ពិធីការិនីរូបស្រស់សោភា និងគួរឱ្យស្រឡាញ់ កញ្ញា តូច ចាន់ធូ។ កញ្ញា តូច ចាន់ធូ បានចូលប្រឡងនៅក្នុងវិស័យសិល្បៈជាង២ឆ្នាំមកហើយ។ ពេលនេះសុគន្ធាកំពុងតែមានការគាំទ្រយ៉ាងច្រើនពីសំណាក់មហាជន ជាពិសេសគឺស្រទាប់យុវវ័យតែម្ដង។ ឥឡូវនេះ ចាន់ធូកំពុងតែមានការមមាញឹកនឹងការងារជាច្រើន ប៉ុន្ដែចាន់ធូក៏មិនដែលភ្លេចឡើយនូវការថែរក្សាសម្រស់ និងសុខភាពរបស់ខ្លួន។
ចាន់ធូបានចូលមកបកស្រាយអំពីការថែរក្សាសម្រស់ប្រាប់ទស្សនាវដ្ដី សុខភាពយើង អំពីវិធីសាស្ដ្រថែរក្សាសម្រស់នឹងការថែរក្សាសុខភាពរាងកាយរបស់ខ្លួនជូនប្រិយមិត្ដទាំងអស់ ពិសេសគឺមិត្ដនារីទាំងឡាយឱ្យបានជ្រាបផងដែរ។
ប្រវត្ដិសិល្បៈ
មុនពេលមុនចូលសិល្បៈ ចាន់ធូគ្រាន់តែជាបុគ្គលិកបម្រើការងារនៅក្រុមហ៊ុនឯកជនធម្មតាមួយ។ នៅក្នុងឆ្នាំ២០០៨ ចាន់ធូ បានប្រឡងFreshie girl នៅស្ថានីយទូរទស្សន៍ប៉ុស្ដិ៍លេខ៥ ប៉ុន្ដែមិនបានជាប់ចំណាត់ថ្នាក់នោះទេ ដោយចាន់ធូបានបោះបង់ចោល។ នៅក្នុងឆ្នាំ២០០៩ចាន់ធូក៏បានដាក់ពាក្យធ្វើជាពិធីការិនីស្ថានីយទូរទស្សនំ៍យ TV ដោយចាន់ធូបានធ្វើតេស្ដពី៣ទៅ៤ថ្ងៃ ទីបំផុត ចាន់ធូក៏បានជាប់ធ្វើជាពិធីការិនីតែម្ដង។ មកដល់សព្វថ្ងៃនេះ ចាន់ធូធ្វើជាពិធីការិនីនៅស្ថានីយទូរទស្សនំ៍យ TV ក្នុងកម្មវិធី Took Talk ជារៀងរាល់ថ្ងៃសោរ៍ កម្មវិធី fast fashion និងកម្មវិធី Winner song ផ្សាយផ្ទាល់នៅថ្ងៃពុធពីម៉ោង៨ទៅ៩យប់។ គួររម្លឹកផងដែរថា មុននឹងធ្វើជាពិធីការិនី ចាន់ធូក៏បានថតស្ពតពាណិជ្ជកម្មមួយចំនួនផងដែរ។
វិធីថែរក្សាសម្រស់ និងសុខភាព
សព្វថ្ងៃនេះ កញ្ញា តូច ចាន់ធូ មានការមមាញឹកច្រើននឹងការងារ។ តែទោះបីជាមានការមមាញឹកច្រើនយ៉ាងណាក៏ដោយ ក៏ចាន់ធូមិនដែលភ្លេចឡើយនូវការថែរក្សាសម្រស់ដ៏ផូរផង់ក៏ដូចជាការថែរក្សាសុខភាពរបស់ខ្លួនផងដែរ។ ខាងក្រោមនេះគឺជាវិធីក្នុងការថែរក្សាសម្រស់ និងសុខភាពរបស់កញ្ញា តូច ចាន់ធូ ដែលបានអនុវត្ដជាប្រចាំ។
- ការថែរក្សាសក់ ៖ ក្នុងនាមជាអ្នកសិល្បៈមួយរូបចាន់ធូតែងតែធ្វើសក់ជារៀងរាល់ថ្ងៃ។ ដូចនេះនៅពេលដែលមកដល់ផ្ទះ ចាន់ធូតែងតែកក់សក់ចេញ និងបន្ទន់សក់ ដើម្បីការពារសក់កុំឱ្យឆាប់ខូច។
