នាពេលបច្ចុប្បន្ន ភាពជឿនលឿនរបស់ប្រជាពលរដ្ឋទូទៅពិសេសគឺយុវវ័យបានវិវឌ្ឍន៍ទៅរកវប្បធម៌បរទេស ដោយសារតែ ការហូរចូលមកក្នុងសង្គមដែលជឿនលឿន។ ការភ្លើតភ្លើននឹងវប្បធម៌បរទេសនេះបានធ្វើឱ្យយុវជនមួយចំនួនភ្លេចភ្លាំងស្មារតី ពុំដឹង ថាខ្លួនកំពុងធ្វើអ្វី ហើយមិនដឹងថាខ្លួនជាបុគ្គលមួយដែលសង្គមកំពុងតែត្រូវការប៉ុណ្ណានោះទេ។ យុវជនជាកម្លាំងចលករដែលអាចធ្វើ ឱ្យមានការផ្លាស់ប្ដូរជាវិជ្ជមាននៅក្នុងសង្គមនាពេលអនាគត។
ដើម្បីចូលរួមធ្វើការបកស្រាយឱ្យកាន់តែច្បាស់អំពីកាតព្វកិច្ចរបស់យុវជនចំពោះសង្គមជាតិ ទស្សនាវដ្ដី សុខភាពយើង បាន ជួបជាមួយនឹងកញ្ញា ម៉ៅ ពុទ្ធីរ័ត្ន មន្ដ្រីសម្របសម្រួលនៃក្រុមប្រឹក្សាយុវជនកម្ពុជា។
តើយុវជនគួរមានភារៈកិច្ចអ្វីខ្លះចំពោះសង្គម?
នៅកម្ពុជាយុវជនមានអត្រាដល់ទៅ៧០ភាគរយនៃចំណោមប្រជាពលរដ្ឋទូទៅ។ យុវជនគឺជាសសរទ្រូងនៃប្រទេសជាតិ និងសង្គមជាតិ។ សង្គមមួយអាចរីកចម្រើនបានក៏ដោយសារមានការចូលរួមពីយុវជនដែលត្រូវមានភារៈកិច្ចចំពោះសង្គមជាតិ។
1 . ការថែរក្សាវប្បធម៌ប្រពៃណីខ្មែរ ៖ បញ្ហានៅក្នុងសង្គមដែលកើតមានឡើងភាគច្រើនដោយសារតែវប្បធម៌ និង ប្រពៃណី។ វប្បធម៌ប្រពៃណីដែលមានលក្ខណៈល្អផូរផង់ តែបើសិនជាយើងមិនអាចការពារថែរក្សាបាន គឺងាយនឹងធ្វើឱ្យមានផលប៉ះពាល់ពីវប្បធម៌ផ្សេងៗដែលខុសឆ្គងបំផុត។ នៅពេលដែលមានការហូរចូលនៃវប្បធម៌ទាំងនោះ គឺនឹងធ្វើឱ្យសង្គមមានភាពចលាចល និងមានបញ្ហាជាច្រើន រួមមានអំពើអបាយមុខ ល្បែងស៊ីសង និងអំពើហិង្សាជាដើម។ ទាំងអស់នេះធ្វើឱ្យយុវជន មានការភ្លើតភ្លើន និងបណ្ដាលឱ្យបាត់បង់នូវវប្បធម៌របស់ខ្លួន។ ដូចនេះចាំបាច់យុវជនត្រូវតែចូលរួមចំណែកថែរក្សាវប្បធម៌ប្រពៃណី។
2 . ការចូលរួមកសាងក្នុងប្រទេសជាតិ ៖ នេះជាកាតព្វកិច្ចមួយដ៏ចម្បងរបស់ប្រជាពលរដ្ឋ ពិសេសគឺយុវជន ព្រោះយុវជន ជាអនាគតនៃអ្នកបន្ដវេនក្នុងការដឹកនាំប្រទេសជាតិ។ ប្រទេសមានការរីកចម្រើនបាន មិនត្រឹមតែមានការចូលរួមដឹកនាំតែមនុស្ស ចាស់ប៉ុណ្ណោះទេ គឺយុវជនក៏មានតួនាទីយ៉ាងសំខាន់ក្នុងការចូលរួមចំណែកអភិវឌ្ឍន៍ប្រទេសជាតិក្នុងគ្រប់រូបភាពទាំងអស់ ដូចជាការចូលរួមក្នុងសកម្មភាពមនុស្សធម៌ ការងារស្ម័គ្រចិត្ដក្នុងសហគមន៍ ការបង្កើតឡើងគម្រោងតូចៗ ដើម្បីឆ្លើយតបចំពោះសហគមន៍ និងការចូលរួមបញ្ចេញមតិយោបល់ផ្សេងៗ។ ទាំងអស់នេះហើយ ដែលសុទ្ធសឹងតែជាភារកិច្ចក្នុងការចូលរួមចំណែកកសាងសង្គម ជាតិ។
