ការមានធ្លាក់ឈាមមកនៅក្រោយពេលរាំងរដូវឬពេលមានផ្ទៃពោះ គឺជារោគសញ្ញាដែលអាចបញ្ជាក់ថាមានការគម្រាម រលូតកូន។ បន្ទាប់ពីការធ្លាក់ឈាមទើបរលូតកូនមកតាមក្រោយ។ ជាការពិតណាស់ការរលូតគឺបណ្ដាលមកពីកត្ដាច្រើនយ៉ាង ដែលជាហេតុធ្វើឱ្យស្ដ្រីតែងតែព្រួយបារម្ភ ព្រោះការរលូតកូនអាចបង្កឱ្យមានផលប៉ះពាល់យ៉ាងធ្ងន់ធ្ងរចំពោះស្ដ្រី ជួនកាលបង្កឱ្យបាត់បង់ជីវិតថែមទៀតផង។
ទស្សនាវដ្ដី សុខភាពយើង បានជួបជាមួយលោកវេជ្ជបណ្ឌិត អ៊ូច ឌីណា ឯកទេសផ្នែកសម្ពព និងរោគស្ដ្រីនៅមន្ទីរពេទ្យ កាល់ម៉ែត លោកនឹងធ្វើការពន្យល់អំពីស្ដ្រីរលូតកូនរួមទាំងផលប៉ះពាល់។
ការរលូតកូនជាអ្វី?
ស្ដ្រីដែលមានគភ៌ដោយរាប់ចាប់ពីអាយុសូន្យខែទៅប្រាំខែ ហើយមានធ្លាប់មកក្រៅនូវដុំឈាមឬដុំគភ៌ដែលនៅក្នុងស្បូនមកក្រៅនោះ គេហៅថារលូតកូន។ ការរលូតកូនគឺជាការពន្លិចចេញមកក្រៅនូវដុំឈាមឬក៏គភ៌ ដោយអចេតនាឬដោយគ្មានបំណង នឹងធ្វើ(ពន្លូត)។
រោគសញ្ញាជម្ងឺរលូតកូន
ការធ្លាក់ឈាមក្រោយពីរាំងរដូវមិនមានការឈឺចុកចាប់អ្វីនោះទេ។ ប៉ុន្ដែបើសិនជាមានការឈឺចាប់គឺឈឺចាប់នៅពេលដែលរលូតកូនតែស្បូនមិនបើក ដែលបណ្ដាលឱ្យមានការឈឺចុកចាប់យ៉ាងខ្លាំងនៅក្នុងពោះខាងលើថ្ងាស ព្រោះនេះជាពេលដែលស្បូនច្របាច់ឱ្យកូនចេញមកក្រៅ។ ដូចនេះស្ដ្រីគ្រប់រូបគួរតែប្រញាប់ទៅជួបជាមួយគ្រូពេទ្យដែលមានជំនាញ ដើម្បីចៀសវាងឈានដល់ដំណាក់កាលធ្ងន់ធ្ងរ។
មូលហេតុដែលបណ្ដាលឱ្យរលូតកូន
ចំពោះការរលូតកូនអាចបណ្ដាលមកពីមូលហេតុច្រើនយ៉ាងដូចជា ៖
1 . ការតោងរបស់គភ៌មិនធម្មតា ៖ គភ៌ទំនៅលើភ្នាសស្បូន កាលណាគភ៌តោងទៅលើភ្នាសស្បូនដែលមិនល្អ ជាពិសេសភ្នាសស្បូនដែលធ្លាប់ធ្វើការវះកាត់ច្រើនដង ដែលអាចធ្វើឱ្យគភ៌រលូតបាន។
2 . ស្បូនមានរូបរាងមិនធម្មតា ៖ ស្បូនមានរូបរាងច្រើនប្រភេទ ចំពោះស្បូនធម្មតាគឺមានរូបរាងដូចជាឃ្លោក។ រីឯស្បូនដែលមានរូបរាងមិនធម្មតាគឺសំដៅទៅលើស្បូនពីកំណើតមានរូបរាងខុសពីស្បូនដទៃទៀត ឬក៏ស្បូនមានបញ្ហាផ្សេងៗនៅក្នុងសាច់ស្បូនក៏បណ្ដាលឱ្យរលូតដែរ។
3 . ម្ដាយមានជម្ងឺ ៖ ម្ដាយដែលមានជម្ងឺប្រចាំកាយ ដូចជាមានជម្ងឺពកក ឬក៏ជម្ងឺទឹកនោមផ្អែម ជម្ងឺទាំងនេះក៏ជាមូលហេតុ ដែលអាចបណ្ដាលឱ្យកូនរលូតបានដែរ។
4 . ការប្រើប្រាស់ថ្នាំ ៖ ស្ដ្រីខ្លះប្រើប្រាស់ថ្នាំតាមចិត្ដចង់ មិនបានពិភាក្សាជាមួយគ្រូពេទ្យដែលជំនាញឱ្យបានត្រឹមត្រូវក៏អាចបណ្ដាលឱ្យមានផលប៉ះពាល់ចំពោះទារកយ៉ាងធ្ងន់ធ្ងរផងដែរ។
5 . សុកកូនខ្សោយ ៖ ជាទូទៅសុកត្រូវតែទំនៅលើភ្នាសស្បូន ដូចនេះសុកត្រូវតែមានការមមាញឹក ដើម្បីតោងភ្នាសស្បូនឱ្យជាប់។ ដើម្បីតោងភ្នាសស្បូនឱ្យជាប់ សុកត្រូវតែមានសុខភាពល្អ ព្រោះសុកមានតួនាទីសំខាន់សម្រាប់ចិញ្ចឹមគភ៌ បើសុកខ្សោយ កូនក៏ខ្សោយដែរ ជាហេតុធ្វើឱ្យកូនរលូត។
