របប​អាហារ​សម្រាប់​អ្នក​កីឡា

របប​អាហារ​សម្រាប់​មនុស្ស​គ្រប់រូប​គឺមាន​លក្ខណៈ​ខុសៗ​ពីគ្នា។ អាហារ​ជាការ​ផ្គត់ផ្គង់ដ៏​មាន​សារៈ​សំខាន់​ចំពោះ​មនុស្ស​គ្រប់រូប។ សម្រាប់​លោកអ្នក​ដែលជា​កីឡា​ករ ចាំបាច់​បំផុត​ក្នុងការ​គ្រប់គ្រង​របប​អាហារ​សម្រាប់​ខ្លួន​ដ៏មាន​សារៈ​ប្រយោជន៍ គឺ​សម្បូរ ទៅដោយ​ប្រូតេអ៊ីន និង​មាន​ជីវជាតិ​គ្រប់គ្រាន់​ដើម្បី​ជា​ជំនួយ​ឱ្យមាន​សុខភាព​មាំមួន។

រូបភាពទស្សនាវដ្ដីសុខភាពយើង

ដើម្បី​ធ្វើការ​បកស្រាយ​ពី​របប​អាហារ​សម្រាប់​អ្នក​កីឡា​ជូន​ប្រិយមិត្ដ​អ្នកអាន​ទាំងអស់បាន​ជ្រាប ទស្សនាវដ្ដី សុខភាពយើង បានជួប​សម្ភាសន៍​ជាមួយ​លោក ខាត់ សុខទី ដែល​ជាគ្រូបង្ហាត់​កីឡា​ក្លឹប​វីអាយភី។

អាហារ​សម្រាប់​អ្នក​កីឡា

មិនមែន​ជាការ​ងាយស្រួល​នោះទេ បើចង់​ក្លាយជា​កីឡាករ​មួយរូប ទាមទារ​ជាចាំបាច់​ទាំង​ការ​ថែទាំ​សុខភាព​រាងកាយ ឱ្យបាន​ល្អ និង​ទាំងការ​គ្រប់គ្រង​របប​អាហារ​ឱ្យបាន​ត្រឹមត្រូវ។ របប​អាហារ​ទាំងអស់​ដែលអ្នក​កីឡា​ត្រូវ​ទទួលទាន​នោះគឺ​ត្រូវតែ​ជា​អាហារ​ដែល​សម្បូរ​ទៅដោយ​ប្រូតេអ៊ីន​ច្រើន ដូចជា​សាច់ បន្លែ ស៊ុត និង​ទឹកដោះ​គោ​ជាដើម។ គ្រប់​ប្រភេទ​អាហារ​ទាំងអស់​ដែលអ្នក​កីឡា​ត្រូវ​ទទួល​ទាន ក៏ជា​ប្រភេទ​អាហារ​ដែល​ចាំបាច់​សម្រាប់​លោកអ្នក​ទូទៅ​ផងដែរ។ ចំពោះ​កីឡាក​ររត់​ប្រណាំង កីឡា​ករ ប្រដាល់ និង​កីឡាករ​ហែល​ទឹក គប្បី​ទទួលទាន​អាហារ​ដែលមាន​ជាតិ​កាបូហារ៉េត​ឱ្យបាន​ច្រើន ដូចជា​បាយ ឬមី​ជាដើម ព្រោះ​វាជា​អាហារ​ដែល​អាច​រក្សាទុក​កម្លាំង​បាន​រយៈពេល​យូរ និង​គប្បី​បរិភោគ​សាច់​ឱ្យបាន​ច្រើន និងមាន​កំណត់​ត្រឹមត្រូវ។ រីឯ​ចំពោះ​កីឡាករ​កាយ​វប្បកម្ម​វិញនោះ ប្រការ​សំខាន់​គឺត្រូវ​ទទួល​ទាន​អាហារ​ដែល​មានជាតិ​ប្រូតេអ៊ីន​ច្រើន​ដែលមាន​នៅក្នុង​សាច់ និង​បន្លែ ហើយ​ភេសជ្ជៈ​ប៉ូវ​មួយ​ចំនួន ដូចជា​ទឹក​សណ្ដែក ឬ​ទឹកដោះ​គោ​ជាដើម។

