កុមារគឺជាវ័យទន់ខ្សោយហើយងាយទទួលរងការវាយប្រហារដោយសារជម្ងឺផ្សេងៗយ៉ាងឆាប់រហ័ស បើសិនជាពុំមានកាថែរក្សា និងចាក់ការថ្នាំបង្ការឱ្យបានត្រឹមត្រូវ។ ជម្ងឺរលាកខួរក្បាលកុមារជាជម្ងឺដ៏កាចសាហាវបំផុតមួយប្រភេទក្នុងចំណោមជម្ងឺកុមារដែលសមត្ថភាពក្នុងការផ្តាច់ជីវិតរបស់កុមារបានយ៉ាងងាយ ប៉ុន្តែវាក៏ជាជម្ងឺដែលអាចព្យាល និងបង្ការបានបើសិនជាចេះអនុវត្ត តាមគោលការណ៍វេជ្ជសាស្ត្រឱ្យបានត្រឹមត្រូវ។
លោកវេជ្ជបណ្ឌិត គឹម អាង ជាអ្នកជំនាញផ្នែកជម្ងឺកុមារ នៅមន្ទីរពេទ្យកុមារជាតិនឹងបកស្រាយអំពីជម្ងឺរលាកស្រោមខួរ ក្បាលកុមារជូនអ្នកអាន និងអាណាព្យាបាលទាំងអស់ឱ្យបានជ្រាបតាមរយៈទស្សនាវដ្ដី សុខភាពយើង។
ជម្ងឺរលាកស្រោមខួរក្បាលជាអ្វី?
ជម្ងឺរលាកស្រោមខួរក្បាលកុមារគឺជាជម្ងឺដែលកាចសាហាវ អាចកើតមានចំពោះកុមារគ្រប់រូបដែលពុំបានចាក់វ៉ាក់សាំង ការពារជម្ងឺ៦មុខ និងជម្ងឺរលាកស្រោមខួរកុមារ។ ជម្ងឺនេះបង្កមកពីការលុកលុយ និងលូតលាស់របស់ពពួកមេរោគនៅក្នុងទឹក ស្រោមខួរក្បាលកុមារ។
មូលហេតុបង្កជម្ងឺរលាកស្រោមខួរក្បាលកុមារ
មេរោគ និងប៉ារាសិតជាច្រើនប្រភេទដែលស្ថិតនៅក្នុងខ្លួនកុមារបានប្រមូលផ្ដុំទៅរស់នៅក្នុងទឹកស្រោមខួរក្បាលកុមារ បានបង្កជម្ងឺរលាកស្រោមខួរក្បាលកុមារនេះឡើង ដែលគេបែងចែកមេរោគទាំងនោះជាបីផ្នែកធំៗដូចជា ៖
1 . បាក់តេរី ៖ ក្រុមសំខាន់ដែលចម្លងមេរោគរបស់បាក់តេរី មានដូចជាមេណាំងកូកូស អាំងភ្លុសអង់សារ ជាបាក់តេរីដែលកើតមានឡើងចំពោះកុមារធំៗ។ ផ្ទុយទៅវិញសម្រាប់កុមារតូចៗដែលទើបតែកើតរហូតដល់អាយុ២៨ថ្ងៃ អាចឆ្លងបាក់តេរីដែលបង្កមេរោគទាំងនេះបានតាមពោះវៀន និងប្រដាប់បន្ដពូជរបស់ម្ដាយដែលមានប្រភេទបាក់តេរីទាំងនោះ។
2 . វីរុស ៖ ជាប្រភេទភ្នាក់ងារបង្កជម្ងឺរលាកស្រោមខួរកុមារ ប៉ុន្ដែវាមានលក្ខណៈស្រាល ឧទាហរណ៍ដូចជាវីរុសផ្ដាសាយ កញ្ជ្រឹល ក្រឡទែន និងអែប៉េះ សុទ្ធសឹងតែមូលហេតុសំខាន់ដែលបង្កឱ្យមានជម្ងឺរលាកស្រោមខួរនេះឡើង។
