប្រយាជន៍ជាច្រើនដូចជា ៖
- ជួយបង្កើនភាពរហ័សរហួន និងកម្លាំងដៃលោកអ្នក
- បង្កជាភាពងាយស្រួលដល់ប្រព័ន្ធចលនាជីពចរ និងសម្រួលដល់ការរត់នៃសរសៃឈាម
- រក្សាចលនាកន្ដ្រាក់របស់ថ្លើម បេះដូងឱ្យមានឱ្យស្ថិតក្នុងសភាពប្រក្រតី
- ជំនួយដល់ចលនាផត ហើយប៉ោងរបស់សួត
- ទប់ស្កត់ជម្ងឺរ៉ាំរ៉ៃ ពិសេសបញ្ចេញចោលនូវសារធាតុពុលដែលមានក្នុងរាងកាយ
- បំបាត់ចោលនូវអាការឈឺចាប់តាមសន្លាក់ ក្នុងការបត់បែនធ្វើចលនាផ្សេងៗ។
ការថែរក្សាសុខភាព និងការទទួលទានអាហារ
ការលេងកីឡាវាយកូនបាល់ត្រូវការភាពកំណត់ពេលវេលាដែលច្បាស់លាស់ និងការលេងបានត្រឹមត្រូវ ទើបផ្ដល់នូវផលល្អច្រើនសម្រាប់សុខភាពរាងកាយ។ លោកអ្នកគប្បីកម្ដៅសាច់ដុំ និងយល់ពីរបៀបវាយកូនបាល់ជាមុនសិនមុនលេងកីឡានេះ។ បើមិនដូច្នេះទេ វាអាចបង្កជាគ្រោះថ្នាក់តិចតួចក្នុងការលេងកីឡានេះ ម្យ៉ាងទៀតវាក៏ធ្វើឱ្យសាច់ដុំដៃរបស់លោកអ្នកឡើងប៉ោងម្ខាង បើសិនលោកអ្នកពុំយល់ច្បាស់ពីបច្ចេកទេសវាយកូនបាល់នោះទេ។ ការលេងកីឡានេះទៀតសោតក៏តម្រូវឱ្យអ្នកលេងទទួលទានអាហារបានគ្រប់គ្រាន់ ពិសេសសម្បូរទៅវីតាមីនសម្រាប់រាងកាយ មិនថាជាអ្នកលេងអាជីព ឬក៏ដើម្បីការកម្សាន្ដ។ សូមទទួលទានបន្លែឱ្យបានច្រើនជាងការទទួលទានសាច់។
ពេលវេលាក្នុងការលេងកូនបាល់
លោកអ្នកដែលលេងកីឡាកូនបាល់ត្រូវកំណត់ពេលវេលាឱ្យបានច្បាស់ក្នុងការហាត់ ឬក៏ការលេងកម្សាន្ដ ដើម្បីសុខភាព។ លោកអ្នកគួរតែជ្រើសរើសការលេងនៅពេលព្រឹកព្រលឹម និងពេលល្ងាចជារៀងរាល់ថ្ងៃជាប្រចាំ មួយថ្ងៃឱ្យបានមួយម៉ោងទៅពីរម៉ោង ទើបជាការប្រសើរនៅក្នុងការហាត់លេង។ លោកអ្នកមិនគួរលេងកីឡានេះក្រោយការបរិភោគអាហារឆ្អែតនោះទេ ព្រោះអាចបណ្ដាលឱ្យក្រពះរំលាយអាហារមិនបានល្អ។ សូមព្យាយាមលេងកីឡានេះនៅពេលព្រឹកទើបល្អ សម្រាប់រាងកាយងាយស្រួលក្នុងការបញ្ចេញចោលនូវសារធាតុពុលដែលមាននៅក្នុងខ្លួនយើង។
ដំបូន្នានអ្នកឯកទេស
ការលេងកីឡាសុទ្ធសឹងតែមានសារៈប្រយោជន៍ទាំងអស់។ ដូចនេះលោកអ្នកគួរតែស្វែងយល់អំពីការលេងកីឡា ពិសេសកីឡាកូនបាល់ដែលផ្ដល់អត្ថប្រយោជន៍ច្រើនដល់សុខភាពលោកអ្នក ព្រោះកីឡាវាយកូនបាល់ជាប្រភេទកីឡាដែលតម្រូវឱ្យអវយវៈ និងរាងកាយទាំងមូលធ្វើចលនាទាំងអស់ព្រមគ្នា។ ដើម្បីជាថ្នូរនៃសុខភាព គួរតែលោកអ្នកគិតគូរឡើងវិញអំពីកីឡា និងធ្វើលំហាត់ប្រាណជាប្រចាំ ដើម្បីកាត់បន្ថយនូវការចំណាយប្រាក់កាក់ច្រើនក្នុងការព្យាបាលជម្ងឺ។
ប្រភព ៖ ទស្សនាវដ្តី សុខភាពយើង លេខ០៥៨ ខែវិច្ឆិកា ឆ្នាំ២០១០
Leave a Reply