ដើម្បីចៀសវាងនូវការវិវឌ្ឍន៍ទៅរកផលវិបាកធ្ងន់ធ្ងរ ចំពោះអ្នកជម្ងឺទឹកនោមផ្អែម ការតាមដានកម្រិតជាតិស្ករក្នុងឈាម ដោយខ្លួនឯងដើរតួនាទីសំខាន់ណាស់ ប្រយោជន៍ដឹងថាកម្រិតជាតិស្ករក្នុងឈាមរបស់លោកអ្នកមានការកើនឡើងខ្ពស់ ឬនៅសភាព ធម្មតា។ ការតាមដានកម្រិតជាតិស្ករក្នុងឈាមដោយខ្លួនឯងជាមួយម៉ាស៊ីនធ្វើតេស្ដជាតិស្ករ អាចធ្វើឡើងចំពោះអ្នកជម្ងឺទឹកនោមផ្អែម ប្រភេទទី២។
ដើម្បីតាមដានកម្រិតជាតិស្ករដោយខ្លួនឯងបាន លោកអ្នកចាំបាច់ត្រូវយល់ដឹងអំពីអត្ថប្រយោជន៍របស់ម៉ាស៊ីនក៏ដូចជាវិធី ប្រើប្រាស់វាផងដែរ។ សូមស្វែងយល់ជាមួយទស្សនាវដ្ដី សុខភាពយើង តាមរយៈការបកស្រាយរបស់លោកវេជ្ជបណ្ឌិត ទូច ឃុន ឯកទេសជម្ងឺទឹកនោមផ្អែម នៃមន្ទីរពេទ្យព្រះកុសុមៈ។
អត្ថប្រយោជន៍នៃម៉ាស៊ីនវាស់ជាតិស្ករ
ការធ្វើឱ្យកម្រិតជាតិស្ករស្ថិតនៅកម្រិតប្រហាក់ប្រហែលគោលដៅធម្មតាជាការសំខាន់បំផុត បន្ទាប់ពីធ្វើការព្យាបាល ដោយឱសថដោយធ្វើនូវរបបអាហារឱ្យបានត្រឹមត្រូវគួបផ្សំនឹងការហាត់ប្រាណ។ ពោលគឺធ្វើយ៉ាងណាឱ្យកម្រិតជាតិស្ករក្នុងឈាមស្ថិត នៅត្រឹមចន្លោះពី៨០ទៅ១២០មីលីក្រាម/ដេស៊ីលីត្រ មុនបរិភោគអាហារ និងចន្លោះពី១២០ទៅ១៨០មីលីក្រាម/ដេស៊ីលីត្រ ក្រោយពីបរិភោគអាហារ២ម៉ោង។
បច្ចុប្បន្ននេះការតាមដានកម្រិតជាតិស្ករក្នុងឈាមដោយខ្លួនឯងឱ្យបានទៀងទាត់ជាមួយនឹងម៉ាស៊ីនធ្វើតេស្ដជាតិស្ករនៅតាមផ្ទះ គឺត្រូវបានគេណែនាំទៅដល់អ្នកជម្ងឺទឹកនោមផ្អែម ជាពិសេសអ្នកជម្ងឺទឹកនោមផ្អែមប្រភេទទី២ ដែលត្រូវការចាក់ថ្នាំ អាំងស៊ុយលីន។
តម្រូវការប្រើប្រាស់នូវម៉ាស៊ីនធ្វើតេស្ដជាតិស្ករ គឺត្រូវចាំបាច់ត្រូវអនុវត្ដនៅពេលចាប់ផ្ដើមធ្វើការព្យាបាលជាលើកដំបូង ចំពោះអ្នកជម្ងឺទឹកនោមផ្អែមដែលមានកម្រិតជាតិស្ករក្នុងឈាមឡើងខ្ពស់ ជាពិសេសចំពោះអ្នកជម្ងឺដែលត្រូវប្រើពពួកថ្នាំស៊ុយហ្វាមីត នៅពេលដែលគ្រូពេទ្យធ្វើការផ្លាស់ប្ដូរកម្រិតប្រើនៃថ្នាំ។
