ជាតារាសម្ដែងដែលទើបនឹងប្រឡូកក្នុងវិស័យសិល្បៈមិនយូរប៉ុន្មានផង ប៉ុន្ដែកេរ្ដិ៍ឈ្មោះរបស់នាងត្រូវបានមនុស្សជាច្រើន ស្គាល់តាមរយៈរាងកាយដ៏ស្រស់ស្អាតរបស់នាង។ ទេពកោសល្យសម្ដែងរបស់នាងក៏មិនអន់ប៉ុន្មានដែរ ព្រោះនាងត្រូវបានផលិតកម្មជាច្រើនអញ្ជើញឱ្យចូលរួមសម្ដែងជាបទចម្រៀងខារ៉ាអូខេ ភាពយន្ដ ឬក៏ស្ពតពាណិជ្ជកម្មផ្សេងៗ។ បើទោះបីជាមមាញឹកនឹងការងារសិល្បៈយ៉ាងណា ក៏សូរិយាមិនដែលភ្លេចពីការថែទាំសម្រស់ដ៏ស្រស់ស្អាតរបស់នាងឡើយ។
ទស្សនាវដ្ដី សុខភាពយើង នឹងលើកយកបទពិសោធន៍ខ្លះរបស់ កែវ សូរិយា ទាក់ទងនឹងការថែរក្សាសម្រស់ និងសុខភាព មករៀបរាប់ជូនលោកអ្នក ជាពិសេសមិត្ដនារីឱ្យបានជ្រាបឬក៏អាចយកទៅអនុវត្ដន៍តាម។
ប្រវត្ដិមុនចូលសិល្បៈ
មុនពេលចូលសិល្បៈ កែវ សូរិយា គ្រាន់តែជាសិស្សរៀនភាសាអង់គ្លេស និងអ៊ុតសក់កែសម្ផស្សបន្ដិចបន្ដួចតែប៉ុណ្ណោះ ណាមួយនាងក៏គ្មានបំណងប្រឡូកក្នុងការងារសិល្បៈដែរ។ ដោយសារតែរូបសម្ផស្សដែលស្រស់ស្អាតពីធម្មជាតិរបស់នាង និងមានការ ជំរុញពីសំណាក់មិត្ដភក្ដិនោះ សូរិយាក៏បានចាប់ចូលរួមក្នុងសិល្បៈដំបូងនៅឆ្នាំ២០០៧។ ស្នាដៃដំបូងរបស់នាងត្រូវបានទទួលស្គាល់តាមរយៈរឿងព្រាយហាយសូ និងបទចម្រៀងខារ៉ាអូខេជាច្រើននៅតាមផលិតកម្មនានា។
ការថែរក្សាសម្ផស្ស
បើទោះបីជាពេលនេះ កែវ សូរិយា ត្រូវបានមជ្ឈដ្ឋាននានាទទួលស្គាល់ថានាងមានរូបសម្រស់ស្រស់ស្អាតយ៉ាងណាក៏ដោយ ក៏នាងនៅតែមិនភ្លេចអំពីវិធីទាំងឡាយដែលនាំឱ្យនាងស្រស់ស្អាតដូចរាល់ថ្ងៃនេះដែរ។ សូរិយាមានវិធីដោយឡែកមួយចំនួន ដើម្បី ថែរក្សារូបសម្រស់របស់នាង ដែលក្នុងនោះសូរិយាបានផ្ដោតទៅលើចំណុចសំខាន់មួយចំនួនដូចជា ៖
- ការថែរក្សាសរសៃសក់ ៖ ក្នុងមួយសប្ដាហ៍សូរិយាអប់សក់ម្ដង ដោយនាងបានជ្រើសរើសនូវផលិតផលណាដែលអាច ជួយបំប៉នសរសៃសក់របស់នាងឱ្យទន់រលោង ព្រមទាំងអាចការពារមិនឱ្យសក់បែកចុងបាន។ សូរិយាតែងកក់សក់រៀងរាល់ពីរថ្ងៃម្ដងជាទៀងទាត់។ ចំពោះម៉ូតសក់ សូរិយាចូលចិត្ដម៉ូតបែបតារាកូរ៉េ ហេតុនេះពេលខ្លះនាងប្រើសក់ពាក់ដើម្បីប្ដូរម៉ូតសក់។
