នាងខ្ញុំបានចាក់វ៉ាក់សាំងការពារជម្ងឺថ្លើមប្រភេទបេលើកទី១រួចហើយ។ ឥឡូវនេះដល់ពេលកំណត់ចាក់លើកទី២ប៉ុន្ដែពេលនេះនាងខ្ញុំកំពុងមានគភ៌។ តើការចាក់លើកទី២នេះមានផលប៉ះពាល់ដល់កូនក្នុងផ្ទៃឬទេ? តើគួរចាក់ឬអត់?
លោកស្រី ច.ណ. ភេទស្រី ភ្នំពេញ
វេជ្ជ. លី ចេងហ៊ុយ ៖ វ៉ាក់សាំងឬថ្នាំបង្ការជម្ងឺរលាកថ្លើមដោយវីរុសប្រភេទបេនេះ មិនមែនជាវ៉ាក់សាំងមេរោគរស់ទេ។ ហេតុនេះមិនមានការហាមប្រាមមិនឱ្យចាក់នោះទេ។ ករណីលោកស្រីដែលបានចាក់លើកទី១ហើយលោកស្រីអាចចាក់ជាបន្ដទៅទៀត លើកទី២ឬលើកទី៣បានតាមប្រតិទិនចាក់ថ្នាំបង្ការដែលកំណត់ដោយគ្រូពេទ្យ ដោយមិនមានផលប៉ះពាល់អ្វីទេ។ ម្យ៉ាងទៀត អង្គបដិបក្ខប្រាណដែលទទួលបានពីការចាក់ថ្នាំបង្ការនេះអាចមានប្រយោជន៍សម្រាប់លោកស្រីជាម្ដាយផ្ទាល់និងសម្រាប់កូនរបស់ លោកស្រីដែលនឹងប្រសូតមកទៀតផង។ ដូចនេះចម្លើយយកជារួមលោកស្រីអាចបន្ដចាក់ថ្នាំបង្ការនេះតទៅទៀតបាន។ បើលោកស្រី នៅមានការសង្ស័យ សូមសាកសួរជាមួយគ្រូពេទ្យជំនាញខាងចាក់ថ្នាំបង្ការបន្ថែមទៀតផង។ សូមលោកស្រីមានសុខភាពល្អទាំងពីរនាក់ ទាំងលោកស្រីផ្ទាល់ និងទារកក្នុងផ្ទៃ។
ប្រភព ៖ ទស្សនាវដ្តី សុខភាពយើង លេខ៣៥ ខែធ្នូ ឆ្នាំ២០០៨
Leave a Reply