ការមានរបួសមិនអាចមាននរណាម្នាក់គេចផុតនោះទេ គ្រាន់តែមានរបួសស្រាល ឬរបួសធ្ងន់តែប៉ុណ្ណោះ។ ប៉ុន្ដែអ្វីដែល សំខាន់នៅពេលនេះ គឺទស្សនាវដ្ដី សុខភាពយើង នឹងលើកមកបង្ហាញជូនអំពីវិធីមួយចំនួនដែលអាចជួយលោកអ្នកឱ្យចៀសផុត អំពីបញ្ហាមួយចំនួនដែលនាំឱ្យមានគ្រោះថ្នាក់នៅពេលដែលលោកអ្នក ឬក៏នរណាម្នាក់មានរបួស ហើយលោកអ្នកត្រូវជួយសង្គ្រោះ ជាបន្ទាន់នោះ។
លក្ខណៈទូទៅនៃរបួស
ជាទូទៅរបួសត្រូវបានចែកចេញជាពីរ របួសស្រាល និងរបួសធ្ងន់។
- របួសស្រាល ៖ គឺជាការរលាត់ស្បែកបន្ដិចបន្ដួចដែលគ្មានឈាម ឬមានឈាមខ្លះ
- របួសធ្ងន់ ៖ មានទំហំធំ ជ្រៅ នៅក្បែររន្ធធម្មជាតិ ឬនៅលើមុខ ឬមានវត្ថុមុតជាប់។
ការជួយសង្គ្រោះនៅពេលមានរបួស
1 . របួសស្រាល ៖
បើសិនជាជនរងគ្រោះមិនបានព្យាបាលរបួសស្រាល នឹងក្លាយទៅជារបួសធ្ងន់។ ប្រសិនបើជនរងគ្រោះមិនបានចាក់ថ្នាំបង្ការ តេតាណូស ជនរងគ្រោះអាចមានជម្ងឺតេតាណូសដែលអាចបណ្ដាលឱ្យស្លាប់។ នៅពេលមានរបួសស្រាល លោកអ្នកចាំបាច់ត្រូវអនុវត្ដ កាយវិការមួយចំនួនគឺ ៖
- លាងដៃនឹងទឹកសាប៊ូ
- លាងរបួសនឹងទឹកសាប៊ូ ដោយប្រើស្បៃស្អាតសម្អាតពីខាងក្នុងចេញមកក្រៅ
- លាងរបួសនឹងទឹកថ្នាំសម្លាប់មេរោគ
- ធ្វើការរុំរបួសជាមួយនឹងស្បៃចំហុយ ដែលរៀបចំរួច
- ប្រសិនបើជនរងគ្រោះមិនបានចាក់ថ្នាំបង្ការតេតាណូស ត្រូវប្រាប់ជនរងគ្រោះឱ្យទៅមណ្ឌលសុខភាពដើម្បីចាក់ថ្នាំ
- ដុត ឬក៏កប់កាកសំណល់ និងត្រូវលាងដៃនឹងសាប៊ូ។
ក្រៅពីនេះលោកអ្នកក៏គួរតែប្រុងប្រយ័ត្ន ហើយត្រួតពិនិត្យឱ្យទៀងទាត់នូវសញ្ញាឆ្លងរោគក្រហម ការឈឺចាប់ ឡើងដំបៅហើម ការហូរខ្ទុះជាដើម។
2 . របួសធ្ងន់ ៖
របួសធ្ងន់អាចមានដំបៅធ្ងន់ធ្ងរនៅខាងក្នុងខ្លួន (ការហូរឈាមខាងក្នុង ឬការខូចខាតដល់សរីរាង្គ)។ ក្នុងករណីនេះលោក អ្នកជាអ្នកជួយសង្គ្រោះត្រូវមានវិធានការណ៍ជាបន្ទាន់ ដើម្បីជួយសង្គ្រោះ ដោយត្រូវ ៖
- លាងដៃឱ្យស្អាត រួចពាក់ស្រោមដៃ
- គ្របស្បៃរម្ងាប់មេរោគលើដំបៅដោយមិនសង្កត់
- រុំរបួសនឹងក្រណាត់ស្អាត(រាងបីជ្រុង) កុំរឹតឱ្យតឹង ប៉ុន្ដែគ្របបិទឱ្យជិត
- ដាក់ជនរងគ្រោះឱ្យដេក ឬដាក់ជនរងគ្រោះក្នុងជំហរមួយមានផាសុកភាព
- បញ្ជូនជនរងគ្រោះទៅមណ្ឌលសុខភាព ឬមន្ទីរពេទ្យ។
- ប្រសិនបើមានរបួសនៅត្រង់កន្លែងមួយចំនួនដែលធ្វើឱ្យលោកអ្នករអាក្នុងការជួយសង្គ្រោះនោះ សូមលោកអ្នកស្វែងយល់ ពីការសង្គ្រោះដ៏ពិបាក។
3 . របួសធ្លាយពោះ ចេញពោះវៀនមកក្រៅ ៖
- សូមកុំរុញចូល ឬទាញពោះវៀនចេញក្រៅ
- សូមដាក់ជនរងគ្រោះឱ្យដេក និងបញ្ឈរជង្គង់
- ស៊កក្រមាក្រោមចង្កេះជនរងគ្រោះ
- រៀបចំចានទឹកអំបិលស្អាតមួយ
- លាងដៃឱ្យស្អាត និងពាក់ស្រោមដៃ
- យកស្បៃចំហុយផ្សើមទឹកអំបិល ផ្ដិតលើពោះវៀនថ្នមៗ
- យកស្បៃផ្សើមទឹកអំបិល គ្របលើពោះវៀន
- យកចានគោមគ្របពីលើស្បៃ រួចរុំក្រមាពីលើ
- ដឹកជញ្ជូនជនរងគ្រោះក្នុងស្ថានភាពដដែល(បញ្ឈរជង្គង់)ទៅមន្ទីរពេទ្យ។
4 . របួសភ្នែក ៖
- សូមដាក់ជនរងគ្រោះឱ្យដេកផ្ងារ
- សុំឱ្យជនរងគ្រោះបិទភ្នែកទាំងពីរ
- យកស្បៃចំហុយគ្របលើភ្នែករបួស រុំថ្នមៗ។
5 . របួសដោយមានវត្ថុមុតជាប់ ៖
ពេលនោះលោកអ្នកមិនត្រូវដកវត្ថុមុតជាប់ចេញ និងកុំសង្កត់វត្ថុមុតជាប់នោះចុះក្រោម តែទាញស្បែកកន្លែងមុខរបួសមក ផ្អឹបជុំវិញវត្ថុមុតជាប់ និងរុំជុំវិញដោយបង់។
បណ្ដាំផ្ញើ
ប្រសិនបើលោកអ្នកមានការជួយសង្គ្រោះអ្នកដទៃសូមចាំថា ជានិច្ចកាលត្រូវតែលាងដៃនៅពេលមុន និងក្រោយការលាង របួសនៅពេលប៉ះពាល់របួសជាដើម។ ទស្សនាវដ្ដី សុខភាពយើង សង្ឃឹមនិងជឿជាក់ថា លោកអ្នកប្រាកដជានឹងទទួលបាននូវចំណេះ ដឹងពីការជួយសង្គ្រោះនេះ ដើម្បីទុកជាប្រយោជន៍នៅថ្ងៃណាមួយ។
ប្រភព ៖ ទស្សនាវដ្តី សុខភាពយើង លេខ៤១ ខែមិថុនា ឆ្នាំ២០០៩
Leave a Reply