ប្រុសស្អាតឆ្នាំ២០០៧ធ្វើឱ្យមហាជនជាច្រើនបានទទួលស្គាល់កេរ្ដិ៍ឈ្មោះរបស់លោកក្នុងឆ្នាំ២០១០នេះកាន់តែច្រើននោះគឺ លោក ជា សុវណ្ណារិទ្ធ តួឯកប្រុសក្នុងរឿង ត្រៀមចិត្ដសម្រាប់ឈឺ។ តែរយៈពេលជាងពីរឆ្នាំ កំលោះសង្ហារូបនេះបានក្លាយជាតារាសម្ដែងកំពុងរះមានពន្លឺមិនចាញ់តារាសម្ដែងរៀមច្បងប៉ុន្មាននោះទេ។ សព្វថ្ងៃ តារាសម្ដែងរូបនេះកំពុងមមាញឹកច្រើនជាមួយនឹងការងារជាពិធីករផង និងជាតារាសម្ដែងស្ពតពាណិជ្ជកម្ម ខារ៉ាអូខេ និងខ្សែភាពយន្ដផង។
លោក ជា សុវណ្ណារិទ្ធ បានចូលខ្លួនមកប្រាប់ពីវិធីថែទាំសុខភាព និងសម្រស់របស់លោកផ្ទាល់ជូនដល់ប្រិយមិត្ដអ្នកអានទាំងអស់ ពិសេសប្រិយមិត្ដដែលមានការគាំទ្រចំពោះរូបលោកទទួលជ្រាបតាមរយៈទស្សនាវដ្ដី សុខភាពយើង។
ប្រវត្ដិមុនឈានជើងចូលសិល្បៈ
មុននឹងចូលជាអ្នកសិល្បៈ ជា សុវណ្ណារិទ្ធ ជាសិស្សម្នាក់ដែលស្នេហាវិស័យកីឡាតៃក្វាន់ដូ។ តែដោយសារមានការជំរុញពីសំណាក់មិត្ដភក្ដិ និងទេពកោសល្យល្អខាងវិស័យសិល្បៈ គួបផ្សំនឹងរូបសម្បត្ដិផង សុវណ្ណារិទ្ធក៏បានប្រឡងជាប់ជាហ្វ្រេសស៊ីប៊យក្នុងឆ្នាំ២០០៧។ លោកបានក្លាយជាអ្នកសិល្បៈក្រោយពេលបានប្រឡងជាប់ហ្វ្រេសស៊ីប៊យក្នុងឆ្នាំ២០០៧។ រយៈពេលភ្លាមៗនោះ លោកក៏ត្រូវបានស្ថានីយទូរទស្សន៍ប៉ុសិ៍្ដបាយ័នផ្ដល់ឱកាសឱ្យថតសម្ដែងជាតួឯកក្នុងរឿង ក្រោមមេឃបើគ្មានអូន។ មកដល់់ពេលនេះ សុវណ្ណារិទ្ធបានថតចំនួន៦រឿងរួចមកហើយ រួមមានរឿងក្រោមមេឃបើគ្មានអូន កែចិត្ដស្អប់បង បាត់ខ្លួន វិមានសុបិន ពិភពក្រឡាប់ចក្រ និង រឿងត្រៀមចិត្ដសម្រាប់ឈឺ។ សព្វថ្ងៃនេះ លោកបានធ្វើការប្រចាំនៅស្ថានីយទូរទស្សន៍បាយ័ន។
ការថែរក្សាសម្រស់
ជាតារាសម្ដែងមួយរូប ត្រូវធ្វើយ៉ាងណាឱ្យទស្សនិកជនចូលចិត្ដនូវអត្ដចរិតក៏ដូចជារូបសម្បត្ដិផងដែរ។ ចង់បានរូបរាងស្រស់សង្ហា សុខភាពត្រូវតែមាំមួន ព្រោះសុខភាពជារឿងដ៏សំខាន់។ ការងារទាំងអស់អាចទៅដោយរលូនក៏អាស្រ័យទៅលើសុខភាព។ រីឯ សម្រស់ក៏ជាចំណុចទាក់ទាញមួយសម្រាប់សុវណ្ណារិទ្ធដែលជាតារាសម្ដែងមួយរូប។ ខាងក្រោមនេះគឺជាវិធីនៃការថែរក្សាសម្រស់ និង ការថែទាំសុខភាពរបស់តារាសម្ដែង ជា សុវណ្ណារិទ្ធ ដែលបានអនុវត្ដជាប្រចាំ។
- ការថែរក្សាស្បែកមុខ ៖ រាល់ពេលចេញដំណើរទៅណាម្ដងៗ សុវណ្ណារិទ្ធតែងតែមានក្រដាសផ្ដិតធូលីដី និងជាតិខ្លាញ់នៅលើផ្ទៃមុខជាប់ខ្លួនជានិច្ច ដើម្បីផ្ដិតសម្អាតរៀងរាល់ពេលដែលផ្ទៃមុខពោរពេញដោយធូលីដី និងជាតិខ្លាញ់។ សុវណ្ណារិទ្ធក៏ឧស្សាហ៍ លាងសម្អាតផ្ទៃមុខផងដែរ ដើម្បីចៀសផុតពីបញ្ហាទាំងឡាយដែលកើតមាននៅលើផ្ទៃមុខ។
- ការថែរក្សាស្បែកដងខ្លួន ៖ ស្បែកដងខ្លួនក៏ជាបញ្ហាសម្រាប់សុខភាពផងដែរ។ សុវណ្ណារិទ្ធតែងចំណាយពេលយ៉ាងតិចពីរដងក្នុងមួយថ្ងៃ ដើម្បីងូតទឹកសម្អាតខ្លួនប្រាណ ផ្ដល់ផាសុកភាពដល់រាងកាយ។