3 . បាក់តេរីរបេង ៖ តាមពិតទៅមេរោគរបេងក៏ជាបាក់តេរីដែរ ប៉ុន្ដែវាជាប្រភេទបាក់តេរីដែលបង្កឱ្យមានជម្ងឺរលាក ស្រោមខួរធ្ងន់ធ្ងរ និងមានរោគវិនិច្ឆ័យខុសពីបាក់តេរីដទៃទៀត ជាពិសេសត្រូវការពេលវេលាយូរដើម្បីព្យាបាល។ កុមារអាចឆ្លង បាក់តេរីជម្ងឺរបេងនេះដោយសារដំណកដង្ហើម ឬក៏ការប៉ះពាល់យ៉ាងជិតស្និទ្ធជាមួយអ្នកជម្ងឺរបេង។
រោគសញ្ញារលាកស្រោមខួរក្បាលកុមារ
ជម្ងឺរលាកស្រោមខួរក្បាលអាចបង្ហាញចេញជារោគសញ្ញាទៅតាមប្រភេទជម្ងឺ និងអាយុរបស់កុមារ ដែលក្នុងនោះគេចែក កុមារជាពីរក្រុមគឺក្មេងតូច និងក្មេងធំ។ កុមារដែលទើបនឹងកើតរហូតដល់អាយុប្រាំបួនខែត្រូវបានចាត់ទុកថាជាក្រុមក្មេងតូច និងមានរោគវិនិច្ឆ័យ ដូចជាការប្រែប្រួលនៃឥរិយាបថ កុមារយំច្រើន មានភាពរញ៉ាំរញ៉ូវមិនដាច់។ ព្រមទាំងចាប់ផ្ដើមក្ដៅខ្លួនខ្លាំង មិនបៅ និងទន់កខុសពីធម្មតា។ ជួនកាលកុមារមិនក្ដៅខ្លួនទេ បែរជាមានសភាពត្រជាក់ខ្លួនខ្លាំងវិញក៏មានដែរ។ សម្រាប់កុមារធំយើងអាច សង្កេតឃើញថា កុមារចាប់ឈឺ និងរឹងក ក្អួតខ្លាំង និងសន្លឹម ជួនកាលអាចទល់លាមកក៏មាន។ ទាំងនេះគឺជាផ្នែកខ្លះនៃរោគសញ្ញានៃជម្ងឺរលាកស្រោមខួរកុមារ ប៉ុន្ដែពេលខ្លះក៏មានលក្ខណៈស្រដៀងនឹងជម្ងឺដទៃទៀតដែរ។ ដូចនេះដើម្បីឱ្យកាន់តែច្បាស់ មាតាបិតាគ្រប់រូបគួរចេះសង្កេតមើលសភាពកុមារ បើសិនជាមានសភាពមិន ស្រួលដូចដែលមានខាងលើ លោកអ្នកចាំបាច់នាំកុមារទៅមន្ទីរពេទ្យ ដើម្បីឱ្យគ្រូពេទ្យពិនិត្យ និងបូមយកទឹកស្រោមខួរទៅពិនិត្យ និងបណ្ដុះមេរោគដើម្បីឱ្យដឹងកាន់តែច្បាស់ចៀសវាងការភាន់ច្រឡំ។
វិធីព្យាបាលជម្ងឺរលាកស្រោមខួរក្បាលកុមារ
ជម្ងឺរលាកស្រោមខួរទោះបីជាបណ្ដាលមកពីបាក់តេរី វីរុស ឬបាក់តេរីរបេងក៏ដោយ វាសុទ្ធតែជាជម្ងឺធ្ងន់ធ្ងរ។ ប៉ុន្ដែជម្ងឺ រលាកស្រោមខួរដែលបង្កដោយវីរុសមានភាពងាយស្រួលក្នុងការព្យាបាលជាងប្រភពបង្កផ្សេងៗទៀត។ យើងអាចព្យាបាលតាមការផ្ដល់អាហារបំប៉ន ឬក៏ទ្រទ្រង់ដល់សុខភាពកុមារដោយមិនបាច់ប្រើថ្នាំប្រភេទអង់ទីវីយូទីកនោះទេ ជម្ងឺនេះអាចជាសះស្បើយឡើងវិញ។ សម្រាប់ជម្ងឺរលាកស្រោមខួរដែលបង្កដោយបាក់តេរី និងបាក់តេរីរបេង