- ការថែរក្សាស្បែកមុខ ៖ នេះជាចំណុចពិសេសដែលសូរិយាយកចិត្ដទុកដាក់ខ្លាំងបំផុត នាងតែងតែព្យាយាមប្រើប្រាស់ នូវប្រភេទម្សៅឬក៏ឡេដែលអាចជួយឱ្យមុខរបស់នាងសម៉ដ្ឋរលោង។ ក្រៅពីនេះនាងតែងតែប្រើប្រាស់វិធីធម្មជាតិជាជំនួយផងដែរ ដូចជាការបិទផ្លែចេកត្រសក់ជាដើម។ នៅពេលចេញទៅក្រៅនាងតែងតែលាបក្រែមការពារកម្ដៅថ្ងៃជាប់ជានិច្ច ហើយបើមិនមាន កម្មវិធីឬក៏ថតនោះទេ សូរិយាមិនចូលចិត្ដតុបតែងនោះឡើយ នាងចូលចិត្ដបែបសាមញ្ញច្រើនជាង។ បើទោះបីជាយ៉ាងណា សូរិយា ព្យាយាមទៅម៉ាស្សាសម្អាតស្បែកមុខយ៉ាងតិចក៏ម្ដងដែរក្នុងមួយសប្ដាហ៍។
- ការថែរក្សាស្បែកខ្លួន ៖ ស្បែកដ៏សរលោងគួរឱ្យចង់ថ្នាក់ថ្នមរបស់ កែវ សូរិយា បានមកពីវិធីថែរក្សាយ៉ាងយកចិត្ដទុកដាក់ ដោយការប្រើប្រាស់ផលិតផលកូរ៉េជាច្រើនមុខលាយបញ្ចូលគ្នាសម្រាប់លាបលើស្បែកជាប្រចាំ។ ក្រៅពីនេះជារៀងរាល់ថ្ងៃនៅ ពេលងូតទឹកសូរិយាបានយកទឹកដោះគោឆៅមួយកំប៉ុងមកលាបឱ្យសព្វលើរាងកាយ ដោយផ្អាប់ទុករយៈពេលពី១០ទៅ១៥នាទី ទើបលាងសម្អាតចេញ។ ជាមួយគ្នានេះសូរិយាក៏តែងតែខាត់ស្បែកជាប្រចាំ ដើម្បីឱ្យស្បែករបស់នាងកាន់តែសហើយម៉ដ្ឋរលោងទៀតផង។
- ការថែរក្សាបបូរមាត់ ៖ សូរិយាមិនចូលចិត្ដលាបបបូរមាត់ពណ៌ក្រហម ឬក្រមៅទេ លើកលែងតែករណីចៀសមិនបាន ដូចជាពេលសម្ដែងជាដើម។ ពេលធម្មតាសូរិយាលាបបបូរមាត់ពណ៌ស្រាល ឬមិនលាបតែម្ដង ព្រោះថាបើលាបបបូរមាត់ឋិតថេរ និងពណ៌ដិតពេក អាចធ្វើឱ្យបបូរមាត់ខ្មៅបាន។
- ការថែរក្សាធ្មេញ ៖ ជាទូទៅសូរិយាសម្អាតធ្មេញក្នុងមួយថ្ងៃ៣ដងជាប្រចាំ ជាមួយនឹងថ្នាំដុសធ្មេញដែលមានសារជាតិជួយឱ្យធ្មេញរឹងមាំ និងស។ សូរិយាតែងតែទៅរកគ្រូពេទ្យធ្មេញរៀងរាល់២ឬ៣ខែម្ដងជាប្រចាំ ដើម្បីពិនិត្យ និងសម្អាតធ្មេញមិនដែលខកខានឡើយ។
- ការថែរក្សារោមចិញ្ចើម និងរោមភ្នែក ៖ ជាទៀងទាត់១ឬ២សប្ដាហ៍ម្ដងសូរិយាត្រូវកោរតម្រឹមរោមចិញ្ចើមខាងចុងម្ដង ដោយមិនបណ្ដោយឱ្យរោមចិញ្ចើមដុះក្រាស់ឡើយ ព្រោះនាងយល់ថាចិញ្ចើមក្រាស់មិនសក្ដិសមជាមួយទម្រង់មុខរបស់នាង។ ចំពោះរោមភ្នែកភាគច្រើនសូរិយាប្រើម៉ាស្ការ៉ាសឹងតែរាល់ថ្ងៃ ព្រោះត្រូវតុបតែងពេលសម្ដែង ដែលធ្វើឱ្យរោមភ្នែកសូរិយាប្រឈមមុខនឹងការជ្រុះ។ ប៉ុន្ដែនៅពេលនេះសូរិយាបានជ្រើសរើសវិធីពាក់រោមភ្នែកជំនួសវិញ។
