សួតគឺជាសរីរាង្គម្យ៉ាងសំខាន់់សម្រាប់ពេលដកដង្ហើមចេញ-ចូល និងជាសម្ពាធមួយដ៏ធំធេង ជាអ្នកផ្ដល់ខ្យល់អុកស៊ីសែនដល់សរីរាង្គផ្សេងទៀត ដើម្បីឱ្យមានសំណើម និងជំរុញដល់ការចិញ្ចឹមផ្នែកផ្សេងៗឱ្យសរសៃឈាមរត់ល្អផងដែរ។ តែប្រសិនបើលោកអ្នកមានបញ្ហា ឬជម្ងឺសួតហើយនោះ វានឹងផ្ដល់នូវផលប៉ះពាល់យ៉ាងច្រើនដល់ការថមថយកម្លាំង និងអាចផ្ដាច់នូវការទំនាក់ទំនង ផ្សេងទៀតទៅនឹងសរីរាង្គមួយចំនួន ធ្វើឱ្យលោកអ្នកអាចប្រឈមនឹងគ្រោះថ្នាក់ផ្សេងៗរហូតដល់បាត់បង់អាយុជីវិត។
ដើម្បីបញ្ជាក់ឱ្យដឹងថា ជម្ងឺហើមសួតបង្កគ្រោះថ្នាក់យ៉ាងណាចំពោះលោកអ្នកនោះ ទស្សនាវដ្ដី សុខភាពយើង បានជួបសម្ភាសជាមួយលោកវេជ្ជបណ្ឌិត វ៉ាន់ ម៉ិច ឯកទេសជម្ងឺសួត និងហឺត នៃមន្ទីរពេទ្យមិត្ដភាពខ្មែរ-សូវៀត។
ជម្ងឺហើមសួតគឺជាអ្វី?
ជម្ងឺហើមសួតគឺជាជម្ងឺមួយប្រភេទដែលមានគ្រោះថ្នាក់បំផុតសម្រាប់លោកអ្នក ហើយក៏ជាជម្ងឺស្រួចស្រាវអាចធ្វើឱ្យលោកអ្នកស្លាប់បានដោយសារជម្ងឺនេះ ប្រសិនបើមិនធ្វើការព្យាបាលឱ្យទាន់ពេលវេលាទេនោះ។ ជម្ងឺនេះកើតឡើងដោយសារភាពមិនស្មើគ្នារវាងសមីការ។ ព្រោះជាធម្មតានៅក្នុងខ្លួនយើងគ្រប់រូបត្រូវមានកម្លាំងទប់ទឹកមិនឱ្យចេញមកក្រៅសរសៃឈាម ហើយនិងកម្លាំង មួយទៀតសម្រាប់រុទឹកឱ្យជ្រាបចេញពីសរសៃឈាមនៃកោសិកា តែបើកម្លាំងរុញទឹកនោះខ្សោយវាអាចច្រាលចូលទៅក្នុងសួតបង្កឱ្យលោកអ្នកមានជម្ងឺសួតតែម្ដង។
មូលហេតុដែលបណ្ដាលឱ្យមានជម្ងឺហើមសួត
ហេតុផលមួយចំនួនដែលបង្កឱ្យលោកអ្នកមានជម្ងឺហើមសួត។ ជំហានដំបូងអ្នកជម្ងឺអាចបង្កឡើងដោយសារមានជម្ងឺខ្សោយបេះដូងខាងឆ្វេង ជម្ងឺប្រើសបេះដូង ឬជម្ងឺរលាកត្រង់សួតផ្ទាល់តែម្ដង ដែលជាចំណុចសម្រាប់បញ្ចេញខ្យល់អុកស៊ីសែន។ មិនតែប៉ុណ្ណោះជម្ងឺហើមសួតអាចមានប្រភេទពីរយ៉ាងទៀត ហើមសួតដោយជម្ងឺបេះដូង និងហើមសួតដោយសារការរលាកត្រង់សួតតែម្ដង។
1 . ហើមសួតដោយជម្ងឺបេះដូង ៖ គឺកើតឡើងដោយសារភាពចុះខ្សោយនៃបេះដូង ធ្វើឱ្យកម្លាំងឈាមដែលច្របាច់ចេញ ពីបេះដូងមិនបានបណ្ដាលឱ្យឈាមចាល់ទៅទើរនៅថតសួតខាងលើផ្នែកខាងឆ្វេង ហើយក៏ជ្រាបទៅដល់សរសៃឈាមទងសួត ជាហេតុធ្វើឱ្យទឹកជ្រាបចេញ ហើយឆ្ពោះចូលទៅក្នុងសួតបង្កឱ្យមានជម្ងឺសួតតែម្ដង។
