ជាម្ដាយមួយរូប ពិតជាចង់ឱ្យកូនមានសុខភាពល្អ រឹងមាំ និងស្រស់ស្អាតនៅពេលដែលកូនខ្លួនបានចេញមករស់នៅពិភពខាងក្រៅ។ ទន្ទឹមនឹងបំណងប្រាថ្នានេះ ក្នុងនាមជាស្ដ្រី និងជាម្ដាយមួយរូប គប្បីថែរក្សាសុខភាពខ្លួនឱ្យបានល្អ។ ក្នុងអំឡុងពេលមានផ្ទៃ ស្ដ្រីគ្រប់រូបនឹងត្រូវប្រឈមមុខជាមួយបញ្ហាដែលកើតឡើងដោយមិនអាចដឹងមុន ដែលជាសញ្ញាគ្រោះថ្នាក់ចំពោះម្ដាយ និងកូនក្នុងផ្ទៃ។ តើអ្នកម្ដាយគ្រប់រូបបានត្រៀមខ្លួនក្នុងការថែរក្សាសុខភាពហើយឬនៅ?
ដើម្បីជ្រាបច្បាស់ថាស្ដ្រីនៅពេលមានផ្ទៃពោះមានសញ្ញាគ្រោះថ្នាក់អ្វីខ្លះនោះ ទស្សនាវដ្ដី សុខភាពយើង បានជួបធ្វើបទសម្ភាសន៍ជាមួយលោកសាស្ដ្រាចារ្យ លៀង ច័ន្ទរិទ្ធ អនុប្រធានមន្ទីរពេទ្យមិត្ដភាពខ្មែរសូវៀត។
អ្វីទៅជាសញ្ញាគ្រោះថ្នាក់ចំពោះស្ដ្រីពេលមានផ្ទៃពោះ?
សុខភាពជាបញ្ហាមួយដែលយើងម្នាក់ៗកំពុងយកចិត្ដទុកដាក់ ពិសេសចំពោះស្ដ្រីដែលកំពុងមានផ្ទៃពោះ។ ការមានផ្ទៃពោះ នៅមុនអាយុ១៨ឆ្នាំ ឬក្រោយអាយុ៣៥ឆ្នាំនឹងអាចបង្កើនគ្រោះថ្នាក់ដល់សុខភាពម្ដាយ និងទារក។ សញ្ញាគ្រោះថ្នាក់ទាំងអស់ប្រៀប ដូចជាមុខព្រួញដ៏មុខស្រួចដែល អាចចូលទៅសម្លាប់អាយុជីវិតម្ដាយ និងទារក។ ស្ដ្រីគ្រប់រូបគប្បីកំណត់ពេលមានផ្ទៃពោះយ៉ាងហោចណាស់នៅអាយុ២០ឆ្នាំយ៉ាងតិចដែរ ព្រោះអាចជួយឱ្យមានសុវត្ថិភាពបំផុតទាំងម្ដាយទាំងកូននៅពេលសម្រាល ជាពិសេសជួយកាត់បន្ថយគ្រោះថ្នាក់ចំពោះទារកដែលកើតមកមិនគ្រប់ទម្ងន់។ មានបញ្ហាជាច្រើនដែលស្ដ្រីត្រូវដឹងដើម្បីការពារខ្លួន និងកូនក្នុងផ្ទៃឱ្យមានសុវត្ថិភាព។
សញ្ញាគ្រោះថ្នាក់ចំពោះស្ដ្រីពេលមានផ្ទៃពោះ
សញ្ញាគ្រោះថ្នាក់ចំពោះស្ដ្រីពេលមានផ្ទៃពោះអាចកើតមានឡើងដោយមិនបានដឹងជាមុន ក្នុងពេលមានផ្ទៃពោះ និងពេលសម្រាល។ ដូចនេះទាមទារឱ្យក្រុមគ្រួសារទាំងអស់ ពិសេសស្ដ្រីខ្លួនឯងផ្ទាល់ចាំបាច់ត្រូវដឹងអំពីកត្ដាដែលនាំឱ្យគ្រោះថ្នាក់ និងឱ្យស្គាល់ពីសញ្ញាគ្រោះថ្នាក់ទាំងឡាយដែលអាចកើតមានដូចខាងក្រោមនេះ ៖
