ស្ដ្រីប្រាថ្នាចង់បានក្រចកស្អាត ព្រោះក្រចកស្អាតគឺជាផ្នែកមួយនៃសម្រស់ដៃ។ នៅលើទីផ្សារមានថ្នាំពណ៌លាបក្រចកជាច្រើនម៉ាកច្រើនពណ៌សម្រាប់ជ្រើសរើសលាបដើម្បីលម្អក្រចករបស់សុភាពនារី។ ថ្នាំក្រចកពិតជាធ្វើឱ្យក្រចកស្អាតនៅពេលលាបប៉ុន្ដែនារីមួយចំនួនប្រហែលជាមិនបានជ្រាបច្បាស់ទេថាការប្រើប្រាស់ថ្នាំក្រចកអាចផ្ដល់ផលប៉ះពាល់ដល់ក្រចកយ៉ាងធ្ងន់ធ្ងរដែលធ្វើឱ្យក្រចករបស់យើងបាត់បង់នូវភាពស្រស់ស្អាតផងដែរ។
ក្នុងទស្សនាវដ្ដី សុខភាពយើង អ្នកស្រី សោភា ម្ចាស់ហាងកែសម្ផស្សម៉ាលីនណា និងបកស្រាយឱ្យច្បាស់អំពីផលប៉ះពាល់នៃការប្រើប្រាស់ថ្នាំក្រចក រួមទាំងវិធីការពារក្រចកផងដែរ។
សារៈប្រយោជន៍នៃការប្រើប្រាស់ថ្នាំលាបក្រចក
ការលាបថ្នាំក្រចកធ្វើឱ្យក្រចកស្អាត ហើយមានលក្ខណៈក្រាស់រឹង ឬមិនទន់។ ហើយប្រសិនបើលោកស្រីអ្នកនាងកញ្ញាចង់ឱ្យក្រចកល្អស្រស់ស្អាត ត្រូវឧស្សាហ៍លាបក្រចកឱ្យបានញឹកញាប់ព្រោះថ្នាំលាបក្រចកធ្វើឱ្យក្រចករបស់លោកស្រីអ្នកនាងកញ្ញាក្រាស់ ហើយដុះលឿន និងមិនបាក់។ ជាពិសេសវាធ្វើឱ្យក្រចកមានសោភ័ណភាពស្រស់ស្អាត។ អ្វីដែលកាន់តែល្អនោះគឺបិទបាំងភាពកខ្វក់នៅក្នុងក្រចក។
ផលប៉ះពាល់នៃការប្រើប្រាស់ថ្នាំលាបក្រចក
នៅពេលលោកស្រីអ្នកនាងកញ្ញាឧស្សាហ៍លាបថ្នាំក្រចកធ្វើឱ្យក្រចកមានពណ៌លឿងឡើងស្និម ស្រអាប់ជាដើម ជាពិសេសនៅពេលដែលលាងថ្នាំក្រចកចេញ។ ព្រោះថ្នាំលាបក្រចកជាអាវុធមុខពីរ ទីមួយធ្វើឱ្យក្រចកស្អាតនៅពេលលាប ទីពីរគឺធ្វើឱ្យក្រចកបាត់បង់នូវសោភ័ណភាពនៅពេលលាងថ្នាំក្រចកចេញ។
វិធីថែទាំការពារក្រចក
ក្រចកឡើងលឿងគឺបណ្ដាលមកពីការលាបក្រចកដែលមានពណ៌ក្រមៅពេក បញ្ហានេះអាចកែបាននៅពេលដែលយើងលាងក្រចកចោលហើយទុកឱ្យក្រចកដុះឱ្យផុត។ សូមកុំទុកថ្នាំលាបក្រចកឱ្យនៅលើក្រចកមានរយៈពេលយូរលើសពី៣ទៅ៥ថ្ងៃ បើមិនដូច្នេះទេជាតិថ្នាំអាចធ្វើឱ្យក្រចកខូចបាន។ ត្រូវទទួលទានផ្លែឈើ និងបន្លែឱ្យបានច្រើន ព្រោះផ្លែឈើ និងបន្លែក៏ជាចំណែកមួយសម្រាប់ការពារក្រចក ធ្វើឱ្យក្រចករឹង និងមិនមានភាពស្រអាប់ ជាពិសេសត្រូវទទួលទានវីតាមីន និងទឹកឱ្យបានច្រើនដើម្បីជំនួយដល់ក្រចក។ ក្រចកមានភាពខុសគ្នារវាងក្រចកដៃ និងក្រចកជើង ដោយក្រចកដៃដុះលឿនជាងក្រចកជើង១មីលីម៉ែត្រក្នុងមួយសប្ដាហ៍។
ដំបូន្មានរបស់អ្នកជំនាញ
ដើម្បីឱ្យក្រចកលោកស្រីអ្នកនាងកញ្ញាមានភាពស្អាតមិនស្រអាប់មិនលឿង ត្រូវតែសម្អាតក្រចកឱ្យបានញឹកញាប់ អ្វីដែលសំខាន់នោះគឺនៅពេលដែលលោកស្រីអ្នកនាងកញ្ញាលាបក្រចកមិនត្រូវទុកឱ្យពណ៌ថ្នាំក្រចកនៅយូរពេកទេ ត្រូវតែឆាប់លាងសម្អាតចេញដើម្បីចៀសវាងការខូចក្រចក។ ត្រូវតែឧស្សាហ៍សម្អាតក្រចកដោយលាងជាមួយនឹងសាប៊ូ ឬទឹកក្រូចឆ្មារដើម្បីសម្លាប់មេរោគដែលនៅក្នុងក្រចក ដូចជាធូលីដែលនៅក្នុងក្រចកជាដើម។
ប្រភព ៖ ទស្សនាវដ្តី សុខភាពយើង លេខ៤៥ ខែតុលា ឆ្នាំ២០០៩
Leave a Reply