ពាក្យថាតារានៅក្នុងវិស័យសិល្បៈបានធ្វើឱ្យយុវវ័យភាគច្រើនជ្រួលច្របល់ចង់បានដូចអ្នកដែលល្បី។ ហេតុនេះទើបពួក ទាំងនោះតែងតែស្រវាចង់បានឱកាសដែលអាចនាំពួកគេទៅកាន់ផ្លូវដែលក្លាយទៅជាតារា។ មានយុវវ័យចង់ក្លាយទៅជាតារាជាច្រើន នោះបញ្ជាក់វិស័យសិល្បៈកំពុងតែរីកចម្រើន ប៉ុន្ដែក៏មានផលប៉ះពាល់បន្ទាប់បន្សំមួយចំនួនផងដែរ។ មានប្រការមួយចំនួនដែលបង្កឱ្យចិត្ដយុវវ័យទាំងនោះចង់ក្លាយទៅជាតារា។
បើតាមការស្ទាបស្ទង់មួយបានបង្ហាញថាមានយុវវ័យមួយចំនួនកំពុងតែជួបប្រទះនឹងជម្ងឺចង់ក្លាយជាតារា ដែលជម្ងឺនេះបាន ឆ្លងរាលដាលយ៉ាងគំហុក ជាពិសេសសម្រាប់យុវវ័យនៅតាមទីក្រុង។ ភាពកក្រីកនៅរយៈពេលប៉ុន្មានឆ្នាំចុងក្រោយនេះមានភាព គគ្រឹកគគ្រេងយ៉ាងសម្បើម។ ហេតុផលមួយចំនួនត្រូវបានគេរកឃើញដែលញ៉ាំងឱ្យយុវវ័យខ្មែរមួយចង់ក្លាយជាតារា។
មូលហេតុដែលចង់ក្លាយជាតារា
តារាមានន័យថាផ្កាយដែលស្ថិតនៅពិភពផ្សេងៗពីមនុស្សលោក ហេតុនេះហើយអ្នកដែលតាំងខ្លួនជាផ្កាយតែងចង់បាននូវ ភាពខ្ពង់ខ្ពស់ផុតពីមនុស្សទាំងឡាយ។ មានហេតុផលមួយចំនួនដែលនាំឱ្យយុវវ័យខ្មែរមួយចំនួនចង់ឡើងញ័រខ្លួន ដើម្បីក្លាយជាតារា ហេតុផលទាំងអស់នោះរួមមាន ៖
1 . ចង់បង្ហាញនូវសមត្ថភាពដែលខ្លួនមាន ៖ ការងារសិល្បៈមិនមែននរណាក៏អាចមានសមត្ថភាពនោះ។ ការច្រៀង ការរាំ និងការសម្ដែង សុទ្ធតែត្រូវទាមទារនូវទេពកោសល្យពីកំណើត ការតស៊ូហាត់រៀនជាដើម។ ហេតុនេះហើយការបង្ហាញអ្នកដទៃ ពីអ្វីដែលខ្លួនអាចធ្វើបានជារឿងដែលគួរជាទីមោទនៈបំផុត។ ដោយយល់ពីកត្ដាចិត្ដសាស្ដ្រទាំងអស់នេះហើយ ទើបបច្ចុប្បន្ននេះ ស្ថានីយទូរទស្សន៍ជាច្រើនបានព្យាយាមបង្កើតកម្មវិធីដែលទាក់ទងទៅនឹងសិល្បៈនេះ ដូចជាការប្រឡងចម្រៀង សម្ដែង រាំ កំប្លែង ស្រីស្រស់ប្រុសស្អាតជាដើម។ ទាំងនេះហើយដែលធ្វើឱ្យយុវវ័យកាន់តែឆាប់សម្រេចនូវបំណងប្រាថ្នារបស់ពួកគេ។
2 . ការងារសិល្បៈងាយរកលុយ និងមានសេរីភាព ៖ សិល្បៈជាប្រភេទការងារស្រាល ធ្វើការតិចបានប្រាក់ច្រើន ដូចជា ការឡើងច្រៀងតាមកញ្ចក់ទូរទស្សន៍ ឬកម្មវិធីផ្សេងៗ គ្រាន់តែចំណាយពេលមួយម៉ោងឬពីរម៉ោងក៏បានប្រាក់ច្រើន។ រហូតមកដល់ ពេលនេះតាមការទទួលព័ត៌មានបាន សិល្បករខ្លះមានតម្លៃខ្លួនរាប់ពាន់ដុល្លារក្នុងមួយកម្មវិធី ថែមទាំងមានឱកាសទទួលកាដូពីអ្នក គាំទ្រទៀតផង។ គ្មានការងារណាស្រួលមិនហត់ បានសប្បាយ បានល្បី ហើយបានលុយច្រើនបែបនេះ។ ម្យ៉ាងបើនិយាយពីសេរីភាព នោះគឺងាយស្រួលណាស់ ទោះបីជាធ្វើការមិនសូវទៀងពេល ចង់ឈប់សម្រាកមួយសប្ដាហ៍ ឬច្រើនជាងនេះក៏ពុំចាំបាច់ទៅសុំការ អនុញ្ញាតពីនរណាដែរ។ ហើយបើអ្នកសិល្បៈកាន់តែល្បីកាន់តែឡូយ ព្រោះការងារនឹងរត់មករកដោយខ្លួនឯង ជួនកាលមានគេមក តាមអង្វរឱ្យធ្វើទៀតផង។
3 . មានឱកាសបានគូស្នេហ៍ជាអ្នកមាន ៖ ការដែលធ្វើជាកណ្ដុរធ្លាក់ក្នុងធុងអង្ករនរណាក៏ចង់បានដែរ តែឱកាសនេះមួយ ចំនួនធំត្រូវបានអ្នកដែលជាតារាស្រវាយកទៅគ្មានសល់ទុកសម្រាប់អ្នកដែលជាមនុស្សធម្មតានោះឡើយ។ ជាតារាក្នុងពិភពសិល្បៈ រូបសម្រស់ស្រស់ស្អាត និងសង្ហាបានក្លាយជាចំណាប់អារម្មណ៍របស់អ្នកមានលុយទាំងឡាយ មិនថាប្រុសឬក៏ស្រីឡើយ ព្រោះពួកគេ មានលុយតែខ្វះប្រុស ឬស្រីស្អាតមកជួយចាយតែប៉ុណ្ណោះ។ ហេតុនេះហើយទើបតារាសិល្បៈមួយចំនួនបានក្លាយទៅជាទាសករស្នេហា សម្រាប់ពួកអ្នកមានលុយទាំងនោះ។
4 . មានឱកាសបាននៅជិតតារានៅក្នុងដួងចិត្ដ ៖ បើគ្រាន់តែជាមនុស្សសាមញ្ញម្នាក់ពេលបានជួបតារាប្រាកដជាមាន អារម្មណ៍រំភើបតាមសម្លឹងមិនដាក់ភ្នែកនោះទេ។ ប៉ុន្ដែនៅពេលដែលក្លាយទៅជាតារាដូចគ្នាពួកគេអាចមានឱកាសធ្វើការងារជាមួយ គ្នា ប្រាស្រ័យទាក់ទងគ្នាតាមរយៈការងារ ជួនកាលបើនិយាយពីលទ្ធភាពបង្កើតចំណងស្នេហានោះក៏មានឱកាសច្រើនជាងអ្នកធម្មតា ច្រើនណាស់។
៥ . ក្លាយជាមនុស្សពិសេស ៖ ដោយសារមានភាពល្បីតាមរយៈការងារសិល្បៈ ទើបឱ្យគ្រប់តារាទាំងអស់នៅពេលដែល ចូលរួមក្នុងកម្មវិធីអ្វីមួយតែងតែមានភាពលេចធ្លោជាងគេ ហើយត្រូវបានគេស្វាគមន៍ជាមនុស្សពិសេស ឬជាភ្ញៀវសំខាន់ទៀតផង។ កេរ្ដិ៍ឈ្មោះ និងភាពល្បីល្បាញនេះបានដក់ជាប់ក្នុងអារម្មណ៍ទស្សនិកជនរហូត បើទោះបីតារារូបនោះបានស្លាប់បាត់បង់ជីវិតហើយក៏ពិតមែន តែស្នាដៃបានបន្សល់ទុកមិនអាចបំភ្លេចបានឡើយ ជាក់ស្ដែងដូចជាអ្នកចម្រៀងជំនាន់មុន លោក ស៊ិន ស៊ីសាមុត អ្នកស្រី រស់ សេរីសុធាជាដើម សុទ្ធតែបានបន្សល់ទុកនូវកេរ្ដិ៍ឈ្មោះមិនអាចបង់បាត់ទៅតាមម្ចាស់ឡើយ ពោលគឺម្ចាស់ស្លាប់ចោលស្នាដៃ។
កត្ដាប្រឈមមុខនៅពេលក្លាយជាតារា
ក្រៅពីផលប្រយោជន៍ដែលត្រូវគេសម្លឹងឃើញដូចដែលពោលរៀបរាប់ខាងលើរួចមក។ មានកត្ដាមួយចំនួនទៀតដែលត្រូវ បានបំភ្លេច ឬធ្វើជាភ្លេចនៅពេលដែលគេចង់ក្លាយទៅជាតារា ដូចជា ៖
