ថ្ងៃទី២៥ ខែធ្នូ ជាថ្ងៃបុណ្យណូអែល ដែលប្រារឰឡើងដើម្បីរម្លឹកដល់ថ្ងៃប្រសូតរបស់ព្រះយេស៊ូគ្រឹស្ម និងជាថ្ងៃបុណ្យ សប្បាយរីករាយមួយរបស់សាសនាគ្រឹស្ម។ ចំណែកសម្លៀកបំពាក់សម្រាប់បុណ្យណូអែល ដែលមានពណ៌ក្រហមគឺតំណាងឱ្យលោហិតរបស់ព្រះយេស៊ូគ្រឹស្ម។ ចំពោះសម្លៀកបំពាក់ពណ៌ក្រហមនេះមានរឿងតំណាលជាច្រើនដែលទាក់ទងជាមួយ។
ទស្សនាវដ្ដី សុខភាពយើង បានជួបជាមួយលោក ថោង ចន្ថា អ្នកតំណាងសាសនាក្នុងមណ្ឌលខាងជើងនៃសាសនាចក្រនៃ ព្រះយេស៊ូគ្រឹស្មនៃពួកបរិសុទ្ធថ្ងៃចុងក្រោយ ដើម្បីពន្យល់អំពីសម្លៀកបំពាក់បុណ្យណូអែល។
ដើមកំណើតបុណ្យណូអែល
មុនដំបូងបង្អស់ក្នុងសតវត្សទី៣ គេបានរៀបចំបុណ្យណូអែលនេះឡើង ក្នុងខែធ្នូជារដូវរងា។ ដូចនេះក្រុមហ៊ុនមួយ ចំនួនបានបង្កើតសម្លៀកបំពាក់រួមទាំងស្បែកជើងដើម្បីលក់។ ប៉ុន្ដែក្រោយមកចក្រភពរួមបានសម្រេចបង្កើតថ្ងៃបុណ្យណូអែលនេះ ឡើងនៅក្នុងថ្ងៃទី២៥ ខែធ្នូ ឆ្នាំ៣៣៦ក្រោយគ.ស នៅក្នុងសតវត្សទី៤ដើម្បីរម្លឹកចំពោះថ្ងៃប្រសូតរបស់ព្រះយេស៊ូគ្រឹស្ម។ ព្រះយេស៊ូគ្រឹស្មទ្រង់បានប្រសូតនៅថ្ងៃទី០៦ ខែមេសា គ.ស០០។ មូលហេតុដែលគេមិនយកថ្ងៃដែលព្រះយេស៊ូប្រសូតមកធ្វើបុណ្យណូអែល ដោយសារតែរដូវដែលព្រះយេស៊ូប្រសូតនោះជារដូវក្ដៅ មិនមែនជារដូវរងា។ ហេតុនេះក្រុមហ៊ុនមិនអាចលក់ផលិតផលបានច្រើន ទើបចក្រភពរួមបានលើកថ្ងៃបុណ្យណូអែលមកប្រារឰនៅថ្ងៃទី២៥ ខែធ្នូវិញ។
សម្លៀកបំពាក់ក្នុងថ្ងៃបុណ្យណូអែល
នៅថ្ងៃបុណ្យណូអែល គ្រឹស្មបរិស័ទតែងតែស្លៀកសម្លៀកបំពាក់ថ្មីៗ ឬក៏សម្លៀកបំពាក់បុណ្យណូអែលពណ៌ក្រហម។ ព្រោះបុណ្យណូអែលគឺជាបុណ្យមួយដ៏ធំសម្រាប់សាសនាចក្រនៃព្រះយេស៊ូគ្រឹស្មដែលជាប្រពៃណី។ សម្លៀកបំពាក់ពណ៌ក្រហមនៅក្នុងថ្ងៃបុណ្យណូអែលគឺតំណាងឱ្យលោហិតរបស់ព្រះយេស៊ូគ្រឹស្ម។ មានរឿងតំណាលពីរដែលទាក់ទងទៅនឹងសម្លៀកបំពាក់ពណ៌ក្រហម ៖
- នៅក្នុងឆ្នាំ៣៨០ មានបុរសម្នាក់ជាអ្នកកាន់សាសនាគ្រឹស្មប្រើប្រាស់ស្លៀកសម្លៀកបំពាក់ពណ៌ក្រហម ហើយគាត់បានចែក អំណោយឱ្យគេគ្រប់គ្នាទាំងអស់។ ក្រោយមកក៏បានក្លាយជាទម្លាប់តគ្នាមក ហើយគេក៏បានដាក់ឈ្មោះគាត់ថាតាសាន់ឌឺខ្លក់ ឬក៏តាណូអែល។
- ចំណែករឿងតំណាលមួយទៀតនោះគឺមានបុរសម្នាក់ស្លៀកសម្លៀកបំពាក់ពណ៌ស ហើយបានធ្វើដំណើរចូលរួមក្នុងកម្មវិធីជប់លៀង។ ប៉ុន្ដែចៃដន្យមានភ្លៀងធ្លាក់យ៉ាងខ្លាំងធ្វើឱ្យសម្លៀកបំពាក់គាត់សើមអស់ ដែលបណ្ដាលឱ្យអ្នកកាសែត ចាប់អារម្មណ៍ចំពោះគាត់យ៉ាងខ្លាំង ហើយក៏បាននាំគ្នាថតរូបធ្វើឱ្យបុរសមានការខ្មាសអៀនយ៉ាងខ្លាំង មុខរបស់គាត់ឡើងក្រហម មិនត្រឹមតែប៉ុណ្ណោះថែមទាំងធ្វើឱ្យសម្លៀកបំពាក់គាត់ឡើងក្រហមប្រឿងៗផងដែរ។ ដោយសារតែភាពអៀនខ្មាសខ្លាំងពេក គាត់ក៏បានជិះសត្វក្ដាន់ចេញពីទីប្រជុំជន ដោយបានឆ្លងកាត់ចម្ការស្ដូបូរី ហើយមិនដឹងជាមូលហេតុអ្វីទើបបណ្ដាលឱ្យសម្លៀកបំពាក់របស់គាត់ បានប្រែពណ៌ទៅជាក្រហមតែម្ដង។
បណ្ដាំផ្ញើ
សូមលោកអ្នកចូលរួមសប្បាយរីករាយជាមួយបុណ្យណូអែល ក៏ដូចជាការចូលរួមចំណែករម្លឹកដល់ថ្ងៃប្រសូតរបស់ព្រះយេស៊ូគ្រឹស្មផងដែរ។ ណូអែលជាបុណ្យមួយដែលមានលក្ខណៈអធឹកអធមសម្រាប់បណ្ដាប្រទេសអឺរ៉ុបប្រគល់អំណោយទៅវិញទៅមក បង្កឱ្យមានឱកាសរីករាយ។
ប្រភព ៖ ទស្សនាវដ្តី សុខភាពយើង លេខ៤៧ ខែធ្នូ ឆ្នាំ២០០៩
Leave a Reply