ស្បែកប្រតិកម្មបណ្ដាលមកពីកត្ដាច្រើនយ៉ាង ដូចជាប្រតិកម្មជាផលិតផល សារធាតុគីមី ចំណីអាហារជាដើម។ ចំពាះស្បែក ប្រតិកម្មគឺជាបញ្ហាដ៏ធំមួយ។ ព្រោះស្បែកប្រតិកម្មតែងតែបង្កផលប៉ះពាល់យ៉ាងធ្ងន់ធ្ងរ ជាពិសេសធ្វើឱ្យស្បែកបាត់បង់នូវ សោភ័ណភាពថែមទៀតផង។
ទស្សនាវដ្ដី សុខភាពយើង បានជួបជាមួយលោក ហោ លីហាក់ អ្នកគ្រប់គ្រងផ្នែកព្យាបាល និងថែរក្សាសម្ផស្សនៃសម្អាង ការលុច្ស ដើម្បីពន្យល់អំពីការថែរក្សាស្បែកប្រតិកម្មដើម្បីឱ្យលោកអ្នកបានយល់ និងជ្រាបឱ្យកាន់តែច្បាស់អំពីបញ្ហានេះ។
មូលហេតុស្បែកប្រតិកម្ម
ទាក់ទិនទៅនឹងស្បែកប្រតិកម្មគឺបណ្ដាលមកពីមូលហេតុច្រើនយ៉ាង។
- គ្រឿងសម្អាង ៖ ការប្រើប្រាស់គ្រឿងសម្អាងគ្មានគុណភាពក៏អាចធ្វើឱ្យស្បែកមុខប្រតិកម្មបានដែរ។ ដូចនេះដើម្បី កុំឱ្យកើតមានបញ្ហាទាំងនេះ លោកអ្នកគួរតែជ្រើសរើសផលិតផលដែលមានគុណភាពល្អត្រូវទៅនឹងប្រភេទស្បែករបស់លោកអ្នក។ ប្រតិកម្មស្បែកជាមួយនឹងផលិតផលនាំឱ្យកើតមានឡើងកន្ទួលក្រហម រមាស់ ឬក៏ជាពងទឹកតូចៗ ហើយផ្ទៃមុខក្រហមខ្លាំង កើតមុន ឬក៏ជាលក្ខណៈក្រហល់ក្រហាយនៅលើស្បែកមុខដែលធ្វើឱ្យមានសភាពធ្ងន់ធ្ងរ។ ដូចនេះលោកអ្នកគួរតែប្រញាប់ទៅជួបជាមួយអ្នកជំនាញសើស្បែក ដើម្បីរកវិធីការពារ និងព្យាបាល។
- ចំណីអាហារ ៖ ការទទួលទានគ្រឿងសមុទ្រក៏អាចបណ្ដាលឱ្យស្បែកមានប្រតិកម្មបានដែរ។ ប៉ុន្ដែមិនជាទូទៅសម្រាប់ លោកអ្នកនោះទេ គឺប្រតិកម្មទៅតាមប្រភេទស្បែកតែប៉ុណ្ណោះ។
វិធីថែរក្សាស្បែកប្រតិកម្ម
ការថែរក្សាស្បែកមិនមែនជារឿងលំបាកនោះទេ បើសិនជាលោកអ្នកដឹងអំពីប្រភេទស្បែករបស់លោកអ្នកថាស្បែករបស់ លោកអ្នកជាប្រភេទស្បែកអ្វី ឬក៏ស្បែករបស់លោកអ្នកប្រតិកម្មនឹងសារធាតុអ្វី។ ដូចនេះត្រូវជ្រើសរើសនូវផលិតផលណាមួយ ល្អត្រឹមត្រូវ ដែលបានណែនាំពីអ្នកឯកទេសច្បាស់លាស់។ លោកអ្នកអាចថែរក្សាស្បែកបានដោយការសម្អាតខ្លួននិងមុខដោយទឹកក្ដៅឧណ្ហៗ ដើម្បីសម្លាប់មេរោគ។ បើសិនជាលោកអ្នកចង់ថែរក្សាស្បែកមិនឱ្យកើតមានប្រតិកម្ម លោកអ្នកមិនត្រូវប្រើប្រាស់ ផលិតផលអ្វីទាំងអស់ ឬក៏ត្រូវប្រយ័ត្នប្រយែងចំពោះចំណីអាហារ និងមិនត្រូវប៉ះពាល់ជាមួយសារធាតុគីមី ទោះបីប្រើនៅលើមុខឬខ្លួន នោះក្ដី។ ដូចនេះស្បែករបស់លោកអ្នកមិនងាយនឹងប្រតិកម្មឡើយ។
ដំបូន្មានអ្នកជំនាញ
បើសិនជាលោកអ្នកប្រើប្រាស់ផលិតផលមិនត្រូវនឹងប្រភេទស្បែក នោះប្រាកដជាមានបញ្ហា។ ដូចនេះដើម្បីកុំឱ្យស្បែកមានបញ្ហា លោកអ្នកគួរតែទៅពិនិត្យប្រភេទស្បែកជាមុនសិន មុននឹងសម្រេចចិត្ដជ្រើសរើសផលិតផលមកប្រើប្រាស់ ជាពិសេសត្រូវតែមានការណែនាំពីអ្នកដែលមានជំនាញ។
ប្រភព ៖ ទស្សនាវដ្តី សុខភាពយើង លេខ៥២ ខែឧសភា ឆ្នាំ២០១០
Leave a Reply