បេះដូងមានតួនាទីសំខាន់ណាស់សម្រាប់មនុស្សគ្រប់វ័យ ព្រោះវាជាសរីរៈមួយជួយបញ្ជូនឈាមទៅគ្រប់ប្រព័ន្ធនៃសារពាង្គ កាយនៅក្នុងខ្លួនយើង តាមចរន្ដសរសៃឈាម។ ដោយឡែកសាច់ដុំបេះដូងក៏មានតួនាទីសំខាន់ផងដែរ ក្នុងការច្របាច់ខ្យល់អុកស៊ីសែន ដើម្បីចែករំលែកឱ្យប្រព័ន្ធបេះដូងដើរស្រួលគ្មានការរាំងស្ទះ។ ប៉ុន្ដែប្រសិនបើសាច់ដុំបេះដូងរលាកហើយនោះ វានឹងធ្វើឱ្យមានផលប៉ះពាល់យ៉ាងច្រើនក្នុងពេលធ្វើប្រតិបត្ដិការនៅក្នុងរាងកាយ។
ដើម្បីជូនជ្រាបអំពីផលប៉ះពាល់ចំពោះជម្ងឺរលាកសាច់ដុំបេះដូងកុមារបង្កដោយវីរុស ទស្សនាវដ្ដី សុខភាពយើង បានជួបសម្ភាសន៍ជាមួយ លោកវេជ្ជបណ្ឌិត ហុង សុខឃាង ឯកទេសជម្ងឺកុមារទូទៅនៃមន្ទីរពេទ្យកុមារជាតិ។
ជម្ងឺរលាកសាច់ដុំបេះដូងកុមារបង្កដោយវីរុស ជាអ្វី?
ជម្ងឺរលាកសាច់ដុំបេះដូងកុមារបង្កឡើងដោយវីរុស គឺជាការរលាកសាច់ដុំបេះដូងដោយសារមេរោគឆ្លងចូលទៅតាមមាត់ តាមច្រមុះ ឬតាមឈាម។ ក្រោយពេលមេរោគឆ្លងចូលក្នុងឈាម វាធ្វើដំណើរតាមសរសៃឈាមរហូតដល់បេះដូង បណ្ដាលឱ្យប៉ះពាល់បេះដូង អាចបង្កឱ្យរលាកសាច់បេះដូង បេះដូងហើម ឬបង្កឱ្យបេះដូងរីក ហើយសកម្មភាពនៃការកន្ដ្រាក់របស់បេះដូង កុមារនោះមានសភាពខ្សោយជាងមុន។
មូលហេតុដែលបណ្ដាលឱ្យមានជម្ងឺរលាកសាច់ដុំបេះដូងកុមារ
ជម្ងឺរលាកបេះដូងកុមារបង្កឡើងដោយសារជម្ងឺផ្ដាសាយធំ និងបង្កឡើងពីការរលាកបំពង់ក រលាកច្រមុះ រលាកទងសួត មេរោគព្រមទាំងដោយសារស្រឡាទែន ឬវីរុសបង្កឱ្យកុមាររាករូសផងដែរ។
រោគសញ្ញាជម្ងឺរលាកសាច់ដុំបេះដូងកុមារ
កុមារដែលមានជម្ងឺនេះបានបង្ហាញរោគសញ្ញាដំបូងមានអាការខ្សោយបេះដូង ក្ដៅដង្ហក់ បេះដូងលោតញាប់ សម្បុរឡើង ពណ៌ប្រផេះខុសប្រក្រតី ស្លេកស្លាំងជាដើម។
វិធីព្យាបាលជម្ងឺរលាកសាច់ដុំបេះដូងកុមារ
ប្រសិនបើរកឃើញថាកុមារមានជម្ងឺរលាកសាច់ដុំដែលបង្កឱ្យមានអាការខ្សោយបេះដូងនោះ ត្រូវព្យាបាលជម្ងឺខ្សោយបេះ ដូងឱ្យជាសះស្បើយ។ ប្រសិនបើវាបង្កឡើងដោយមេរោគនៃការរលាកផ្សេងៗ គឺត្រូវព្យាបាលជម្ងឺរលាកនេះឱ្យជាទើបមិនអាចរីក រាលដាលដល់ប្រព័ន្ធបេះដូង។
វិធីការពារជម្ងឺរលាកសាច់ដុំបេះដូងកុមារ
ដើម្បីការពារជម្ងឺនេះកុមារទាំងអស់ត្រូវធ្វើយ៉ាងណាការពារកុំឱ្យមានមេរោគឆ្លងចូលតាមប្រព័ន្ធផ្សេងៗ ដូចជាប្រព័ន្ធផ្លូវ ដង្ហើមឬតាមមាត់។ ត្រូវចេះធ្វើអនាម័យ ជាពិសេសពេលក្អក ឬកណ្ដាស់ត្រូវមានក្រណាត់ខ្ទប់មាត់ឱ្យបានត្រឹមត្រូវ។ ត្រូវលាងដៃ មុនពេលទទួលទានអាហារ ឬមុនពេលចូលគេង។ ចំពោះមាតាបិតាវិញក៏ត្រូវលាងដៃឱ្យស្អាតដែរ មុនពេលប៉ះពាល់កូនរបស់ខ្លួន។
ផលប៉ះពាល់ចំពោះជម្ងឺរលាកសាច់ដុំបេះដូងកុមារ
ប្រសិនបើមិនធ្វើការព្យាបាលកុមារឱ្យទាន់ពេលវេលាទេនោះ អាចនឹងធ្វើឱ្យកុមារទទួលការប៉ះពាល់កាន់តែធ្ងន់ធ្ងរថែម ទៀត រហូតដល់បាត់បង់ជីវិតផងដែរ។ ព្រោះបេះដូងគឺជាសរីរៈសំខាន់បំផុត បើចលនាបេះដូងលែងដើរ ឬមិនអាចច្របាច់ បញ្ជូនឈាមឬខ្យល់អុកស៊ីសែនបាន នឹងឱ្យកុមារមានគ្រោះថ្នាក់។
ដំបូន្មានអ្នកជំនាញ
មាតាបិតាគ្រប់រូបប្រសិនបើឃើញកូនមានអាការប្លែក ឬបង្ហាញជារោគសញ្ញាផ្សេងៗ ដែលខ្លួនសង្ស័យថាមានជម្ងឺនោះត្រូវ យកទៅកាន់មន្ទីរពេទ្យឱ្យឆាប់រហ័ស ដើម្បីឱ្យគ្រូពេទ្យធ្វើការត្រួតពិនិត្យដើម្បីធ្វើការព្យាបាល ព្រោះកុមារបច្ចុប្បន្ននេះងាយនឹង រងគ្រោះដោយសារជម្ងឺផ្សេងៗជាច្រើន ហើយឆាប់គ្រោះថ្នាក់ទៀតផង។
ប្រភព ៖ ទស្សនាវដ្តី សុខភាពយើង លេខ៥១ ខែមេសា ឆ្នាំ២០១០
Leave a Reply