ភាពក្រីក្រក៏ជាចំណែកមួយដែលងាយនឹងធ្វើឱ្យកើតមានជម្ងឺផ្លូវចិត្ដ។ ជម្ងឺផ្លូវចិត្ដតែងតែបង្កផលលំបាកដល់សង្គមយ៉ាងធ្ងន់ធ្ងរ ជាពិសេសការកើតមានអំពើហិង្សា។ បច្ចុប្បន្ននេះអំពើហិង្សាតែងតែកើតមានជាញឹកញាប់ ចំពោះប្រជាពលរដ្ឋដែលមានជីវភាពក្រីក្រ ហើយខ្វះចំណេះដឹង ដែលជាហេតុធ្វើឱ្យមានការព្រួយបារម្ភយ៉ាងខ្លាំងសម្រាប់សង្គម និងប្រទេសដែលកំពុងអភិវឌ្ឍ។
នៅក្នុងទស្សនាវដ្ដី សុខភាពយើង លោកវេជ្ជបណ្ឌិត សុខ សេដ្ឋបុត្រ អ្នកឯកទេសផ្នែកសុខភាពផ្លូវចិត្ដនៃមន្ទីរពេទ្យមិត្ដ ភាពខ្មែរ-សូវៀត បកស្រាយអំពីភាពក្រីក្រ និងសុខភាពផ្លូវចិត្ដ ដើម្បីលោកអ្នកបានយល់។
ទំនាក់ទំនងភាពក្រីក្រ និងសុខភាពផ្លូវចិត្ដ
ភាពក្រីក្រអាចបណ្ដាលមកពីកត្ដាច្រើនយ៉ាងដែលបណ្ដាលឱ្យមានបញ្ហាសុខភាពផ្លូវចិត្ដ តែងតែកើតលើបុគ្គលដែលរស់នៅក្នុងស្ថានភាពខ្វះខាតដូចជា ៖
- ការភៀសខ្លួនមកទីក្រុង ៖ ជនភៀសខ្លួនមកនៅទីក្រុង ច្រើនតែរស់នៅក្នុងតំបន់អនាធិបតេយ្យ ដែលបណ្ដាញសង្គមមានតិចតួចប៉ុណ្ដោះ ដែលមានស្ដ្រី កុមារ និងចាស់ជរាត្រូវក្លាយជាជនឯកោដោយសមាជិកសកម្មរកកម្រៃចូលផ្ទះបានបាត់បង់។
- ខ្វះខាតធនធាន និងអនាម័ក្នុងការរស់នៅ ៖ ស្ថានភាពរស់នៅប្រកបដោយភាពខ្វះខាតធនធាន និងកង្វះអនាម័យដែលមានដូចជាកង្វះនូវទឹកស្អាតនៅក្នុងការប្រើប្រាស់ កង្វះអាហារូបត្ថម្ភ បរិយាយកាសអាប់អួ ចំពោះការរស់នៅក្នុងស្ថានភាពនេះ នាំឱ្យអារម្មណ៍តានតឹងចិត្ដ និងមិនមានភាពរីករាយឡើយ។
- កង្វះចំណេះដឹង ៖ កង្វះចំណេះដឹងធ្វើឱ្យពិបាកនៅក្នុងការស្វែងរកការងារធ្វើដើម្បីផ្គត់ផ្គង់នៅក្នុងគ្រួសារ ដែលជាហេតុមិនអាចឱ្យបុគ្គលទាំងនោះមិនមានវិធីចេញអំពីភាពក្រីក្របាន ដែលតែងតែមានចិត្ដអស់សង្ឃឹមនឹងអនាគតរបស់ពួកគេ។
