ឡេង មុន្នីរចនា ជាតារាចម្រៀងមួយដែលមានរូបសម្ផស្សស្រស់ស្អាត និងមានទេពកោសល្យខ្ពស់ក្នុងការសម្ដែងកាយវិការ ក្រមិចក្រមើម នៅពេលដែលនាងឡើងលើឆាកម្ដងៗ។ មានទស្សនិកជនមួយចំនួននាំគ្នានិយាយថា នាងជាតារាចម្រៀងមួយដែល ស្រស់ស្អាត សម្លេងពីរោះ និងមានកាយវិការគួរឱ្យស្រឡាញ់។ ឯមតិមួយចំនួនទៀតយល់ថា នាងជាតារាចម្រៀងដែលស្រស់ស្អាត ហើយសិចស៊ីថែមទៀតផង។
ដើម្បីឱ្យកាន់តែច្បាស់អំពីអាថ៌កំបាំងក្នុងការថែរក្សាសម្ផស្សរបស់មុន្នីរចនា ទស្សនាវដ្ដី សុខភាពយើង បានធ្វើការសម្ភាសន៍ ជាមួយនាងផ្ទាល់តែម្ដង អំពីចំណុចពិសេសមួយចំនួនដែលអាចធ្វើឱ្យនាងមានរូបរាង ក៏ដូចជាសម្រស់ស្រស់ស្អាតដូចនេះ។
ប្រវត្ដិមុនចូលសិល្បៈ
មុនពេលនាងចូលសិល្បៈ រចនាបានរៀននៅវិទ្យាល័យបាក់ទូក។ ដោយមានការពេញចិត្ដវិស័យសិល្បៈ រចនាក៏បានដាក់ ពាក្យប្រឡងចម្រៀងនៅស្ថានីយទូរទស្សន៍ប៉ុស្ដិ៍លេខ៥ ក្នុងកម្មវិធីពន្លកតារានៅក្នុងឆ្នាំ១៩៩៨។ បន្ទាប់ពីការប្រឡងជាប់នៅក្នុងកម្មវិធីនោះមក រចនាក៏បានចូលប្រឡូកក្នុងវិស័យសិល្បៈ នាងបានចេញទៅច្រៀងតាមរង្គសាលនានានៅព្រះរាជាណាចក្រកម្ពុជា និង បានចូលបម្រើការងារនៅក្នុងផលិតកម្មមួយចំនួនទៀងផង។ នៅពេលបច្ចុប្បន្ននេះ មុន្នីរចនាបានច្រៀងប្រចាំនៅភោជនីយដ្ឋាន ទន្លេសាប និងរង្គសាលណាវីឡុងប៊ិក។
ក្រៅអំពីអាជីពជាតារាចម្រៀងមួយរូបហើយនោះ រចនាក៏ជាម្ចាស់ហាងលក់សម្លៀកបំពាក់មួយកន្លែងផងដែរ ដែលមានទី តាំងនៅផ្សារបឹងត្របែកថ្មី។
វិធីថែរក្សាសម្រស់
ការថែរក្សាសម្រស់វិញនោះ មុន្នីរចនាមានអាថ៌កំបាំងបន្ដិចបន្ដួចក្នុងការរក្សានូវរូបសម្ផស្សរបស់ខ្លួនឱ្យមើលទៅស្រស់ស្អាត និងមានភាពក្មេងជាងវ័យ។ ខាងក្រោមនេះជាការប្រតិបត្ដិរបស់មុន្នីរចនា ដែលអាចធ្វើឱ្យនាងស្រស់ស្អាតចាប់តាំងតែពីចុងសក់ដល់ ចុងជើងផងដែរ។
