មនុស្សម្នាក់ៗតែងតែគិតថា សុខភាពជាបញ្ហាចម្បងសម្រាប់ខ្លួន ព្រោះវាជាសត្រូវមួយដ៏ធំតាមយាយីនិងបៀតបៀនលើរាងកាយមនុស្សយើងគ្រប់ពេលវេលា។ ដូច្នេះហើយសម្រាប់កញ្ញាសាច់សខ្ចីជាពិធីការិនី និងតារាសម្ដែង ហេង ម៉ារ៉ាឌី បានចាត់ទុកថា សុខភាពគឺមានតម្លៃជាងមាសពេជ្រ ព្រោះថាមាសពេជ្រនាងអាចទិញបាន តែសុខភាពល្អមិនមានដាក់លក់លើទីផ្សារឡើយ។
ទោះបីជាការងារសិល្បៈរបស់កញ្ញាស្រស់សោភា ហេង ម៉ារ៉ាឌី មានភាពមមាញឹកយ៉ាងណាក្ដីក៏កញ្ញាឆ្លៀតពេលវេលាដ៏មាន តម្លៃរបស់ខ្លួនធ្វើការបកស្រាយពីការថែទាំសុខភាពនិងសម្រស់តាមរយៈទស្សនាវដ្ដី សុខភាពយើង ដើម្បីជម្រាបជូនដល់មិត្ដសុភាពនារីគ្រប់វ័យទាំងអស់យកទៅអនុវត្ដជួយឱ្យសម្រស់កាន់តែស្រស់ថ្លាយូរអង្វែង។
ប្រវត្ដិចូលសិល្បៈ
តាមរយៈការប្រឡងជ្រើសរើសកញ្ញាឯកសាប៊ូលុច្សទទួលបានជ័យលាភីលេខ១ កញ្ញា ហេង ម៉ារ៉ាឌី បានចាប់ផ្ដើមវិវឌ្ឍន៍ ខ្លួនចូលប្រឡូកក្នុងវិស័យសិល្បៈនាចុងឆ្នាំ២០០៤ ទទួលបាននូវផ្លែផ្កាដ៏ត្រចះត្រចង់មួយ។ បន្ទាប់ពីជាប់ជាតារាឯកសាប៊ូលុច្សហើយ កញ្ញា ហេង ម៉ារ៉ាឌី ត្រូវបានហាងកាត់ដេរសម្លៀកបំពាក់មួយអញ្ជើញនាងឱ្យទៅថតម៉ូដខោអាវឱ្យគេ។ ក្រោយមកទៀតនាងបានក្លាយទៅជាអ្នកកាន់កម្មវិធីរ៉េវឡន។ បន្ទាប់មកទៀតក៏ក្លាយទៅជាពិធីការិនីប្រចាំប៉ុស្ដិ៍លេខ៣នៅក្នុងកម្មវិធី “តាមដានកម្សាន្ដ”។ ក្រោយពេលបញ្ចប់ការងារនៅប៉ុស្ដិ៍លេខ៣ កញ្ញា ហេង ម៉ារ៉ាឌី បានឈានជើងចូលប៉ុស្ដិ៍លេខ៥នៅក្នុងកម្មវិធី“ជំហានតារា” តន្ដ្រីចុង សប្ដាហ៍ “ម៉ូឌែលខុនសឺត” កម្មវិធី “ស្ដ្រីដើម្បីស្ដ្រី” ហើយពេលនេះនាងកំពុងតែមមាញឹកនឹងកម្មវិធីថ្មីមួយទៀតគឺ “សុខភាពនិងជីវិត” ។
ការថែរក្សាសម្រស់
ខណៈពេលដែលកញ្ញា ហេង ម៉ារ៉ាឌី មានភាពមមាញឹកក្នុងការងារជាតារាសម្ដែងនិងជាពិធីការិនីប្រចាំស្ថានីយទូរទស្សន៍ ប៉ុស្ដិ៍លេខ៥នោះ កញ្ញាក៏មិនដែលភ្លេចអំពីការថែរក្សាសម្រស់និងសុខភាពនោះទេ។ ព្រោះកញ្ញាយល់ថាវាជាការចាំបាច់ណាស់ត្រូវតែ យកចិត្ដទុកដាក់ ហើយបើសុខភាពល្អក៏នាំមកនូវភាពជោគជ័យផងដែរ។ ខាងក្រោមនេះគឺជាវិធីថែទាំសម្រស់និងសុខភាពរបស់ ហេង ម៉ារ៉ាឌី ដែលបានធ្វើការអនុវត្ដជាប្រចាំមុនពេលសម្ដែងនិងក្រោយពេលសម្ដែង។
