ថ្ងៃបុណ្យសង្សារ ឬថ្ងៃនៃក្ដីស្រឡាញ់កំពុងត្រូវ​បាន​យុវវ័យខ្មែរ​មួយចំនួន ជាពិសេស​អ្នករស់នៅទីក្រុងភ្នំពេញ នាំគ្នាចាប់អារម្មណ៍ និងនិយមចូលចិត្ដ បើទោះជាពិធី​នេះមិនមែន​ជាទំនៀមទម្លាប់ខ្មែរ វាជាបុណ្យរបៀបអឺរ៉ុបក្ដី។ ថ្ងៃទី១៤កុម្ភៈជាថ្ងៃ Valentine’s day ឬថ្ងៃបុណ្យនៃក្ដីស្រឡាញ់​ដែលនឹងឈានចូលមកដល់​ក្នុងពេលដ៏ខ្លីខាងមុខនេះ ជាទិវាសកល​បែបអឺរ៉ុបនិយមដែល​យុវវ័យខ្មែរ​និយមហៅថាបុណ្យសង្សារ​ឡើងរត់មាត់ទៅហើយ។

សង្គមជឿនលឿន វប្បធម៌លាយឡំ

ក្រោយពីប្រទេសកម្ពុជាយើងទទួលបាននូវសុខសុវត្ថិភាព​ពេញបរិបូរណ៍មក ការហូរចូលនៃវប្បធម៌​បរទេសក៏មានការកើន ឡើង​គួរឱ្យកត់សម្គាល់ ដែលជាសញ្ញាបញ្ជាក់​ពីភាពរីកចម្រើន​ខាងផ្នែកសេដ្ឋកិច្ច និងទំនាក់ទំនង​ការបរទេស។ វប្បធម៌បរទេស​បន្ដិច ម្ដងៗបានគ្របដណ្ដប់​លើសតិអារម្មណ៍យុវវ័យខ្មែរ​ដែលប្រាថ្នាចង់​ធ្វើដូចគេនេះបាន និងកំពុងចាប់អង្រួន​បេះដូងប្រជាពលរដ្ឋខ្មែរ​ឱ្យរង្គើ ​ទាំងក្មេងទាំងចាស់។ សង្គមជឿនលឿន​សម្ភារៈប្រើប្រាស់ទំនើប​ជាបច្ច័យមួយយ៉ាងល្អ ដែលស្ដែងពីការរស់នៅក្នុង​កម្រិតសមរម្យមួយ​ ប៉ុន្ដែក្រៅពីនេះ​ក៏អាចបង្កឱ្យមានការប៉ះពាល់​មួយចំនួនផងដែរទៅលើ​ប្រពៃណីទំនៀមទម្លាប់ខ្មែរ ដែលបន្ដិចម្ដងៗ​ត្រូវបានកាត់តម្រឹម ។

មានពិធីតាមបែបអឺរ៉ុបជាច្រើនត្រូវបានប្រជាពលរដ្ឋខ្មែរ ជាពិសេសយុវវ័យ​និយមចូលចិត្ដ ដូចជាបុណ្យណូអែល បុណ្យ សង្សារជាដើម។ ដោយឡែក​សម្រាប់បុណ្យសង្សារ​នៅពេលជួបសាកសួរ​ជាមួយក្រុមយុវវ័យ​បានឱ្យដឹងថា ក្នុងចំណោមពួកគេ​ភាគ ច្រើនមិនដឹងពីប្រវត្ដិ ឬអត្ថន័យយ៉ាងណានោះទេ គ្រាន់តែឃើញគេធ្វើក៏​ធ្វើតាមទៅតែប៉ុណ្ណោះ។ យុវវ័យខ្លះគ្រាន់តែដឹងថា​នេះជាថ្ងៃ បុណ្យសង្សារ អ្នកដែលមានសង្សារត្រូវតែជូនកាដូ ឬផ្កាឱ្យគ្នាទៅវិញទៅមក​ដើម្បីបញ្ជាក់នូវការស្រឡាញ់។ ដោយឡែកយុវជនខ្លះ ​ទៀតយល់ថា នេះជាឱកាសល្អដែលគេអាចសារភាពស្នេហ៍​ដោយគ្រាន់តែទិញកាដូ ឬផ្កាមួយបាច់​ជូនចំពោះនារី​ដែលគេស្រឡាញ់។

សម័យកាលចេះតែវិវត្ដន៍ទៅមុខ ទម្លាប់នៃការប្រព្រឹត្ដ​ក៏មានការផ្លាស់ប្ដូរដែរ។ ពីមុនយុវវ័យខ្មែរព្យាយាម​លាក់បាំងទំនាក់ ទំនងស្នេហាដោយមិនចង់​ទទួលនូវការរិះគន់​សើចយំពីអ្នកដទៃ។ ប៉ុន្ដែសម័យថ្មីនេះយុវវ័យដែលគ្មាន​ស្នេហាប្រៀបដូចផ្កា​ដែលគ្មាន លម្អង។