2 . ជម្ងឺហើមសួតដោយសាររលាកត្រង់សួត ៖ កើតឡើងដោយសារអ្នកជម្ងឺមានជម្ងឺខ្សោយតម្រងនោម ឬក៏ថ្លើម ហើយក៏អាចបណ្ដាលមកពីមានមេរោគកាចសាហាវមួយចំនួនទៀត ដែលចូលទៅដល់ក្នុងសួតបង្កឱ្យសួតមានការរលាក ហើយបង្កឱ្យហើម ដោយបណ្ដូរឧស្ម័នអុកស៊ីសែន បណ្ដាលឱ្យជ្រាបទឹកចូលក្នុងសួតក៏ឈានដល់មានជម្ងឺហើមសួតតែម្ដង។
រោគសញ្ញាជម្ងឺហើមសួត
ជម្ងឺហើមសួតបានបង្ហាញជារោគសញ្ញាថា មុនដំបូងលោកអ្នកចាប់ផ្ដើមដកដង្ហើមឮៗ ហើយដង្ហក់ត្រដរខ្យល់ ហើយនៅលើផ្ទៃមុខឡើងពណ៌ស្វាយ។ អ្នកជម្ងឺមានសម្លេងស្អកត្រង់បំពង់ក ស្លេស្មឡើង ហើយកំហាករបស់អ្នកជម្ងឺមានពណ៌សឬពណ៌កុលាប។ បន្ទាប់មកអ្នកជម្ងឺដកដង្ហើមតាមពោះ នៅលើទ្រូងមានអាការផឺតផត ហើយមានសម្លេងនៅក្នុងពោះដូច សត្វចង្រិតយំ ដោយមានលក្ខណៈពិសេសមួយមានសំលេងឮដេញពីក្រោមឡើងដល់លើ ហើយសម្លេងនេះបញ្ជាក់ថា អ្នកជម្ងឺមានអាការធ្ងន់ធ្ងរ បើទឹកជន់កាន់តែលឿន អ្នកជម្ងឺប្រឈមមុខនឹងការបាត់បង់ជីវិតកាន់តែលឿន។
វិធីព្យាបាលជម្ងឺហើមសួត
វិធីព្យាបាលជម្ងឺហើមសួតគឺធ្វើឡើងទៅតាមដំណាក់កាល ប្រសិនបើដំណាក់កាលដំបូងដែលអ្នកជម្ងឺមកពិគ្រោះជាមួយគ្រូពេទ្យទាន់ពេល មានន័យថាជម្ងឺទើបចាប់ផ្ដើមវិវឌ្ឍន៍ ការព្យាបាលពីសំណាក់ក្រុមគ្រូពេទ្យអាចព្យាបាលជាសះស្បើយ។ តែបើអ្នកជម្ងឺ មានសភាពធ្ងន់ធ្ងរទៅហើយ នោះការព្យាបាលប្រើពេលយូរ ហើយមិនមានការធានាថានឹងជាសះស្បើយឬយ៉ាងណានោះឡើយ។ ព្រោះការព្យាបាលនេះពឹងផ្អែកទៅលើស្ថានភាពជម្ងឺដើម បើអ្នកជម្ងឺមានជម្ងឺបេះដូងខ្សោយខ្លាំងក្លា ឬការរលាកសួតមានសភាពធ្ងន់ធ្ងរ ការព្យាបាលមិនអាចជួយឱ្យមានប្រសិទ្ធភាពផងដែរ។ ប៉ុន្ដែបើអ្នកជម្ងឺធ្វើរោគវិនិច្ឆ័យលឿនអាចជួយបានមួយកម្រិតបានដែរ។
វិធីការពារជម្ងឺហើមសួត
