ជម្ងឺទឹកនោមប្រៃពុំសូវមានការចាប់អារម្មណ៍នោះឡើយ ទោះបីជាមនុស្សភាគច្រើនតែងតែនិយាយអំពីជម្ងឺទឹកនោមផ្អែម ក៏ដោយ។ ប៉ុន្ដែពេលនេះ ជម្ងឺទឹកនោមប្រៃក៏ជាបញ្ហាមួយផ្ដល់គ្រោះថ្នាក់ដល់សុខភាព និងបំផ្លាញសរីរាង្គរបស់លោកអ្នកឱ្យមានការ ប្រែប្រួលខ្លាំងក្លាផងដែរ។ ម្យ៉ាងទៀតជម្ងឺនេះកើតមានទូទៅមិនចំពោះ សូម្បីតែកូនក្មេង ឬមនុស្សចាស់ក៏មានជម្ងឺទឹកនោមប្រៃដែរ។
ដើម្បីជ្រាបអំពីជម្ងឺទឹកនោមប្រៃដែលបង្កគ្រោះថ្នាក់យ៉ាងណានោះ ទស្សនាវដ្ដី សុខភាពយើង បានជួបសម្ភាសលោក វេជ្ជបណ្ឌិត លឹម វឌ្ឍនា អ្នកឯកទេសជម្ងឺតម្រងនោម និងជាប្រធានផ្នែកមជ្ឈមណ្ឌល ជា ស៊ីម លាងឈាម នៃមន្ទីរពេទ្យកាល់ម៉ែត។
ជម្ងឺទឹកនោមប្រៃជាអ្វី?
ជម្ងឺទឹកនោមប្រៃគឺជាការបញ្ចេញសារជាតិមិនធម្មតាដែលកើតឡើងដោយសារជម្ងឺអ្វីមួយនៅក្នុងទឹកនោម ដែលជាតិប្រូតេអ៊ីននៅក្នុងទឹកនោមមានលើសពី៥០មីលីក្រាមក្នុង២៤ម៉ោង ព្រោះជាទូទៅទឹកនោមបញ្ចេញបានតិចជាង៣០មីលីក្រាមប៉ុណ្ណោះ ក្នុង២៤ម៉ោង។ ជាធម្មតាវត្ដមានជម្ងឺទឹកនោមប្រៃនេះបានបង្ហាញខ្លួន ឬត្រូវរកឃើញនៅពេលដែលអ្នកជម្ងឺមកជួបគ្រូពេទ្យពេលមាន អាការហើម និងជម្ងឺរលាកតម្រងនោម។ ជម្ងឺទឹកនោមប្រៃនេះបែងចែកជា៣យ៉ាងផ្សេងគ្នា ៖
1 . ជម្ងឺទឹកនោមប្រៃកើតឡើងដោយសារធម្មជាតិ គឺជាទឹកនោមប្រៃដែលកើតឡើងតិចជាង៥០មីលីក្រាមក្នុង២៤ម៉ោង ។
2 . ជម្ងឺទឹកនោមប្រៃកើតឡើងដោយសារការងើបអង្គុយ ឈរ ឬដេក គឺជាជម្ងឺកើតឡើងតាមរយៈជម្ងឺផ្សេងៗមួយចំនួន បូកផ្សំចូលគ្នា។
3 . ទឹកនោមប្រៃស្ដែងចេញឱ្យឃើញពីអាការអ្នកជម្ងឺ ដូចជារលាកតម្រងនោម ខ្សោយតម្រងនោម ឬហើមជាដើម។
មូលហេតុដែលបង្កឱ្យមានជម្ងឺទឹកនោមប្រៃ
ជម្ងឺនេះជាទូទៅកើតឡើងដោយសារខ្លួនឯង ឬក៏អាចកើតមានឡើងដោយសារជម្ងឺដទៃទៀត។ តួយ៉ាងដូចជាករណី ជម្ងឺទឹកនោមផ្អែម ជាទូទៅបានផ្ដល់នូវផលវិបាកទាំងនេះ។ ព្រោះបើមិនធ្វើការព្យាបាលទប់ស្កាត់ វាអាចធ្វើឱ្យខូចតម្រងនោម ហើយក៏មានជម្ងឺទឹកនោមប្រៃចេញមក។ ជម្ងឺទឹកនោមប្រៃជាទូទៅគេច្រើនហៅថា ជម្ងឺរលាកតម្រងនោម។
រោគសញ្ញាជម្ងឺទឹកនោមប្រៃ
អ្នកជម្ងឺទឹកនោមប្រៃ មុនដំបូងមានរោគសញ្ញាហើម ហើយអ្នកជម្ងឺមានអាការហេវហត់ គ្មានកម្លាំងកំហែង ចុះខ្សោយ ផ្លូវភេទ ហើយអ្នកជម្ងឺបញ្ចេញទឹកនោមច្រើន អាចមានប្រូតេអ៊ីនលើសពី៥០មីលីក្រាមក្នុង២៤ម៉ោង។ លោកអ្នកមួយចំនួនមិនបាន ចាប់អារម្មណ៍ថាខ្លួនមានជម្ងឺនេះឡើយ លុះឈានដល់កម្រិតមួយធ្ងន់ធ្ងរសុខភាពចុះខ្សោយយ៉ាងខ្លាំងទើបទៅពិគ្រោះជាមួយគ្រូពេទ្យ ទើបដឹងថាខ្លួនមានជម្ងឺទឹកនោមប្រៃ។
វិធីព្យាបាលជម្ងឺទឹកនោមប្រៃ