- ការថែរក្សាសក់ ៖ ចំពោះបញ្ហាសក់វិញនោះ វាមានសារៈសំខាន់ណាស់សម្រាប់ស្ដ្រីទូទៅ។ ស្ដ្រីមួយចំនួនតែងតែចង់បាន នូវសរសៃសក់ស្អាតទន់រលោង គួរជាទីគយគន់របស់អ្នកដទៃ។ ចំណែករចនាវិញនោះ កក់សក់មួយថ្ងៃរំលងមួយថ្ងៃ ក្រោយពេល កក់សក់រួចហើយ រចនាប្រើជាក្រែមបន្ទន់សក់ ដើម្បីកុំឱ្យសក់ជំពាក់គ្នា និងធ្វើឱ្យសក់ទន់រលោងងាយស្រួលសិតទៀតផង។ ក្នុងមួយ សប្ដាហ៍នាងតែងតែអប់សក់ចំនួនពីរដង ដើម្បីធ្វើឱ្យសក់មានទម្ងន់ និងជួយថែរក្សាសក់មិនឱ្យជ្រុះជាដើម។ នៅពេលដែលធ្វើសក់ម្ដងៗ រចនាមិនសូវប្រើសាប្រាយបាញ់សក់ប៉ុន្មានទេ ព្រោះវាអាចធ្វើឱ្យសក់ជ្រុះ និងងាប់សរសៃសក់បាន។
- ការថែរក្សារោមភ្នែក ចិញ្ចើម បបូរមាត់ ៖ ភាគច្រើនរចនាតែងតែពាក់រោមភ្នែក មិនសូវជាប្រើប្រាស់រោមភ្នែក ខ្លួនឯងទេ ដោយសារខ្លាចរោមភ្នែកធម្មជាតិនោះជ្រុះ។ ម្យ៉ាងវិញទៀតនោះការប្រើរោមភ្នែកក្លែងក្លាយ អាចធ្វើឱ្យរចនាបន្ថែមភាព ស្រស់ស្អាតបានទៀតផង និងឃើញកែវភ្នែកស្អាត។ ចំណែកឯចិញ្ចើមវិញនោះ គឺគូសទៅតាមការផាត់មុខ និងសម្លៀកបំពាក់។ បបូរមាត់រចនាច្រើនប្រើពណ៌ធម្មតា មិនប្រើពណ៌ណាដែលដិតពេកទេ និងប្រើក្រែមរលោងបន្ថែមពីលើ។
- ការថែរក្សាធ្មេញ ៖ សុខភាពមាត់ធ្មេញជាកត្ដាមួយសំខាន់ណាស់ចំពោះមនុស្សទូទៅ ដោយសារតែមនុស្សគ្រប់រូបត្រូវ និយាយស្ដីទៅកាន់អ្នកដែលនៅជុំវិញខ្លួន។ រចនាដុសធ្មេញមួយថ្ងៃ៣ដង គឺនៅពេលយប់មុនពេលចូលគេង ពេលភ្ញាក់ពីដំណេក និងនៅ ពេលដែលញ៉ាំអាហារហើយ រចនាក៏មានប្រើជាទឹកខ្ពុរមាត់ផងដែរ។
- ការថែរក្សាស្បែកមុខ ៖ ចំពោះផ្ទៃមុខវិញនោះ រចនាមិនទម្លាប់ប្រើម្សៅស្អិតទេនៅពេលដែលមានការផាត់មុខម្ដងៗ ដោយសារតែផ្ទៃមុខនាងមិនមានស្នាមអ្វី និងគ្មានមុន។ ម្យ៉ាងទៀតនោះការប្រើម្សៅស្អិតអាចធ្វើឱ្យមុខប្រតិកម្មបាន និងអាចធ្វើឱ្យ មុខជាំទៀតផង។
- ការថែរក្សាស្បែកដងខ្លួន ៖ រចនាប្រើសាប៊ូការពារស្បែកគ្រប់ពេលដែលបានជម្រះខ្លួន ដើមី្បឱ្យស្បែកស និងម៉ត់រលោង។ បន្ទាប់ពីការងូតហើយនោះ នាងបានប្រើជាឡេការពារស្បែកមួយមុខទៀត។ មុន្នីរចនាប្រើប្រាស់ឡេទៅតាមកាលវេលា ដូចជានៅពេលដែលចេញទៅខាងក្រៅត្រូវប្រើឡេសម្រាប់ការពារកម្ដៅថ្ងៃឡេដែលប្រើពេលថ្ងៃ។ ចំណែកឯពេលយប់ នាងមានឡេប្រើ សម្រាប់ពេលយប់ ទើបធ្វើឱ្យស្បែករចនាម៉ត់ទន់រលោង ភ្លឺ និងមានពណ៌ជម្ពូទៀតផង។
