ការថែទាំ និងយកចិត្ដទុកដាក់ចំពោះសុខភាពជារឿងដែលលោកអ្នកចាំបាច់គិតគូរជាចម្បង។ ការហាត់ប្រាណសុទ្ធតែផ្ដល់់នូវសារៈប្រយោជន៍គ្រប់បែបយ៉ាងចំពោះសុខភាពរបស់លោកអ្នក ទាំងផ្លូវកាយ និងផ្លូវចិត្ដ។ កីឡាកាយវប្បកម្មជាការហាត់ប្រាណ ទៅលើប្រភេទម៉ាស៊ីន និងឧបករណ៍ដុំដែកដែលកំពុងជាទីចាប់អារម្មណ៍របស់លោកអ្នកមួយចំនួន។ សារៈប្រយោជន៍នៃការហាត់កីឡា នេះជាលទ្ធផលលោកអ្នកនឹងទទួលបាននូវសុខភាពដ៏មាំមួន និងមានរាងកាយដ៏រឹងមាំ។
ចង់ជ្រាបថាឧបករណ៍នីមួយៗផ្ដល់សារៈប្រយោជន៍អ្វីចំពោះសុខភាពរបស់លោកអ្នក ទស្សនាវដ្ដី សុខភាពយើង បានជួបសម្ភាសជាមួយលោក រីឆាត ជិន ជាម្ចាស់ក្លឹបកីឡា Aus Fit។
ឧបករណ៍ក្នុងការហាត់កីឡាកាយវប្បកម្ម
ឧបករណ៍សម្រាប់ហាត់កីឡាកាយវប្បកម្មមានច្រើនសណ្ឋាន តែក្នុងនោះបែងចែកចេញជាពីរប្រភេទ គឺឧបករណ៍ ម៉ាស៊ីន និងដុំដែក។ ឧបករណ៍សាច់ដុំមានជាង៣៦០សាច់ដុំ ដូចជាសាច់ដុំស្មា ដើមទ្រូង ក ក្បាលពោះ ខ្នង ដៃ ភ្លៅ កំប៉េះគូទជាដើម។ ចំណែកប្រភេទម៉ាស៊ីនមានដូចជាម៉ាស៊ីនដើរ រត់ ធាក់កង់ ម៉ាស៊ីនហាត់ចលនាបេះដូងជាដើម។
សារៈប្រយោជន៍នៃការលើកដុំដែក
សាច់ដុំនីមួយៗត្រូវការយោងគ្នាទៅវិញទៅមកដើម្បីមើលទៅឱ្យមានភាពសក្ដិសមនឹងរូបរាងស្រស់ស្អាតនិងសង្ហារបស់ លោកអ្នកទាំងឡាយ។ ការហាត់លើកសាច់ដុំគឺដើម្បីឱ្យសាច់ដុំមានភាពស្មើគ្នា ដែលមិនអាចតម្រូវឱ្យមានមួយខ្សោយមួយខ្លាំងនោះទេ។ ការលើកសាច់ដុំគឺត្រូវហាត់ឱ្យបានគ្រប់ប្រភេទសាច់ដុំ តាំងពីក្បាលរហូតដល់ចុងជើង ហាត់កាន់តែច្រើនភាពសក្ដិសមនៃរាងកាយកាន់តែរឹងមាំ សុខភាពក៏មាំមួន និងជួយកាត់បន្ថយជាតិខ្លាញ់ផងដែរ។ បើសិនជាលោកអ្នកហាត់មិនបានគ្រប់ប្រភេទនោះទេ អាចធ្វើឱ្យមានសាច់ដុំខ្លះខ្សោយ ខ្លះខ្លាំង នេះជាបញ្ហាដែលនាំផលលំបាកទៅវិញទេ។ ជាការល្អលោកអ្នកគប្បីជ្រើសរើសការហាត់គ្រប់ប្រភេទ ដើម្បីឱ្យមានរាងកាយរឹងមាំ ដោយផ្លាស់ប្ដូរក្នុងការហាត់ពីមួយថ្ងៃទៅមួយថ្ងៃ ដូចជាមួយថ្ងៃហាត់សាច់ដុំដើមទ្រូង មួយថ្ងៃ សាច់ដុំក្បាលពោះ និងមួយថ្ងៃទៀតហាត់សាច់ដុំខ្នងជាដើម។ ការលើកដុំដែកមានការបែងចែកជាទម្ងន់លើកនៅក្នុងការហាត់ ចាប់ពី១គីឡូក្រាមរហូតដល់៤០គីឡូក្រាម។ ការហាត់លើកសាច់ដុំគប្បីមានគ្រូបង្ហាត់ក្នុងការហាត់ ឬប្រើប្រាស់ឱ្យបានត្រឹមត្រូវ ដើម្បីចៀសវាងការបង្កឱ្យមានបញ្ហាចំពោះលោកអ្នក។ ដោយសារតែមនុស្សម្នាក់មានលក្ខណៈខុសៗគ្នា ទៅតាមពូជសាសន៍ ភេទ ទម្ងន់ និងអាយុ វិធីហាត់នីមួយៗមិនអាចហាត់បានសម្រាប់មនុស្សគ្រប់គ្នានោះទេ។ ការហាត់កីឡាកាយវប្បកម្មមិនមែនថាចង់ហាត់អាចសម្រេចចិត្ដ ហាត់បានទៅលើឧបករណ៍ដែលចង់ហាត់គ្រប់ប្រភេទដោយគ្មានការណែនាំពីគ្រូបង្ហាត់នោះទេ។
សារៈប្រយោជន៍នៃការប្រើឧបករណ៍ម៉ាស៊ីន
ឧបករណ៍ដែលហាត់ទៅលើម៉ាស៊ីនគឺជាប្រភេទម៉ាស៊ីនខារីអូដែលទាក់ទងនឹងការជំនួយដល់បេះដូង ធ្វើឱ្យជីពចរមានដំណើរការល្អ និងមានកម្លាំងសាច់ដុំបេះដូងខ្លាំងមិនងាយហត់ ដោយសារតែនៅពេលដែលហាត់គឺត្រូវការប្រើប្រាស់កម្លាំងសាច់ដុំបេះដូង។ ជាងនេះទៅទៀតការហាត់ដោយម៉ាស៊ីននេះក៏ដូចជាការហាត់ប្រាណតាមវិធីផ្សេងៗទៀត នឹងជួយឱ្យប្រព័ន្ធការពាររាងកាយរឹងមាំ អាចប្រឆាំងនឹងការឆ្លងរោគ និងជម្ងឺឆ្លងទាំងឡាយ ជាពិសេសគឺជម្ងឺផ្ដាសាយ។
ដំបូន្មានអ្នកជំនាញ
លោកអ្នកគប្បីថែទាំសុខភាពឱ្យបានត្រឹមត្រូវដោយការជ្រើសរើសយកវិធីហាត់ប្រាណ។ ការទទួលទានបារី ស្រា និងគ្រឿងញៀនមិនមែនជារឿងដែលត្រូវប្រព្រឹត្ដសម្រាប់លោកអ្នកដែលគិតគូរ និងយកចិត្ដទុកដាក់ចំពោះការថែទាំសុខភាពនោះទេ។
ប្រភព ៖ ទស្សនាវដ្តី សុខភាពយើង លេខ៥២ ខែឧសភា ឆ្នាំ២០១០
Leave a Reply