លោកអ្នកបានជ្រាបរួចមកហើយ អំពីការកំណត់ភេទរបស់បុត្រធីតា ថាជាស្រីឬជាប្រុស ដោយក្រូម៉ូសូម ហើយនៅពេល ណានោះ។ ចំណេះដឹងទាំងនេះជាមូលដ្ឋានគ្រឹះសម្រាប់ស្វែងយល់ និងអនុវត្ដវិធីសាស្ដ្រសម្រាប់ចំណង់បានកូនប្រុស និងកូនស្រី និងបច្ចេកទេសទទួលបានកូនប្រុស និងកូនស្រីតាមចំណង់ដែលទស្សនាវដ្ដី សុខភាពយើង នឹងបន្ដលើកមកជម្រាបជូន។
ភេទរបស់កុមារក្ដី របស់ទារកឬរបស់អំប្រ៊ីយ៉ុងក្ដី សុទ្ធតែត្រូវបានកំណត់ឡើងពេលដែលមេជីវិតទាំងពីរដែលជាអូវុល និង ស្ពែមម៉ាតូសូអ៊ីដជួបចាប់យកគ្នា។ ព្រោះថាពេលនោះក្រូម៉ូសូមអ៊ិចរបស់ស្ដ្រីជាម្ដាយបានភ្ជាប់ខ្លួនទៅនឹងក្រូម៉ូសូមអ៊ិច និងអ៊ីក្រិច របស់ ស្ពែមម៉ាតូសូអ៊ីដរបស់បុរសជាឪពុក។ សម្ព័ន្ធក្រូម៉ូសូមអ៊ិចអ៊ិចផ្ដល់កំណើតជាកូនស្រី រីឯសម្ព័ន្ធភាពអ៊ិចអ៊ីក្រិចផ្ដល់កំណើតជាកូនប្រុស។ បើពិនិត្យទៅលើបាតុភូតនេះ អាចសន្និដ្ឋានបានថា កត្ដាមួយចំនួនដែលកើតមានមុនការបង្កកំណើតអាចកំណត់ភេទរបស់ទារកបាន។
មូលហេតុចង់បានកូនប្រុស ឬកូនស្រី
នៅប្រទេសកម្ពុជាយើង មិនទាន់មានច្បាប់ទាក់ទងនឹងការចង់បានកូនប្រុសឬកូនស្រីនេះនៅឡើយទេ។ នៅប្រទេស លូតលាស់ ជម្រើសភេទរបស់ទារកជាជម្រើសស្របច្បាប់ ក្នុងករណីប្ដីប្រពន្ធទាំងពីរនាក់ មាននរណាម្នាក់មានជម្ងឺសួពូជទាក់ទងនឹងភេទ ដូចជាក្នុងករណីជម្ងឺសួពូជដែលទាក់ទងនឹងហ្សែនរបស់ក្រូម៉ូសូមអ៊ិច បុរសមានក្រូម៉ូសូមអ៊ិចតែមួយ រីឯស្ដ្រីមានក្រូម៉ូសូមអ៊ិចពីរ ជាដើម។ ព្រោះថាក្រៅពីតួនាទីកំណត់ភេទ ក្រូម៉ូសូមភេទ និងជាពិសេសក្រូម៉ូសូមអ៊ិច មានហ្សែនអត្ដចរិតជាច្រើនដែលដាច់ដោយឡែកពីភេទ។ បុរសជាឪពុកផ្ដល់ក្រូម៉ូសូមអ៊ិចទៅឱ្យកូនស្រី ប៉ុន្ដែពិតជាមិនអាចផ្ដល់ដល់កូនប្រុសនោះទេ រីឯស្ដ្រីជាម្ដាយវិញអាច ចម្លងហ្សែនមិនប្រក្រតីរបស់ក្រូម៉ូសូមអ៊ិចទៅទាំងកូនស្រីទាំងកូនប្រុស។
