ការកែច្នៃធ្វើច្រមុះជាទីពេញនិយមសម្រាប់លោកអ្នកដែលមានច្រមុះមិនសមនឹងទម្រង់មុខ ឬមិនពេញចិត្ដចំពោះអ្វីដែលខ្លួនមាន។ ការកែច្នៃមានច្រើនរបៀបខុសៗគ្នា ដែលធ្វើឱ្យលោកអ្នកជាពិសេសសុភាពនារីដែលមានបំណងចង់កែទម្រង់ច្រមុះនោះ មានការពិបាកក្នុងការពិចារណាជ្រើសរើស។ ព្រោះថាបើការជ្រើសរើសមិនបានត្រឹមត្រូវ ធ្វើឱ្យលោកអ្នកខាតបង់ទាំងពេលវេលា និង ថវិកាទៀតផង។
ការចាក់ថ្នាំកែច្រមុះ
ជាទូទៅការកែច្រមុះច្រើនធ្វើឡើងទៅលើអ្នកជម្ងឺដែលមានបញ្ហាខ្វះខាតខ្ទង់ច្រមុះ ពោលគឺច្រមុះក្រពឹត មិនមានខ្ទង់ ឬក៏ មានដែរតែមានមិនស្អាត ឬសមចិត្ដជាដើម។ ការចាក់ថ្នាំដើម្បីឱ្យច្រមុះស្រស់ស្អាតត្រូវធ្វើឡើងទៅតាមប្រភេទច្រមុះដែលមានបញ្ហា ដូចជា ៖
- ច្រមុះមិនមានខ្ទង់អាចចាក់ថ្នាំដើម្បីឱ្យច្រមុះមានខ្ទង់ក្នុងកម្រិតមួយសមនឹងទម្រង់មុខរបស់អ្នកកែ
- លោកអ្នកមួយចំនួនមានច្រមុះខុបដូចច្រមុះសេកដោយសាច់ដុំទាញ ហេតុនេះគ្រូពេទ្យត្រូវចាក់ថ្នាំម្យ៉ាងដើម្បីឱ្យសាច់ដុំ នោះរលា ដែលអាចធ្វើឱ្យច្រមុះស្អាតបាន។
សូមលោកអ្នកចងចាំថា ការចាក់ថ្នាំមិនអាចធ្វើឱ្យច្រមុះស្រួច ឬកែស្លាបច្រមុះឱ្យរួមតូចនោះទេ គ្រាន់តែអាចធ្វើឱ្យ ច្រមុះមានខ្ទង់ និងធ្វើឱ្យសាច់ដុំច្រមុះរលាតែប៉ុណ្ណោះ។ ជាទូទៅថ្នាំដែលយកមកប្រើជាប្រភេទថ្នាំដែលនាំចូលមកពីសហរដ្ឋអាមេរិក។ ចំពោះការចាក់ថ្នាំនេះ លោកអ្នកអាចជ្រើសរើសទៅតាមប្រភេទថ្នាំ ដូចជាមានថ្នាំសម្រាប់ប្រើបានរយៈពេល២ឆ្នាំ ៣ឆ្នាំ ឬក៏ថ្នាំខ្លះមាន ប្រសិទ្ធភាពបានមួយជីវិត។
ប្រការគួរប្រតិបត្ដិពេលធ្វើច្រមុះ
លោកអ្នកដែលមានបំណងចង់កែច្រមុះ លោកអ្នកត្រូវមានភាពប្រាកដក្នុងចិត្ដថា លោកអ្នកពិតជាចង់កែ ហើយព្រមទទួលយកអ្វីដែលកើតមានក្រោយពេលកែ។ ម្យ៉ាងទៀតលោកអ្នកក្រោយពេលកែរួចលោកអ្នកត្រូវការពារច្រមុះរបស់អ្នកមិនឱ្យមានការប៉ះទង្គិចរយៈពេល៤៨ម៉ោងយ៉ាងតិច។ បើមានការប៉ះទង្គិចនោះ នាំឱ្យច្រមុះរបស់លោកអ្នកខូចទម្រង់ នាំឱ្យការច្នៃមិនទទួលបានលទ្ធផលល្អ។
ដំបូន្មានអ្នកជំនាញ
ប្រសិនបើលោកអ្នកជាពិសេសដូចជាសុភាពនារីទាំងអស់មានបំណងចង់កែប្រែច្រមុះដើម្បីបង្កើនភាពស្រស់ស្អាតនោះ សូម មានការប្រុងប្រយ័ត្នទៅលើការជ្រើសរើសសេវាកម្មនោះ។ ជាការប្រសើរបំផុតសូមលោកអ្នកទៅរកអ្នកជំនាញពិតប្រាកដ ព្រោះថា បើមានករណីណាមួយកើតឡើង លោកអ្នកមិនត្រឹមតែមិនបានដូចបំណងទេ ថែមទាំងត្រូវប្រឈមមុខនឹងបញ្ហាសុខភាព និងសម្រស់ ទៀតផង។
ប្រភព ៖ ទស្សនាវដ្តី សុខភាពយើង លេខ៤១ ខែមិថុនា ឆ្នាំ២០០៩
Leave a Reply