ស្បែកស្អាតគឺជាវត្ថុសំខាន់ ដែលនរណាៗក៏ចង់បានដែរ ទោះបីជាអ្នកនោះស្ថិតក្នុងវ័យកម្រិតណាក៏ដោយ។ ព្រោះស្បែកស្អាតគឺជាចំណុចសំខាន់មួយដែលទាក់ទាញការចាប់អារម្មណ៍ពីអ្នកដទៃ។ ដូចនេះហើយទើបមនុស្សម្នាក់ៗខិតខំប្រឹងប្រែងថែរក្សា ស្បែកមិនឱ្យមានស្លាកស្នាមកន្ទួលរមាស់ ទោះជាត្រូវថែទាំស្បែកតាមវិធីណាក៏ដោយ។ បើសិនលោកអ្នកមានស្បែកមិនស្អាតដូចសេចក្ដីប៉ងប្រាថ្នា តើលោកអ្នកមានអារម្មណ៍យ៉ាងណា។
សម្រាប់លេខនេះ ទស្សនាវដ្ដី សុខភាពយើង បានអញ្ជើញលោកវេជ្ជបណ្ឌិត ថៃ គា អ្នកឯកទេសជម្ងឺសើស្បែក និងកាមរោគ ធ្វើការបកស្រាយបំភ្លឺពីវិធីបំបាត់ស្បែកកន្ទួលរមាស់ ជូនប្រិយមិត្ដអ្នកអានឱ្យបានស្វែងយល់។
មូលហេតុបង្កឱ្យស្បែកមានកន្ទួលរមាស់
មានជម្ងឺជាច្រើនដែលធ្វើឱ្យស្បែកចេញកន្ទួលរមាស់បណ្ដាលឱ្យស្បែកមិនស្អាត ខ្លះជាប្រភេទជម្ងឺឆ្លង ខ្លះទៀតជាជម្ងឺមិនឆ្លង និងខ្លះទៀតបណ្ដាលមកពីការប៉ះពាល់ទៅនឹងសារធាតុផ្សេងៗ។
- ជម្ងឺស្រែង ៖ ជាជម្ងឺដែលកើតឡើងដោយមេរោគផ្សិតលើស្រទាប់ស្បែកខាងក្រៅ ហើយធ្វើឱ្យរមាស់ស្បែកនៅត្រង់កន្លែងដែលកើតបណ្ដាលឱ្យអ្នកជម្ងឺចង់តែអេះ។ ពេលនោះហើយជាហេតុធ្វើឱ្យមានការរបកស្បែក ឬដាច់ស្បែកមានទឹករងៃ។
- កម ឬអាត់ ៖ ជាជម្ងឺសើស្បែកដែលឆ្លងរាលដាលពីមនុស្សម្នាក់ទៅមនុស្សម្នាក់ទៀត រំខានដល់អ្នកជម្ងឺដោយសារការរមាស់។ ពេលនោះអ្នកជម្ងឺទ្រាំនឹងការរមាស់មិនបានច្រើនតែអេះ។ ក្រោយពីអេះហើយ ស្បែកមានរបក និងកន្ទួលរមាស់ អាចខ្ទុះ។
- ជម្ងឺត្រអក ៖ ជាជម្ងឺសើស្បែកដែលមាន២ប្រភេទ គឺត្រអកដែលបណ្ដាលមកពីកត្ដាខាងក្នុងខ្លួន ធ្វើឱ្យមានចេញកន្ទួល រមាស់លើស្បែក ដែលភាគច្រើនកើតនៅលើកូនក្មេង។ ត្រអកដែលបណ្ដាលមកពីការប៉ះពាល់នឹងសារធាតុខាងក្រៅ ដូចជាសាប៊ូ ជាតិដែកក្រូម៉េ ក្បាលខ្សែក្រវាត់ គ្រឿងកាឡៃជាដើម ភាគច្រើនកើតនៅលើមនុស្សចាស់ នឹងវ័យជំទង់។
