មនុស្សម្នាក់ដែលមានសុខភាពល្អទាំងផ្លូវកាយ និងផ្លូវចិត្ដ អាចមានសមត្ថភាពគិតគូរដោះស្រាយបញ្ហានានាក្នុងជីវិតរស់នៅបានយ៉ាងល្អ និងអាចធ្វើទំនាក់ទំនងប្រកបដោយភាពរីករាយជាមួយអ្នកដទៃ។ នៅពេលដែលមានសុខភាពផ្លូវចិត្ដល្អ ប្រសើរហើយនោះ នឹងអាចប្រឈមមុខទប់ទល់យ៉ាងក្លាហាននឹងការបៀតបៀននៃជម្ងឺផ្លូវចិត្ដ។ ជម្ងឺផ្លូវចិត្ដអាចកើតមានបាន ដោយសារតែមូលហេតុដ៏ចម្បងនៃផ្នែកសុខភាពផ្លូវចិត្ដ។ ដូចនេះលោកអ្នកគប្បីស្វែងយល់ឱ្យបានកាន់តែច្បាស់អំពីការថែទាំសុខភាពផ្លូវចិត្ដ។
លោកវេជ្ជបណ្ឌិត ពៅ ប៊ុនធឿន អ្នកឯកទេសផ្នែកសុខភាពផ្លូវចិត្ដនៃមន្ទីរពេទ្យមិត្ដភាពខ្មែរ-សូវៀត បានធ្វើការបកស្រាយ ពីការថែទាំនេះជូនប្រិយមិត្ដទាំងអស់ តាមរយៈបទសម្ភាសន៍ជាមួយទស្សនាវដ្ដី សុខភាពយើង។
អ្វីទៅជាសុខភាពផ្លូវចិត្ដ?
សុខភាពផ្លូវចិត្ដគឺជាសមត្ថភាពនៃការរក្សាបាននូវភាពទំនាក់ទំនងល្អជាមួយអ្នកដទៃ ហើយជាការសម្របសម្រួលខ្លួនបានល្អ ក្នុងការចូលរួមសកម្មភាពនានា និងសមត្ថភាពក្នុងការធ្វើសម្បទាន។ សុខភាពផ្លូវចិត្ដគឺទាមទារសំខាន់បំផុតក្នុងការថែទាំពីខ្លួនឯងផ្ទាល់។ បើសុខភាពផ្លូវចិត្ដមានបញ្ហា គឺពេលនោះហើយដែលលោកអ្នកម្នាក់ៗត្រូវស្វែងរកការបង្ការនិងព្យាបាលឱ្យបានទាន់ពេលវេលា។
ការថែទាំសុខភាពផ្លូវចិត្ដដោយខ្លួនឯង
– រាល់ការគិតពិចារណាចំពោះរឿងអ្វីមួយ ត្រូវចេះធ្វើគំនិតជាវិជ្ជមាន ដោយមិនត្រូវគិតតែគំនិតអវិជ្ជមានច្រើនពេកនោះទេ។ ធ្វើចិត្ដគំនិតឱ្យទូលាយ និងត្រូវចេះបើកចិត្ដទទួលយកគំនិតពិចារណាដែលត្រឹមត្រូវពីអ្នកដទៃ។
– រក្សាឱ្យបាននូវតុល្យភាពក្នុងការបំពេញការងារ និងការចំណាយពេលវេលាសម្រាប់សម្រាកលំហែកម្សាន្ដ។ ត្រូវចេះបែង ចែកពេលវេលាសម្រាប់ការដើរលំហែសម្រាកខួរក្បាល ដោយមិនត្រូវគិតគូរតែរឿងធ្វើការមួយមុខនោះទេ។ ការសម្រាកខួរក្បាល ក៏ជាការជួយសម្រួលចំពោះសុខភាពផ្លូវចិត្ដផងដែរ។
– បង្កើតទំនាក់ទំនងល្អជាមួយនឹងមិត្ដភក្ដិ ក្រុមគ្រួសារ និងអ្នកដែលនៅជុំវិញខ្លួន។ ឆាកជីវិតពោរពេញដោយភាព ស្រស់ស្រាយ ទំនាក់ទំនងល្អ បង្កើតភាពស្និទ្ធស្នាល បង្កើនភាពសប្បាយរីករាយ ទាំងនេះជាកត្ដានៃការថែទាំសុខភាពផ្លូវចិត្ដ ហើយ អាចបញ្ចៀសបានពីបញ្ហាទាំងឡាយដែលនាំឱ្យកើតមានជាជម្ងឺផ្លូវចិត្ដ។
– ថែរក្សាសុខភាពរាងកាយឱ្យបានល្អ ដោយត្រូវមានអនាម័យល្អក្នុងការហូបចុក ចៀសវាងការឆ្លងជម្ងឺផ្សេងៗ លេង កីឡាឱ្យបានគ្រប់គ្រាន់ និងចូលទទួលទានដំណេកឱ្យបានទៀងទាត់ពេលវេលា និងឱ្យបានគ្រប់គ្រាន់។
– ចេះចែករំលែកនូវទុកកង្វល់ ឬបញ្ហាផ្សេងៗ ដែលខ្លួនពិបាកចិត្ដប្រាប់ទៅអ្នកដទៃដែលជាមនុស្សដែលទុកចិត្ដ និង ជឿជាក់បំផុត ដើម្បីឱ្យរឿងរ៉ាវដែលបានកើតឡើងនៅក្នុងចិត្ដមានសភាពធូរស្រាលឡើងវិញ។
ដំបូន្មានអ្នកជំនាញ
ការថែទាំសុខភាពផ្លូវចិត្ដគឺជារឿងដ៏សំខាន់សម្រាប់មនុស្សម្នាក់ៗ។ នៅពេលដែលលោកអ្នកមានសុខភាពផ្លូវចិត្ដល្អ បរិបូរណ៍ គ្មានការព្រួយបារម្ភនឹងការកើតជម្ងឺផ្លូវចិត្ដដែលបង្កពីការប៉ះទង្គិចកត្ដាចិត្ដសាស្ដ្រនោះទេ។ បើសិនជាមានការធ្វេសប្រហែស ក្នុងការថែទាំសុខភាពផ្លូវចិត្ដ ធ្វើឱ្យឈានដល់មានរោគសញ្ញាផ្លូវចិត្ដ ដូចជាមានអារម្មណ៍សង្ឃឹម គេងមិនលក់ ឆាប់ភ័យខ្លាច ឆាប់ មួម៉ៅ ខឹងច្រើន ធុញថប់ក្នុងអារម្មណ៍ខ្លាំង ឬមានអាកប្បកិរិយាចម្លែកៗ ត្រូវប្រញាប់ទៅជួបពិគ្រោះជាមួយនឹងវេជ្ជបណ្ឌិតជម្ងឺផ្លូវចិត្ដ ដើម្បីជាការបង្ការកុំឱ្យមានជម្ងឺផ្លូវចិត្ដក្នុងដំណាក់កាលធ្ងន់ធ្ងរ។
Leave a Reply