- ការថែរក្សាសក់ ៖ សុវណ្ណារិទ្ធតែងតែកក់សក់ជាប្រចាំ ក្នុងមួយសប្ដាហ៍លោកកក់សឹងតែជារៀងរាល់ថ្ងៃ ក្នុងមួយថ្ងៃម្ដង។ ជួនពេលខ្លះសុវណ្ណារិទ្ធកក់ក្នុងមួយថ្ងៃពីរដង។
- ការថែរក្សាភ្នែក ៖ ជាអ្នកសម្ដែង ចៀសមិនផុតពីការការពារភ្នែកនឹងពន្លឺរាល់ពេលថតសម្ដែងនោះទេ។ ជាពិសេសរាល់ពេលដែលធ្វើដំណើរទៅណាម្ដងៗ សុវណ្ណារិទ្ធតែងតែពាក់វ៉ែនតាការពារពន្លឺថ្ងៃ ឬរបាំងការពារធូលីដីរាល់ពេលធ្វើដំណើរ។ បើសិនជាភ្នែកមានបញ្ហា ការងារជាតារាសម្ដែងក៏មិនប្រសើរទៅតាមនោះដែរ។ ដូចនេះការគិតគូរសុខភាពភ្នែកជារឿងដ៏សំខាន់។
- ការថែរក្សាធ្មេញ ៖ ក្នុងមួយថ្ងៃសុវណ្ណារិទ្ធសម្អាតធ្មេញចំនួនពីរដង។ សុខភាពមាត់ធ្មេញជាបញ្ហាសំខាន់ក្នុងការប្រាស្រ័យទាក់ទងគ្នា សុវណ្ណារិទ្ធមិនធ្វេសប្រហែសឱ្យកើតបញ្ហាសុខភាពមាត់ធ្មេញនោះទេ។
ការថែទាំសុខភាពរាងកាយ
- ការទទួលទានដំណេក ៖ ការគេងជាបញ្ហាសំខាន់សម្រាប់សុវណ្ណារិទ្ធដែលត្រូវគិតគូរជាចាំបាច់ ព្រោះបើគេងមិនបានគ្រប់គ្រាន់ គឺអាចប្រឈមមុខនឹងបញ្ហាជាច្រើន។ ដូចនេះសុវណ្ណារិទ្ធគេង៨ម៉ោងក្នុងមួយថ្ងៃ ដើម្បីឱ្យបានគ្រប់គ្រាន់កុំឱ្យសុខភាពមានបញ្ហា។
- ការទទួលទានអាហារ ៖ សុវណ្ណារិទ្ធចូលចិត្ដទទួលទានអាហារជាលក្ខណៈអាហាររហ័សៗ ដូចជានំប៉័ង ឬសាន់វិចជាដើម។ សុវណ្ណារិទ្ធមិនមានការតមប្រភេទអាហារអ្វីនោះទេ សំខាន់ឱ្យតែអាចទទួលទានបានហើយផ្ដល់នូវថាមពលដល់រាងកាយ។
- លំហាត់ប្រាណ ៖ ដោយមានការមមាញឹកច្រើននឹងការងារ សុវណ្ណារិទ្ធមិនសូវជាបានធ្វើការហាត់ប្រាណនោះទេ។ ប៉ុន្ដែសព្វថ្ងៃនេះសុវណ្ណារិទ្ធបានហ្វឹកហាត់តៃក្វាន់ដូចំនួនមួយថ្ងៃក្នុងមួយសប្ដាហ៍។
បំណងទៅថ្ងៃអនាគត
ក្រៅពីអាជីពជាតារាសម្ដែងហើយនោះ សុវណ្ណារិទ្ធក៏នៅមានបំណងប្រាថ្នាសម្រាប់ទៅថ្ងៃអនាគតផងដែរ គឺលោកមានបំណងចង់បើកក្លឹបកីឡាមួយដោយខ្លួនឯង។
បណ្ដាំផ្ញើរបស់ ជា សុវណ្ណារិទ្ធ
លោកអ្នកគ្រប់រូបតែងតែចង់បានសុខភាពល្អ ដូចនេះមានការទាមទារជាចាំបាច់ក្នុងការគិតគូរថែទាំចំពោះសុខភាព សូមកុំឱ្យមានការធ្វេសប្រហែសក្នុងការថែទាំឱ្យសោះ។ ការទទួលទានអាហារ និងដំណេកឱ្យបានគ្រប់គ្រាន់ នឹងអាចធ្វើឱ្យសុខភាពរបស់លោកអ្នកកាន់តែប្រសើរ ហើយអ្វីដែលពិសេសសម្រាប់សុខភាពទៀតនោះគឺការហាត់ប្រាណ។
ប្រវត្ដិរូបសង្ខេប
- ឈ្មោះ ៖ ជា សុវណ្ណារិទ្ធ
- អាយុ ៖ ២៤ឆ្នាំ
- ថ្ងៃ.ខែ.ឆ្នាំកំណើត ៖ ១៥ មិថុនា ១៩៨៦
- ទីកន្លែងកំណើត ៖ ខេត្ដសៀមរាប
- កម្ពស់ ៖ ១,៧៣ម៉ែត្រ
- បងប្អូន ៖ ៥នាក់(ប្រុស៤ ស្រី១ ជាកូនទី៣)
- អាជីពនាពេលបច្ចុប្បន្ន ៖ អ្នកសិល្បៈ
- ស្ថានភាពគ្រួសារ ៖ នៅលីវ
ប្រភព ៖ ទស្សនាវដ្តី សុខភាពយើង លេខ៥៥ ខែសីហា ឆ្នាំ២០១០
Leave a Reply