ថ្លើមគឺជាសរីរាង្គមួយក្នុងចំណោមសរីរាង្គជាច្រើនទៀតដែលមាននៅក្នុងរាងកាយរបស់មនុស្ស។ វាមានតួនាទីយ៉ាងសំខាន់ នៅក្នុងការបំប្លែង និងស្រូបយកសារធាតុពុលផ្សេងៗដែលចូលទៅក្នុងខ្លួនមនុស្ស តាមរយៈការទទួលទានអាហារ ឬថ្នាំសង្កូវ។ ថ្លើមរីកគឺជាជម្ងឺមួយប្រភេទដែលផ្ដល់ឥទ្ធិពលអាក្រក់ និងពិបាកព្យាបាល។ តើពិតឬក៏យ៉ាងណា?
លោកវេជ្ជបណ្ឌិត សាន់ ចាន់ណា ឯកទេសជម្ងឺថ្លើម ពោះវៀន និងក្រពះ នៅមន្ទីរពេទ្យកាល់ម៉ែត បានធ្វើការបកស្រាយ បញ្ហាថ្លើមរីកជូនលោកអ្នកអាន។
លក្ខណៈថ្លើមរីក
ថ្លើមរីកមិនមែនជាប្រភេទនៃជម្ងឺនោះទេ។ វាគ្រាន់តែជាអាការរោគសញ្ញាមួយដែលស្ដែងចេញនៅពេលមានជម្ងឺផ្សេងៗ កើតមាន និងជះឥទ្ធិពលទៅលើវាប៉ុណ្ណោះ។ ថ្លើមរីកអាចធូរស្រាលវិលទៅរកសភាពដើមវិញបាន ដរាបណាជម្ងឺដែលបង្កហេតុទាំង អស់នោះត្រូវបានធ្វើការព្យាបាលជាសះស្បើយ។
រោគសញ្ញា និងការវិភាគ
គេអាចដឹងថាមានបញ្ហាថ្លើមរីកទៅបាន គឺអាស្រ័យទៅលើការធ្វើរោគវិនិច្ឆ័យរបស់អ្នកជំនាញ។ គេអាចសន្និដ្ឋានបាន នៅពេលដែលអ្នកជំនាញធ្វើការវិភាគ និងពិនិត្យទៅលើទីតាំងរបស់ថ្លើមនៅលើពោះខាងក្រោមឆ្អឹងជំនីរខាងស្ដាំ ដោយយកដៃស្ទាប ចុចនិងគោះ ទើបដឹងថាថ្លើមមានទំហំធំជាងប្រក្រតី ឬពិនិត្យទៅឃើញថា ថ្លើមមានទំហំធំលើសពី១២សង់ទីម៉ែត្រ។ ម្យ៉ាងវិញទៀតគេអាចមើលឃើញស្នាមទុលនៅតំបន់ក្រោមឆ្អឹងជំនីរខាងស្ដាំ នៅពេលដែលថ្លើមមានសភាពរីកធំខ្លាំង។ លើសពីនេះទៅទៀត គេអាចដឹងច្បាស់ដោយធ្វើការវិភាគទៅលើការថតឆ្លុះអេកូសាស្ដ្រ។
មូលហេតុបង្កថ្លើមរីក
បើយោងទៅតាមការសិក្សាស្រាវជ្រាវបានបញ្ជាក់ថា ថ្លើមរីកគឺបណ្ដាលមកពីមូលហេតុជាច្រើន។
1 . បណ្ដាលមកពីការទទួលទានគ្រឿងស្រវឹង ៖ ពិតមែនតែការទទួលទានស្រាអាចជាជំនួយដល់សុខភាព ជាពិសេស អាចជួយសម្រួលដល់ការរំលាយអាហារ ដែលស្ថិតនៅក្នុងបរិមាណមួយសមស្រប។ ផ្ទុយទៅវិញ នៅពេលដែលសេពគ្រឿងស្រវឹងច្រើនហួសកម្រិត វាក៏អាចធ្វើឱ្យមានបញ្ហាទៅដល់សុខភាពយ៉ាងពិតប្រាកដ។ អ្វីដែលទទួលរងនូវឥទ្ធិពលអាក្រក់ពីការទទួលទានគ្រឿងស្រវឹងនោះគឺថ្លើម ដែលជាប្រព័ន្ធសរីរាង្គមួយមានតួនាទីយ៉ាងសំខាន់នៅក្នុងការស្រូបយកសារធាតុពុលនៅក្នុងរាងកាយរបស់ មនុស្ស។
