ការធ្វើលំហាត់ប្រាណបញ្ចេញញើសដែលជាសារធាតុពុលចេញពីរាងកាយ គឺជាប្រការល្អមួយដែលគួរតែយកចិត្ដទុកដាក់។ ការហាត់ប្រាណក៏ដូចជាការលេងកីឡា គឺសុទ្ធតែអាចបញ្ចេញនូវសារជាតិពុលផ្សេងៗមកខាងក្រៅតាមរយៈញើសនេះឯង។ កីឡាអាចជួយធ្វើឱ្យសុខភាពរបស់យើងមានភាពមាំមួន ប្រាសចាកពីជម្ងឺតម្កាត់ទាំងពួងបាន ល្គឹកណាការហាត់ទាំងនោះប្រកបទៅតាមក្បួនច្បាប់ត្រឹមត្រូវដែលបានកំណត់។ ផ្ទុយទៅវិញ ប្រសិនបើការធ្វើលំហាត់ប្រាណហួសកម្លាំង មិនត្រឹមតែមិនបានផ្ដល់អត្ថប្រយោជន៍ មកដល់រាងកាយនោះ ថែមទាំងអាចបណ្ដាលឱ្យមានគ្រោះថ្នាក់ទៀតផង។
ដើម្បីប្រាសចាកពីគ្រោះថ្នាក់ដែលអាចកើតមានពីការហាត់កីឡាជាយថាហេតុ លោក ហ៊ី ឌីណារិន្ទ ប្រធានក្លឹបគីងកុង បានបកស្រាយតាមរយៈទស្សនាវដ្ដី សុខភាពយើង ទុកជាចំណេះដឹង និងជាជម្រើសខ្លះៗសម្រាប់ការធ្វើលំហាត់ប្រាណប្រចាំថ្ងៃ។
ប្រយោជន៍នៃការហាត់ប្រាណ
ការហាត់ប្រាណមានសារៈប្រយោជន៍ជាច្រើនសម្រាប់សុខភាពរាងកាយ និងសុខភាពផ្លូវចិត្ដ។ ជាពិសេសវាធ្វើឱ្យលោកអ្នក មានអារម្មណ៍សប្បាយរីករាយ ជ្រះថ្លាក្នុងចិត្ដ កាត់បន្ថយនូវភាពកង្វល់បានមួយចំណែក។ អ្វីដែលអស្ចារ្យជាងនេះទៅទៀត ការហាត់កីឡា អាចកាត់បន្ថយនូវអត្រាប្រឈមមុខទៅនឹងជម្ងឺ្ងបានថែមទៀតផង ដូចជាជម្ងឺលើសឈាម ជម្ងឺទឹកនោមផ្អែម ខ្សោយបេះដូងជាដើម។ ការហាត់ប្រាណតាមក្បួនខ្នាតត្រឹមត្រូវប្រកបដោយសុវត្ថិភាព មិនត្រឹមតែជួយកាត់បន្ថយជម្ងឺតែប៉ុណ្ណោះទេ ថែមទាំងជួយធ្វើឱ្យរាងកាយរបស់លោកអ្នកមាំមួន ស្អាតស្រស់សង្ហាទៅតាមបំណងប្រាថ្នាថែមទៀតផង។
កត្ដាដែលនាំឱ្យការហាត់ប្រាណមានសុខភាពល្អ
សុខភាពអាចមានភាពល្អប្រសើរដោយសារការធ្វើលំហាត់ប្រាណបានលុះត្រាតែសមស្របទៅនឹងក្បួនខ្នាតត្រឹមត្រូវ និងមានការកំណត់ច្បាស់លាស់។ ខាងក្រោមនេះគឺជាចំណុចសំខាន់មួយចំនួនដែលលោកអ្នកគួរតែអនុវត្ដ ដើម្បីធ្វើឱ្យការហាត់ប្រាណ របស់លោកអ្នកមានភាពប្រសើរ។
1 . ការហាត់ប្រាណដើម្បីសុខភាព
- ត្រូវធ្វើការកម្ដៅសាច់ដុំមុនពេលលោកអ្នកហាត់ប្រាណគ្រប់ប្រភេទ
- ចាប់ផ្ដើមជ្រើសរើស និងអនុវត្ដប្រភេទនៃការហាត់ប្រាណដែលលោកអ្នកប្រាថ្នា
- ត្រូវកំណត់ពេលវេលាក្នុងការហាត់ឱ្យបានសមស្របជាមួយសុខភាព
- បន្ទាប់ពីធ្វើការហាត់ចប់ ត្រូវសម្រាកដើម្បីសម្រួលសាច់ដុំ។
2 . ការហាត់ប្រាណដើម្បីបង្កើនសាច់ដុំ
- ត្រូវគិតវិភាគទៅលើទម្ងន់ដុំដែកដែលត្រូវលើក។ គួរគប្បីចាប់ផ្ដើមពីទម្ងន់ស្រាលបំផុតឡើងទៅ។
- ត្រូវផ្លាស់ប្ដូរប្រភេទកីឡា ដើម្បីជួយសម្រួលដល់ចលនាឈាម ចលនាបេះដូង និងខ្លាញ់ដែលរុំបេះដូង។
