ការយកពេលវេលាដ៏មានតម្លៃទៅចាយវាយលើសុខភាពដើម្បីភាពល្អប្រសើរ គឺជាកម្រិតត្រឹមត្រូវហើយនឹងទទួលបានលទ្ធផល។ ការហាត់ប្រាណមានគោលដៅជាចម្បងចំពោះសុខភាពសម្រាប់មនុស្សម្នាក់ៗ។ សកម្មភាពហាត់ប្រាណទាំងនោះមិនសំដៅទៅពេលវេលាណាមួយនោះទេ។ ការហាត់ប្រាណនៅពេលព្រឹកឬក៏ពេលល្ងាចគឺមិនសំខាន់ទេ គឺលោកអ្នកនឹងបានទទួលសុខភាពមួយដ៏បរិបូរណ៍គ្រប់ពេលដែលបានហាត់ប្រាណជាទៀងទាត់។
នៅពេលនេះលោកអ្នកនឹងបានស្វែងយល់ពីសារៈសំខាន់នៃការហាត់ប្រាណជាមួយទស្សនាវដ្ដី សុខភាពយើង តាមរយៈការជួបសម្ភាសជាមួយលោក ខាត់ សុខទី គ្រូបង្ហាត់កីឡានៅក្លឹបវីអាយភី។
កំណើននៃអ្នកហាត់ប្រាណ
មកដល់បច្ចុប្បន្នប្រជាពលរដ្ឋកាន់តែជ្រាបច្បាស់ពីអត្ថប្រយោជន៍នៃការហាត់ប្រាណច្រើនឡើងៗ តាមរយៈការឃើញជាក់ស្ដែងគ្រប់ទីកន្លែង ដូចជាតាមសួនច្បារ មាត់ទន្លេ និងនៅពហុកីឡាដ្ឋានជាតិអូឡាំពិកជាដើម។ នេះជាការបង្ហាញឱ្យកាន់តែឃើញថាលោកអ្នកពិតជាយកចិត្ដទុកដាក់ចំពោះសុខភាព និងមានការជ្រាបកាន់តែច្បាស់អំពីអត្ថប្រយោជន៍នៃការហាត់ប្រាណ។ លោកអ្នកជាច្រើនបានសម្រេចចិត្ដចំណាយពេលវេលាទៅលើការហាត់ប្រាណ មិនថាពេលព្រឹក ឬពេលល្ងាចនោះទេ ក៏អាចហាត់បានដែរ។ ប៉ុន្ដែអ្វីដែលនៅតែព្រួយបារម្ភនោះគឺមានលោកអ្នកមួយចំនួនតូចមិនទាន់បានចំណាយពេលទៅលើការហាត់ប្រាណនៅឡើយទេ។ មូលហេតុនេះក៏អាចបណ្ដាលមកពីការមិនទាន់ជ្រាបច្បាស់ពីអត្ថប្រយោជន៍នៃការហាត់ប្រាណ។
សារៈប្រយោជន៍នៃការហាត់ប្រាណ
លោកអ្នកដែលបានធ្វើការហាត់ប្រាណ មិនថាហាត់ទៅតាមរបៀបណាមួយនោះទេ ក៏អាចជួយបង្កើនសុខភាពរបស់លោកអ្នកឱ្យកាន់តែប្រសើរ និងធ្វើឱ្យរាងកាយរបស់លោកអ្នកកាន់តែរឹងមាំ។ ការហាត់ប្រាណនឹងជួយឱ្យលោកអ្នកមានសុខភាពល្អ ធ្វើឱ្យប្រព័ន្ធការពាររាងកាយកាន់តែខ្លាំងក្លា និងអាចជួយឱ្យលោកអ្នកចៀសផុតពីជម្ងឺផ្សេងៗទៀតផង។
- ការហាត់ប្រាណនៅពេលព្រឹក ៖ ការហាត់ប្រាណនៅពេលព្រឹកគឺជាវេលាមួយដែលលោកអ្នកមិនទាន់ស្រស់ស្រូបអាហារពេលព្រឹក។ ដូចនេះនៅពេលដែលលោកអ្នកបានបញ្ចេញនូវថាមពលចេញពីរាងកាយធ្វើឱ្យបែកញើសបញ្ចេញជាតិពុលពីក្នុងរាងកាយ រីឯកម្លាំងក្នុងរាងកាយកាន់តែមានភាពប្រសើរជាជាងមុន។ សូមចងចាំផងដែរថា មុននឹងធ្វើការហាត់ប្រាណនៅពេលព្រឹក លោកអ្នកគប្បីទទួលទានទឹកមុនពេលហាត់ដោយបរិមាណ២ទៅ៣កែវរួចសម្រាកមួយសន្ទុះសឹមហាត់។ អំឡុងពេលហាត់ក៏គួរឆ្លៀតពេលទទួលទានទឹក១ទៅ២កែវផងដែរ ដើម្បីបំពេញនូវជាតិទឹកដែលបានបាត់បង់ខណៈពេលហាត់ប្រាណនិងការពារមិនឱ្យរាងកាយស្ថិតនៅក្នុងភាពខ្សោះ ឬខ្វះជាតិទឹក ដែលអាចបង្កផលលំបាកកើតមានក្នុងពេលហាត់ ដូចជាបណ្ដាលឱ្យស្ងួតបំពង់ក រមួលក្រពះ ក្អួត ឈឺក្បាល វិលមុខ ឬអស់កម្លាំងជាដើម។ សម្រាប់ការហាត់ប្រាណនាពេលព្រឹក លោកអ្នកអាចជ្រើសរើសវិធីជាច្រើនក្នុងការហាត់ ដូចជាការដើរ រត់ រាំ និងការធ្វើកីឡាកាយវប្បកម្មជាដើម។