តារាង​បរិមាណ​កូឡេ​ស្ដេរ៉ូល​ក្នុង​អាហារ​សម្រាប់​អ្នក​កីឡា

ប្រភេទ​​អាហារ កូឡេ​ស្ដេរ៉ូល

  • ស៊ុត​លឿង ១២០០-២០០០ មីលី​ក្រាម
  • ស៊ុត​ទាំងមូល ៤៥០ មីលី​ក្រាម
  • ពង​ត្រី ៣០០ មីលី​ក្រាម
  • ស៊ុត​ស ០ មីលី​ក្រាម
  • ថ្លើម​(គោ ជ្រូក) ៣៧៦-​៤២០ មីលី​ក្រាម
  • រូបភាពទស្សនាវដ្ដីសុខភាពយើង

  • ក្រលៀន​(គោ ជ្រូក) ៣៨០-​៤០០ មីលី​ក្រាម
  • ពោះវៀន ១៤៥ មីលី​ក្រាម
  • ខួរ ២៣០០-​៣០០០ មីលី​ក្រាម
  • មឹក ៣៤៨ មីលី​ក្រាម
  • ខ្យង​សមុទ្រ ៤៥៤ មីលី​ក្រាម
  • អន្ទង់ ១៨៦ មីលី​ក្រាម
  • ងាវ-​គ្រំ ១៨០ មីលី​ក្រាម
  • ក្ដាម ១៦៤ មីលី​ក្រាម
  • បង្គា​-បង្កង ១៥៤ មីលី​ក្រាម
  • ត្រី​ចាប ១២០ មីលី​ក្រាម
  • ត្រី​សូម៉ុង ៨៦ មីលី​​ក្រាម
  • ត្រី​អណ្ដែង ៦០ មីលី​ក្រាម
  • សាច់​ជ្រូក ១២៦ មីលី​ក្រាម
  • សាច់​ជ្រូកសុទ្ធ ៦០ មីលី​ក្រាម
  • សាច់​គោ ១២៥ ​មីលី​ក្រាម
  • សាច់​ចៀម ១២២ មីលី​ក្រាម
  • សាច់​មាន់-ទា ៩០ មីលី​ក្រាម
  • សាច់ភ្លៅ​ជ្រូក ១០០ មីលី​ក្រាម
  • សាច់​ក្រក ១៥០ មីលី​ក្រាម
  • ទឹកដោះ​គោ ២៤ ​មីលី​ក្រាម

អាហារ​គួរ​ចៀសវាង​សម្រាប់​អ្នក​កីឡា

ប្រការ​ដែល​គួរតែ​ចៀសវាង​សម្រាប់​អ្នក​កីឡា គឺការ​ទទួល​ទានស្រា និង​បារី។ ហើយ​ចំពោះ​ប្រភេទ​អាហារ​ដែលគួរ​ចៀសវាង គឺ​អាហារ​ចៀន ឆា បំពង និង​សាច់​ដែលមាន​ជាតិ​ខ្លាញ់ច្រើន។

ដំបូន្មានអ្នកជំនាញ

សម្រាប់​អ្នក​កីឡា ការ​គ្រប់គ្រង​របប​អាហារ​គឺមាន​សារៈ​សំខាន់​ណាស់​ចំពោះ​សុខភាព​រាងកាយ។ បើអាច​ធ្វើទៅ​បាន​​​​​​​គប្បី ទទួលទាន​ទឹក​ដោះគោឱ្យ​បាន​ញឹកញាប់​ជាការ​ល្អ។ លោកអ្នក​មិន​ត្រឹមតែ​ម៉ត់ចត់​តែ​ចំពោះ​ការ​គ្រប់គ្រង​អាហារ​នោះ​ទេ ការ​ហាត់​កីឡា ក៏​ត្រូវ​កំណត់ពេល​ហាត់​ឱ្យបាន​ត្រឹមត្រូវ​ផងដែរ។ ដូចនេះ​លោកអ្នក​គួរតែ​បរិភោគ​អាហារ​ទាំងនេះ​ឱ្យមាន​កម្រិត និង​ឱ្យបាន​ទៀងទាត់​ពេលវេលា។

ប្រភព ៖ ទស្សនាវដ្តី សុខភាពយើង លេខ៤៧ ខែធ្នូ ឆ្នាំ២០០៩

Google Analytics Alternative