តម្លៃភ្លើងបច្ចុប្បន្ន៧២០រៀលក្នុង១គីឡូវ៉ាត់ម៉ោងនៅភ្នំពេញ ដែលចេញដោយអាជ្ញាធរអគ្គិសនីកម្ពុជា។ តម្លៃនេះបើ ប្រៀបធៀបទៅនឹងប្រាក់ចំណូលរបស់ប្រជាពលរដ្ឋមួយចំនួន ដែលសមាជិកនៅក្នុងផ្ទះច្រើន ការប្រើប្រាស់ច្រើនពិតជាពិបាក ក្នុងការទប់ទល់នឹងការចំណាយនេះណាស់។ ហេតុនេះការសន្សំសំចៃថាមពលត្រូវតែរួមគ្នាអនុវត្ដ។
សូមស្វែងយល់អំពីឧបករណ៍ប្រើប្រាស់មួយចំនួនដែលដើរដោយចរន្ដអគ្គិសនី ជាមួយទស្សនាវដ្ដី សុខភាពយើង សំដៅរួមចំណែកកាត់បន្ថយការប្រើប្រាស់ឱ្យអស់ថាមពលតិចបំផុត។
ថ្លៃភ្លើងកាន់តែថ្លៃ ត្រូវតែកាត់បន្ថយ
មានឧបករណ៍ដើរដោយចរន្ដមួយចំនួន ដែលលោកអ្នកត្រូវការប្រើប្រាស់ប្រចាំថ្ងៃ លោកអ្នកមួយចំនួនគ្រាន់តែដឹងពីរបៀបនៃការប្រើប្រាស់ តែមិនដឹងពីរបៀបដែលប្រើដោយអស់ថាមពលតិចនោះទេ។ សូមស្វែងយល់ពីឧបករណ៍ទាំងនោះ។
1 . អំពូលភ្លើង ៖ អំពូលពងមាន់៦០វ៉ាត់ បើកចោលក្នុង១ថ្ងៃ១ម៉ោង ខាតថ្លៃភ្លើងក្នុង១ខែ១.២៩៦រៀល ឬក្នុង១ឆ្នាំ ១៥.៥៥២រៀល។ អំពូលម៉ែត្រ៣៦វ៉ាត់(មិនគិតការបាត់បង់ទៅលើកូនជ្រូក) បើបើកចោលក្នុង១ថ្ងៃ១ម៉ោង នឹងខាតបង់ថ្លៃភ្លើង ក្នុង១ខែ៧៧៧រៀល ឬក្នុង១ឆ្នាំ៩.៣២៤រៀល។ ហេតុនេះលោកអ្នកត្រូវថែទាំឧបករណ៍អំពូលភ្លើងយ៉ាងទៀងទាត់ជានិច្ច ដោយសារការសម្អាតគម្របគោមភ្លើងអំពូល និងបន្ទះចំណាំងពន្លឺក្នុងគោម ដើម្បីឱ្យអំពូលភ្លើងស្អាត និងផ្ដល់នូវពន្លឺយ៉ាងមានប្រសិទ្ធភាព យើងត្រូវសម្អាតជានិច្ចរៀងរាល់៣-៦ខែ។ ក្រៅពីនេះលោកអ្នកក៏ត្រូវចៀសវាងនូវប្រការមួយចំនួនដូចជា ៖
- ចៀសវាងការបើកភ្លើងចោលនៅពេលដែលគ្មានមនុស្សនៅ
- កាត់បន្ថយចំនួនអំពូលភ្លើងនៅកន្លែងដែលយើងអាចពឹងផ្អែកទៅលើពន្លឺថ្ងៃបាន
- កាត់បន្ថយការប្រើអំពូលភ្លើងដែលគ្មានគុណភាព
- គប្បីប្រើអំពូលម៉ែត្រជំនួសអំពូលពងមាន់
- លោកអ្នកត្រូវប្ដូរអំពូលម៉ែត្រដែលស៊ីភ្លើង៤០វ៉ាត់ចេញ ព្រោះបច្ចុប្បន្ននេះមានទាំងប្រភេទ៣៦វ៉ាត់ និង៣២វ៉ាត់។
2 . ម៉ាស៊ីនត្រជាក់ ៖ បច្ចុប្បន្ននេះការប្រើប្រាស់ម៉ាស៊ីនត្រជាក់ចាំបាច់ណាស់ ដើម្បីទប់ទល់នឹងអាកាសធាតុដែលកម្ដៅ ឡើងខ្លាំង។ បើទោះបីជាលោកអ្នកមួយចំនួនត្រូវការម៉ាស៊ីនត្រជាក់យ៉ាងណាក៏ដោយ ក៏លោកអ្នកចាំបាច់ត្រូវតែមានការសន្សំសំចៃ ដែរ។ ការសន្សំសំចៃបានលុះត្រាតែលោកអ្នកអនុវត្ដតាមវិធីដូចខាងក្រោម ៖
- កាត់បន្ថយការកំណត់សីតុណ្ហភាពម៉ាស៊ីនត្រជាក់ទាបពេក
- កាត់បន្ថយការបើកទ្វារបន្ទប់ឱ្យខ្យល់ត្រជាក់ចេញទៅក្រៅ
- កំណត់សីតុណ្ហភាពម៉ាស៊ីនត្រជាក់ពី២៥-២៦អង្សាសេ
