សក់អាចធ្វើឱ្យមុខកាន់តែស្អាតមួយកម្រិត ប្រសិនបើការតុបតែងសក់មានលក្ខណៈសមស្របត្រូវនឹងទម្រង់មុខ។ សក់ត្រូវបានគេចាត់ទុកជាគ្រឿងលើក ឬដាក់សម្រស់នារីបាន។ ហេតុនេះហើយទើបសុភាពនារីទាំងឡាយយកចិត្ដទុកដាក់ក្នុងការថែរក្សសក់សំខាន់។ ការថែរក្សានោះទៀតសោតក៏ត្រូវអនុវត្ដទៅតាមប្រភេទនៃសក់នីមួយៗ ទើបទទួលបានលទ្ធផលល្អប្រសើរ។
សូមសុភាពនារីទាំងឡាយស្វែងយល់ពីវិធីថែរក្សាសក់ទៅតាមប្រភេទនីមួយៗជាមួយទស្សនាវដ្ដី សុខភាពយើង តាមរយៈ ការបកស្រាយរបស់លោកស្រី លីរ៉ា នីរ៉ាន់ ម្ចាស់ហាងសម្រស់ភ្នំពេញ។
លក្ខណៈធម្មជាតិនៃសក់
ក្នុងមួយថ្ងៃសក់អាចដុះបានប្រហែលពី១.២ទៅ១.៣មីលីម៉ែត្រ។ នៅប្រទេសដែលមានសំណើមខ្ពស់ និងកម្ដៅថ្ងៃច្រើន សក់អាចដុះលូតលាស់ច្រើនជាងប្រទេសដែលមិនសូវក្ដៅហើយត្រជាក់ច្រើន។ ការរីកលូតលាស់នៃសក់ក៏អាស្រ័យផងដែរទៅលើសុខភាពនៃរាងកាយ។ ចំពោះកូនក្មេងដែលមានសុខភាពល្អសក់អាចដុះបានល្អយ៉ាងឆាប់រហ័ស ចំណែកមនុស្សចាស់ដែលខ្សោយមាន ជម្ងឺសក់ដុះយឺត ឬមិនដុះតែម្ដង។
ការថែរក្សាសក់ទៅតាមប្រភេទសក់
សក់ចែកចេញជាបីប្រភេទ គឺសក់ធម្មតា សក់ស្ងួត និងសក់រអិលឬសក់ខ្លាញ់។ សក់ធម្មតាគឺជាប្រភេទសក់ដែលភ្លឺផ្លេក ទន់ល្មើយស្ទាបទៅត្រជាក់ដៃ។ រីឯសក់ស្ងួតវិញស្ទាបទៅគគ្រើមហើយរឹង ពណ៌សក់ស្រអាប់មិនភ្លឺផ្លេកឡើយ។ ចំណែកឯសក់រអិល ឬសក់ខ្លាញ់វិញហាក់ដូចជាសក់សើមហើយពិបាកសិតទៅតាមចំណង់របស់ខ្លួន។ លោកអ្នកអាចបែងចែកប្រភេទសក់របស់លោកអ្នក បានដោយខ្លួនឯង ជាពិសេសនៅក្រោយពេលកក់សក់មួយឬពីរថ្ងៃ លោកអ្នកយកដៃញីសក់មួយស្របក់ រួចយកដៃនោះចុចលើក្រដាសមូរបារី។ បើសិនជាសក់ស្ងួត នឹងគ្មានស្នាមដៃ។ បើសក់ធម្មតា មានស្នាមដៃព្រិលៗ។ ហើយបើសក់ខ្លាញ់ មានស្នាមដៃដក់ជាប់យ៉ាងច្បាស់នៅលើក្រដាស។ ក្រោយពីបានដឹងអំពីប្រភេទសក់របស់លោកអ្នករួចហើយ លោកអ្នកអាចថែរក្សាសក់របស់លោកអ្នកឱ្យមានសុខភាពល្អបាន ដោយវិធីផ្សេងៗទៅតាមប្រភេទរបស់សក់។
