ការប្រកាសសេចក្តីជូនដំណឺងឲ្យមានការបិទទ្វារសាលា គឺចៀសមិនផុតឡើយសម្រាប់ប្រទេសកម្ពុជា ខណៈពេលដែលជម្ងឺអ៊ីវី៧១ បាននឹងកំពុងរាតត្បាតដល់ពលរដ្ឋកម្ពុជា ជាពិសេសទៅលើកុមារ។ ការរីករាលដាលនៃជម្ងឺអ៊ីវី៧១នេះ កើតឡើងបន្ទាប់ពីក្រុមគ្រូពេទ្យនៃក្រសួងសុខាភិបាលកម្ពុជា ព្រមទាំងអង្គការសុខភាពពិភពលោក បានរកឃើញនូវវីរុសអ៊ីវី៧១ដែលបានសម្លាប់កុមារកម្ពុជាអស់ជាច្រើននាក់រួចមកហើយ។
នៅថ្ងៃពុធ ទី១៨ ខែកក្កដា ឆ្នាំ២០១២នេះ មន្រ្តីមន្ទីរអប់រំយុវជន និងកីឡារាជធានីភ្នំពេញមួយរូប បានឲ្យដឹងថា មន្ទីរអប់រំ បានសម្រេចប្រកាសឲ្យបិទសាលាមត្តេយ្យ និងសាលាបឋមសិក្សាទាំងសាលារដ្ឋ និងសាលាឯកជនមួយរយៈ តាមសេចក្តីប្រកាសរបស់ក្រសួងអប់រំ យុវជននិងកីឡា ដែលបានប្រកាសឲ្យសាលាមតេ្តយ្យ និងសាលាបឋមសិក្សាបិទទ្វារ។
លោក ជា ជាតិ ប្រធានមន្ទីរអប់រំ យុវជននិងកីឡារាជធានីភ្នំពេញ បានមានប្រសាសន៍ឲ្យដឹងកាលពីព្រឹកថ្ងៃទី១៨ កក្កដា ឆ្នាំ២០១២ថា ដោយយោងតាមសេចក្តីជូនដំណឹងរបស់ក្រសួងអប់រំ បានប្រកាសឲ្យមានការបិទសាលាបឋមសិក្សា និងសាលាមតេ្តយ្យនេះ នៅខណៈពេលដែលមានការលើកឡើងពីបញ្ហាជម្ងឺប្រភេទថ្មី ។ តែទោះបីជាយ៉ាងណាសិស្សានុសិស្សតូចៗនៅរាជធានីភ្នំពេញមិនទាន់បានឆ្លងជម្ងឺនេះទេ ព្រោះមន្ទីរអប់រំណែនាំដល់គ្រូៗឲ្យសិស្សមានអនាម័យល្អរៀងរាល់ថ្ងៃ ដោយការលាងដៃនឹងសាប៊ូជាដើម។ នេះបើយោងតាមការចេញផ្សាយរបស់គេហទំព័រសារព័ត៌មានកោះសន្តិភាព។
លោកប្រធានមន្ទីរអប់រំរាជធានីភ្នំពេញ បានបន្តថា នៅរាជធានីភ្នំពេញមានសាលាបឋមសិក្សាប្រមាណ១៦៤ ក្នុងនោះមានមតេ្តយ្យសាលាមត្តេយ្យចំនួន២៣។ សិស្សានុសិស្សសរុបទាំងសាលាមតេ្តយ្យ និងបឋមសិក្សាមានចំនួនប្រមាណ១៣៧,៨៦០នាក់ ក្នុងនោះជាសិស្សអាយុពី៣ឆ្នាំដល់៥ឆ្នាំ។ ការបិទទ្វារសាលាសិស្សតូចៗនេះ ធ្វើឡើងទាំងសាលារដ្ឋនិងសាលាឯកជននៅទូទាំងរាជធានី ហើយការបិទនេះបានធ្វើឡើងប្រមាណ១០ថ្ងៃ មុនពេលវិស្សមកាលរបស់សិស្សក្នុងឆ្នាំនេះ។
លោកប្រធានមន្ទីរអប់រំរាជធានីបន្តថា នៅរាជធានីភ្នំពេញមិនមានសិស្សានុសិស្សណាម្នាក់បានឆ្លងជម្ងឺប្រភេទថ្មីនេះទេ ដោយសារនៅតាមសាលារៀនមានការពង្រឹងអនាម័យរាល់ថ្ងៃ និងមិនអនុញ្ញាតឲ្យមានការលក់ដូរចំណីអាហារមិនស្អាតនៅក្នុងបរិវេណ សាលារៀននោះទេ។
បើយោងទៅតាមសេចក្តីប្រកាសរបស់ក្រសួងអប់រំ យុវជន និងកីឡា គឺសាលាមត្តេយ្យ សាលាបឋមសិក្សារដ្ឋ និងឯកជនទាំងអស់ ត្រូវបានផ្អាកសកម្មភាពសិក្សាមួយរយៈពេលដោយមិនកំណត់ ។ បើតាមព័ត៌មានពីខេត្តកំពង់ចាមបានឱ្យដឹងថា ជម្ងឺចម្លែកនេះ បានយាយីសិស្សសាលា១៥នាក់ ត្រូវនាំចូលមន្ទីរពេទ្យ ក្នុងនោះ២នាក់ត្រូវស្លាប់។ រីឯប្រជាពលរដ្ឋនៅឯខេត្តស្ទឹងត្រែងឯណោះវិញ ក៏កំពុងកើតក្តីបារម្ភចំពោះសុវត្ថិភាពកូនតូចៗរបស់ពួកគាត់ផងដែរ ដែលកុមារ និងកូនតូចៗមានអាយុក្រោម១០ឆ្នាំជាច្រើននាក់កំពុងត្រូវបានខាងមន្ទីរពេទ្យបង្អែកនៅខេត្តស្ទឹងត្រែង តាមដាន និងពិនិត្យជាបន្តបន្ទាប់ផងដែរ។
គេហទំព័រ សុខភាពកម្ពុជា នឹងបន្តផ្សាយនូវព័ត៌មានក្តៅកគុកទាំងនេះ នៅពេលបន្តបន្ទាប់ទៀត។ ចង់ស្វែងយល់លម្អិតអំពីជម្ងឺអ៊ីវី៧១នេះ សូមអានបទសម្ភាសន៍ជាមួយលោកវេជ្ជបណ្ឌិត លី ចេងហ៊ុយ «ជម្ងឺចម្លែក ឬជម្ងឺអ៊ីវី៧១: បទសម្ភាសន៍ជាមួយលោកវេជ្ជបណ្ឌិត លី ចេងហ៊ុយ»។
អត្ថបទដោយ ៖ សៀង វិរៈ
ចេញផ្សាយ ៖ ថ្ងៃទី១៨ ខែកក្កដា ឆ្នាំ២០១២
Leave a Reply