បុណ្យសង្សារ​បង្កចលាចល

ថ្ងៃនៃក្ដីស្រឡាញ់បាននាំមកនូវភាពគគ្រឹកគគ្រេង ជាពិសេស​នៅតាមដងផ្លូវសាធារណៈ​សំខាន់ៗមួយចំនួន ជាពិសេសក្បែរ​ សាលាមធ្យមសិក្សានានា នៅតាមទីកន្លែងលក់ផ្កា​នៅម្ដុំផ្សារថ្មី ផ្សារអូរឬស្សី តាមដងវិថីម្ដុំមាត់ទន្លេ កន្លែងកម្សាន្ដ និងកន្លែងហូបចុក នានា។ ជាពិសេសកន្លែងលក់ផ្កា កន្លែងលក់វត្ថុអនុស្សាវរីយ៍ មានភាពខុសប្លែកពីសព្វដង ដោយគេសង្កេតឃើញមានការដាក់តាំងផ្កា យ៉ាងល្អស្រស់ មានការវេចខ្ចប់ មើលទៅគួរឱ្យចាប់អារម្មណ៍​ធ្វើឱ្យអ្នកមានគូសង្សារ​ឃើញហើយមានចិត្ដចង់ទិញយក​ទៅជូនសង្សារ របស់ខ្លួន។

ចាប់តាំងពីយុវវ័យចូលរួមក្នុងពិធីបុណ្យសង្សាររយៈ​ពេលប៉ុន្មាន​ឆ្នាំកន្លងទៅនេះ ផ្កាកុលាបស្រស់ៗ​លក់ដាច់ច្រើនណាស់​ ព្រោះតែយុវវ័យខ្លះ​បើទោះជាមានជីវភាពក្រីក្រ ប៉ុន្ដែពួកគេក៏មានលទ្ធភាព​រកប្រាក់ទិញផ្កាកុលាបស្រស់បាន១ទង​សម្រាប់គូសង្សារ ​ឬអ្នកដែលគេពេញចិត្ដ។ ផ្កាដាក់លក់នៅក្នុងថ្ងៃបុណ្យសង្សារ​មានច្រើនប្រភេទ ជាផ្កាស្រស់ក៏មាន ផ្កាសិប្បនិម្មិតក៏មាន។ ផ្កាកុលាប ស្រស់​ដែលវេចខ្ចប់យ៉ាងស្អាត លក់ក្នុងតម្លៃ១ដុល្លារ​សម្រាប់ផ្កាមួយទង។ ប៉ុន្ដែសម្រាប់អ្នកដែលមានប្រាក់កាសច្រើន​អាចទិញគ្រឿង អលង្ការជូនគូសង្សារ ឬភរិយា។

បុណ្យសង្សាររីករាយ ឬទឹកភ្នែក

បើទោះបីជាភាគច្រើននៃយុវវ័យរីករាយ​ធ្វើបុណ្យសង្សារក៏ដោយ ក៏មានយុវតីមួយចំនួន​ស្រក់ទឹកភ្នែកផងដែរ ដោយសារ តែផ្កាកុលាប​បណ្ដាលឱ្យមានការភ្លើតភ្លើន​បានបន្សល់​នូវភាពសោកស្ដាយ ព្រោះយុវតីខ្លះ​បានបាត់បង់នូវព្រហ្មចារី មានផ្ទៃពោះ និងឆ្លង ជម្ងឺផ្សេងៗជាដើម។ ថ្ងៃបុណ្យសង្សារ​មិនមែនតែផ្កា ឬវត្ថុអនុស្សាវរីយ៍ទេ​ដែលលក់ដាច់ សូម្បីតែស្រោមអនាម័យ ផ្ទះសំណាក់់ កន្លែង កម្សាន្ដផ្សេងៗ​ក៏មានតួលេខកើនឡើង​ច្រើនគួរឱ្យកត់សម្គាល់ដែរ។ មិនត្រឹមតែនៅក្នុងប្រទេសកម្ពុជា​យើងទេ នៅឯបរទេសវិញរឹត តែកក្រើក​ជាងនេះទៅទៀត ជាក់ស្ដែងដូចជាប្រទេសថៃ​ក្នុងថ្ងៃបុណ្យសង្សារ​ស្ទើរតែគ្រប់សណ្ឋាគារ​នៅក្នុងប្រទេស​ត្រូវបានកក់ទុក​ ទាំងអស់។ តាមរយៈព័ត៌មាននេះមានន័យថា ការរួមភេទនៅថ្ងៃបុណ្យសង្សារ​ក៏មានអត្រាខ្ពស់ណាស់ដែរ។ ជាងនេះទៅទៀត​ក៏មាន ករណី​មួយចំនួនទៀត ដូចជាយុវតីបានធ្វើអត្ដឃាត​ដោយសង្សារមិនជូនផ្កា ឬវត្ថុអនុស្សាវរីយ៍ ឬក៏ជ្រុលខ្លួនជាមួយសង្សារ​ដែលមិន ទទួលខុសត្រូវ។

បណ្ដាំផ្ញើ

យុវវ័យទាំងឡាយដែលកំពុងគាំទ្រថ្ងៃបុណ្យសង្សារ ត្រូវទទួលស្គាល់ការពិតថា ប្រពៃណីនេះមិនមែន​ជារបស់ខ្មែរទេ ហើយ ក៏មិនមានការហាមឃាត់​ណាមួយដែលរារាំង​ការទទួលយក​ប្រពៃណីនេះដែរ។ ប៉ុន្ដែសូមកុំធ្វើអ្វីហួសហេតុពេក ព្រោះមានយុវវ័យ​មួយ ចំនួនប្រព្រឹត្ដខ្លួនមិនល្អ​អាចនិយាយថា ជាអំពើពាលា អាសអាភាស គ្មានការអៀនខ្មាស និងសម្ដែងភាពស្និទ្ធស្នាល​ហួសព្រំដែន ដែលមិនអាច​ទទួលយកបាន។

ប្រភព ៖ ទស្សនាវដ្តី សុខភាពយើង លេខ២៥ ខែកុម្ភៈ ឆ្នាំ២០០៨