គង់ ច័ន្ទស្រីមុំ ជាតារាសម្ដែងយុវវ័យមួយរូបដ៏ស្រស់សោភា និងកំពុងតែមានការគាំទ្រយ៉ាងច្រើនពីសំណាក់មហាជន។ កញ្ញា គង់ ច័ន្ទស្រីមុំ ជាតារាសម្ដែងដ៏ប៉ិនប្រសប់មួយរូប ហើយឥឡូវនេះស្រីមុំកំពុងតែមមាញឹកនឹងការងារជាច្រើន ដូចជាការសម្ដែងជាខារ៉ាអូខេថ្មីៗជាច្រើនបទ និងសម្ដែងជាខ្សែភាពយន្ដជាដើម។ ប៉ុន្ដែស្រីមុំក៏មិនដែលភ្លេចឡើយនូវការថែរក្សាសម្រស់ និងសុខភាពរបស់នាងផងដែរ។
កញ្ញា គង់ ច័ន្ទស្រីមុំ បានចូលខ្លួនមកបកស្រាយពីការថែរក្សាសម្រស់ជាមួយទស្សនាវដ្ដី សុខភាពយើង ដើម្បីប្រាប់ពីវិធីសាស្ដ្រនៅក្នុងការថែរក្សាសម្រស់មួយចំនួន និងការថែរក្សាសុខភាពរាងកាយរបស់ខ្លួនជូនប្រិយមិត្ដទាំងអស់ ពិសេសគឺសុភាពនារីគ្រប់រូបឱ្យបានជ្រាបផងដែរ។
ប្រវត្ដិមុនចូលសិល្បៈ
មុនពេលឈានចូលសិល្បៈ ស្រីមុំជាសិស្សដែលសិក្សានៅវិទ្យាល័យស៊ីសុវត្ថិ។ ដោយសារតែមានការជំរុញនិងលើកទឹកចិត្ដ ពីឪពុកម្ដាយ រួមទាំងមិត្ដភក្ដិ ទើបនៅឆ្នាំ២០០៨ស្រីមុំបានដាក់ពាក្យប្រឡង Freshy boy and freshy girl នៅស្ថានីយទូរទស្សន៍ប៉ុស្ដិ៍លេខ៥។ ជាង២ឆ្នាំមកនេះ ស្រីមុំបានសម្ដែងជាខ្សែភាពយន្ដ និងបានថតបទចម្រៀងឱ្យផលិតកម្មជាច្រើន ដូចជា TV Bang, M, SD, និង Big Men ដែលបទចម្រៀងនីមួយៗសុទ្ធតែបានទទួលការគ្រាំទ្រយ៉ាងច្រើនពីសំណាក់មហាជន ជាពិសេសគឺ យុវវ័យតែម្ដង។ ចំពោះបទចម្រៀងដំបូងដែលស្រីមុំបានសម្ដែងនោះគឺបទ ស្រក់ទឹកភ្នែកនៅថ្ងៃបុណ្យសង្សារ សុខចិត្ដធ្វើមនុស្សល្ងង់ ស្នេហ៍ខុសគោលដៅ ហើយចំពោះបទចម្រៀងដែលកំពុងតែមានការពេញនិយមបំផុតនោះ គឺនៅបារម្ភសង្សារក្មេង និងបទស្រឡាញ់ គ្នាឱ្យស្លាប់ចុះ។ ជាងនេះទៅទៀត ស្រីមុំបានសម្ដែងខ្សែភាពយន្ដបានចំនួន៣រឿង ដោយសម្ដែងជាតួឯកនោះគឺរឿង សុគន្ធថេរ៉ាយុលង បះសក់ ស្នេហាតាមសង្សារស្ទាវ និងរឿងដែលកំពុងថតនោះគឺស្នេហាមួយនៅវិទ្យាល័យ។
