សាយ សៀរ៉ា ជាតារាមួយដួងកំពុងតែរះនៅលើវិថីសិល្បៈនាពេលបច្ចុប្បន្ន។ មហាជនមួយចំនួនបានទទួលស្គាល់រួចមកហើយ តាមរយៈការសម្ដែងរឿង និស្ស័យស្លាប់រស់។ សាយ សៀរ៉ា ត្រូវបានម្ចាស់ផលិតកម្មជាច្រើនចាប់អារម្មណ៍ពីទេពកោសល្យសម្ដែង និងរូបរាងរបស់លោក ហើយក៏បានផ្ដល់ឱកាសឱ្យលោកថតខ្សែភាពយន្ដមួយចំនួន និងថតសម្ដែងខារ៉ាអូខេតាមបណ្ដាផលិតកម្មជាច្រើន។ ការបោះជំហានចូលសិល្បៈរយៈពេលជាងបួនឆ្នាំមកនេះ ការងាររបស់សៀរ៉ាសព្វថ្ងៃកាន់តែមានល្បឿនទៅមុខ ទោះជាយ៉ាងណាអ្វីដែលលោកត្រូវតែគិតគូរសំខាន់ជាងគេនោះគឺសុខភាពរបស់លោក។
សាយ សៀរ៉ា បានចូលខ្លួនមកធ្វើការបកស្រាយពីការថែរក្សាសុខភាព និងសម្រស់របស់គេផ្ទាល់ជូនដល់ប្រិយមិត្ដអ្នកអាន ទាំងអស់បានទទួលជ្រាបតាមរយៈកិច្ចសម្ភាសន៍ជាមួយទស្សនាវដ្ដី សុខភាពយើង។
ប្រវត្ដិមុនឈានជើងចូលសិល្បៈ
ដំបូងឡើយ សៀរ៉ាបានទៅហាត់រៀនការសម្ដែងនៅក្លឹបមួយរយៈពេលជាងមួយឆ្នាំ។ បន្ទាប់មកក៏បានចូលរួមការសម្ដែង មួយចំនួនតាមរយៈសមាជិករបស់ក្លឹបនៅតាមខេត្ដឆ្ងាយ។ សៀរ៉ាបានចូលក្នុងវិស័យសិល្បៈជាអ្នកសម្ដែងក្នុងអំឡុងដើមឆ្នាំ២០០៥។ ការប្រឡូកដំបូងសៀរ៉ាបានសម្ដែងស្ពតពាណិជ្ជកម្មឱ្យក្រុមហ៊ុនមួយ។ បន្ទាប់មកទៀតលោកក៏បានសម្ដែងភាពយន្ដរឿង បង្គងជីវិត ដោយមានការដឹកនាំសម្ដែងរឿងដោយក្លឹបរបស់លោកដែលរឿងនេះបានយកទៅលក់នៅក្រៅប្រទេស។ បន្ទាប់មកទៀត លោកក៏បានសាងស្នាដៃនៅក្នុងរឿងមួយទៀតប្រចាំស្ថានីយទូរទស្សន៍បុស្ដិ៍លេខ៣ គឺរឿង ងារជាប្រពន្ធ ដែលដើរសម្ដែងជាតួឯក។ ក្រៅពីនេះ សៀរ៉ាបានសម្ដែងជាតួខារ៉ាអូខេជាច្រើន រួមមានផលិតកម្ម ខេអេច រស្មីស្ទឹងសង្កែ រស្មីស្ទឹងសែន ស្បាក សាន់ដេ អេម និងផលិតកម្មរស្មីហង្សមាស រួមនឹងផលិតកម្មជាច្រើនទៀត។
ការថែរក្សាសម្រស់
ទោះបីជាសព្វថ្ងៃការងាររបស់សៀរ៉ាមានការមមាញឹកយ៉ាងណា ក៏លោកនៅតែគិតគូរសំខាន់ទៅលើបញ្ហាសុខភាព និង សម្រស់របស់លោកជានិច្ច។ ខាងក្រោមនេះគឺជាវិធីមួយចំនួនដែលលោកបានអនុវត្ដជាប្រចាំថ្ងៃ។
- ការថែរក្សាស្បែកមុខ ៖ បញ្ហាស្បែកមុខគឺសៀរ៉ាមិនមានការធ្វេសប្រហែសនោះទេ ព្រោះមួយផ្នែកនៃសម្រស់របស់ លោកក៏អាស្រ័យលើផ្ទៃមុខនេះដែរ។ ជារៀងរាល់ពេលដែលលោកត្រឡប់មកពីធ្វើការ គឺតែងតែលាងសម្អាតមុខជាប្រចាំជាមួយហ្វម លាងមុខដើម្បីកាត់បន្ថយធូលីដី និងជាតិខ្លាញ់នៅលើផ្ទៃមុខ។
- ការថែរក្សាស្បែកដងខ្លួន ៖ លោកបានសម្អាតកាយជាមួយសាប៊ូរៀងរាល់ពេលដែលងូតទឹក។ ក្នុងមួយថ្ងៃយ៉ាងហោចណាស់ក៏សៀរ៉ាងូតទឹកចំនួនពីរដងដែរ។
- ការថែរក្សាសក់ ៖ លោកតែងតែមានការថែទាំសក់បានដិតដល់ណាស់ នៅរាល់ពេលដែលសៀរ៉ាងូតទឹក លោកតែងតែឧស្សាហ៍កក់សក់ និងអប់សក់ជារៀងរាល់ពីរថ្ងៃម្ដង។