- ការថែរក្សាសក់ ៖ សរសៃសក់គឺបញ្ហាសំខាន់មួយដែល ម៉ារ៉ាឌីតែងតែយកចិត្ដទុកដាក់ថែរក្សាជានិច្ចមុននឹងក្រោយពេល ឡើងលើឆាកម្ដងៗ។ ព្រោះថាមុននឹងឡើងកម្មវិធី នាងតែងតែធ្វើសក់ឱ្យសក្ដិសមទៅនឹងកម្មវិធីនីមួយៗ។ បន្ទាប់ពីចប់កម្មវិធីនាងបានវិលត្រឡប់មកផ្ទះវិញត្រូវតែកក់លាងសម្អាត ហើយជ្រើសរើសសាប៊ូណាដែលត្រូវនឹងសក់របស់ខ្លួន។ មិនត្រឹមតែប៉ុណ្ណោះ ម៉ារ៉ាឌី ក៏ជ្រើសរើសវិធីថែសរសៃសក់តាមរយៈការទទួលទានអាហារ និងផ្លែឈើ ដែលអាចជួយជំរុញដល់សុខភាពសរសៃសក់មានសភាពរស់
រវើក។ ម្យ៉ាងទៀតនាងតែងតែអប់សក់ជានិច្ចដើម្បីឱ្យសរសៃសក់មានសំណើមមិនបែកចុង។ នាងក៏ជ្រើសរើសវិធីថែរក្សាសក់មួយសប្ដាហ៍កក់៣-៤ថ្ងៃផងដែរ។ - ការថែរក្សាស្បែកមុខ ៖ សម្រាប់ម៉ារ៉ាឌី ផ្ទៃមុខនាងតែងតែលាងសម្អាតរាល់ថ្ងៃនៅពេលដែលវិលត្រឡប់ពីថតឬសម្ដែង វិញ ត្រូវតែលុបលាងជានិច្ចជាមួយនឹងវ៉ូមដែលត្រូវនឹងស្បែកមុខរបស់នាង ព្រោះវាជាចំណុចសំខាន់ណាស់សម្រាប់អាជីពនាងជាពិធីការិនីនិងតារាសម្ដែង។ បន្ទាប់មកនាងយកម៉ាសមកបិទមុខ គឺជាម៉ាសដែលមានស្លាកយីហោត្រឹមត្រូវ ហើយក៏ត្រូវប្រើឡេការពារ ពេលយប់មកលាបថែមទៀត។ ម្យ៉ាងទៀតនៅពេលចេញទៅសម្ដែង ម៉ារ៉ាឌីក៏ប្រើប្រាស់ឡេការពារកម្ដៅថ្ងៃលើផ្ទៃមុខផងដែរ។
- ការថែរក្សាដងខ្លួន ៖ ដោយឡែកចំពោះស្បែកដងខ្លួន ម៉ារ៉ាឌីធ្វើការថែទាំតាមរបៀបស្រដៀងនឹងស្បែកមុខផងដែរ ដោយដុសនឹងសាប៊ូ និងលាបឡេការពារកម្ដៅថ្ងៃដែលមានបច្ចេកទេសគឺពីរម៉ោងលាបម្ដង ដើម្បីឱ្យសាច់ដងខ្លួនមានភាពសភ្លឺថ្លាគ្រប់ពេលវេលា ហើយត្រូវទទួលទានបន្លែ ផ្លែឈើ និងហាត់ប្រាណឱ្យបានទៀងទាត់ផងដែរ។
- ការថែរក្សាធ្មេញ ៖ រីឯសុខភាពមាត់ធ្មេញ ម៉ារ៉ាឌីជ្រើសរើសការថែទាំដោយដុសធ្មេញមួយថ្ងៃ៣ដង ពេលព្រឹកម្ដង និងមុនចូលគេងម្ដង និងក្រោយពេលទទួលទានអាហាររួច។ មិនត្រឹមតែប៉ុណ្ណោះ នាងឧស្សាហ៍ទៅកាន់មន្ទីរពេទ្យធ្មេញទៀតផង ដើម្បីឱ្យគ្រូពេទ្យសម្អាតធ្មេញបង្កើនភាពរឹងមាំ និងមានក្លិនមាត់ល្អ។ ជាទូទៅចំពោះការសម្អាតធ្មេញ កញ្ញាតែងតែទៅមន្ទីរព្យាបាលធ្មេញរាល់១ខែពីរដង។
- ការថែរក្សាភ្នែក ៖ ចំពោះភ្នែក ម៉ារ៉ាឌីតែងតែមានការការពារជានិច្ចរាល់ពេលថតសម្ដែង នៅពេលនាងមានអាការ ដូច ជាព្រិលភ្នែក នាងតែងតែយកកន្សែងត្រជាក់មកជូតឬមកស្អំលើភ្នែកធ្វើឱ្យភ្នែករបស់នាងមានភាពប្រសើរឡើងវិញ។
- ការថែរក្សារោមភ្នែក ចិញ្ចើម បបូរមាត់ ៖ ម៉ារ៉ាឌីតែងតែយកចិត្ដទុកដាក់យ៉ាងខ្លាំងទៅលើរោមភ្នែក ដោយប្រើម៉ាសការ៉ាណាដែលអាចថែរក្សារោមភ្នែកឱ្យបានល្អ។ ចំពោះបបូរមាត់ កញ្ញាស្វែងរកក្រេមដែលល្អដើម្បីធ្វើការការពារយកមកលាបលើបបូរមាត់មិនអាចខានបានឡើយ ព្រោះត្រូវការពារកុំឱ្យបបូរមាត់ប្រេះ។ ចំពោះចិញ្ចើមនាងថែរក្សាដោយគូរធម្មតាប៉ុណ្ណោះ។