- ការថែរក្សាក្រចកដៃជើង ៖ ជាអ្នកសិល្បៈត្រូវមានការតុបតែងខ្លួនឱ្យមានភាពស្រស់ស្អាត ជាពិសេសគឺក្រចកដៃជើង ត្រូវធ្វើឱ្យស្អាត និងកាត់តម្រឹមកុំឱ្យមើលទៅវែងពេក។ ចំណែកឯពណ៌ក្រចកវិញនោះលាបឱ្យសមទៅនឹងទីកន្លែង និងសម្លៀកបំពាក់ ផងដែរ។
ការថែរក្សាសុខភាពរាងកាយ
ទោះបីជាការងារមានការមមាញឹកយ៉ាងណាក៏ដោយ ក៏រចនាព្យាយាមធ្វើលំហាត់ប្រាណនៅផ្ទះជានិច្ច។ មុន្នីរចនាគិតថាការ ហាត់ប្រាណអាចជួយឱ្យមានសុខភាពល្អ និងអាចជួយកាត់បន្ថយការឡើងទម្ងន់បានទៀតផង។ ទោះបីជាការហាត់ប្រាណនោះមិនបាន ជារៀងរាល់ថ្ងៃក៏ដោយ ក៏រចនានៅតែខិតខំប្រឹងប្រែងឆ្លៀតពេលវេលាដើម្បីអនុវត្ដវាជានិច្ចជាកាល។
បំណងទៅថ្ងៃអនាគត
ចំពោះបំណងថ្ងៃអនាគតវិញនោះ រចនានៅមិនទាន់មានភាពច្បាស់លាស់នៅឡើយទេ ដោយនាងគិតថាអនាគតនាងនៅ វែងឆ្ងាយតទៅទៀត និងមានការផ្លាស់ប្ដូរ។
បណ្ដាំផ្ញើរបស់ ឡេង មុន្នីរចនា
សម្រស់ និងសុខភាពត្រូវដើរទន្ទឹមគ្នាជានិច្ច មិនអាចអត់មួយណាបានទេ។ ដូច្នេះលោកអ្នកត្រូវរំលែកពេលវេលាសម្រាប់ ការថែរក្សាសម្ផស្ស ថែរក្សាសុខភាពរាងកាយជាដើម ដើម្បីទទួលបាននូវភាពស្រស់ស្អាតសម្រាប់ខ្លួនឯង។
ការរៀបរាប់ជូនខាងលើនេះ ជាការយល់ឃើញ និងជាការអនុវត្ដរបស់អ្នកនាង ឡេង មុន្នីរចនា តែប៉ុណ្ណោះ។ សូមលោក ស្រីអ្នកនាងកញ្ញាជ្រើសរើសយកអ្វីដែលលោកអ្នកយល់ថាល្អត្រឹមត្រូវសម្រាប់អនុវត្ដបានហើយ។
ប្រវត្ដិរូបសង្ខេប
- ឈ្មោះ ៖ ឡេង មុន្នីរចនា
- អាយុ ៖ ២៥ឆ្នាំំ
- កម្ពស់ ៖ ១,៦៥ម៉ែត្រ
- ទម្ងន់ ៖ ៥៣គីឡូក្រាម
- ទំហំទាំងបី ៖ ៣៦ ២៧ ៣៤
- បងប្អូន ៖ ជាកូនទោល
- កម្រិតវប្បធម៌ ៖ បញ្ចប់ថ្នាក់បាក់ឌុប
- អាជីពពេលបច្ចុប្បន្ន ៖ តារាចម្រៀង
- ទីកន្លែងកំណើត ៖ ទីក្រុងភ្នំពេញ
ប្រភព ៖ ទស្សនាវដ្តី សុខភាពយើង លេខ៣៤ ខែវិច្ឆិកា ឆ្នាំ២០០៨
Leave a Reply