វ៉ែនតាដែលលោកអ្នកប្រើប្រាស់ជាប្រចាំ គឺមានសារៈសំខាន់ណាស់ក្នុងការមើលវត្ថុផ្សេងៗ។ លោកអ្នកមួយចំនួនចេះតែការប្រើប្រាស់ប៉ុណ្ណោះ ចំណែកឯការថែរក្សាវិញនោះមិនសូវជាដឹងប៉ុន្មានទេ ដែលជាហេតុធ្វើឱ្យលោកអ្នកត្រូវផ្លាស់ប្ដូរវ៉ែនតាជាញឹកញាប់។ លោកអ្នកខ្លះទៀតដឹងពីការថែរក្សាហើយ តែមិនបានធ្វើការថែរក្សាឱ្យត្រឹមត្រូវ ឬគ្មានពេលវេលាគ្រប់គ្រាន់ជាដើម។
នៅលេខនេះ ទស្សនាវដ្ដី សុខភាពយើង នឹងធ្វើការជួបសម្ភាសជាមួយលោកវេជ្ជបណ្ឌិត អេង គឹមបូរិទ្ធ ឯកទេសចក្ខុរោគនៃ មន្ទីរពេទ្យបង្អែកក្រុងភ្នំពេញ អំពីការថែរក្សាវ៉ែនតាឱ្យបានល្អ និងរក្សាបានរយៈពេលយូរ។
វិធីថែរក្សាកញ្ចក់វ៉ែនតា
លោកអ្នកត្រូវយល់ដឹងថា វ៉ែនតាដែលប្រើប្រាស់រាល់ថ្ងៃជាប្រចាំនេះ វាមានប្រយោជន៍ចំពោះភ្នែករបស់លោកអ្នកខ្លាំងណាស់។ ពេលណាដែលកញ្ចក់វ៉ែនតារបស់លោកអ្នកមានការឆ្កូត ស្រអាប់ ឬមានធូលីដីហុយ នោះលោកអ្នកនឹងមានអារម្មណ៍ថា ពិបាកក្នុងការសម្លឹងមើលអ្វីៗផ្សេងៗ ឬមើលមិនឃើញច្បាស់ជាដើម។ នេះហើយជាផលពិបាកមួយដែលលោកអ្នកចាំបាច់ត្រូវតែ ថែរក្សាចំពោះវត្ថុប្រើប្រាស់មួយនេះ។
កញ្ចក់វ៉ែនតាដែលប្រើប្រាស់រាល់ថ្ងៃនេះ ភាគច្រើនគឺផលិតឡើងពីជាតិជ័រ និងពីជាតិកែវ។ ទោះបីជាយ៉ាងណាក៏ដោយ ក៏ការថែរក្សា និងការយកចិត្ដទុកដាក់របស់វាគឺប្រហាក់ប្រហែលគ្នាតែប៉ុណ្ណោះ។ លោកអ្នកត្រូវថែរក្សាវ៉ែនតាឱ្យបានល្អ ដោយអនុវត្ដ តាមវិធីខ្លះៗដូចខាងក្រាមនេះ។
- មុននឹងជូតកញ្ចក់វ៉ែនតា ត្រូវសម្អាតធូលីដីចេញពីកញ្ចក់ជាមុនសិន ជាមួយទឹកធម្មតា
- ត្រូវយកក្រណាត់ទន់ស្អាតមកជូត ដោយប្រើកម្លាំងដៃថ្នមៗ
- ពេលប្រើប្រាស់រួចហើយ គួរតែយកវាដាក់ក្នុងប្រអប់វាវិញ ចៀសវាងការធ្លាក់បែក ឬធូលីដីហុយ
ប្រការគួរចៀសវាងពេលប្រើប្រាស់វ៉ែនតា
អ្នកប្រើប្រាស់វ៉ែនតាភាគច្រើនមិនសូវយកចិត្ដទុកដាក់ និងថែទាំកញ្ចក់វ៉ែនតាប៉ុន្មានទេ ពេលដែលឃើញវ៉ែនតាប្រឡាក់ ដីនោះតែងតែយកមកជូតនឹងអាវ ឬក្រណាត់កខ្វក់ជាដើម។ ហើយក៏ឃើញមានការធ្វេសប្រហែសចំពោះការទុកដាក់ក៏ដូចជាការពាក់ ឬដោះវ៉ែនតាជាដើម។ មានប្រការមួយចំនួនដែលយើងគួរយល់ដឹងទាំងអស់គ្នា។
- ពេលពាក់ ឬដោះវ៉ែនតានោះ លោកអ្នកគួរតែប្រើដៃទាំងពីរតែម្ដងទើបជាការល្អ ចៀសវាងការប្រើដៃតែម្ខាងដោះ ឬពាក់វ៉ែនតា វាអាចធ្វើឱ្យវៀចដងវ៉ែនតា ឬអាចឱ្យបាក់ដងតែម្ដងក៏មានដែរ។
- មិនត្រូវជូតកញ្ចក់វ៉ែនតាទៅនឹងអាវ ឬក្រណាត់ណាដែលមិនស្អាតល្អ ឬដោយដៃនោះទេ
- មិនត្រូវដាក់វ៉ែនតាផ្កាប់ទៅនឹងតុ ឬទៅក្នុងហោប៉ៅអាវឬខោ ដោយមិនដាក់ក្នុងប្រអប់ឡើយ។
ដំបូន្មានអ្នកជំនាញ
លោកអ្នកនាងកញ្ញាទាំងអស់ដែលបានប្រើប្រាស់វ៉ែនតា គួរតែអនុវត្ដនូវវិធីដូចបានជម្រាបប្រាប់ខាងលើ ព្រោះនេះជាវិធីមួយងាយស្រួលជាទីបំផុតក្នុងការអនុវត្ដ និងយកតម្រាប់តាមជាប្រចាំ។ ទង្វើអស់ទាំងនោះអាចជួយលោកអ្នកពីការខូចបង់វ៉ែនតា និងជួយសន្សំសំចៃថវិកាបានមួយកម្រិតទៀតផង។
ប្រភព ៖ ទស្សនាវដ្តី សុខភាពយើង លេខ៣៥ ខែធ្នូ ឆ្នាំ២០០៨
Leave a Reply