- ការថែរក្សាក្រចកដៃ និងក្រចកជើង ៖ ចំពោះក្រចកដៃក្រចកជើង ម៉ារ៉ាឌីលាបនិងកែលម្អជារៀងរាល់ថ្ងៃ និងប្ដូរពណ៌ ជានិច្ចទៅតាមកម្មវិធីផ្សេងៗ។ ជាមួយគ្នានេះដែរ នាងតែងតែសម្អាតជាមួយក្រូចឆ្មារនិងខ្ទឹមសហើយត្រាំទឹកក្ដៅ និងឱ្យជាងសម្អាត ជាប្រចាំផងដែរ។ ចំពោះប្រអប់ដៃប្រអប់ជើង នាងតែងតែប្រើឡេការពារជានិច្ចដើម្បីឱ្យមានភាពស្រឡូនល្អ។
សុខភាពរាងកាយជាការចាំបាច់ មានតម្លៃស្មើជីវិត
ក្នុងនាមជាពិធីការិនីនិងតារាសម្ដែង ម៉ារ៉ាឌីតែងតែប្រកាន់ខ្ជាប់ជានិច្ចចំពោះសម្រស់រាងកាយ និងសុខភាព គឺជាការចាំបាច់ សម្រាប់អាជីពដូចនាង។ ដូច្នេះហើយសម្រាប់ម៉ារ៉ាឌី នៅពេលដែលនាងមកពីការសម្ដែងមានអាការនឿយហត់ នាងត្រូវតែទទួលទាន អាហារឱ្យបានគ្រប់គ្រាន់ដែលមានសារជាតិបន្លែផ្លែឈើច្រើនជាងសាច់។ ជាពិសេសនាងតែងតែជ្រើសរើសផ្លែឈើណាដែលជួយសម្អាតគ្រឿងក្នុងខ្លួន។ លើសពីនេះដើម្បីឱ្យរាងកាយមាំមួននិងសម្រស់កាន់តែស្រស់ស្អាត នាងក៏ជ្រើសរើសការហាត់កីឡាស្ទើររាល់ថ្ងៃដែរ បើទោះបីនាងមិនបានចេញទៅហាត់នៅតាមក្លឹបក៏នាងហាត់នៅផ្ទះផងដែរ ដោយវិធីងាយៗដែលអាចធ្វើទៅបាន។ ចំពោះកីឡាដែលចូលចិត្ដជាងគេ គឺកីឡាបោះប៊ូលីង និងរត់។
បំណងទៅថ្ងៃអនាគត ៖
កញ្ញា ហេង ម៉ារ៉ាឌី បានបញ្ជាក់ថា ថ្ងៃអនាគតចង់ក្លាយទៅជាអ្នករកស៊ីបើកភោជនីយដ្ឋាន និងកែសម្ផស្ស។
បណ្ដាំផ្ញើ ហេង ម៉ារ៉ាឌី
មិត្ដយុវវ័យទាំងអស់ កត្កាដែលសំខាន់នោះគឺសុខភាពរឹងមាំ។ ជាពិសេសការទទួលទានចំណីអាហារគឺត្រូវគិតពីសុខភាព នៅពេលដែលយើងចាស់ទៅ ហើយត្រូវងាកទៅរកកីឡាណាដែលធ្វើឱ្យយើងចំណេញពេល និងទទួលបាននូវសុខភាពល្អ។ ចំពោះមនុស្សចាស់វិញ ក៏ត្រូវជ្រើសរើសពេលវេលាហាត់ប្រាណផងដែរ ជាពិសេសទទួលទានចំណីអាហារ និងផ្លែឈើឱ្យបានត្រឹមត្រូវ ដើម្បីទប់ស្កាត់កុំឱ្យមានជម្ងឺឈឺថ្កាត់ផ្សេងៗ។
ប្រវត្ដិរូបសង្ខេប ៖
- ហេង ម៉ារ៉ាឌី
- អាយុ ២៦ឆ្នាំ
- កម្ពស់ ១.៥៨ម៉ែត្រ
- ទម្ងន់ ៤៥គីឡូក្រាម
- ទំហំទាំងបី ៣៥ ២៦ ៣៦
- បងប្អូន ៥នាក់ ស្រី៣ ជាកូនទី៣
- ទីកន្លែងកំណើត ភ្នំពេញ
- អាជីពបច្ចុប្បន្ន តារាសម្ដែង និងពិធីការិនី
- កម្រិតវប្បធម៌ ត្រឹមថ្នាក់ទី៩ វិទ្យាល័យចាក់អង្រែ
- ស្ថានភាពគ្រួសារ នៅលីវ
ប្រភព ៖ ទស្សនាវដ្តី សុខភាពយើង លេខ៥៥ ខែសីហា ឆ្នាំ២០១០
Leave a Reply