- ការថែរក្សាស្បែកមុខ ៖ ចាន់ធូបានយកចិត្ដទុកដាក់បំផុតចំពោះការថែរក្សាស្បែកមុខ ព្រោះស្បែកមុខមានសារៈសំខាន់ណាស់សម្រាប់ចាន់ធូ។ ចាន់ធូបានប្រើឡេការពារពេលយប់ដើម្បីឱ្យស្បែកមុខមានសំណើម។ នៅពេលដែលចេញទៅក្រៅម្ដងៗ ចាន់ធូមិនសូវជាប្រើប្រាស់ឡេការពារកម្ដៅថ្ងៃញឹកញាប់នោះទេ។ នៅពេលសម្ដែង ចាន់ធូតែងតែយកទឹកជូតសម្អាតផ្ទៃមុខ បន្ទាប់មកគឺចាន់ធូបានប្រើហ្វូមលាងសម្អាតផ្ទៃមុខ។
- ការថែរក្សាស្បែកដងខ្លួន ៖ ចាន់ធូតែងតែប្រើឡេដែលមានកម្រិតខ្ពស់ ដើម្បីការពារពន្លឺព្រះអាទិត្យ។ ហើយពេលយប់ ចាន់ធូលាបឡេការពារពេលយប់ និងផ្ដល់សំណើមដល់ស្បែក។ ចាន់ធូតែងតែប្រើសាប៊ូដុសខ្លួនដែលមានក្លិនក្រអូប និងផ្ដល់សំណើមដល់ស្បែក ជាពិសេសសាប៊ូកម្ចាត់មេរោគ។
- ការថែរក្សាធ្មេញ ៖ ចំពោះសុខភាពមាត់ធ្មេញ ចាន់ធូយកចិត្ដទុកដាក់បំផុត រាល់ពេល៦ខែម្ដងចាន់ធូបានទៅពេទ្យធ្មេញម្ដង។ ចាន់ធូតែងតែធ្វើការសម្អាតធ្មេញក្នុងមួយថ្ងៃបីដង ព្រឹក ថ្ងៃ និងមុនពេលចូលគេង ជាពិសេសនៅក្រោយពេលទទួលទានអាហារហើយ ចាន់ធូតែងតែប្រើទឹកថ្នាំដើម្បីលាងសម្លាប់មេរោគជានិច្ច។ ក្នុងមួយសប្ដាហ៍ ចាន់ធូបានខាំពុម្ពធ្មេញឱ្យសដោយខ្លួនឯងបីដង។
- ការថែរក្សាភ្នែក ៖ ចំពោះការថែរក្សាភ្នែក ចាន់ធូបានយកចិត្ដទុកដាក់ផងដែរចំពោះបញ្ហានេះ ព្រោះសុខភាពភ្នែកមិនសូវជាមានសុខភាពល្អប៉ុន្មាននោះទេ។ នៅពេលដែលធ្វើដំណើរទៅណាមកណាម្ដង ចាន់ធូតែងតែមានវ៉ែនតាការពារពន្លឺព្រះអាទិត្យ ជាពិសេសរាល់ពេលមានបញ្ហាភ្នែក ចាន់ធូតែងតែប្រើថ្នាំបន្ដក់ភ្នែកជានិច្ច។
- ការថែរក្សារោមភ្នែក ចិញ្ចើម បបូរមាត់ ៖ ចំពោះចិញ្ចើម ចាន់ធូមិនសូវជាយកចិត្ដទុកដាក់ថែរក្សាឱ្យបានដិតដល់នោះទេ យ៉ាងច្រើនចាន់ធូយកម៉ាស្ការ៉ាដែលមានពណ៌សូកូឡាមកសិតលើចិញ្ចើមតែប៉ុណ្ណោះ ដើម្បីឱ្យពណ៌ចិញ្ចើម និងសក់មានពណ៌ដូចគ្នា។ បើនិយាយអំពីរោមភ្នែក ចាន់ធូច្រើនតែពាក់រោមភ្នែកនៅពេលដែលទៅចូលរួមកម្មវិធីនិងពេលធ្វើការងារ។ ចំពោះបបូរមាត់វិញ ចាន់ធូ បានយកចិត្ដទុកដាក់ជាង ព្រោះខ្លាចបបូរមាត់ឡើងខ្មៅ ដូចនេះចាន់ធូបានប្រើក្រែមដែលមានជាតិជេលដែលជាប់បានពេញមួយថ្ងៃ។ ក្រែមដែលចាន់ធូចូលចិត្ដ្ដលាបនោះគឺជាក្រែមដែលមានពណ៌ស្រស់ៗ ហើយមួយប្រភេទទៀតគឺចូលចិត្ដពណ៌ស្លេក។