- គ្មានលទ្ធភាពក្នុងការថែទាំសុខភាព ៖ អ្នកក្រីក្រមានលទ្ធភាពតិចតួចណាស់នៅក្នុងការថែទាំសុខភាពឱ្យបានត្រឹមត្រូវ។ ដូចនេះអ្នកក្រីក្រតែងតែមានបន្ទុកធ្ងន់ធ្ងរ នៅពេលដែលកើតមានជម្ងឺខាងផ្លូវកាយ។ ជម្ងឺផ្លូវកាយនេះក៏ជាហេតុដែលងាយនឹងធ្វើឱ្យកើតមានជម្ងឺផ្លូវចិត្ដជាញឹកញាប់។
ផលប៉ះពាល់របស់ភាពក្រីក្រ ដល់សុខភាពផ្លូវចិត្ដ
បុគ្គលដែលរស់នៅក្នុងភាពក្រីក្រងាយនឹងរងគ្រោះដោយជម្ងឺផ្លូវចិត្ដណាស់ ជាពិសេសធ្វើឱ្យប៉ះពាល់ដល់សង្គមទៀតផង។ ភាពក្រីក្រ និងសុខភាពផ្លូវចិត្ដតែងតែបង្កផលលំបាកដល់សង្គមជាខ្លាំង ជាពិសេសបង្កឱ្យមានភាពរញ៉េរញ៉ៃដល់សង្គម មានការប្រើអំពើហិង្សា(ប្លន់ សម្លាប់ រំលោភ) ការជួញដូរផ្លូវភេទ បង្កើតបក្សពួក(ក្មេងទំនើង) ឬការប្រើប្រាស់ថ្នាំញៀនជាដើម។ នៅពេលដែលមានអំពើហិង្សានៅក្នុងគ្រួសារ ឬសង្គម ងាយនឹងបង្កការលំបាកយ៉ាងធ្ងន់ធ្ងរចំពោះសុខភាពផ្លូវចិត្ដសម្រាប់អ្នករងគ្រោះ ដូចជាធ្វើឱ្យបញ្ញាអាប់ ឬវិកលចិត្ដ ជាពិសេសធ្វើឱ្យប៉ះពាល់ដល់សមត្ថភាពបុគ្គលដែលមិនអាចបន្ដការសិក្សាបាន ដូចនេះឱកាសក្នុងការស្វែងរកការងារធ្វើមានតិចតួចណាស់សម្រាប់អនាគតរបស់ពួកគេ។
ការព្យាបាលសុខភាពផ្លូវចិត្ដដែលបង្កដោយភាពក្រីក្រ
អ្នកក្រីក្រមួយចំនួនតែងតែមានការខ្វះខាតនៅក្នុងការព្យាបាលចំពោះជម្ងឺផ្លូវកាយ និងផ្លូវចិត្ដ ព្រោះតម្លៃនៃការប្រើប្រាស់ សេវាសុខភាពមិនអាចផ្ដល់ឱ្យដោយឥតគិតថ្លៃនោះទេ។ ចំណែកឯការថែទាំសុខភាពផ្លូវកាយ និងផ្លូវចិត្ដក៏កាន់តែថ្លៃឡើងៗ បើនិយាយអំពីឱសថក៏ឡើងថ្លៃជារៀងរាល់ថ្ងៃ ធ្វើឱ្យមានការលំបាកជាខ្លាំងចំពោះប្រជាពលរដ្ឋក្រីក្រ។ ក្រីក្រតែងតែស្វែងរកកន្លែងដែលមានតម្លៃថោកៗឱ្យសមនឹងសមត្ថភាពរបស់ពួកគេ ដូចជានៅតាមអង្គការជាដើម។ ចំពោះការព្យាបាលសុខភាពផ្លូវចិត្ដ គឺទាមទារការយកចិត្ដទុកដាក់បំផុត ជាពិសេសគឺការប្រើថ្នាំ និងផ្ដល់ភាពកក់ក្ដៅឱ្យអ្នកជម្ងឺមានអារម្មណ៍ល្អជានិច្ច។
វិធីការពារកុំឱ្យកើតមានបញ្ហាផ្លូវចិត្ដនៅពេលដែលមានភាពក្រីក្រ