ជម្ងឺទាំងនេះអាចកើតឡើងលើតែកូនប្រុសដែលទទួលក្រូម៉ូសូមអ៊ិច ដែលមានហ្សែនមិនប្រក្រតី។ ស្ដ្រីម្នាក់ដែលមានហ្សែន នេះ ក្នុងចំណោមក្រូម៉ូសូមណាមួយនៃក្រូម៉ូសូមអ៊ិចទាំងពីរមិនមានជម្ងឺនេះទេ ប៉ុន្ដែគាត់អាចជាអ្នកចម្លង។ ពោលគាត់អាចចម្លងជម្ងឺ នោះទៅកូនប្រុសរបស់គាត់ដែលអាចមានអត្រាខ្ពស់។
សព្វថ្ងៃនេះមានជម្ងឺសួពូជជាច្រើនទាក់ទងនឹងភេទដែលគេបានរកឃើញ។ ហើយជម្ងឺសួពូជដែលកើតមានញឹកញាប់ជាងគេ បំផុតគឺជម្ងឺអេម៉ូភីលីអា និងបេ ឬជម្ងឺឈាមក្រកក(ក្នុងចំណោមក្មេងប្រុស១ម៉ឺននាក់ មាន១នាក់កើត) និងជម្ងឺសាច់ដុំសួពូជ (ក្នុងចំណោមក្មេងប្រុស៥ពាន់នាក់ មាន១នាក់កើត)។
ក្នុងករណីជម្ងឺសួពូជទាំងនេះ ចំណង់ចង់បានកូន គឺជម្រើសកូនស្រី។ ព្រោះថាបើកូនប្រុសអាចងាយមានជម្ងឺសួពូជទាំងនេះ។ នេះជាមូលហេតុវេជ្ជសាស្ដ្រ ក្នុងការជ្រើសរើសកូនប្រុស និងកូនស្រី។ នៅមានមូលហេតុបុគ្គលឬគ្រួសារផងដែរ ក្នុងការជ្រើសរើសកូន ប្រុសឬកូនស្រី។
មូលហេតុបុគ្គល និងគ្រួសារ
គូស្រករឬប្ដីប្រពន្ធខ្លះចង់បានកូនប្រុស ហើយគូស្រករខ្លះទៀតចង់បានកូនស្រីជាង។ គូនីមួយៗមានចំណងផ្ទាល់ខ្លួន។ ចំណង់កូនប្រុសឬកូនស្រីអាចកើតមានឡើងអាស្រ័យទៅលើជាតិសាសន៍ ពូជអម្បូរ ជំនឿ និងកត្ដាផ្សេងៗទៀត។ យ៉ាងណាម៉ិញ ជនជាតិចិនចង់បានកូនប្រុសជាងកូនស្រី ដោយហេតុផលកាន់ត្រកូល តពូជពង្ស និងមានអំណាចសម្រាប់គ្រួសារវង្សត្រកូល។ រីឯគ្រួសារខ្មែរខ្លះចង់បានកូនស្រីជាងកូនប្រុសជាដើម។ ដោយសារថា កូនស្រីល្បីឈ្មោះថាស្រួលចិញ្ចឹម និងស្រួលអប់រំជាងកូនប្រុស ព្រមទាំងជិតស្និទ្ធជាមួយឪពុកម្ដាយ និងសាច់ញាតិខាងម្ដាយជាង ប៉ុន្ដែឆ្ងាយពីសាច់ញាតិខាងឪពុកបន្ដិចជាដើម។ ដោយឡែកកូនប្រុស ឆ្លាត និងអាចជួយកិច្ចការធ្ងន់បានល្អជាងកូនស្រីជាដើម។ ទាំងនេះគ្រាន់តែជាចំណង់បាន និងការយល់ឃើញខុសៗគ្នា ប៉ុន្ដែអ្វីដែលសំខាន់គឺជម្រើសត្រឹមត្រូវរបស់លោកអ្នក។
ប្រភព ៖ ទស្សនាវដ្តី សុខភាពយើង លេខ៣៤ ខែវិច្ឆិកា ឆ្នាំ២០០៨