2 . បណ្ដាលមកពីការទទួលទានឱសថដែលមិនមានវេជ្ជបញ្ជា ៖ ការប្រើប្រាស់ឱសថដោយពុំមានវេជ្ជបញ្ជាត្រឹមត្រូវ អាចធ្វើឱ្យមានការរលាកថ្លើម ក៏ជាមូលហេតុមួយដែលបណ្ដាលឱ្យថ្លើមរីកបានដែរ។ លើសពីនេះទៅទៀត ការទទួលទានឱសថដោយ គ្មានវេជ្ជបញ្ជា មិនត្រឹមតែធ្វើឱ្យថ្លើមរីកប៉ុណ្ណោះទេ តែវាក៏អាចជាមូលហេតុដែលបង្កឱ្យមានកើតជម្ងឺផ្សេងៗជាច្រើនទៀត ដូចជាជម្ងឺ ក្រពះ ជម្ងឺស្អិតពោះវៀន ជម្ងឺតម្រងនោមជាដើម។
3 . បណ្ដាលមកពីជម្ងឺ ៖ ជម្ងឺគឺជាមូលហេតុចម្បងដែលបណ្ដាលឱ្យថ្លើមរីក។ ដោយសារតែថ្លើមជាសរីរាង្គសំខាន់នៅក្នុងរាងកាយ ដោយទទួលបន្ទុកក្នុងការចម្រាញ់សារធាតុពុលទាំងឡាយ និងមានទំនាក់ទំនងដោយផ្ទាល់ជាមួយបណ្ដាប្រព័ន្ធនៅក្នុង រាងកាយ។ ដូច្នេះនៅពេលដែលមានជម្ងឺ ឬមានផលប៉ះពាល់ទៅលើផ្នែកសរីរាង្គណាមួយនោះ ថ្លើមនឹងមានប្រតិកម្មរីកធំ។ ជម្ងឺដែលអាចបណ្ដាលឱ្យថ្លើមរីក មានដូចជាជម្ងឺរលាកថ្លើមបេ និងសេ ជម្ងឺក្រិនថ្លើម មហារីកថ្លើម បូសថ្លើម ជម្ងឺខ្សោយបេះដូង ជម្ងឺដែលបណ្ដាលមកពីវីរុស បាក់តេរី ឬប៉ារ៉ាស៊ីតមួយចំនួន ឬជម្ងឺធាត់ជាដើម។ ចំពោះជម្ងឺធាត់អាចជះឥទ្ធិពល និងធ្វើឱ្យថ្លើមរីកបានដោយសារតែបណ្ដាលមកពីការកកជាតិខ្លាញ់នៅក្នុងថ្លើម។
វិធីសាស្ដ្រព្យាបាលថ្លើមរីក
នៅក្នុងវិធីសាស្ដ្រនៃការព្យាបាលបញ្ហាថ្លើមរីក ឬថ្លើមធំនេះ អ្នកជំនាញអាចធ្វើទៅតាមប្រភេទនៃជម្ងឺនីមួយៗដែលបង្ក ឡើង។ ឧទាហរណ៍ នៅពេលដែលគេពិនិត្យទៅឃើញថា បញ្ហាថ្លើមរីកគឺបណ្ដាលមកពីជម្ងឺថ្លើម(រលាកថ្លើម ក្រិនថ្លើម មហារីក ថ្លើម) នោះអ្នកជំនាញនឹងធ្វើការព្យាបាលយ៉ាងយកចិត្ដទុកដាក់បំផុតទៅលើជម្ងឺថ្លើមនោះ។ ប៉ុន្ដែបើពិនិត្យទៅឃើញថា វាមានទាក់ ទងជាមួយជម្ងឺបេះដូង នោះគេនឹងធ្វើការព្យាបាលទៅលើជម្ងឺបេះដូង។ សរុបរួម វិធីសាស្ដ្រនៅក្នុងការព្យាបាល ដាច់ខាត់គឺត្រូវធ្វើការព្យាបាលទៅលើជម្ងឺនីមួយៗដែលបង្កជាមុន នោះបញ្ហាថ្លើមរីកនឹងបាត់ទៅវិញ ឬធូរស្រាលតាមក្រោយ។
ផលប៉ះពាល់បណ្ដាលមកពីថ្លើមរីក