វិធីថែរក្សាសម្រស់
ទោះបីជាមានការមមាញឹកច្រើនយ៉ាងណាក៏ដោយ ក៏ស្រីមុំមិនដែលភ្លេចឡើយនូវការថែរក្សាសម្រស់ ក៏ដូចជាការថែរក្សាសុខភាពរបស់នាងដែរ។ ខាងក្រោមនេះគឺជាវិធីក្នុងការថែរក្សាសម្រស់ និងសុខភាពរបស់ស្រីមុំដែលបានអនុវត្តជាប្រចាំ។
- សម្រាប់ការថែរក្សាសក់ ៖ ស្ដ្រីគ្រប់រូបតែងតែយកចិត្ដទុកដាក់បំផុតនៅក្នុងការថែរក្សាសរសៃសក់។ សម្រាប់ស្រីមុំដែលជាតារាសម្ដែងមួយរូប ស្រីមុំតែងតែផ្លាស់ប្ដូរពណ៌សក់ និងលេងម៉ូតសក់ជាញឹកញាប់ ដែលជាហេតុធ្វើឱ្យសរសៃសក់ឆាប់ខូច។ ដូចនេះហើយនៅក្នុង៣ទៅ៤ថ្ងៃ ស្រីមុំអប់សក់ម្ដងជាមួយនឹងផលិតផលដែលល្អ ហើយមានសារជាតិចិញ្ចឹម និងវីតាមីនគ្រប់គ្រាន់ដែលអាចឱ្យសរសៃសក់របស់ស្រីមុំមានភាពរស់រវើកហើយស្រស់ស្អាត។
- ការថែរក្សាស្បែកមុខ ៖ សម្រាប់ការថែរក្សាស្បែកមុខ ស្រីមុំតែងតែយកចិត្ដទុកដាក់បំផុត។ ស្រីមុំជ្រើសរើស ផលិតផលសមស្របទៅនឹងស្បែកមុខរបស់ស្រីមុំ ដូចជាពេលថ្ងៃស្រីមុំប្រើឡេការពារកម្ដៅថ្ងៃ ហើយនៅពេលយប់ស្រីមុំតែងតែលាបឡេជំនួយដល់ស្បែកមុខជានិច្ច។ អ្វីដែលល្អបំផុតសម្រាប់ស្រីមុំនោះគឺក្រោយពីតុបតែងមុខ និងរាល់ពេលសម្ដែងចប់ ស្រីមុំ តែងតែធ្វើការសម្អាតមុខដោយប្រើឡេសម្រាប់ជូតនៅលើផ្ទៃមុខចេញ ដើម្បីការពារកុំឱ្យឆាប់ជ្រួញ កុំឱ្យកើតមុនឬជាំ និងមានកន្ទួល រមាស់ជាដើម។
- ការថែរក្សាស្បែកដងខ្លួន ៖ សម្រាប់ការថែរក្សស្បែកដងខ្លួនវិញ ស្រីមុំតែងតែប្រើឡេការពារកម្ដៅថ្ងៃ នៅពេលដែល ចេញទៅសម្ដែងឬក៏ចេញទៅណាមកណាម្ដងៗ។ ហើយនៅពេលយប់ ស្រីមុំបានលាបឡេថែរក្សាស្បែកពេលយប់ ដើម្បីឱ្យស្បែកមាន សំណើមហើយម៉ដ្ឋរលោង។ ចំណែកឯការខាត់ស្បែកវិញមិនសូវជាអនុវត្ដនោះទេ យ៉ាងច្រើនមួយខែម្ដងតែប៉ុណ្ណោះ។