- ការរៀនសូត្រមិនចប់ចុងចប់ដើម ៖ តាមការសង្កេតជាទូទៅមិនសូវមានតារាណាដែលអាចបញ្ចប់ការសិក្សារបស់ខ្លួនបាន ជោគជ័យនោះទេ។ ព្រោះតែពួកគេបានលូកដៃក្នុងការងារសិល្បៈច្រើនជាងការរៀនសូត្រ រហូតពួកគេខ្លះបានលះបង់ការសិក្សាចោល តែម្ដង។ ហេតុនេះហើយនៅពេលការងារសិល្បៈរបស់គេបរាជ័យ គេមិនមានលទ្ធភាពទៅប្រកបការងារចិញ្ចឹមជីវិតអ្វីផ្សេងទៀត ឡើយ។ បើមានឱកាសក្លាយជាតារាល្បីនោះមិនសូវចោទជាបញ្ហាទេ គេអាចរកប្រាក់ចំណូលបានច្រើន តែបើជាតារាបន្ទាប់បន្សំ ទេនោះពិតជាពិបាកហើយអាចទីបញ្ចប់នៅសល់តែសម្បកខ្លួន។
- ហ៊ានបោកប្រាស់ខ្លួនឯង និងភូតកុហក ៖ មានតារាមិនតិចទេបានក្លាយជាមនុស្សដែលចេះកុហកបោកប្រាស់ ព្រោះអ្នកខ្លះ មិនចង់ឱ្យគេដឹងពីអតីតកាលរបស់ខ្លួន(អ្នកខ្លះធ្លាប់មានប្ដី មានសង្សារ មានកូន កើតចេញពីគ្រួសារអ្នកក្រីក្រជាដើម) ព្យាយាមរៀប ឫកពាជាអ្នកថ្លៃថ្នូរ។ ជីវិតឯកជនគ្មានសេរីភាព ព្រោះបានក្លាយខ្លួនជាអ្នកល្បីត្រូវខ្លាចគ្រប់យ៉ាង ខ្លាចគេនិយាយមិនល្អពីខ្លួន ខ្លាចបាត់បង់ប្រជាប្រិយភាពជាដើម។
- លង់ខ្លួនព្រោះស្នេហា ៖ ភាពល្បីល្បាញដែលយុវវ័យទាំងឡាយប៉ងប្រាថ្នាអាចហុចផលមកវិញមិនប្រសើរក៏មានដែរ ក៏ ព្រោះតែស្នេហា។ តារាមួយចំនួនព្រោះតែចង់បានប្រាក់ ចង់បានកិត្ដិយសលឿនពេក ទើបអាចនាំគ្នាយកប្រាណទៅប្ដូរជាមួយអ្នកដែល មានលុយ មានអំណាចមួយចំនួនដែលត្រូវបានគេជឿថាអាចជួយឱ្យពួកគេសម្រេចនូវបំណងប្រាថ្នានេះ។ ជាលទ្ធផល អ្នកខ្លះក៏ជោគជ័យ អ្នកខ្លះទៀតអាចត្រូវរងសង្គ្រាមស្នេហាត្រីកោណ ស្នេហ៍មិនគាប់ចិត្ដ មានកេរ្ដិ៍ឈ្មោះមិនប្រសើរជាដើម។
បណ្ដាំផ្ញើ
នៅមានកត្ដាជាច្រើនទៀតដែលអាចកើតមានចំពោះក្រុមតារាដែលកំពុងតែស្ថិតក្នុងពិភពស្រមៃនោះ។ ទស្សនាវដ្ដី សុខភាពយើង សូមលើកយកមកបង្ហាញជូនតែប៉ុណ្ណេះ ក្នុងគោលបំណងចង់ឱ្យយុវវ័យដែលមានបំណងក្លាយជាតារា ត្រិះរិះពិចារណា ដោយខ្លួនឯង។ ពោលបែបនេះមិនមែនមានន័យថាការងារសិល្បៈមិនល្អនោះទេ អាស្រ័យទៅលើបុគ្គលផ្ទាល់តែប៉ុណ្ណោះដែលមានការ ពិចារណាមុននឹងសម្រេចចិត្ដធ្វើអ្វីមួយ។ ការងារអ្វីក៏ល្អប្រសើរសម្រាប់មនុស្សដែរ បើមនុស្សឱ្យតម្លៃទៅលើវា។
ប្រភព ៖ ទស្សនាវដ្តី សុខភាពយើង លេខ៤១ ខែមិថុនា ឆ្នាំ២០០៩
Leave a Reply