វិធីការពារគឺមិនមាននោះទេ ព្រោះជម្ងឺនេះកើតឡើងមិនបានឱ្យអ្នកជម្ងឺដឹងមុនឡើយ។ ព្រោះជាទូទៅវាអាចកើតមានឡើងដោយសារការរលាកសួត ឬបង្កឡើងដោយសារមេរោគនៅក្នុងឈាម ដែលមិនបានធ្វើការព្យាបាលឱ្យទាន់ពេលវេលាក៏បង្កើតឱ្យមានជម្ងឺសួតតែម្ដង។ ព្រោះសួតគឺជាសរីរាង្គមួយសម្រាប់បណ្ដុំសារធាតុទាំងអស់ដែលមានការឆ្លងកាត់ទៅកាន់សរីរាង្គផ្សេងៗ នឹងធ្វើបណ្ដូរឧស្ម័ន ដោយយកឧស្ម័នពុលចេញដាក់ជំនួសឧស្ម័នល្អបរិសុទ្ធចូល ដែលគេហៅថា អុកស៊ីសែនដើម្បីបញ្ចេញឧស្ម័នកាបូនិច។ ប៉ុន្ដែបើដឹងថាលោកអ្នកមានជម្ងឺហើមសួតហើយ គ្រូពេទ្យធ្វើវិធីការពារមួយផ្សេងទៀត គឺតម្រូវឱ្យអ្នកជម្ងឺទទួលទានថ្នាំ អាចបញ្ចុះ សម្ពាធទឹកឬឈាម ដែលចាល់ចេញពីក្នុងខ្លួនឱ្យលឿនតាមវិធីប្រើថ្នាំបញ្ចុះទឹកនោម តែថ្នាំទាំងនោះត្រូវតែទទួលការប្រឹក្សាពីវេជ្ជបណ្ឌិតជំនាញឱ្យច្បាស់លាស់។
ផលប៉ះពាល់របស់ជម្ងឺហើមសួត
ប្រសិនបើលោកអ្នកមានជម្ងឺហើមសួតហើយ តែមិនមានការព្យាបាលឱ្យទាន់ពេលវេលាទេ អ្នកជម្ងឺនឹងស្លាប់យ៉ាងលឿនបំផុត។ ព្រោះជម្ងឺនេះមានដំណាក់កាលរបស់វា គឺដំណាក់កាលទី១ ដំណាក់កាលទី២ ដំណាក់កាលទី៣ ហើយបើចូលដល់ដំណាក់កាលទី៣ ឬទី៤ហើយ អ្នកជម្ងឺពិតជាមិនអាចស្រោចស្រង់ជីវិតបានឡើយ។ ព្រោះប្រព័ន្ធសរីរាង្គផ្សេងៗដែលមានទំនាក់ទំនងជាមួយនឹងសួតត្រូវបានកាត់បំផ្លាញទាំងអស់ ដូចជាការនាំឈាមទៅចិញ្ចឹមសរីរាង្គបេះដូង ពោះវៀន ថ្លើម ក្រពះ ដែលបានរីកសាយភាយពីជម្ងឺនេះទទួលរងប៉ះពាល់យ៉ាងធ្ងន់ធ្ងរ ធ្វើឱ្យប្រព័ន្ធសរីរាង្គទាំងនេះលែងធ្វើការ អ្នកជម្ងឺត្រូវស្លាប់តែម្ដង។
ដំបូន្មានអ្នកជំនាញ
លោកអ្នកទាំងអស់ប្រសិនបើដឹងថា មានជម្ងឺសួតនៅដំណាក់កាលដំបូង គួរប្រញាប់រួសរាន់មកកាន់មន្ទីរពេទ្យឬទៅជួបគ្រូពេទ្យជំនាញ ដើម្បីធ្វើការពិនិត្យស្វែងរករោគវិនិច្ឆ័យនិងធ្វើការព្យាបាលឱ្យទាន់ពេលវេលា។ ព្រោះបើលោកអ្នកទុកយូរ ជម្ងឺនេះអាចវិវឌ្ឍន៍ទៅរកដំណាក់កាលធ្ងន់ធ្ងរមិនអាចព្យាបាលបាននោះលោកអ្នកនឹងបាត់បង់ជីវិតជាមិនខានឡើយ។ ព្រោះជម្ងឺហើមសួត ប្រសិនបើដឹងមុនអាចព្យាបាលបានជាសះស្បើយ ដោយប្រើរយៈពេលខ្លីតែប៉ុណ្ណោះ។
ប្រភព ៖ ទស្សនាវដ្តី សុខភាពយើង លេខ៥៣ ខែមិថុនា ឆ្នាំ២០១០
Leave a Reply