វិធីព្យាបាលគឺពឹងផ្អែកទៅលើលទ្ធផលនៃជម្ងឺមួយៗ ប្រសិនបើវាកើតឡើងដោយសារការរលាកតម្រងនោមនោះគឺគ្រូពេទ្យព្យាបាលជម្ងឺរលាកតម្រងនោម។ ប្រសិនបើកើតឡើងដោយសារការរលាកប្លោកនោមត្រូវព្យាបាលទៅតាមនោះ។ ប៉ុន្ដែអ្នកជម្ងឺ ទឹកនោមប្រៃមួយចំនួនកើតឡើងដោយឯងៗ ហើយមានតិចតួចដែលមានតិចជាង១ក្រាមក្នុង២៤ម៉ោង។ ហើយបើធ្វើការពិនិត្យទៅ ក្នុងទឹកនោម ឃើញមានគ្រាប់ឈាមស។ គ្រូពេទ្យផ្ដល់ថ្នាំព្យាបាលទៅតាមអាការរោគទាំងនេះ។ ម្យ៉ាងទៀតលោកអ្នកមួយចំនួនមានជម្ងឺលើសឈាមខ្លាំង ក៏អាចប្រឈមមុខនឹងកើតជម្ងឺទឹកនោមប្រៃនេះដែរ។ ចំពោះវិធីព្យាបាលគឺត្រូវធ្វើទៅតាមការវិនិច្ឆ័យតាម មុខជម្ងឺនីមួយៗរបស់អ្នកជម្ងឺតែម្ដង។ ខណៈពេលដែលគ្រូពេទ្យកំពុងតែយកចិត្ដទុកដាក់ព្យាបាលនោះ អ្នកជម្ងឺអាចវិវឌ្ឍន៍លឿនលឿនទៅមុខដោយមានកត្ដាបីយ៉ាង ដូចជាបន្ទាប់ពីព្យាបាលហើយនោះអាការហើមចាប់ផ្ដើមស្រក។ ទីពីរ ទឹកនោមអាចកើនច្រើនមកវិញ ហើយច្រោះចេញមកតាមការកំណត់ច្បាស់លាល់។ ទីបី វិធីព្យាបាលតាមការប្រើប្រាស់ថ្នាំផ្សះ ធ្វើឱ្យជម្ងឺអាចឆាប់ជាសះស្បើយទាំងអាការហើម និងជម្ងឺរលាកផ្សេងៗ ជាពិសេសរលាកតម្រងនោម និងប្លោកនោមតែម្ដង។
វិធីការពារជម្ងឺទឹកនោមប្រៃ
ដើម្បីការពារជម្ងឺទឹកនោមប្រៃ ក្រោយពេលព្យាបាលអ្នកជម្ងឺត្រូវតែឧស្សាហ៍មកជួបគ្រូពេទ្យដើម្បីធ្វើការពិនិត្យឡើងវិញ និងប្រើថ្នាំទប់ស្កាត់ជម្ងឺនេះក្រែងរើឡើងវិញដោយប្រការណាមួយ។
ផលប៉ះពាល់នៃជម្ងឺទឹកនោមប្រៃ
ជម្ងឺទឹកនោមប្រៃគឺជាជម្ងឺដែលធ្វើឱ្យតម្រងនោមមានការចុះខ្សោយ។ នៅពេលដែលតម្រងនោមចុះខ្សោយគឺបណ្ដាលឱ្យខូច ក្រលៀន អ្នកជម្ងឺចាំបាច់ត្រូវតែដូរក្រលៀនចេញ បន្ទាប់មកអាចប្រើវិធីលាងឈាមផងដែរ។ មិនតែប៉ុណ្ណោះប្រសិនបើជម្ងឺទឹកនោម ប្រៃនេះធ្លាក់ដល់កម្រិតមួយមិនអាចព្យាបាលកើត អ្នកជម្ងឺអាចប្រឈមមុខនឹងការស្លាប់បាត់បង់ជីវិត។ ព្រោះបើតម្រងនោមចុះខ្សោយហើយ វាបានទាញយកសរីរាង្គផ្សេងៗ ដូចជាសរសៃឈាមបេះដូង សរសៃខួរក្បាល ក្រពះ ពោះវៀនជាដើម មិនអាចដំណើរការ និងផ្លាស់ប្ដូរនូវចរន្ដឈាមបាននោះទេ។
ដំបូន្មានអ្នកជំនាញ
ប្រសិនបើលោកអ្នកមានអាការហើមមុខមាត់ ឬដៃជើង ត្រូវរួសរាន់មកកាន់មន្ទីរពេទ្យ ដើម្បីធ្វើការពិនិត្យឱ្យទាន់ពេល វេលា ព្រោះអាការបែបនេះលោកអ្នកកំពុងតែប្រឈមមុខនឹងជម្ងឺផ្សេងៗ។ ម្យ៉ាងទៀតលោកអ្នកអាចកើតជម្ងឺទឹកនោមប្រៃ និង ជម្ងឺមួយចំនួនទៀត ដូចជាជម្ងឺខ្សោយតម្រងនោម រលាកប្លោកនោមជាដើម។ មានតែគ្រូពេទ្យតែប៉ុណ្ណោះដែលអាចដឹងថា លោកអ្នកមានជម្ងឺអ្វីក្រោយពេលធ្វើការពិនិត្យ និងវិនិច្ឆ័យ។
ប្រភព ៖ ទស្សនាវដ្តី សុខភាពយើង លេខ៤៩ ខែកុម្ភៈ ឆ្នាំ២០១០
Leave a Reply