- ធ្វើការហ្វឹកហាត់តាមសម្រួលដោយធ្វើចលនាយឺតៗ មួយៗ ចៀសវាងការហាត់ដោយបង្ខំដែលជាហេតុធ្វើឱ្យមានការប៉ះពាល់ដល់សុខភាព។
- ត្រូវកំណត់ពេលហ្វឹកហាត់ឱ្យត្រឹមត្រូវទៅតាមក្បួនច្បាប់ ដោយធ្វើការហាត់រយៈពេល១ម៉ោងទៅ១ម៉ោង៣០នាទី
ក្នុងមួយថ្ងៃ និង៥ថ្ងៃក្នុងមួយសប្ដាហ៍។ ទុករយៈពេល២ថ្ងៃដើម្បីឱ្យសាច់ដុំបានសម្រាក និងធ្វើការលូតលាស់។
ផលប៉ះពាល់ដែលបណ្ដាលពីការហាត់លើសកម្រិត
ជាការពិតណាស់ ការហាត់ប្រាណបានផ្ដល់ប្រយោជន៍ជាច្រើនសម្រាប់សុខភាព។ ប៉ុន្ដែបើការហាត់មិនមានការវិភាគឱ្យបានត្រឹមត្រូវច្បាស់លាស់នោះទេ វានឹងផ្ដល់នូវគុណវិបត្ដិមកលើសុខភាពវិញជាក់ជាមិនខាន។ ជាអាទិការហ្វឹកហាត់ហួសកម្លាំង សុខភាពរាងកាយនឹងទទួលបានមកវិញនូវផលអវិជ្ជមានជាច្រើន ដូចជាបាក់កម្លាំង ឈឺក្បាល វិលមុខ ខ្យល់គរ ស្ទះសរសៃឈាម ឬគាំងបេះដូង ដែលជាហេតុបណ្ដាលឱ្យមានការប្រឈមមុខជាមួយនឹងគ្រោះថ្នាក់ដល់ជីវិត ប្រសិនបើមិនមានការទប់ស្កាត់ទាន់ពេលវេលា។
ចំពោះអ្នកដែលហ្វឹកហាត់តម្លើងសាច់ដុំហួសកម្រិត ក្រៅពីមិនអាចសមតាមបំណងប្រាថ្នារបស់លោកអ្នកនោះ ថែមទាំងអាចបង្កផលវិបាកយ៉ាងធ្ងន់ធ្ងរចំពោះសុខភាព។ ផលលំបាកដែលបណ្ដាលមកពីការហាត់ហួសកម្លាំងមានដូចជាប៉ះពាល់ដល់សន្លាក់ បាក់កម្លាំង ប្រេះឆ្អឹង ឈឺសាច់ដុំ រហែកសាច់ដុំ ស្ទះសរសៃឈាម និងគាំងបេះដូង។ ផលអាក្រក់ទាំងនេះកើតចេញពីការហ្វឹកហាត់ ដោយពុំមានការកំណត់ត្រឹមត្រូវ មិនមានក្បួនច្បាប់ច្បាស់លាស់។
ការជ្រើសរើសចំណីអាហារសម្រាប់អ្នកហាត់ប្រាណ
សុខភាពរបស់លោកអ្នកអាចមានភាពល្អប្រសើរទៅបានគឺអាស្រ័យទៅលើរបបចំណីអាហារជាកត្ដាចម្បង។ មិនថាជាកីឡាករ ឬជាជនសាមញ្ញនោះទេ ត្រូវតែមានការប្រុងប្រយ័ត្នជានិច្ច។ ដើម្បីចៀសវាងនូវផលអវិជ្ជមានដែលអាចកើតមានចំពោះសុខភាព លោកអ្នកគួរតែជ្រើសរើសនូវប្រភេទអាហារទាំងឡាយណាដែលពុំសូវសម្បូរទៅដោយជាតិខ្លាញ់ និងសម្បូរទៅដោយប្រូតេអ៊ីន ដូចជា សាច់មាន់ សាច់ទា ត្រី សាច់គោជាដើម។ លើសពីនេះអ្វីដែលចាំបាច់ត្រូវតែទទួលទានជាប្រចាំនោះគឺបន្លែ និងផ្លែឈើ។
ដំបូន្មានអ្នកជំនាញ
ការធ្វើលំហាត់ប្រាណអាចបញ្ចៀសនូវរាល់ជម្ងឺផ្សេងៗពីខ្លួនប្រាណរបស់លោកអ្នកបាន លុះត្រាតែស្ថិតនៅក្នុងក្រមមួយត្រឹមត្រូវ។ ក្នុងករណីដែលលោកអ្នកធ្វើលំហាត់ប្រាណលើសពីកម្លាំង មិនត្រឹមតែមិនអាចសមតាមបំណងប្រាថ្នារបស់លោកអ្នកប៉ុណ្ណោះទេ តែថែមទាំងបណ្ដាលឱ្យមានផលប៉ះពាល់ទៅដល់សុខភាពទៀត។ ដូច្នេះអ្វីដែលសំខាន់ លោកអ្នកគួរកំណត់ពេលវេលាឱ្យបានត្រឹមត្រូវ និងត្រូវមានគ្រូបង្វឹក ទើបជាការប្រសើរ។
ប្រភព ៖ ទស្សនាវដ្តី សុខភាពយើង លេខ៥៣ ខែមិថុនា ឆ្នាំ២០១០
Leave a Reply