3 . ការសិក្សា និងការប្រកបការងារ ៖ យុវជនដែលមានអាយុក្រោម៣០ឆ្នាំមួយចំនួនកំពុងតែសិក្សា ធ្វើការងារ ឬអាចធ្វើការងារផងសិក្សាផង។ ចំពោះយុវជនដែលធ្វើការងារ គឺត្រូវបំពេញការងារដែលសុចរិតត្រឹមត្រូវ និងសង្គមកំពុងតែត្រូវការក៏ដូចជាខ្លួនឯងផ្ទាល់។ ចំណែកយុវជនដែលកំពុងតែសិក្សា ភារកិច្ចដ៏សំខាន់គឺការខិតខំប្រឹងប្រែងរៀនសូត្រ សង្គមនឹងអាចមានភាពអន្ដរាយ បើសិនជាមិនមានធនធានដើម្បីទៅថ្ងៃអនាគតនោះទេ។ ដូចនេះនេះជាភារកិច្ចដ៏ចម្បងដែលយុវជនត្រូវយកចិត្ដទុកដាក់ក្នុងការសិក្សាអប់រំសម្រាប់ខ្លួនឯងផ្ទាល់ ក៏ដូចជាសង្គមជាតិផងដែរ។ សង្គមមួយដែលពោរពេញទៅដោយអ្នកចេះដឹង ប្រទេស រីកចម្រើន។
ហេតុអ្វីបានជាយុវជនចាំបាច់ចូលរួមក្នុងសង្គមជាតិ?
កុមារជាទំញំងស្នងឫស្សី ឯយុវជនគឺជាអនាគតនៃអ្នកដឹកនាំ។ ការអភិវឌ្ឍន៍ក្នុងសង្គមមួយមិនមែនមានតែការដឹកនាំរបស់ អ្នកដឹកនាំតែម្នាក់នោះទេ គឺចាំបាច់មានការចូលរួមចំណែកគ្រប់ប្រជាពលរដ្ឋទាំងអស់ ទាំងប្រុសស្រី ក្មេងចាស់ និងយុវជន។ ចំណុចសំខាន់នៃការចូលរួមចំណែកក្នុងសង្គមគឺជាប្រយោជន៍មួយសម្រាប់អនាគតរបស់ប្រទេសជាតិ។ បើសិនជាយុវជនមិនបានគិតគូរ និងយកចិត្ដទុកដាក់ក្នុងការជួយសង្គម និងអភិវឌ្ឍន៍ទេ ប្រទេសជាតិនឹងគ្មានសសរទ្រូងដ៏រឹងមាំសម្រាប់កសាងប្រទេសនោះទេ។ យុវជនគឺជាអនាគតនៃអ្នកដឹកនាំ។ យុវជនគឺមានអត្រាច្រើននៃប្រជាពលរដ្ឋខ្មែរទូទៅ ចាំបាច់ត្រូវមានការទទួលខុសត្រូវខ្ពស់ក្នុង សង្គម។
1 . វិធីសាស្ដ្រពីខ្លួនឯង ៖ យុវជនត្រូវយល់អំពីសារៈសំខាន់នៃការចូលរួមរបស់ខ្លួន ព្រោះអាចត្រូវ និងមានផលប្រយោជន៍ អ្វីខ្លះចំពោះខ្លួនឯង គ្រាន់ទុកជាបទពិសោធន៍។ យុវជនត្រូវចេះប្រើវេលាឱ្យបានត្រឹមត្រូវចំពោះរឿងដែលខ្លួនបានធ្វើ។ មិនត្រូវចំណាយ ពេលទៅធ្វើអំពើដែលសង្គមស្អប់ខ្ពើម ដូចជាការប្រើប្រាស់គ្រឿងញៀន និងការប្រព្រឹត្ដអំពើពាលាអាវាសែផ្សេងៗ។ យុវជនត្រូវដឹង ថា សង្គមកំពុងតែជះឥទ្ធិពលទៅលើខ្លួន ដូចនេះយុវជនផ្ទាល់គប្បីត្រូវដឹងថាគួរការពារខ្លួនឯងដូចម្ដេចដើម្បីកុំឱ្យរងការជះឥទ្ធិពល ពីសង្គមនេះបាន។ យុវជនត្រូវចៀសឱ្យឆ្ងាយពីបញ្ហាជាចំណុចអវិជ្ជមានទាំងឡាយ។ យើងមិនត្រូវបណ្ដែតបណ្ដោយឱ្យខ្លួនដើរតាម របត់នៃអំពើដែលប្រាសចាកសីលធម៌ទេ។
