នៅពេលដែលលោកអ្នកធ្វើការងារច្រើន មានអារម្មណ៍នឿយហត់ល្វើយល្ហិតល្ហៃ លោកអ្នកអាចម៉ាស្សាខ្លួន សាច់ដុំ ឬម៉ាស្សាបាតជើង ដើម្បីដោះស្រាយបញ្ហានេះ។ ឥឡូវនេះការម៉ាស្សាបាតជើងជាការពេញនិយមមួយសម្រាប់សុភាពបុរសមួយចំនួន ដែលជារៀងរាល់ពេលសម្រាកពីការងារ ការម៉ាស្សាបាតជើងដើម្បីឱ្យមានអារម្មណ៍ធូរស្បើយពីការងារ។
ទស្សនាវដ្ដី សុខភាពយើង បានជួបជាមួយលោកស្រី ជា ពុទ្ធាសត្យា អ្នកគ្រប់គ្រងនៃឡាប៊ែលឡាស្ប៉ា និងសាឡន ដើម្បីធ្វើការបកស្រាយអំពីអត្ថប្រយោជន៍នៃការម៉ាស្សាបាតជើងនេះ ជូនប្រិយមិត្ដទាំងឡាយឱ្យបានជ្រាប។
ម៉ាស្សាបាតជើងជាអ្វី?
ការម៉ាស្សាបាតជើងគឺជាវិធីសាស្ដ្រមួយនៃការចាប់សរសៃ ដើម្បីជួយសម្រួលទៅដល់់សរសៃឈាម សម្រួលទៅដល់សុខភាព និងជួយឱ្យមានអារម្មណ៍ស្រស់ថ្លា បាត់អស់នូវអារម្មណ៍ឈឺរោគស្ពឹកស្រពន់។ ការម៉ាស្សាបាតជើងនេះត្រូវការរយៈពេលតែពីរម៉ោងប៉ុណ្ណោះ។ ការម៉ាស្សាបាតជើងបើសិនជាមានការធ្វេសប្រហែស ឬគ្មានជំនាញច្បាស់លាស់ អាចបណ្ដាលឱ្យលោកអ្នកពិការក៏ថាបានដែរដោយសារតែចំណុចបាតជើងមានផលប៉ះពាល់ច្រើន។ ដូចនេះរាល់ការម៉ាស្សាបាតជើង លោកអ្នកគប្បីស្វែងរកកន្លែងឯកទេសត្រឹមត្រូវដើម្បីម៉ាស្សាជូនលោកអ្នក។
វិធីម៉ាស្សាបាតជើង
មុននឹងឈានទៅដល់ការម៉ាស្សាបាតជើង ដំបូងគឺយកជើងត្រាំទឹកផ្កាដែលមានលាយអំបិល ក្រូចសើច ដុសជើង ទើបដាក់ជើងចូលធុងស្ពុងជើងដែលមានដាក់អំបិល និងខ្ញី។ ក្នុងការស្ពុងជើងគឺប្រើរយៈពេល១៥នាទីដើម្បីឱ្យបែកញើសជើង និងខ្លួនរហូតដល់ក្បាល ទើបចាប់ផ្ដើមម៉ាស្សាបាតជើងសម្រួលសរសៃឈាមតែម្ដង ដោយទទួលបានការម៉ាស្សាត្រង់ចំណុចក្បាលជង្គង់ ជើង ម្រាមជើង និងបាតជើង។
សារៈប្រយោជន៍នៃការម៉ាស្សាបាតជើង
ការម៉ាស្សាបាតជើងពិតជាផ្ដល់សារៈប្រយោជន៍ច្រើន ពេលដែលលោកអ្នកមានក្រិនបាតជើង ចុករោយខ្លួន ស្ពឹកស្រពន់ជើង ឬគេងមិនសូវលក់។ បញ្ហាទាំងអស់នេះនឹងអាចដោះស្រាយបានជាមួយការម៉ាស្សាបាតជើងនេះ។ បន្ទាប់ពីបានទទួលការម៉ាស្សាជើងរួច លោកអ្នកនឹងទទួលបាននូវអារម្មណ៍ធូរស្រាល ដើរមិនសូវឈឺបាតជើង ឈាមរត់ស្រួល ជាពិសេសអាចកាត់បន្ថយអារម្មណ៍ស្ដ្រេស ទាំងឡាយបានទៀតផង។ បាតជើងជាកន្លែងដែលប្រមូលផ្ដុំសរសៃ។ ដូចនេះរាល់ពេលលោកអ្នកមានអារម្មណ៍ហត់នឿយ អស់កម្លាំង ឈឺក្បាល រោគខ្នង ចុកជើង ការម៉ាស្សាបាតជើងនឹងអាចបំបាត់អាការទាំងអស់នេះបានជូនលោកអ្នក។
ដំបូន្មានអ្នកជំនាញ
ការម៉ាស្សាបាតជើងប្រៀបដូចជាឱសថម្យ៉ាងសម្រាប់ជួយទៅដល់សុខភាពរបស់លោកអ្នក។ ការម៉ាស្សាបាតជើងជួយឱ្យ លោកអ្នកមានសុខភាពល្អ ពិសេសជួយសម្រួលដល់អារម្មណ៍ទៀតផង។ ដូចនេះបើសិនជាលោកអ្នកមានពេលទំនេរ លោកអ្នកអាច ចំណាយពេលម៉ាស្សាជើង ដើម្បីទទួលភាពស្រស់ស្រាយ។
ប្រភព ៖ ទស្សនាវដ្តី សុខភាពយើង លេខ៤៧ ខែធ្នូ ឆ្នាំ២០០៩
Leave a Reply