- ការថែរក្សាភ្នែក ៖ សុខភាពភ្នែកជាបញ្ហាសំខាន់សម្រាប់សៀរ៉ា ជារៀងរាល់ពេលថតសម្ដែង លោកតែងតែប្រើថ្នាំបន្ដក់ភ្នែក ដើម្បីការពារគ្រាប់ភ្នែក រាល់ឈុតឆាកដែលត្រូវពន្លឺថ្ងៃខ្លាំង និងមានការបញ្ចាំងភ្លើងហ្វារជាដើម។
- ការថែរក្សាធ្មេញ ៖ ទម្លាប់ដ៏ល្អរបស់សៀរ៉ាគឺដុសធ្មេញក្នុងមួយថ្ងៃបីដងជាប្រចាំ ជាមួយទឹកខ្ពុរមាត់រាល់ពេល ទទួលទានអាហាររួចរាល់ មិនតែប៉ុណ្ណោះជារៀងរាល់មួយខែម្ដងសៀរ៉ាតែងទៅពិនិត្យសុខភាពធ្មេញជាមួយទន្ដពេទ្យទៀតផង។ សៀរ៉ាមិនធ្វេសប្រហែសក្នុងការថែទាំមាត់ធ្មេញនោះទេ ព្រោះក្លិនមាត់សំខាន់ណាស់ដើម្បីប្រាស្រ័យទាក់ទងគ្នាក្នុងការងារប្រចាំថ្ងៃ ទៅវិញទៅមក។
ការថែទាំសុខភាពរាងកាយ
- ការទទួលទានអាហារ និងដំណេក ៖ សៀរ៉ាទទួលទានអាហារទៀងទាត់ និងគ្រប់គ្រាន់ជាប្រចាំ ដើម្បីចៀសវាងមានបញ្ហាក្រពះ។ រីឯការទទួលទានដំណេកវិញលោកតែងចូលគេងនៅប្រហែលជាម៉ោង១២រៀងរាល់យប់ ដោយសារតែលោកមានការរវល់ស្រាវជ្រាវឯកសារផ្សេងៗ និងមើលចម្រៀងមួយចំនួន។
- លំហាត់ប្រាណ ៖ លោកតែងតែងើបពីព្រលឹមដើម្បីហាត់ប្រាណនៅបរិវេណក្នុងផ្ទះ។ ទោះបីជាមានការងាររវល់យ៉ាងណាក៏លោកត្រូវតែចំណាយពេលក្នុងការហាត់ប្រាណឱ្យបានញឹកញាប់ដែរក្នុងមួយសប្ដាហ៍ៗ ព្រោះវាអាចជួយបង្កើនសុខភាព របស់លោកឱ្យកាន់តែមាំមួន។
បំណងទៅថ្ងៃអនាគត
ជីវិតជាតារាសម្ដែងសៀរ៉ាបានតស៊ូជាងរយៈពេលបួនឆ្នាំមកហើយ នេះជាក្ដីបំណងប្រាថ្នារបស់តារាសម្ដែងរូបនេះ។ ប៉ុន្ដែក្រៅពីអាជីពជាអ្នកសិល្បៈហើយនោះលោកក៏នៅមានក្ដីបំណងប្រាថ្នាមួយទៀតសម្រាប់ថ្ងៃខាងមុខផងដែរ គឺលោកចង់បើកហាង លក់ដូរមួយកន្លែងដែលមិនទាន់មានការប្រាកដលក់អ្វីនោះទេ អាស្រ័យតាមតម្រូវការរបស់អតិថិជន។
បណ្ដាំផ្ញើរបស់ សាយ សៀរ៉ា
ទោះបីជាការងារដើរទៅរកភាពជោគជ័យយ៉ាងណាក៏ដោយ ក៏សុខភាពនៅតែជារឿងសំខាន់បំផុតដែលទាមទារឱ្យមានការថែទាំឱ្យបានល្អ។ បើសិនជាការងារល្អយ៉ាងណា តែសុខភាពមានបញ្ហានោះ យើងក៏មិនអាចធ្វើអ្វីទៀតបានដែរ។ ការងារកាន់តែច្រើនសម្រាប់យើង យើងត្រូវតែគិតគូរពីសុខភាពឱ្យច្រើនដូចគ្នាផងដែរ។ សុខភាពជាគន្លឹះនៃភាពជោគជ័យសម្រាប់មនុស្សម្នាក់ៗ។
ប្រវត្ដិរូបសង្ខេប
- ឈ្មោះ ៖ សាយ សៀរ៉ា
- អាយុ ៖ ២៧ឆ្នាំ
- ថ្ងៃ.ខែ.ឆ្នាំកំណើត ៖ ១៤ កុម្ភៈ ១៩៨២
- ទីកន្លែងកំណើត ៖ ខេត្ដកំពង់ចាម
- កម្ពស់ ៖ ១,៧៤ម៉ែត្រ
- បងប្អូន ៖ ៧នាក់(ប្រុស៣ ស្រី៤ ជាកូនទី៥)
- អាជីពនាពេលបច្ចុប្បន្ន ៖ អ្នកសិល្បៈ
- ស្ថានភាពគ្រួសារ ៖ នៅលីវ
ប្រភព ៖ ទស្សនាវដ្តី សុខភាពយើង លេខ៤៩ ខែកុម្ភៈ ឆ្នាំ២០១០
Leave a Reply