ការថែរក្សាសុខភាព
សុខភាពជារឿងសំខាន់សម្រាប់សូរិយា ជារៀងរាល់ថ្ងៃនាងតែងតែទទួលទានអាហារយ៉ាងប្រយ័ត្នប្រយែង ពោលគឺ បរិភោគអាហារណាដែលមានប្រយោជន៍ចំពោះសុខភាព បន្លែពណ៌បៃតង ផ្លែឈើ ទឹកដោះជាប្រចាំ។ អាហារត្រូវតែទទួលទានឱ្យបានទៀងទាត់ដើម្បីកុំឱ្យខូចក្រពះ បើទោះជារវល់យ៉ាងណាក៏ឆ្លៀតពេលឬក៏ទទួលទានអាហារសម្រន់ដែរ។ ចំពោះការទទួលទាន ដំណេក សូរិយាទទួលស្គាល់ថានាងគេងមិនបានគ្រប់គ្រាន់ទេ ព្រោះជួនត្រូវរវល់ថតដល់យប់ជ្រៅ ជាហេតុធ្វើឱ្យនាងត្រូវអត់ងងុយ ប៉ុន្ដែទោះបីជាយ៉ាងណា នាងនឹងគេងសងវិញភ្លាមនៅពេលដែលមានពេលវេលា។
ចំពោះការហាត់ប្រាណ សូរិយាបានព្យាយាមហាត់ឱ្យបានយ៉ាងតិចណាស់ក៏បីដងដែរក្នុងមួយសប្ដាហ៍។ ជារៀងរាល់៦ខែឬក៏មួយឆ្នាំម្ដង សូរិយាបានទៅពិនិត្យសុខភាពម្ដង ដើម្បីឱ្យដឹងពីបញ្ហាមិនប្រក្រតីទាំងឡាយដែលអាចកើតមាន។
បំណងថ្ងៃអនាគត
មួយរយៈពេលកន្លងមកនេះកេរ្ដិ៍ឈ្មោះរបស់ កែវ សូរិយា ក៏បានកើនឡើងគួរឱ្យកត់សម្គាល់ផងដែរ ហើយការងារសិល្បៈរបស់នាងក៏មានច្រើនជាហូរហែ ទើបធ្វើឱ្យនាងរវល់រកពេលសម្រាកគ្មាន។ ទោះបីជាយ៉ាងណាក៏សូរិយានៅតែមានបំណងមួយផ្សេងទៀតដែរ សម្រាប់ជីវិតរបស់នាង។ អាជីពពិតប្រាកដមួយនោះគឺការងារជំនួញដែលនាងកំពុងដំណើរជាមួយបុរសកំពូលស្នេហ៍របស់នាងជាជនជាតិកូរ៉េ។
បណ្ដាំផ្ញើរបស់ កែវ សូរិយា
សូមជ្រើសរើសប្រើតែផលិតផលណាដែលមានគុណភាពល្អ មិនត្រូវប្រើតាមការនិយមតៗគ្នាឡើយ ព្រោះអាចឱ្យរូបសម្រស់ត្រូវបាត់បង់គ្មានថ្ងៃនឹងត្រឡប់មកវិញទេ។ សុភាពនារីទាំងអស់គួរទៅរកអ្នកជំនាញ មុននឹងសម្រេចចិត្ដប្រើផលិតផលណាមួយ។
ការរៀបរាប់ជូនខាងលើនេះ ជាការយល់ឃើញ និងការអនុវត្ដរបស់កញ្ញា កែវ សូរិយា តែប៉ុណ្ណោះ។ សូមលោកស្រីអ្នកនាងកញ្ញាជ្រើសរើសយកអ្វីដែលលោកអ្នកយល់ថាល្អត្រឹមត្រូវសម្រាប់អនុវត្ដបានហើយ។
ប្រវត្ដិរូបសង្ខេប
- ឈ្មោះ ៖ កែវ សូរិយា
- អាយុ ៖ ២៣ឆ្នាំ
- កម្ពស់ ៖ ១,៦២ម៉ែត្រ
- ទម្ងន់ ៖ ៤៧គីឡូក្រាម
- ទំហំទាំងបី ៖ ៣៣, ២៦, ៣៨
- បងប្អូន ៖ ៣នាក់ (ជាកូនទី២)
- ស្ថានភាពគ្រួសារ ៖ រស់នៅជាមួយឪពុកម្ដាយ
ប្រភព ៖ ទស្សនាវដ្តី សុខភាពយើង លេខ៤៩ ខែកុម្ភៈ ឆ្នាំ២០១០
Leave a Reply