វិធីប្រើប្រាស់ម៉ាស៊ីនវាស់កម្រិតជាតិស្ករ
ការពិនិត្យមើលជាតិស្ករក្នុងឈាមដោយខ្លួនឯង គឺអ្នកជម្ងឺទឹកនោមផ្អែមអាចធ្វើតេស្ដជាមួយម៉ាស៊ីនមើលជាតិស្ករដោយខ្លួន ឯងនៅតាមផ្ទះរៀងៗខ្លួន។ ដោយគ្រាន់តែជួសយកឈាមនៅចុងម្រាមដៃមួយតំណក់តូចដាក់ទៅលើបន្ទះនៃម៉ាស៊ីន រីឯលទ្ធផលនឹង ទទួលបានក្នុងរយៈពេលពី៥ទៅ២០វិនាទី ទៅតាមភាពទំនើបនៃម៉ាស៊ីននីមួយៗ។ នេះជារបៀបទំនើប ដើម្បីតាមដានជម្ងឺទឹកនោម ផ្អែមដែលគេធ្វើស្ទើរតែទូទៅ។
ការណែនាំពីសំណាក់គ្រូពេទ្យចំពោះអ្នកជម្ងឺទឹកនោមផ្អែមប្រភេទទី២ ឱ្យតាមដានកម្រិតជាតិស្ករក្នុងឈាមដោយខ្លួនឯង គឺវាអាស្រ័យទៅតាមអ្នកជម្ងឺម្នាក់ៗ។ ប្រសិនបើគ្រូពេទ្យពិនិត្យឃើញថា កម្រិតជាតិស្ករក្នុងឈាមរបស់អ្នកជម្ងឺមានការឡើងខ្ពស់ ហើយគ្រូពេទ្យត្រូវការផ្លាស់ប្ដូរនូវកម្រិតថ្នាំប្រើប្រាស់ ពេលនោះគ្រូពេទ្យបានណែនាំឱ្យអ្នកជម្ងឺធ្វើការតាមដានរាល់ថ្ងៃជាប់ៗគ្នា។ បើឃើញថាកម្រិតជាតិស្ករក្នុងឈាមធ្លាក់មកនៅសភាពប្រហាក់ប្រហែលធម្មតាហើយនោះ អ្នកជម្ងឺទឹកនោមផ្អែមប្រភេទទី២អាចមើល ជាតិស្ករ១សប្ដាហ៍ម្ដងឬ១ខែម្ដង។ ប៉ុន្ដែត្រូវពិនិត្យ២ថ្ងៃជាប់គ្នាដោយធ្វើតេស្ដ៦ដងក្នុង១ថ្ងៃបើអាចធ្វើទៅបាន ពេលវេលាដែលអាចធ្វើតេស្ដឈាមទៅបានគឺមុនពេលទទួលទានអាហារ និង២ម៉ោងក្រោយពេលទទួលទានអាហារ ទាំង៣ពេល(អាហារពេលព្រឹក អាហារពេលថ្ងៃត្រង់ និងអាហារពេលល្ងាច)។
ប៉ុន្ដែចំពោះអ្នកជម្ងឺទឹកនោមផ្អែមប្រភេទទី២ដែលត្រូវប្រើថ្នាំអាំងស៊ុយលីនចាក់បន្ថែម គឺត្រូវតាមដានជាតិស្ករក្នុងឈាមរាល់ថ្ងៃ ដូចករណីអ្នកជម្ងឺទឹកនោមផ្អែមប្រភេទទី១ដែរ។
សូមបញ្ជាក់ថា ការតាមដានកម្រិតជាតិស្ករក្នុងឈាម២ម៉ោងក្រោយអាហារជាការសំខាន់ ជាពិសេសចំពោះអ្នកដែលមាន កម្រិតជាតិស្ករក្នុងឈាម នៅពេលមិនទាន់បរិភោគអាហារមិនឡើងខ្ពស់ ប៉ុន្ដែHbA1Cឡើង។
ប្រភព ៖ ទស្សនាវដ្តី សុខភាពយើង លេខ៣៤ ខែវិច្ឆិកា ឆ្នាំ២០០៨
Leave a Reply