បើតាមការសង្កេតមើលឃើញថា ផលលំបាកដែលទទួលបានមកពីបញ្ហាថ្លើមរីកនេះ គឺវាអាស្រ័យទៅលើប្រភេទនៃជម្ងឺនីមួយៗ។ ផលលំបាកទាំងអស់នេះនឹងបាត់ទៅវិញ ឬធូរស្រាលនៅពេលណាដែលធ្វើការព្យាបាលមូលហេតុដើមនៃជម្ងឺដែលបង្កនោះជាសះស្បើយ។ ប៉ុន្ដែនៅក្នុងករណីដែលមិនបានធ្វើការព្យាបាលជម្ងឺដែលបង្កឱ្យមានបញ្ហាថ្លើមរីកនោះឱ្យទាន់ពេលវេលានោះទេ វានឹងបង្កឱ្យមានផលលំបាកកាន់តែធ្ងន់ធ្ងរមួយកម្រិតទៀតទៅលើថ្លើម ឬអាចបណ្ដាលឱ្យមានការបាត់បង់អាយុជីវិតក៏មាន។
ប្រការគួរប្រតិបត្ដិពេលមានថ្លើមរីក
នៅពេលដែលដឹងថាមានបញ្ហាថ្លើមរីក ឬថ្លើមធំ គួរគប្បីត្រូវចេះថែរក្សាខ្លួនឱ្យបានល្អ។ នៅពេលដែលរកឃើញនូវប្រភេទ ឬមូលហេតុដែលបង្ក ត្រូវប្រញាប់ទៅរកការព្យាបាលជាបន្ទាន់ ចៀសវាងបង្អង់យូរ នាំឱ្យមានផលលំបាកក្នុងការព្យាបាល។ ម្យ៉ាងវិញទៀតរាល់ចំណីអាហារដែលបរិភោគត្រូវមានអនាម័យជាប់ជានិច្ច ចៀសវាងនាំសារធាតុពុលចូលក្នុងរាងកាយ ដែលជាមូលហេតុធ្វើឱ្យមានការលំបាកទៅដល់ថ្លើម។
វិធីបង្ការកុំឱ្យថ្លើមរីក
វិធីការពារពីថ្លើមរីក មិនមានអ្វីពិបាកនោះទេ ដោយគ្រាន់តែលោកអ្នកត្រូវចៀសឱ្យផុតនូវជម្ងឺមួយចំនួនដែលបានរៀបរាប់ខាងលើតែប៉ុណ្ណោះ។ កាលណាលោកអ្នកកើតជម្ងឺមួយចំនួនដែលបានរៀបរាប់ខាងលើ នោះជាមូលហេតុដែលធ្វើឱ្យថ្លើមអ្នករីក ឬថ្លើមធំហើយ។ មួយវិញទៀត លោកអ្នកត្រូវមានអនាម័យខ្លួនប្រាណ និងបរិស្ថានជុំវិញខ្លួនផងដែរ ទើបអាចចៀសផុតពីជម្ងឺនានាបាន ហើយថែមទាំងមិនធ្វើឱ្យថ្លើមលោកអ្នករីកទៀតផង។
ដំបូន្មានអ្នកឯកទេស
បើលោកអ្នកមានបញ្ហាថ្លើមរីក ត្រូវប្រញាប់ទៅពិគ្រោះជាមួយអ្នកជំនាញ ដើម្បីស្វែងរកដំណោះស្រាយ និងវិធីព្យាបាល។ គួរចាក់ថ្នាំបង្ការរលាកថ្លើមប្រភេទបេ។ ការទទួលទានសុរាត្រូវមានកម្រិត ជាពិសេសត្រូវចៀសវាងនូវការប្រើប្រាស់ឱសថដែលពុំមានការអនុញ្ញាត និងវេជ្ជបញ្ជាពីអ្នកជំនាញ។ ម្យ៉ាងវិញទៀត ត្រូវរស់នៅប្រកបទៅដោយអនាម័យ ដើម្បីកុំឱ្យកើតនូវជម្ងឺឆ្លង និងត្រូវមានលំហាត់ប្រាណឱ្យបានទៀងទាត់។
ប្រភព ៖ ទស្សនាវដ្តី សុខភាពយើង លេខ៣៤ ខែវិច្ឆិកា ឆ្នាំ២០០៨
Leave a Reply