ការសម្រាកចិត្ដកាយជាវិធីមួយដែលជួយសម្រួលដល់អារម្មណ៍របស់លោកអ្នក ក្រៅពីដើរលម្ហែកាយ។ វិធីនេះអាចមានលក្ខណៈខុសប្លែកទៅនឹងវិធីលម្ហែកាយ និងលម្ហែអារម្មណ៍ដែលត្រូវការទីកន្លែងដែលមានសភាពសប្បាយរីករាយ។ ផ្ទុយទៅវិញ ការធ្វើវិធីសម្រាកចិត្ដកាយនេះគឺទាមទារឱ្យលោកអ្នកនៅកន្លែងដែលគ្មានអ្នករំខាន ដើម្បីធ្វើចលនាដកដង្ហើមឱ្យស្ងប់អារម្មណ៍។
ទាក់ទងទៅនឹងវិធីសម្រាកចិត្ដកាយនេះ ទស្សនាវដ្ដី សុខភាពយើង បានជួបជាមួយលោកវេជ្ជបណ្ឌិត យឹម សុបុត្រា អ្នកឯកទេសវិកលវិទ្យានៃគ្លីនិកសាន់រ៉ាយ។
វិធីសម្រាកចិត្ដកាយ
វិធីសម្រាកចិត្ដកាយគឺជាវិធីដ៏មានសារៈប្រយោជន៍ក្នុងការកាត់បន្ថយភាពតានតឹងផ្លូវចិត្ដរបស់មនុស្ស។ វិធីនេះត្រូវបានអនុវត្ដនៅក្នុងវិធីសមាធិបែបបុរាណក៏ដូចជាវិធីតាមបែបចិត្ដសាស្ដ្រផងដែរ។ វិធីសម្រាកចិត្ដកាយភាគច្រើនអនុវត្ដតាមលំហាត់ដកដង្ហើម។ ការសាកល្បងទៅលើវិធីនេះពិតជាធ្វើឱ្យលោកអ្នកបានសេចក្ដីសុខស្រួលក្នុងចិត្ដ និងកាយ ហើយមានអារម្មណ៍ស្ងប់ទៀតផង។ វិធីនេះគឺជាការព្យាបាលម្យ៉ាងដែលលោកអ្នកអាចអនុវត្ដបានដោយមិនចាំបាច់មានជម្ងឺអ្វីមួយនោះទេ។ លំហាត់នេះអាចអនុវត្ដបានគ្រប់ពេលវេលា ហើយចំណាយពេលប្រមាណ១០នាទីប៉ុណ្ណោះ។ ជាការប្រសើរលោកអ្នកគួរធ្វើលំហាត់នេះនៅក្នុងបន្ទប់មួយស្ងាត់ស្ងៀម និងគ្មានអ្នករំខាន។
វិធីលំហាត់ដកដង្ហើម
ខាងក្រោមនេះគឺជាជំហានបន្ដបន្ទាប់ក្នុងការធ្វើលំហាត់ដកដង្ហើម ៖
- ផ្ដើមធ្វើលំហាត់ដោយដេកសណ្ដូក ឬអង្គុយក្នុងស្ថានភាពងាយស្រួលតាមដែលលោកអ្នកចូលចិត្ដ បន្ទាប់មកបិទភ្នែក
- ប្រមាណ១០នាទីក្រោយមក គប្បីផ្ចង់អារម្មណ៍ទៅលើចង្វាក់ដង្ហើម
- បន្ទាប់មកត្រូវផ្ចង់អារម្មណ៍ទៅលើខ្យល់ដង្ហើមយឺតៗ ចេញចូលតាមច្រមុះ
- គប្បីដកដង្ហើមចូលរហូតរាប់ដល់បី ហើយដកដង្ហើមចេញវិញរាប់ដល់បីដូចគ្នា។
សារៈប្រយោជន៍នៃការធ្វើវិធីសម្រាកចិត្ដកាយ
ការធ្វើវិធីសម្រាកចិត្ដកាយ និងលំហាត់ដកដង្ហើមនេះមានសារៈប្រយោជន៍ក្នុងការជួយដល់លោកអ្នកដែលមានបញ្ហាផ្នែកអារម្មណ៍ និងផ្លូវចិត្ដ។ ក្នុងរយៈពេលពីរសប្ដាហ៍បន្ទាប់ដែលលោកអ្នកបានអនុវត្ដលំហាត់ដកដង្ហើមនេះជារៀងរាល់ថ្ងៃ លោកអ្នកនឹង មានអារម្មណ៍ថាបានសម្រាកចិត្ដកាយយ៉ាងសុខស្រួល។ ក្រោយមកទៀតនៅពេលដែលលោកអ្នកមានបទពិសោធន៍គ្រប់គ្រាន់ហើយនោះ លោកអ្នកអាចធ្វើលំហាត់សម្រាកចិត្ដកាយនេះបានគ្រប់ស្ថានភាព ដូចជានៅពេលដែលធ្វើដំណើរតាមរថយន្ដជាដើម។
ដំបូន្មានអ្នកជំនាញ
ការធ្វើវិធីសម្រាកចិត្ដមានអត្ថប្រយោជន៍ជួយទប់ស្កាត់បញ្ហាផ្លូវចិត្ដ ដូចជាការគិតច្រើន មានអារម្មណ៍តានតឹង ភាពស្មុគ ស្មាញក្នុងចិត្ដជាដើម។ ដូចនេះការអនុវត្ដវិធីនេះគឺពិតជាជួយដល់លោកអ្នកបានមួយចំណែកផងដែរ។ ការអនុវត្ដវិធីដែលមានប្រយោជន៍សម្រាប់សុខភាពឱ្យក្លាយជាទម្លាប់នោះសុខភាពរបស់លោកអ្នកប្រាកដជារឹងមាំក្នុងការទប់ស្កាត់ជម្ងឺទាំងឡាយ។
ប្រភព ៖ ទស្សនាវដ្តី សុខភាពយើង លេខ៥១ ខែមេសា ឆ្នាំ២០១០
Leave a Reply