- បើកកង្អារបឺតខ្យល់នៅពេលដែលចាំបាច់ បើកវានៅពេលដែលមានអារម្មណ៍ថាអាកាសធាតុខាងក្នុងបន្ទប់អាប់អួ ហើយ មួយសន្ទុ្ហក្រោយមកបិទវិញ ព្រោះពេលបើកកង្ហារបឺតវានឹងបឺតខ្យល់ត្រជាក់ពីម៉ាស៊ីនត្រជាក់ចេញក្រៅផងដែរ។
- បិទម៉ាស៊ីនត្រជាក់កម្លាំង១សេះ(១២ ០០០ BTU) ឱ្យបានមុន១ម៉ោងក្នុង១ថ្ងៃ កាត់បន្ថយភ្លើងបាន២១គីឡូវ៉ាត់ក្នុងមួយខែ សន្សំសំចៃប្រាក់បាន១៥.១២០រៀល/ខែ។
- បើបិទកាន់តែឆាប់ក្នុងមួយថ្ងៃ១ម្គង ក្នុង១ផ្ទះនឹងសន្ថំសំចៃភ្លើង គិតជាប្រាក់ក្នុង១ខែ១៥.១២០រៀល ឬ១៨១.៤៤០រៀល ក្នុងមួយឆ្នាំក្នុងមួយគ្រួសារ
ទន្ទឹមនឹងសន្សំសំចៃនេះ លោកអ្នកក៏ត្រូវមានការថែទាំល្អ និងការប្រើប្រាស់ឱ្យបានត្រឹមត្រូវដូចជា ៖
- សម្អាតតម្រង និងប្រដាប់ធ្វើឱ្យត្រជាក់យ៉ាងតិច១ខែម្ដង
- សម្អាតបន្ទះបញ្ចេញកម្ដៅរៀងរាល់៦ខែម្ដង
- ត្រូវសម្អាតសន្ទះសំណាញ់ និងសន្ទះទុយោនៅក្នុងប្រដាប់ធ្វើឱ្យត្រជាក់រៀងរាល់៦ខែម្តង។ ការសម្អាតដូចពោលខាងលើ ឱ្យបានទៀងទាត់រៀងរាល់៦ខែម្តង។ ត្រួតពិនិត្យ និងកែសម្រួលឆ្នួនទុយោទឹកត្រជាក់ និងទុយោខ្យល់ត្រជាក់ឱ្យស្សិតក្នុងលក្ខណៈដែលល្អ និងជួសជុលវាបើចាំបាច់។
3 . កុំព្យូទ័រ ៖ ប្រើប្រាស់ចាំបាច់សម្រាប់ការងារគ្រប់ស្ថាប័នទាំងអស់។ អ្នកប្រើប្រាស់ទាំងឡាយមិនដែលគិតពីការសន្សំ សំចៃថាមពលចំពោះការប្រើកុំព្យូទ័រនោះ។ ខាងក្រោយនេះជាប្រការគួរយល់ដឹងមួយចំនួនទៅលើការប្រើប្រាស់កុំព្យូទ័រ ៖
- កាត់បន្ថយការបើកម៉ាស៊ីនកុំព្យូទ័រទុកចោលយូរ ព្រោះចំណាយភ្លើងច្រើន។
- ដកឌុយចេញនៅពេលដែលឈប់ប្រើការ
- បិទម៉ូនីទ័រនៅពេលដែលមិនប្រើលើសពី១៥នាទី
- ប្រើកុំព្យូទ័រដែលកំណត់ម៉ោងបិទម៉ូនីទ័របាន។
លោកអ្នកប្រើប្រាស់ទាំងអស់គប្បីដឹងថា បើបើកកុំព្យូទ័រម៉ូនីទ័រ១៥អ៊ិញចោលក្នុង១ថ្ងៃ៣ម៉ោងនឹងខាតបង់ថ្លៃភ្លើង១២៦រៀល ឬ៣.១៥០រៀលក្នុង១ខែ(២៥ថ្ងៃសម្រាប់ថ្ងៃធ្វើការ) ឬ៣៧.៨០០រៀលក្នុង១ឆ្នាំ។ ជ្រើសរើសប្រើកុំព្យូទ័រដែលមានប្រព័ន្ធ សន្សំសំចៃថាមពល ព្រោះប្រព័ន្ធនេះនឹងប្រើប្រាស់កម្លាំងភ្លើងថយចុះ៥៥%ក្នុងខណៈដែលរង់ចាំការងារ។ បើប្រើកុំព្យូទ័រម៉ូនីទ័រទំហំ ១៤អ៊ិញ អានុភាព៩០វ៉ាត់ ប្រើការមួយថ្ងៃ២ម៉ោងវានឹងស៊ីភ្លើង៥.៤គីឡូវ៉ាត់ក្នុង១ខែ គិតថ្លៃភ្លើងប្រហែល៣.៨៨៨រៀលក្នុង១ខែ។
បណ្ដាំផ្ញើ
លោកអ្នកនឹងទទួលជ្រាបជាបន្ដទៀតអំពីប្រការទាំងឡាយដែលគួរធ្វើចំពោះឧបរណ៍ប្រើប្រាស់ ដែលដើរដោយចរន្ដអគ្គិសនីជាមួយទស្សនាវដ្ដី សុខភាពយើង។ សូមរងចាំអានដោយក្ដីអនុគ្រោះ។
(សូមបន្ដអាននៅលេខក្រោយ)
ប្រភព ៖ ទស្សនាវដ្តី សុខភាពយើង លេខ៤៦ ខែវិច្ឆិកា ឆ្នាំ២០០៩
Leave a Reply