- ការថែរក្សាធ្មេញ ៖ ទោះបីជាមមាញឹកនឹងការងារយ៉ាងណាក៏ដោយ ក៏ស្រីមុំនៅតែឆ្លៀតពេលនៅក្នុងការថែរក្សាសុខភាពធ្មេញ ដោយធ្វើការសម្អាតធ្មេញបីដងនៅក្នុង១ថ្ងៃ នៅពេលព្រឹកក្រោកពីដំណេក នៅពេលថ្ងៃត្រង់ និងមុនពេលចូលដំណេក។ ស្រីមុំតែងតែធ្វើការសម្អាតធ្មេញ១ខែម្ដង។
- ការថែរក្សាភ្នែក ៖ ចំពោះស្រីមុំ ភ្នែកគឺជាផ្នែកមួយសំខាន់បំផុតសម្រាប់នាងដែលជាតារាសម្ដែង។ ស្រីមុំមិនដែលធ្វើឱ្យភ្នែកចុករោយ ឬសម្លឹងយូរពេកនោះទេ នៅពេលដែលមានបញ្ហាអ្វីមួយដែលកើតនៅលើភ្នែក ស្រីមុំតែងតែទៅជួបជាមួយគ្រូពេទ្យភ្នែកជាប្រចាំ មិនដែលធ្វេសប្រហែសឡើយ។
- ការថែរក្សាចិញ្ចើម រោមភ្នែក បបូរមាត់ ៖ ចំពោះចិញ្ចើម ស្រីមុំមិនសូវជាយកចិត្ដទុកដាក់ថែរក្សាឱ្យបានដិតដល់នោះទេ ព្រោះចិញ្ចើមរបស់ស្រីមុំក្រាស់ស្រាប់ នៅពេលដែលសម្ដែងស្រីមុំគ្រាន់តែយកខ្មៅដៃគូសចិញ្ចើមបន្ដិចៗនៅលើចិញ្ចើមតែប៉ុណ្ណោះ។ ចំពោះការកោរចិញ្ចើមស្រីមុំមិនសូវជាកោរញឹកញាប់ពេកនោះ។ បើនិយាយអំពីរោមភ្នែក ស្រីមុំមិនសូវលាបម៉ាស្ការ៉ាច្រើនពេកនោះទេ នៅពេលដែលសម្ដែងចប់ស្រីមុំតែងតែធ្វើការសម្អាតរោមភ្នែកដោយជូតម៉ាស្ការ៉ាចេញដោយប្រើប្រេងសម្រាប់ជូត ដើម្បីការពារកុំឱ្យរោមភ្នែកជ្រុះឬក៏ដាច់។ ចំពោះបបូរមាត់ ស្រីមុំចូលចិត្ដលាបក្រេមពណ៌ស្រាលបំផុត ដូចជាក្រេមរលោងឬពណ៌ ផ្កាឈូកខ្ចីជាដើម។
- ការថែរក្សាក្រចកដៃជើង ៖ ស្រីមុំចូលចិត្ដលេងម៉ូតក្រចកជានិច្ច ជាពិសេសនៅពេលដែលទៅចូលរួមនៅក្នុងកម្មវិធី ផ្សេងៗ។ ជានិច្ចជាកាលនៅក្នុងមួយសប្ដាហ៍ ស្រីមុំតែងតែធ្វើការសម្អាត និងកាត់សាច់ក្រចកម្ដង ដោយសម្អាតធូលីដីដែលនៅក្នុងក្រចក ដោយប្រើក្រូចឆ្មារជូតសម្លាប់មេរោគចេញ។ ចំពោះក្រចកជើងក៏ដូចជាក្រចកដៃដែរ គឺធ្វើការសម្អាតជាប្រចាំ យ៉ាងហោចណាស់ធ្វើការសម្អាតពីរដងក្នុងមួយសប្ដាហ៍។
ការថែរក្សាសុខភាពរាងកាយ