- កន្ទាលត្រអាក ៖ ការកើតកន្ទាលត្រអាក មិនបានធ្វើឱ្យស្បែកមានស្លាកស្នាមទេ ព្រោះវាជាជម្ងឺសើស្បែក។ ជម្ងឺនេះធ្វើឱ្យរមាស់ខ្លាំងណាស់នៅលើស្បែក ដែលជាហេតុធ្វើឱ្យលោកអ្នកអេះរហូតបាត់រមាស់។ កាលណាកាន់តែអេះ កាន់តែមានផ្ទាំងកន្ទួលធំឡើងៗនៅលើស្បែក។ បើមិនអេះទេ វានឹងរលុបបាត់ទៅវិញដោយមិនបន្សល់ស្លាកស្នាមឡើយ។
- ប្រព័ន្ធការពារខ្លួនចុះខ្សោយ ៖ ដូចជាអ្នកកើតជម្ងឺអេដស៍ ទឹកនោមផ្អែម តម្រងនោម របេងជាដើម ងាយរងគ្រោះជម្ងឺផ្សិត បណ្ដាលឱ្យស្បែកចេញជាកន្ទួលរមាស់ច្រើនប្រភេទផ្សេងៗគ្នា នៅពេលប្រព័ន្ធភាពស៊ាំចុះទាប។
វិធីបំបាត់ស្បែកកន្ទួលរមាស់
ការកើតកន្ទួលរមាស់នៅលើស្បែក សុទ្ធតែកើតឡើងដោយសារហេតុផលផ្សេងៗពីគ្នា ហើយជាជម្ងឺសើស្បែកទាំងអស់។ ហេតុនេះការបំបាត់ស្បែកដែលមានកន្ទួលរមាស់ ត្រូវព្យាបាលទៅតាមមូលហេតុនីមួយៗ។ ការថែទាំដើម្បីកុំឱ្យមានស្លាកស្នាមនៅលើស្បែក លោកអ្នកត្រូវចេះអត់ធ្មត់កុំអេះតាមចំណង់ ព្រោះបើអេះដាច់ស្បែកធ្វើឱ្យដំបៅក្លាយ និងបង្កជាសម្លាកអាក្រក់នៅពេលសះស្បើយ។ ម្យ៉ាងទៀតទោះបីជាលោកអ្នកកន្ទួលរមាស់ដោយសារមូលហេតុណាមួយក៏ដោយ លោកអ្នកត្រូវទទួលទានឱសថជាថ្នាំលេប ដើម្បីបំបាត់ការកន្ទួលរមាស់នៅលើស្បែក ព្រមទាំងថ្នាំលាបនៅលើស្បែកទៅតាមទីតាំងដែលកើតកន្ទួលរមាស់ និងតាមប្រភេទ ស្បែក។
ដំបូន្មានអ្នកឯកទេស
លោកអ្នកមួយចំនួននៅពេលដែលស្បែកមានការរមាស់ តែងតែអេះដោយមិនខ្លាចស្បែករបក ឬក្លាយឡើយ។ ជួនកាលតែងតែទៅទិញថ្នាំមកប្រើប្រាស់ដោយខ្លួនឯង ដើម្បីបំបាត់ស្បែកកន្ទួលរមាស់ នេះជាប្រការមួយដែលខុសឆ្គង។ ប្រការដែលល្អ លោកអ្នកគួរតែទៅជួបគ្រូពេទ្យជំនាញ ដើម្បីពិនិត្យ និងព្យាបាលទៅតាមប្រភេទស្បែក និងរកមូលហេតុដែលនាំឱ្យកើតឡើង។
ប្រភព ៖ ទស្សនាវដ្តី សុខភាពយើង លេខ៥៥ ខែសីហា ឆ្នាំ២០១០
Leave a Reply