6 . មេជីវិតឈ្មោលខ្សោយ ៖ ជម្ងឺខ្សោយពីធម្មជាតិនៃមេជីវិតរបស់បុរស។
7 . ការប៉ះទង្គិចពេលមានគភ៌ ៖ ការដួលប៉ះទង្គិច គ្រោះថ្នាក់ផ្សេងៗ ដែលអាចបណ្ដាលឱ្យរលូតកូន។
8 . ឈាមម្ដាយ និងឈាមកូនមិនត្រូវគ្នា ៖ ក៏ជាចំណុចមួយដែលអាចធ្វើឱ្យរលូតកូនបានដែរ។
9 . ឈាមម្ដាយ និងឪពុកមិនត្រូវគ្នា ៖ ចំពោះឈាមឪពុក និងឈាមម្ដាយមិនត្រូវគ្នាក៏អាចបណ្ដាលឱ្យកូនរលូតឬកូនកើតមកអាចស្លាប់ក៏មានដែរ។
ផលប៉ះពាល់នៃការរលូតកូន
ផលប៉ះពាល់ក្រោយពេលរលូតត្រូវបានចែកចេញជាពីរគឺ ៖
- ការរលូតមកទាំងអស់ ៖ ការរលូតមានទាំងអស់ដែលមានតាំងពីឈាម សុក ទឹកភ្លោះ ដែលគេហៅថាការរលូតទាំងដុល ឬគ្រប់គ្រាន់។ ដូចនេះផលប៉ះពាល់គឺមិនមានអ្វីធំដុំនោះទេ គ្រាន់តែមានការធ្លាក់ឈាមបន្ដិចបន្ដួចតែប៉ុណ្ណោះ ហើយក៏បាត់ទៅវិញ។
- ការរលូតកូនមកមិនទាំងដុល ៖ ការរលូតប្រភេទនេះពិតជាមានផលប៉ះពាល់ចំពោះសុខភាពម្ដាយយ៉ាងធ្ងន់ធ្ងរ ដែលធ្វើឱ្យមានធ្លាក់ឈាមជាខ្លាំងរហូតសម្ពាធឈាមចុះខ្សោយរហូតដល់សូន្យ ដែលធ្វើឱ្យស្ដ្រីដែលជាម្ដាយអាចស្លាប់បាន។
វិធីព្យាបាលការរលូតកូន
បើមានការរលូតមកទាំងដុលដូចនេះ ការព្យាបាលគឺមិនមានអ្វីសំខាន់នោះទេ គ្រាន់តែប្រើថ្នាំឃាត់ឈាម ឬក៏ប្រើថ្នាំ សម្រាប់ឱ្យសាច់ដុំស្បូនប្រឹងតែប៉ុណ្ណោះ ប៉ុន្ដែត្រូវតែទៅពិភាក្សាជាមួយគ្រូពេទ្យ។ បើសិនជាការរលូតកូនមិនទាំងដុលនោះទេ ដោយមានធ្លាក់ឈាមអូសបន្លាយ ស្ដ្រីគ្រប់រូបត្រូវតែប្រញាប់មកជួបគ្រូពេទ្យ ដើម្បីឱ្យគ្រូពេទ្យសម្អាតភ្នាសស្បូនឱ្យស្អាតទៅតាម បច្ចេកទេសរបស់គ្រូពេទ្យ និងការប្រើប្រាស់ថ្នាំដើម្បីការពារកុំឱ្យឆ្លងមេរោគ។
វិធីការពារដើម្បីកុំឱ្យរលូតកូន
ដើម្បីកុំឱ្យមានការរលូតកូន ស្ដ្រីគ្រប់រូបដែលជាម្ដាយត្រូវតែឧស្សាហ៍ទៅជួបជាមួយគ្រូពេទ្យជំនាញឱ្យបានញឹកញាប់។ ជាពិសេសមុននឹងមានផ្ទៃពោះត្រូវមកជួបជាមួយគ្រូពេទ្យដែលមានជំនាញ ដើម្បីឱ្យគ្រូពេទ្យពិនិត្យរកជម្ងឺផ្សេងៗនៅមុនពេលមានផ្ទៃពោះ ដើម្បីចៀសវាងការរលូតកូន។
ដំបូន្មានអ្នកជំនាញ
ស្ដ្រីមានផ្ទៃពោះគ្រប់រូបត្រូវតែប្រយ័ត្នប្រយែងជានិច្ច ដូចជាការប៉ះទង្គិចឬក៏ត្រូវចៀសវាងចំពោះការឡើងជណ្ដើរច្រើនជាន់ជាដើម។ ជាពិសេសនៅពេលដែលមានអាការមិនស្រួលចំពោះកូនដែលនៅក្នុងផ្ទៃ ត្រូវមកពិភាក្សាជាមួយគ្រូពេទ្យជំនាញ ដើម្បីចៀសវាងការកើតមានបញ្ហាចំពោះសុខភាពម្ដាយ និងទារកក្នុងផ្ទៃ។
ប្រភព ៖ ទស្សនាវដ្តី សុខភាពយើង លេខ៤៩ ខែកុម្ភៈ ឆ្នាំ២០១០
Leave a Reply