- ការហាត់ប្រាណនៅពេលល្ងាច ៖ សម្រាប់ការហាត់ប្រាណពេលល្ងាចក៏មានសារៈប្រយោជន៍មិនខុសពីពេលព្រឹកនោះដែរ គឺនឹងធ្វើឱ្យលោកអ្នកមានសុខភាពល្អ។ ករណីការហាត់ប្រាណពេលល្ងាច លោកអ្នកអាចជ្រើសរើសពេលវេលាសមស្របណាមួយចាប់ពីម៉ោង៥ល្ងាចរហូតដល់ម៉ោង៧យប់។ សម្រាប់ពេលល្ងាចលោកអ្នកអាចហាត់ប្រាណដោយការរាំ រត់ ឬក៏លើកសាច់ដុំជាដើម។ បើនិយាយពីការហាត់ប្រាណដោយការលើកសាច់ដុំនៅពេលល្ងាចគឺមានភាពប្រសើរជាងនៅពលព្រឹក ព្រោះពេលល្ងាចលោកអ្នកមានកម្លាំងខ្លាំងជាងពេលព្រឹក។ ប៉ុន្ដែលោកអ្នកក៏អាចហាត់នៅពេលព្រឹកផងដែរ គឺនៅម៉ោងប្រហែលជា៩ព្រឹកក្រោយពេលទទួលទាន អាហារពេលព្រឹករួចរាល់។ ដើម្បីការពារបញ្ហាលំបាកដែលអាចកើតមាននៅពេលហាត់ លោកអ្នកគប្បីទទួលទានទឹកជាប្រចាំ ប៉ុន្ដែក៏មិនគប្បីទទួលទានក្នុងកម្រិតច្រើននោះទេ ហើយត្រូវសម្រាកបន្ដិចរាល់ពេលដែលទទួលទានទឹករួច ព្រោះអាចបណ្ដាលឱ្យមានអាការមិនស្រួលកើតមានឡើងទៅវិញទេ។
ឯកសណ្ឋានជួយការពារនៅពេលហាត់ប្រាណ
ការហាត់ប្រាណគឺអាចហាត់បានចំពោះគ្រប់វ័យទាំងអស់ មិនថាកុមារមនុស្សពេញវ័យ ឬមនុស្សចាស់គឺអាចហាត់បានទាំងអស់គ្នា ព្រោះការហាត់ប្រាណនឹងហុចផលជាវិជ្ជមានចំពោះលោកអ្នកដូចៗគ្នា។ យ៉ាងណាម៉ិញ ក្នុងពេលហាត់ប្រាណលោកអ្នកគប្បី មានឯកសណ្ឋានត្រឹមត្រូវសម្រាប់កីឡាហាត់ប្រាណ ចៀសវាងបញ្ហាដែលអាចកើតមាន។ លោកអ្នកគប្បីពាក់ស្បែកជើងឱ្យត្រឹមត្រូវ ដើម្បីការពារពេលធ្វើកីឡា ចៀសវាងការរលាកជើង ហើយនៅពេលដែលមានវ័យចំណាស់អាចធ្វើឱ្យឈឺក្បាលជង្គង់ និងចង្កេះទៀតផង។ លោកអ្នកគប្បីជ្រើសរើសខោត្រឹមជង្គង់ ឬលើជង្គង់ ចៀសវាងខោវែងៗពេកដែលអាចបង្កការលំបាកនៅពេលហាត់ប្រាណ។ ត្រូវពាក់អាវយឺតកីឡា គឺដើម្បីជួយការពារការបែកញើសច្រើន ងាយស្រួលឱ្យញើសស្រូបចូលក្នុងអាវ ហើយបើសិនជាអាចមានកូនកន្សែងមួយប្រចាំជាប់ករបស់លោកអ្នករាល់ពេលធ្វើកីឡាកាន់តែប្រសើរ។
ដំបូន្មានអ្នកជំនាញ
ការហាត់ប្រាណដែលអាចទទួលបានប្រសិទ្ធភាពមួយរយភាគរយនោះ មិនមែនថាហាត់ថ្ងៃនេះថ្ងៃស្អែកមិនហាត់នោះទេ គឺលោកអ្នកគប្បីធ្វើការហាត់ឱ្យបានទៀងទាត់។ ក្នុងការហាត់ប្រាណមានវិធីជាច្រើន ជាអាទិកីឡាកាយវប្បកម្មដែលមានឧបករណ៍ ទំនើបៗនិងសុទ្ធតែជាគ្រឿងដែក។ ដូចនេះពេលហាត់លោកអ្នកគប្បីត្រូវចេះស្ទង់ទៅលើកម្លាំងដែលអាចហាត់ទៅបាន តែបើនៅតែប្រឹងហាត់ហួសពីសមត្ថភាពនោះ នឹងអាចបង្កឱ្យមានបញ្ហាចំពោះលោកអ្នក។
ប្រភព ៖ ទស្សនាវដ្តី សុខភាពយើង លេខ៥៦ ខែកញ្ញា ឆ្នាំ២០១០
Leave a Reply