ពីរលេខរួចមកហើយដែលលោកអ្នកបានស្វែងយល់អំពីក្បួនថែរក្សាគភ៌ ជាពិសេសការវិវត្ដន៍របស់ទារកនៅក្នុងផ្ទៃ។ នៅលេខនេះ សូមលោកអ្នកស្វែងយល់ដឹងអំពីការចំណាយពេល៩ខែដែលទារកបានវិវត្ដន៍ខ្លួន រហូតក្លាយជាមនុស្សម្នាដូចគេឯង។ តើមានការវិវត្ដន៍យ៉ាងដូចម្ដេចខ្លះពីមួយថ្ងៃទៅមួយថ្ងៃ ពីមួយខែទៅមួយខែ?
នៅថ្ងៃទី១០ ៖ ស៊ុតបានក្លាយជាអំប្រ៊ីយ៉ុង
ពេលនេះហើយដែលស្បូនចាប់ផ្ដើមកម្រើកដើម្បីទទួលយកទារកតូចល្អិតនេះ។ សភាវរសតូចល្អិតនេះបានផ្ដើមឱ្យមានការរៀបចំមួយ។ វាចាប់ផ្ដើមបំបែកកោសិការបស់ខ្លួនជា៣ស្រទាប់ដាច់ៗពីគ្នា។ នេះគឺជាសញ្ញានៃការចាប់ផ្ដើមបង្កើតសរីរៈស្បែក ប្រព័ន្ធ ប្រសាទ ឆ្អឹងខ្ចី ឆ្អឹងវែង សាច់ដុំ ប្រព័ន្ធរំលាយអាហារ និងក្រពេញ។
សប្ដាហ៍ទី៣ ៖ បេះដូងចាប់ផ្ដើមកើតជារូបរាង
បំពង់យ៉ាងសាមញ្ញមួយដែលបានបង្កើតឡើងដោយសរសៃឈាមបានបង្កើតជាប្រអប់បេះដូង និងចាប់ផ្ដើមច្របាច់។ លលាដ៍ក្បាលចាប់ផ្ដើមដុះនៅលើទីតាំងរបស់ខ្លួន រីឯសួតក៏ចាប់ផ្ដើមកើតមានផងដែរ។ មួយសប្ដាហ៍បន្ទាប់ អំប្រ៊ីយ៉ុងចាប់ផ្ដើមបន្ដរីករឹតតែធំប្រៀបបាននឹងគ្រាប់ឃ្លីដែលធំមួយ ដែលទម្ងន់របស់វាកើនឡើងដល់ទៅ១០០០០ដងឯណោះ។ រីឯប្រព័ន្ធប្រសាទចាប់ផ្ដើម កើតជាហេតុដូចចង្អុរមួយ។ រីឯអវយវៈមិនទាន់ត្រូវបានកើតមាននៅឡើយទេ។ អ្វីៗទាំងអស់កើតឡើងដូចដែលបានព្រាងទុកអ៊ីចឹង។
សប្ដាហ៍ទី៥ ៖ អំប្រ៊ីយ៉ុងបានផ្លាស់ប្ដូរទម្រង់
ពេលនេះអំប្រ៊ីយ៉ុងបានក្លាយជាបំពង់ស៊ីឡាំងកោងមួយ។ រាងកាយមនុស្សហាក់ដូចជាកើតមានឡើងជាហេតុ។ អវយវៈចាប់ផ្ដើមមានជាទម្រង់តូចៗឡើង។ ទំហំលលាដ៍ក្បាលចាប់ផ្ដើមរីកធំយ៉ាងខ្លាំង មុខមានទម្រង់ជារូបភាព រីឯភ្នែកហាក់ត្រូវបានគូសឡើងជារូបភាពមូលក្រឡំខ្មៅនិល។ ពេលនេះអំប្រ៊ីយ៉ុងមានទម្ងន់១១ក្រាម និងប្រវែង២សង់ទីម៉ែត្រ។
បណ្ដាំផ្ញើ ៖ នៅដំណាក់កាល២ខែដំបូង ទារកហាក់ដូចជាផ្លាស់ប្ដូររូបរាងលឿនណាស់។ ការផ្លាស់ប្ដូររូបរាង និងការប្រែប្រួលមិនឈប់ឈរនេះ បានធ្វើឱ្យទារកងាយរងនូវផលប៉ះពាល់ខ្លាំងណាស់។ ហេតុនេះសូមអ្នកដែលចង់បានទារកឬថែទាំគភ៌ត្រូវរួសរាន់ធ្វើតេស្ដ រកគភ៌ជាបន្ទាន់។ សូមបញ្ជាក់ថា មុនដល់ថ្ងៃមករដូវបន្ទាប់របស់លោកអ្នក ទារករបស់លោកអ្នកអាចចាប់បដិសន្ធិរួចស្រេចទៅហើយ។ បើសិនជាសង្ស័យ ត្រូវប្រញាប់រួសរាន់ថែទាំខ្លួន ដោយផ្អាកទទួលទានសុរា បារី ឱសថ និងការថតដោយកាំរស្មីអ៊ិច។
ប្រភព ៖ ទស្សនាវដ្តី សុខភាពយើង លេខ០៥៧ ខែតុលា ឆ្នាំ២០១០
Leave a Reply