2 . វិធីសាស្ដ្រពីសហគមន៍ដែលគេរស់នៅ ៖ ដើម្បីជាវិធីសាស្ដ្រដ៏ល្អសម្រាប់ឱ្យយុវជនចូលរួមក្នុងសង្គម គឺអ្នកដែលស្ថិតនៅ ជុំវិញយុវជនក៏ត្រូវដឹងពីសារៈប្រយោជន៍នៃការចូលរួមក្នុងសង្គមនេះដែរ។ សហគមន៍ត្រូវមានការជំរុញយុវជនចូលរួមចំណែកក្នុងការ ជួយសង្គមជាតិ ដូចជាការងារស្ម័គ្រចិត្ដជាដើម។ ពេលខ្លះយុវជនចាំបាច់ត្រូវការលើកទឹកចិត្ដ ការគាំទ្រ ការផ្ដល់ឱកាស និងការ ជំរុញពីអ្នកដែលនៅជុំវិញខ្លួន។
3 . វិធីសាស្ដ្រពីរាជរដ្ឋាភិបាល ៖ យុវជនត្រូវការចូលរួមដោយសេរី និងការផ្ដល់ឱកាសពីរាជរដ្ឋាភិបាលឱ្យចូលរួមទាំងការ ប្រជុំលើកផែនការសម្រាប់ការអភិវឌ្ឍន៍ និងការចូលរួមក្នុងការសម្រេចចិត្ដ។ ទោះបីជាយុវជនមានឆន្ទៈ និងមានការជំរុញពីអ្នកដែល នៅជុំវិញខ្លួន តែបើសិនជារាជរដ្ឋាភិបាលមិនមានការគាំទ្រ និងបើកចំហក្នុងការផ្ដល់ឱកាសឱ្យមានការចូលរួមធ្វើសេចក្ដីសម្រេចចិត្ដ នោះទេ យុវជនក៏មិនអាចមានឱកាសក្នុងការចូលរួមជួយសង្គមជាតិដែរ។
4 . ការគាំទ្រនូវគំនិតផ្ដួចផ្ដើមរបស់យុវជន ៖ នៅក្នុងការងារអភិវឌ្ឍន៍មិនសំដៅទៅលើការងារធំៗនោះទេ ទោះបីជា ការងារតូចៗមួយចំនួនក៏យុវជនអាចធ្វើទៅបាននៅក្នុងសហគមន៍របស់ខ្លួនផងដែរ ដូចជាការរៃអង្គាសមូលនិធិដើម្បីជួយអភិវឌ្ឍន៍នៅ ក្នុងឃុំសង្កាត់ ឬការធ្វើគម្រោងតូចៗក្នុងសហគមន៍។ ដូចនេះយុវជនចង់ឱ្យមានការសម្របសម្រួល និងការលើកទឹកចិត្ដពីរាជរដ្ឋាភិបាល ក៏ដូចជាអាជ្ញាធរមូលដ្ឋានចំពោះភារកិច្ចដែលបានធ្វើយ៉ាងសកម្មផងដែរ។ មួយវិញទៀត យុវជនត្រូវមានសិទ្ធិបញ្ចេញមតិយោបល់ឱ្យបានច្រើន និងការនិយាយពីតម្រូវការ និងសំណើចំពោះរាជរដ្ឋាភិបាលដែលកំពុងត្រូវការ។
បណ្ដាំផ្ញើ
យុវជនគប្បីចំណាយពេលវេលាចូលរួមក្នុងការងារជួយអភិវឌ្ឍន៍សហគមន៍ ព្រោះនេះក៏ជាផ្នែកមួយនៃការទទួលខុសត្រូវ ចំពោះសង្គម។ ជាមោទនៈភាពមួយដែលយុវជនម្នាក់អាចបង្ហាញឱ្យអ្នកដទៃទៀតបានដឹងថា យុវជនមិនមែនសុទ្ធតែជាអ្នកដែលបង្ក ឱ្យមានបញ្ហានៅក្នុងសង្គមនោះទេ។ ដូចនេះដើម្បីឱ្យមជ្ឈដ្ឋានទូទៅមើលឃើញពីតម្លៃនៃយុវជន គឺយុវជនខ្លួនឯងផ្ទាល់ត្រូវចូលរួមក្នុង សង្គមគ្រប់សកម្មភាពទាំងអស់ ដែលជាប្រយោជន៍សម្រាប់សង្គម និងប្រទេសជាតិរបស់ខ្លួន។
ប្រភព ៖ ទស្សនាវដ្តី សុខភាពយើង លេខ៤០ ខែឧសភា ឆ្នាំ២០០៩
Leave a Reply