- ការធ្លាក់ឈាម នៅពេលដែលទារកមានអាយុតិចចាប់ពី១ខែទៅ៥ខែ នេះគឺជាមុខសញ្ញាមួយដែលស្ដ្រីប្រឈមមុខនឹងគ្រោះថ្នាក់ ហើយវាជាការគំរាមនៃការរលូត។ បើសិនជានៅពេលជិតគ្រប់ខែហើយនៅតែមានការធ្លាក់ឈាមទៀតនោះ នេះក៏ជាសញ្ញាគ្រោះថ្នាក់ដែរ។
- ស្ដ្រីដែលមានផ្ទៃពោះនៅអាយុច្រើនចាប់ពី៣៥ឆ្នាំឡើង អាចប្រឈមនឹងគ្រោះថ្នាក់ ដោយសារជម្ងឺមួយចំនួន ដូចជាជម្ងឺទឹកនោមផ្អែម លើសឈាម រលាកតម្រង់នោមជាដើម នេះជាមូលហេតុនៃគ្រោះថ្នាក់នៅពេលមានផ្ទៃពោះ។
- ស្ដ្រីដែលមានការកើនឡើងទម្ងន់ហួសកំណត់(ធាត់ពេក) អាចបង្កឱ្យមានគ្រោះថ្នាក់នៅពេលសម្រាល ប្រការដែលល្អបំផុត គឺទម្ងន់អាចកើនត្រឹម១០គីឡូក្រាមក្នុងអំឡុងពេលមានផ្ទៃពោះ
- ជម្ងឺកង្វះគ្រាប់ឈាមក្រហម ឬមានភាពស្លេកស្លាំងនៅផ្នែកខាងក្នុងនៃត្របកភ្នែក អស់កម្លាំងខ្លាំង ឬដង្ហក់ បើមានបញ្ហានេះគប្បីនាំស្ដ្រីទៅមន្ទីរពេទ្យ ឬមណ្ឌលសុខភាព ដើម្បីទទួលការពិគ្រោះយោបល់ជាមួយនឹងគ្រូពេទ្យ ឬអ្នកជំនាញ ដើម្បីជួយសង្គ្រោះ ព្យាបាលម្ដាយ និងកូនឱ្យបានទាន់ពេលវេលា។
- អាការហើមជើង ហើមដៃ ហើមមុខខុសធម្មតា បញ្ហាទាំងនេះសុទ្ធសឹងជាសញ្ញាគ្រោះថ្នាក់ចំពោះស្ដ្រីនៅពេលមានផ្ទៃពោះ
- ទារកនៅក្នុងផ្ទៃមានចលនាខ្សោយ ឬគ្មានចលនាសោះតែម្ដង នេះជាគ្រោះថ្នាក់ចម្បងបំផុតសម្រាប់អាយុជីវិតរបស់ទារក។
- កម្ពស់ស្បូន ឬពោះដែលមានគភ៌មិនធំលូតលាស់សមនឹងអាយុរបស់គភ៌ នេះជាបញ្អាត្រូវយកចិត្តទុកដាក់មួយដែលតម្រូវឱ្យរកនូវមូលហេតុនៃបញ្អា។
- ការប្រើថ្នាំផ្ដេសផ្ដាសរបស់ស្ដ្រីដែលមានផ្ទៃពោះ ដោយមិនមានវេជ្ជបញ្ជាត្រឹមត្រូវពីអ្នកជំនាញ ឬគ្រូពេទ្យ ជាការបង្កគ្រោះថ្នាក់ខ្លាំងក្លាបំផុតចំពោះទារកនៅក្នុងផ្ទៃព្រោះឱសថមួយចំនួននឹងធ្វើឱ្យទារកក្នុងផ្ទៃមានភាពមិនប្រក្រតីពេលសម្រាលមក។