- ការថែរក្សាក្រចកដៃ ក្រចកជើង ៖ ចាន់ធូចូលចិត្ដលាបពណ៌ក្រចកបំផុត តែក៏ខ្លាចមានបញ្ហាដែរ។ នៅពេលលាបក្រចក ចាន់ធូលាបថ្នាំក្រចកដែលអាចការពារក្រចកបានសិនទើបលាបពណ៌ក្រចកជាក្រោយ។ ចាន់ធូតែងធ្វើការសម្អាតក្រចកដៃ និងក្រចកជើង យ៉ាងហោចណាស់២ដងនៅក្នុងមួយខែ ដូចជាការកាត់សាច់ និងកាត់តម្រឹមក្រចកជាដើម។
ការថែរក្សាសុខភាពរាងកាយ
ចាន់ធូយកចិត្ដទុកដាក់បំផុតនៅក្នុងការទទួលទានដំណេក។ ការទទួលទានដំណេកមានសារៈសំខាន់ណាស់ចំពោះចាន់ធូ។ ចំណែកឯការទទួលទានអាហារវិញ ចាន់ធូមិនដែលធ្វេសប្រហែសឡើយ។ ចំណែកឯការហាត់ប្រាណវិញ ចាន់ធូតែងតែទៅហែលទឹក ២ដងនៅក្នុងមួយសប្ដាហ៍។
គោលបំណងទៅថ្ងៃអនាគត
ក្រៅពីអាជីពជាពិធីការិនីហើយ ចាន់ធូក៏មានបំណងចង់ធ្វើជាតារាសម្ដែងបន្ថែមទៀតផងដែរនាពេលអនាគត។
បណ្ដាំផ្ញើ
សុភាពនារីទាំងអស់គួរតែយកចិត្ដទុកដាក់នៅក្នុងការថែរក្សាសម្រស់ និងសុខភាពឱ្យបានល្អ។ នៅពេលដែលមកពីកម្មវិធីអ្វីមួយ ត្រូវតែប្រញាប់ធ្វើការលាងសម្អាតឱ្យបានស្អាត ដើម្បីចៀសវាងការកើតមានបញ្ហាចំពោះស្បែកមុខ។ ត្រូវគិតគូរពីសុខភាពឱ្យបានច្រើនទើបជាការប្រសើរ ហើយអ្វីដែលល្អបំផុតនោះគឺការធ្វើលំហាត់ប្រាណ យ៉ាងហោចណាស់នៅក្នុងមួយសប្ដាហ៍ឱ្យបានពីរដង។ គួរតែគិតគូរអំពីការទទួលទានអាហារឱ្យបានទៀងទាត់ អ្វីដែលល្អបំផុតនោះគឺត្រូវទទួលទានបន្លែជំនួសសាច់ឱ្យបានច្រើនទើបជាការប្រសើរ។
ខាងលើនេះគឺជាយល់ឃើញ និងជាការអនុវត្ដន៍ផ្ទាល់របស់កញ្ញា តូច ចាន់ធូ តែប៉ុណ្ណោះ។ សូមលោកស្រីអ្នកនាងកញ្ញាជ្រើសរើសយកអ្វីដែលលោកអ្នកយល់ថាត្រឹមត្រូវសម្រាប់អនុវត្ដន៍បានហើយ។
ប្រវត្ដិរូបសង្ខេប
- ឈ្មោះ ៖ តូច ចាន់ធូ
- អាយុ ៖ ២១ឆ្នាំ
- ថ្ងៃខែឆ្នាំកំណើត ៖ ២៩. ១២. ១៩៨៩
- កម្ពស់ ៖ ១,៦៦ម៉ែត្រ
- ទម្ងន់ ៖ ៤៩គីឡូក្រាម
- ទំហំទាំងបី ៖ ៣៤ ២៨ ៣៦
- ទីកន្លែងកំណើត ៖ ទីរួមខេត្ដស្វាយរៀង
- បងប្អូន ៖ ៤នាក់ ស្រី៤នាក់(ជាកូនពៅ)
- អាជីពនាពេលបច្ចុប្បន្ន ៖ ជាពិធីការិនី
- ស្ថានភាពគ្រួសារ ៖ នៅលីវ
ប្រភព ៖ ទស្សនាវដ្តី សុខភាពយើង លេខ០៥៨ ខែវិច្ឆិកា ឆ្នាំ២០១០
Leave a Reply