គ្រូពេទ្យត្រូវប្រើរយៈពេលយ៉ាងយូរប្រមាណជាប្រាំមួយខែ ដើម្បីព្យាបាល និងការប្រើប្រាស់ថ្នាំផ្សេងៗដែលត្រូវទៅនឹងសភាពជម្ងឺកុមារ។ ជម្ងឺរលាកស្រោមខួរក្បាលជាជម្ងឺមួយដែលកាចសាហាវ ប៉ុន្ដែអាចព្យាបាលបាន ប្រសិនបើមាតាបិតាគ្រប់រូបបញ្ជូនកុមារមកមន្ទីរពេទ្យឱ្យបានទាន់ពេលវេលា។
ផលវិបាកនៃជម្ងឺរលាកស្រោមខួរកុមារ
កុមារដែលមានជម្ងឺរលាកស្រោមខួរក្បាលហើយមិនបានព្យាបាលឱ្យទាន់ពេលវេលានោះទេ វានឹងផ្ដល់ផលលំបាកជាច្រើនដល់កុមារ។ កុមារអាចក្លាយទៅជាពិការ និងមានជម្ងឺថ្លង់ ជួនកាលអាចមានផលប៉ះពាល់ដល់ការរីកចម្រើន និងលូតលាស់ផ្នែកសរីរាង្គខួរក្បាលកុមារក៏មាន ធ្វើឱ្យប្រព័ន្ធប្រសាទរបស់ក្មេងខ្សោយទាំងការគិតការយល់ មានលក្ខណៈខុសពីក្មេងធម្មតា ឬអាចនិយាយម្យ៉ាងទៀតថា ក្មេងមានញ្ហាខួរក្បាល។
វិធិបង្ការជម្ងឺរលាកស្រោមខួរកុមារ
ជាទូទៅមេរោគរបស់ជម្ងឺរលាកស្រោមខួរក្បាលកុមារនេះគឺជាប្រភេទពួកបាក់តេរី វីរុស។ ដូចនេះយើងអាចការពារជម្ងឺនេះ បានដោយសាររស់នៅតាមក្បួនខ្នាតអនាម័យឱ្យបានត្រឹមត្រូវ គឺហូបស្អាត ផឹកស្អាត រស់នៅស្អាត។ ប៉ុន្ដែប្រការសំខាន់ដែល អាណាព្យាបាលទាំងអស់ត្រូវយកចិត្ដទុកដាក់នោះ គឺការនាំកុមារទៅចាក់ថ្នាំបង្ការជម្ងឺរលាកស្រោមខួរក្បាលកុមារនៅតាមមន្ទីរពេទ្យនានា ដែលអាចផ្ដល់នូវថ្នាំបង្ការជម្ងឺរលាកស្រោមខួរកុមារនេះបាន ព្រោះថាថ្នាំបង្ការនេះមានគុណភាពខ្ពស់ក្នុងការការពារកុមារឱ្យចៀសផុតពីជម្ងឺកាចសាហាវមួយនេះ។
ដំបូន្មានអ្នកជំនាញ
មាតាបិតាគ្រប់រូបគួរកុំធ្វេសប្រហែសចំពោះសុខភាពរបស់កុមារ។ លោកអ្នកគួរគប្បីនាំកុមារទៅទទួលថ្នាំបង្ការការពារជម្ងឺ ប្រាំមួយមុខរបស់កុមារ បូករូមនឹងថ្នាំបង្ការរលាកស្រោមខួរក្បាលកុមារផងដែរ។ ប្រសិនបើកុមារមានអាការមិនស្រួលខុសធម្មតា ដូចការរៀបរាប់ខាងលើនេះ មាតាបិតាគ្រប់រូបចាំបាច់នាំកុមារមកមន្ទីរពេទ្យជាបន្ទាន់ ដើម្បីទទួលការពិនិត្យ និងព្យាបាលឱ្យបានទាន់ពេលវេលា។
ប្រភព ៖ ទស្សនាវដ្តី សុខភាពយើង លេខ៤៤ ខែកញ្ញា ឆ្នាំ២០០៩
Leave a Reply