ស្រីមុំតែងតែបរិភោគចំណីអាហារដែលសម្បូរដោយវីតាមីន និងប្រូតេអ៊ីន ដូចជាបន្លែ និងសាច់ត្រីជាដើម។ ចំណែកឯការ ទទួលទានដំណេកមិនសូវជាគេងបានទៀងទាត់នោះទេ ព្រោះមានការមមាញឹកច្រើនពេក។ ចំពោះការធ្វើលំហាត់ប្រាណវិញ ស្រីមុំតែងតែធ្វើជាប្រចាំគឺមួយថ្ងៃយ៉ាងហោចណាស់មួយម៉ោង។
គោលបំណងទៅថ្ងៃអនាគត
ស្រីមុំបានប្រាប់ថាក្រៅពីអាជីពជាតារាសម្ដែង ស្រីមុំមានគោលបំណងគិតទៅដល់ថ្ងៃអនាគតថា នៅពេលដែលប្រឡងជាប់ បាក់ឌុប ស្រីមុំនឹងបន្ដការសិក្សាផ្នែកទេសចរណ៍ និងបើកជំនួញផ្ទាល់ខ្លួនជាមួយឪពុកម្ដាយរបស់នាងតែម្ដង។
បណ្ដាំផ្ញើ
សុភាពនារីទាំងអស់គួរតែយកចិត្ដទុដាក់នៅក្នុងការថែរក្សាសម្រស់ និងសុខភាពឱ្យបានល្អ ជាពិសេសគឺផ្ទៃមុខត្រូវតែយកចិត្ដទុកដាក់បំផុត ដូចជានៅពេលដែលមកពីកម្មវិធីអ្វីមួយត្រូវតែប្រញាប់ធ្វើការលាងសម្អាតផ្ទៃមុខឱ្យបានស្អាត ដើម្បីចៀសវាងការកើតមានបញ្ហាចំពោះស្បែកមុខ ព្រោះផ្ទៃមុខគឺជាផ្នែកមួយដ៏សំខាន់បំផុតសម្រាប់សុភាពនារីគ្រប់រូប។ អ្វីដែលពិសេសជាងនេះនោះ នៅពេលដែលធ្វើដំណើរទៅណាមកណាម្ដង សុភាពនារីគ្រប់រូបត្រូវតែមានឡេសម្រាប់ការពារពន្លឺព្រះអាទិត្យ ហើយត្រូវពាក់អាវដៃវែងជានិច្ច។
ខាងលើនេះគឺជាយល់ឃើញ និងជាការអនុវត្ដន៍ផ្ទាល់របស់កញ្ញា គង់ ច័ន្ទស្រីមុំ តែប៉ុណ្ណោះ។ សូមលោកស្រីអ្នកនាងកញ្ញា ជ្រើសរើសយកអ្វីដែលលោកអ្នកយល់ថាត្រឹមត្រូវសម្រាប់អនុវត្ដន៍បានហើយ។
ប្រវត្ដិរូបសង្ខេប
- ឈ្មោះ ៖ គង់ ច័ន្ទស្រីមុំ
- អាយុ ៖ ១៩ឆ្នាំ
- ថ្ងៃខែឆ្នាំកំណើត ៖ ០៦. ០៧. ១៩៩១
- ទីកន្លែងកំណើត ៖ បាត់ដំបង
- កម្ពស់ ៖ ១,៦០ម៉ែត្រ
- ទម្ងន់ ៖ ៤៣គីឡូក្រាម
- ទំហំទាំងបី ៖ ៣៤ ២៥ ២៨
- បងប្អូន ៖ ៥នាក់ ប្រុស១នាក់ ស្រី៤នាក់(ជាកូនពៅ)
- កម្រិតវប្បធម៌ ៖ ជាសិស្សនៅវិទ្យាល័យស៊ីសុវត្ថិថ្នាក់ទី១២
- អាជីពនាពេលបច្ចុប្បន្ន ៖ តារាសម្ដែង
- ស្ថានភាពគ្រួសារ ៖ នៅលីវ
ប្រភព ៖ ទស្សនាវដ្តី សុខភាពយើង លេខ៥២ ខែឧសភា ឆ្នាំ២០១០
Leave a Reply