1 . ប្រភេទសរសៃសក់ធម្មតា ៖ លោកអ្នកជាពិសេសសុភាពនារីដែលមានសរសៃប្រភេទនេះ គួរប្រើក្រាសដែលមានធ្មេញមិនញឹក ឬរង្វើលពេកទេ ទើបមិនធ្វើឱ្យសរសៃសក់ដាច់។ ឯសាប៊ូសម្រាប់កក់សក់វិញ គួរជ្រើសរើសប្រភេទសាប៊ូដែលផ្សំដោយរូបមន្ដខ្សោយៗ និងលាយផ្សំសារធាតុចម្រាញ់ពីប្រទាលកន្ទុយក្រពើ អាស៊ីតក្រូចផងដែរ ដើម្បីបំប៉នសក់ឱ្យស្អាត និងនៅជាប់បានយូរ។ ម្យ៉ាងទៀតពុំគួរសិតសក់ញឹកញាប់ពេកទេ ព្រោះអាចធ្វើឱ្យសរសៃសក់ឆាប់ដាច់។
2 . ប្រភេទសរសៃសក់ស្ងួត ៖ លោកអ្នកត្រូវយកចិត្ដទុកដាក់ថែទាំកុំឱ្យសរសៃសក់ត្រូវកម្ដៅថ្ងៃ ឬអាកាសធាតុត្រជាក់ ខ្លាំងពេក។ ពេលកក់សក់គួរប្រើសាប៊ូសម្រាប់ប្រភេទសក់ស្ងួត ដោយកក់លាងជាមួយទឹកត្រជាក់ជានិច្ច ហាមប្រើទឹកក្ដៅកក់សក់ ដាច់ខាត។ ប្រការគួរចៀសវាងគឺមិនត្រូវអ៊ុត គាប ឬលាបពណ៌សក់ញឹកញាប់ពេកទេ ហើយពេលសិតសក់ក៏មិនត្រូវប្រើដៃធ្ងន់ពេក ដែរ។
3 . ប្រភេទសរសៃសក់រអិល ឬសក់ប្រេង ៖ លោកអ្នកគួរសិតសក់នៅពេលសក់ស្ងួតដោយការប្រើក្រាសដែលអាចកម្ចាត់លម្អងធូលី និងជាតិប្រេង។ គួរកក់សក់ជារៀងរាល់ថ្ងៃដើម្បីកាត់បន្ថយជាតិប្រេង។ ហើយបើក្នុងករណីដែលលោកអ្នកចង់ប្រើក្រែម បំប៉នសក់ គួរលាបតែខាងចុងសក់បានហើយ ដើម្បីកុំឱ្យប្រេងប៉ះជាមួយស្បែកក្បាល នោះជាតិប្រេងនឹងរឹតតែកើនឡើង។
ដំបូន្មានអ្នកជំនាញ
លោកអ្នកគប្បីថែរក្សាសក់ឱ្យមានសុខភាពល្អជានិច្ច ដើម្បីឱ្យសម្រស់របស់លោកអ្នកឋិតថេរទៅតាមនោះដែរ។ ព្រោះថា ទោះបីជាលោកអ្នកមានផ្ទៃមុខស្រស់ស្អាតយ៉ាងណាក៏ដោយ បើសក់មិនស្អាតក៏លោកអ្នកមិនអាចស្ងប់ចិត្ដ និងមានជំនឿលើខ្លួន ឯងដែរ។ បើលោកអ្នកមិនមានពេលគ្រប់គ្រាន់សម្រាប់ការថែរក្សាសក់ នោះអ្នកជំនាញនឹងអាចជួយលោកអ្នកបានលើការថែរក្សានេះ។
ប្រភព ៖ ទស្សនាវដ្តី សុខភាពយើង លេខ៣៧ ខែកុម្ភៈ ឆ្នាំ២០០៩
Leave a Reply