- ការធ្លាក់ឈាមតិច ឬច្រើនតាមទ្វារមាស ឬឈឺពោះខ្លាំង ក្អួតមិនឈប់ គ្រុនក្ដៅខ្លាំង មានប្រកាច់ មានការឈឺពោះយូរ និងស្រ្តីមានបែកទឹកភ្លោះមុនថ្ងៃសម្រាល ទាំងនេះជាសញ្ញាគ្រោះថ្នាក់ចំពោះស្ដ្រីមានផ្ទៃពោះដែលទាមទារឱ្យមានការពិគ្រោះព្យាបាលតាមរោគវិនិច្ឆ័យជម្ងឺត្រឹមត្រូវ។ បញ្ហាទាំងអស់នេះជាការយល់ដឹងដ៏សំខាន់បំផុតចំពោះស្ដ្រីគ្រប់រូប ក៏ដូចជាក្រុមគ្រួសារទាំងអស់ផងដែរ។
ប្រការគួរចៀសវាងនៅពេលមានផ្ទៃពោះ
ដើម្បីឱ្យមានសុខភាពមាំមួនល្អ អ្នកម្ដាយគប្បីថែរក្សា និងយកចិត្ដទុកដាក់ចំពោះសុខភាព។ ស្ដ្រីអាចបំផ្លាញសុខភាពរបស់ខ្លួន និងកូនដោយសារការពិសាស្រា បារី ឬក៏ការស្រូបផ្សែងបារីចូលទៅក្នុងខ្លួន។ នេះជាប្រការគួរចៀសវាងចំពោះស្ដ្រីដែលមានផ្ទៃពោះ ព្រោះអាចធ្វើឱ្យកូនកើតមិនគ្រប់ទម្ងន់ កូនអាប់បញ្ញា ថែមទាំងអាចមានជម្ងឺក្អក ផ្ដាសាយ រោគរលាកសួត រោគរលាកបំពង់ក ឬក៏បញ្ហាផ្លូវដង្ហើមផ្សេងៗទៀត ហើយទារកអាចមានមុខមិនស្អាតនៅពេលដែលកើតមក។ មួយវិញទៀត សូមចៀសវាង ការប្រើប្រាស់ថ្នាំដោយមិនមានវេជ្ជបញ្ជាត្រឹមត្រូវនៅពេលមានផ្ទៃពោះ។
ដំបូន្នានអ្នកជំនាញ
ស្ដ្រីដែលមានផ្ទៃពោះត្រូវទៅពិនិត្យ និងដានតាមសុខភាពរបស់ខ្លួនឱ្យបានញឹកញាប់និងទៀងទាត់។ បើដឹងថាខ្លួនមានជម្ងឺ ឬមានបញ្ហាអ្វីមួយហើយ គប្បីប្រញាប់ទៅជួបពិគ្រោះជាមួយអ្នកជំនាញ ឬគ្រូពេទ្យ ដើម្បីពិនិត្យ និងផ្ដល់ថ្នាំត្រឹមត្រូវ។ សូមព្យាយាម បរិភោគអាហារដែលមានថាមពល និងជីវជាតិច្រើន ដើម្បីកូនមានសុខភាពល្អ និងទៅពិនិត្យផ្ទៃពោះនៅមន្ទីរពេទ្យ ឬមណ្ឌលសុខភាពជាប្រចាំ។
ប្រភព ៖ ទស្សនាវដ្តី សុខភាពយើង លេខ៤៧ ខែធ្នូ ឆ្នាំ២០០៩
Leave a Reply