ដើម្បីកុំឱ្យកើតមានបញ្ហាទាំងនេះ នៅក្នុងប្រទេសនីមួយៗតែងតែមានវិធានការក្នុងការលើកកម្ពស់សុខភាពផ្លូវចិត្ដចំពោះអ្នកក្រីក្រ ដែលមានដូចជា ៖
- បង្កើតសហគមន៍សម្រាប់អ្នកក្រីក្រ ៖ ការបង្កើតសហគមន៍គឺមានសារៈសំខាន់ណាស់សម្រាប់អ្នកក្រីក្រដែលមានបញ្ហាសុខភាពផ្លូវចិត្ដ ដូចជាបង្កើតឱ្យមានផ្ទះសម្បែងរស់នៅបានត្រឹមត្រូវ មានការប្រីប្រាស់ទឹកស្អាត បង្កើតកម្មវិធីអនាម័យសម្រាប់សុខភាព បង្កើតមុខរបរសម្រាប់ចិញ្ចឹមជីវិត សាងសង់មន្ទីរពេទ្យសាលារៀន វត្ដអារាមជាដើម។
- ភាពស្មើគ្នាចំពោះយេនឌ័រ ៖ យេនឌ័រគឺជាពាក្យមួយដែលបង្កើតឱ្យមានភាពស្មើគ្នារវាងតំណែង តួនាទី សិទ្ធ និងអំណាច រវាងបុរសនិងស្ដ្រី ដោយមិនមានការប្រើអំពើហិង្សា មិនមានការរើសអើងចំពោះអ្នកទន់ខ្សោយ មិនមានការរំលោភបំពានទៅលើជនណាម្នាក់ឡើយ។
- លើកកម្ពស់សុខភាពផ្លូវចិត្ដ ៖ មានសារៈសំខាន់ណាស់សម្រាប់អ្នកក្រីក្រដែលមានបញ្ហាសុខភាពផ្លូវចិត្ដការធ្វើបែបនេះក៏អាចជួយព្យាបាលចំពោះអ្នកជម្ងឺផងដែរ ព្រោះអ្នកជម្ងឺផ្លូវចិត្ដតែងតែចង់បានបំផុតនូវអ្វីដែលគេត្រូវការ គឺការយល់ចិត្ដពីអ្នកដែលនៅជុំវិញខ្លួនក៏ដូចជាសង្គមទាំងមូល។
- ជំរុញឱ្យមានការរៀនសូត្រ ៖ ការរៀនសូត្រមានសារៈសំខាន់ណាស់សម្រាប់មនុស្សម្នាក់ៗ។ ហើយការរៀនសូត្រនេះ អាចធ្វើឱ្យអ្នកដែលមានជីវភាពក្រីក្រចៀសផុតពីភាពក្រីក្របាន ជាពិសេសគឺអាចធ្វើឱ្យសង្គមមានការរីកចម្រើន និងមិនអាចកើតមានអំពើហិង្សាបាននោះទេ។
ដំបូន្មានអ្នកជំនាញ
ដើម្បីចៀសផុតពីភាពក្រីក្រ និងការកើតមានចំពោះជម្ងឺផ្លូវចិត្ដបាន លោកអ្នកគួរតែបញ្ឈប់ការប្រើអំពើហិង្សា ការប្រើប្រាស់គ្រឿងស្រវឹង គ្រឿងញៀនជាដើម។ ព្រោះអំពើទាំងនេះមិនត្រឹមតែធ្វើឱ្យមានភាពក្រីក្រនោះទេ ថែមទាំងធ្វើឱ្យបាត់បង់ អនាគតដ៏ល្អថែមទៀតផង។
ប្រភព ៖ ទស្សនាវដ្តី សុខភាពយើង លេខ៥៣ ខែមិថុនា ឆ្នាំ២០១០
Leave a Reply